Read Northwest Gbaya JEREMII 10 Bible Online

JEREMII 10 - Northwest Gbaya bible

JEREMII 10

¹Ɛ́nɛ́, o be Israɛl, ɛ̀nɛ̀ zíí mɔ nɛ̀ GASA WAN tɔ̧ zu'nɛ́'ɛ!

²Wen n'aa tɔ̧ nɛ́ mɔ'ɔ: «K’ɛ́nɛ́ zɔk ɗoŋ mɔ ko o tugun bíí de nɛ̀ k’ɛnɛ na! K’ɛ́nɛ́ de kíì o mɔɔ-usi-mɔ mɛ yiwese na! Mɛ̀ nɛ́ o tugun bíí a̧ dé kíì o mɔɔ nɔ‘i ɛ̧.

³Ɓɛɛ yuwar deemɔ ko o dukbíí sa̧ na; wa nɛ́ɛ̀ gɔm te sɛn kɔ̧ kombo, ɓɛɛ wi-sɛk-te sɛka;

⁴wa yɔka ɗoŋ-aa nɛ̀ bu-mbɔi in lɔr, ɓɛɛ wa tɛɛ mgboi nɛ̀ o pɔndi ba zu̧ ŋgɔn, n'aa beka fo tɛ na.

⁵O géé-sɔ̧ nɔ‘i ya hee o nàá-nduŋ-tunyuŋ-ndak-nɔ̧́í̧, nɛ̀‘i ga̧i̧ kpɛɛfɔ'ɛ ga. Wa tɔ̧ wen na, wa nɛ nɔ na mbɛt, kànà nɛ́ tuia wa. Ká kíì dee'nɛ́ na, wen ŋma ŋgamɔ nɛ̀ wa tɛ de sitɛ‘nɛ́ bo na, kà bó nɛ̀ gbaka ɛnɛ na mbɛt.»

⁶Ŋma bíí mɛ nyɛm ŋmaa in'nɛɛ bo na, GASA WAN! Ɛ́nɛ́ nɛ́ gasamɔ, ɓɛɛ nin'nɛ́ nɛ́ zɔm gasamɔ mbɛt wen ŋgai k’ɛnɛ!

⁷Wan ko o tugun bíí, nɛ́ o'o beka yu'nɛ́ na o? Zɔnamɔ nɛ́ k’ɛnɛ kpoo nɛ kpoo. Mgbara o wi-iŋ-mgbara-mɔ nɛ̀ ya poo o tugun bíí in tɛ o mɔɔ-wan lɛŋ, ŋma wi nɛ̀ nyɛma ŋmaa in'nɛɛ bo na.

⁸O wi-iŋ-mgbara-mɔ kɔ-wa lɛŋ nɛ́ o géé tum bíí, zu-wa dam na, wen nɛ̀ wa kpaa usamɔ kɔ-wa tɛ mɔ ko géé-sɔ̧.

⁹O géé-sɔ̧ nɔ‘i nɛ́ bu-mbɔi nɛ‘i duia ba tɛnɛ nɛ̀ Tarsis, ɓɛɛ lɔr tɛ kɔ‘i nɛ̀ Ufaz mɛ, nɛ̀ o wi-sɛk-mɔ in o wi-dui-mