Read Northwest Gbaya LEVITIK 9 Bible Online

LEVITIK 9 - Northwest Gbaya bible

LEVITIK 9

¹Tɛ mɔɔrɔ-ɗoŋ-taar zɛ, Moisɛ saa Arɔŋ in o bem kɔ‘i ká bá nɛ̀ o gasawi Israɛl,

²ɓɛɛ a̧ tɔ̧ ha̧ Arɔŋ: «Mɛ̀ bá be-ndai in vala sami nɛ ŋma mɔ ɗaŋ tɛ-wa na, mɛ̀ ɗáfí nɛ sɔ̧ wen ea-ɗaŋmɔ. Mɛ̀ dɔ́ vala sami dɔɔ, ɓɛɛ mɛ ee wa lɛŋ ti GASA WAN.

³Mɛ̀ tɔ̧́ ha̧ o be Israɛl‘e nde: ‹Ɛ̀nɛ̀ bá vala gbadua ɗafi nɛ sɔ̧ wen ea-ɗaŋmɔ, in be ndai ká bá nɛ̀ be-sami nɛ a̧a̧ nɛ pɛ kpɔk, nɛ ŋma mɔ ɗaŋ tɛ-wa na, wen dɔa-a.

⁴Ɓɛɛ ɛ̀nɛ̀ bá wiwii-ndai in vala sami wen ɗafa-sɔ̧-gaŋmɔ ti GASA WAN, in ŋma ha̧a̧mɔ nɛ‘i vata nɛ nɔ̧́, wen nɛ́ sɔsɔɔ a̧ GASA WAN tɛ usi tɛ h’ɛ́nɛ́.› »

⁵Wa kaia mɔ nɛ Moisɛ tɔ̧ɔ̧ nɛnɛ‘i si nú Tua-kpa-ŋmaa, ɓɛɛ giiwi mɔi̧ yor ti GASA WAN.

⁶Nɛ mɔ'ɔ nɛ Moisɛ tɔ̧ɔ̧ ha̧ wa: «Mɔ nɛ GASA WAN tɔ̧ɔ̧ h’ɛ́nɛ́ mɛ de, ha̧ a̧ mɛ usi gasamɔ kɔ̧-a̧ h’ɛ́nɛ́ nɛ mɔ‘i.»

⁷A̧ tɔ̧ɔ̧ ha̧ Arɔŋ: «Mɛ̀ ɗɔ́ŋ pii ká̧ fara-ɗafi-sɔ̧, mɛ̀ ɗáfí sɔ̧ wen kpaa ea-ɗaŋmɔ kɔ-mɛ in mɛ̀ dɔ́ kpoo-sɔ̧ ha'i mɛ de mɔ nɛ usi ea-ɗaŋmɔ zu mɛ in zu dukbíí, ɓɛɛ mɛ̀ há̧ ha̧a̧mɔ ko dukbíí mɛ̀ dé mɔ nɛ usi ea-ɗaŋmɔ zu wa, hee mɔ'ɔ nɛ GASA WAN tɔ̧ɔ̧ ga.»

⁸Arɔŋ ɗɔŋa pii ká̧ fara-ɗafi-sɔ̧, ɓɛɛ a̧ gɔn be-ndai, ɗafi nɛ sɔ̧ wen kpaa ea-ɗaŋmɔ kɔ̧-a̧.

⁹O bem ko Arɔŋ ha̧a̧ tɔk ha̧ a̧; a̧ pi̧i̧ ndɔŋ nu zɔ̧ɔ̧ er-a ɗɔɔ tɔk'i sɔ̧ tɛ o zak nɛ duk fara-ɗafi-sɔ̧‘i, ɓɛɛ a̧ gbai oi tɔk-aa a gun fara-ɗafi-sɔ̧.

¹⁰A̧ dɔɔ nɔ̧́-kpoo'i sɛn fara-ɗafi-sɔ̧ in o gbaazaa-a ká bá nɛ̀ nu-see-aa hee mɔ'ɔ nɛ GASA WAN tɔ̧ɔ̧ so ha̧ Moisɛ ga.

