Read Northwest Gbaya JEREMII 1 Bible Online

JEREMII 1 - Northwest Gbaya bible

JEREMII 1

¹Wen’ɛ nɛ́ wen ko Jeremii, bem ko Hilkia, ŋma wi-ɗafi-sɔ̧ nɛ̀ duka so saaye Anatot, nù ko Bɛnjamin.

²GASA WAN tɔ̧ɔ̧ wen ha̧ Jeremii ŋgimbi wan ko Josias, bem ko Amɔŋ wannu Juda tɛ ɓu-zua-taar pɛ-wan kɔ̧-a̧.

³GASA WAN tɔ̧ɔ̧ wen ha̧ a̧ woyo tɛ ŋgimbi ko Joakim, bem ko Josias wannu Juda, hɔ nɛnɛ tɛ mɔɔrɔ fio-zɛ tɛ ɓu-zua-kpɔk pɛ-wan ko Sedesias, ŋma ɓii bem ko Josias wannu Juda. Nɛ́ ŋgimbi'i a̧ wa kaia nɛ̀ o bíí Jerusalɛm yaknɛ nɛ̀ bara-biro.

⁴Wen nɛ GASA WAN tɔ̧ɔ̧ ha̧‘m nɛ mɔ'ɔ:

⁵«Nɛti ká nàà kɔ-mɛ tɛ ba zaŋ mɛ hɔ̧ɔ̧ na, mi iŋa so mɛ kaɗi. Nɛti ha̧ wa mɛ ko mɛ, mi hoka so mɛ kaɗi mbɛt; mi ee mɛ nɛ̀ wi-tɔ̧-wen oi nú‘m zu o tugun bíí.»

⁶Ɓɛɛ mi kifi nú: «Ho! Gasa Wan Sɔ̧, mi tɛ iŋ yuwar tɔ̧ɔ̧-wen hɔ̧ɔ̧ na, wen mi ɓɔna nɛ́ obem!»

⁷Ɓɛɛ GASA WAN tɔ̧ ha̧‘m: «Ká mɛ́ tɔ̧‘e, mɛ́ ɓɔna nɛ́ obem na! Fara lɛŋ n'am tɛ tom mɛ si sɛnɛ, kɔ-mɛ nɛ́ nɛa-a; mɔ lɛŋ n'am tɛ tɔ̧ ha̧ mɛ, kɔ-mɛ nɛ tɔ̧a-a ɓɛɛ mbɛt.

⁸Ká mɛ́ de kíí bíí na. Mi tɛ yor ɗoŋ mɛ, wen kpasa mɛ. GASA WAN tɔ̧ɔ̧ hegɔ!»

⁹GASA WAN nyɛi̧a er, tam nú‘m, ɓɛɛ tɔ̧ ha̧‘m: «Mi ee wen kɔ‘m sɛn kɔ̧̀ nú-mɛ́.

¹⁰Mɛ̀ íŋ sɔsɔɔ‘i'e mi ha̧a̧ ŋgai ha̧ mɛ zu o tugun bíí in o mɔɔ-wan, wen zuɗa mɔ yinɛ in ira mɔ a nù, wen gbina mɔ in ɗaŋa-a, wen mboo mɔ in guna mɔ mbɛt.»

¹¹GASA WAN tɔ̧ɔ̧ ha̧‘m: «Jeremii, nɛ́ ge mɔ ge a̧ mɛ zɔk ge?» Ɓɛɛ mi kifi nú: «Nɛ́ gbaa-er te[1] nɛ̀ waia a̧‘m zɔk.»

¹²Ɓɛɛ GASA WAN tɔ̧ ha̧‘m: «Mɛ zɔka mɔ‘i sa̧ yí-mɛ́! Mi tɛ yor ɗoŋ wen kɔ‘m wen ha̧ wen kɔ‘m mɛ hɔ gba̧a̧!»

¹³Nɛ́ mɔ'ɔ nɛ̀ GASA WAN tɔ̧ɔ̧ wen ha̧‘m war yiitoo-aa woyo: «Nɛ́ ge mɔ ge a̧ mɛ zɔk ge?» Ɓɛɛ mi kifi nú: «Nɛ́ gba kpánà a̧ duk tɛ wee nɔi̧ nɛnɛ ɓɛɛ nú-a wɛr pii tɛ‘m nɛ̀ war ká̧-zan-mɛ́-ŋgɔn.»

¹⁴Ɓɛɛ GASA WAN tɔ̧ ha̧‘m: «Ŋgamɔ tɛ tɛ nɛ̀ war ká̧-zan-mɛ́-ŋgɔn mɛ tik zu o bíí nù'ɛ.

¹⁵Mi tɛ sa o bíí nú-gara tɛ mɔɔ-wan mɛ ká̧-zan-mɛ́-ŋgɔn tɛnɛ lɛŋ; GASA WAN tɔ̧ɔ̧ hegɔ. O wi nɔ‘i a̧ tɛ‘i; wa tɛ a o gado-wan kɔ-wa dam nú o garo yea-a si Jerusalɛm; wa tɛ kɛr garo Jerusalɛm kpa nú ŋmaa, ɓɛɛ wa bìì o gasa ye nù Juda lɛŋ.

¹⁶Mi tɛ gɔn kita zu o bíí Juda wen ɗaŋmɔ nɛ̀ wa dea: wa ea'm duk, ɓɛɛ wa dɔ kpoo-sɔ̧ ɗafi nɛ̀ o ŋma sɔ̧, gbɛ nɛ̀ zugur ti o mɔ nɛ̀ wa dee nɛ̀ er, gasi nɛ̀ wa mbɛt.

¹⁷Ɓɛɛ war kɔ-mɛ, mɛ̀ hɛ́r zaŋ-mɛ, mɛ̀ kúr, ɓɛɛ mɛ̀ tɔ̧́ mɔ lɛŋ n'am tɛ tɔ̧ ha̧ mɛ ha̧ wa; ká kíì de mɛ ti wa na, wen ká‘m tɛɛ pi̧ kíì tɛ-mɛ sɛn ti wa.

¹⁸Ku̧u̧naŋ-a sɔsɔɔ‘i, mi dee mɛ nɛ̀ ŋgaya-a hee ŋma ŋga-fara ga, hee mbiŋ-boi in ŋgárá-ndɛrɛ ga sɛn yí o bíí nù Juda nɛ̀ oi-aa lɛŋ, in o wannu, o gasawi, o wi-ɗafi-sɔ̧ kɔ-wa ká bá nɛ̀ o be-nù‘i lɛŋ.

¹⁹Wa tɛ kur zu mɛ, ɓɛɛ ŋma mɔ nɛ wa tɛ de in mɛɛ bo na, wen mi a̧a̧ ɗoŋ mɛ wen kpasa mɛ. Nɛ́ mi GASA WAN a̧ tɔ̧ wen’ɛ!»