¹¹A̧ dɔɔ oi kpoo-aa in ndàrá-a sɛn ɗoŋ ye.

¹²A̧ gɔna saɗi nɛ‘i tɛ dɔ‘i, ɓɛɛ o bem kɔ̧-a̧ ba tɔk-aa nɛnɛ ha̧ a̧ mɛ misi̧ a ɗoŋ fara-ɗafi-sɔ̧.

¹³Wa kaia tɛ saɗi'i n'aa tɛ dɔ‘i nɛnɛ ha̧ a̧ in zu-a mbɛt, ɓɛɛ a̧ dɔ wa lɛŋ sɛn fara-ɗafi-sɔ̧.

¹⁴A̧ fɔra zaŋ-aa in mbayo-a, ɓɛɛ a̧ dɔ sɛn fara-ɗafi-sɔ̧ gu nɛ kpoo n'aa tɛ dɔ‘i.

¹⁵Ɗoŋ mɔ‘i, a̧ ha̧a̧ o ha̧a̧mɔ ko dukbíí ha̧ Sɔ̧; a̧ baa vala gbadua ha̧a̧mɔ wen ɗaŋmɔ kɔ-wa gɔn ɗafi nɛ sɔ̧ hee mɔ'ɔ n'aa dee nɛ be-ndai ga.

¹⁶A̧ baa kpoo-sɔ̧ ɗafi nɛ sɔ̧ nɛ yuwar-a.

¹⁷A̧ baa ha̧a̧mɔ nɛ nyɔnɔ; a̧ kaia dun er-a, ɓɛɛ a̧ dɔ sɛn fara-ɗafi-sɔ̧, e zu kpoo-sɔ̧ mɛ tutuyɛ.

¹⁸Arɔŋ gɔna wiwii-ndai in vala sami nɛ dukbíí ha̧a̧‘i nɛ ha̧a̧mɔ-gaŋmɔ; o bem kɔ̧-a̧ ha̧a̧ tɔk-aa ha̧ a̧, ɓɛɛ a̧ misi̧ a ɗoŋ fara-ɗafi-sɔ̧.

¹⁹War de nɔ̧́-kpoo ndai in vala sami'i, dom-aa, nɔ̧́ zu zaŋ-aa, o gbaazaa-a in nu-see-aa,

²⁰wa kaia a zu tote-a, ɓɛɛ wa dɔ zu fara-ɗafi-sɔ̧.

²¹Arɔŋ ha̧a̧ tote saɗi nɔ‘i in ku-wa mɛ wiiko, ɓɛɛ a̧ wɛk ti GASA WAN hee mɔ'ɔ nɛ Moisɛ baa tɔ̧ ga.

²²Arɔŋ nyɛi̧a er zu dukbíí, ɓɛɛ tok de yoŋgo zu wa. Ɗoŋ nɛ Arɔŋ kaɗa ɗafa-sɔ̧ wen kpaa ea-ɗaŋmɔ, wan mɛ dɔɔ-kpoo-sɔ̧, in ɗafa-sɔ̧-gaŋmɔ, a̧ nyɛi̧a er-a zu dukbíí, tok de yoŋgo zu wa, ɓɛɛ zir.

²³Moisɛ in Arɔŋ yee kɔ̧ Tua-kpa-ŋmaa, ɓɛɛ gbo woyo mɛ tok de yoŋgo zu dukbíí. Ɓɛɛ gasamɔ ko GASA WAN usi tɛ ha̧ dukbíí lɛŋ;

²⁴nɛ mɔ'ɔ nɛ ŋma wee gɔma nɛ tɛ GASA WAN, ɓɛɛ dɔ kpoo-sɔ̧ in nɔ̧́-kpoo sɛn fara-ɗafi-sɔ̧. Dukbíí nɛ oi-aa lɛŋ zɔka mɔ‘i, ɓɛɛ wa gai mɔ nɛ desee gbɛ nɛ zugur-wa nu.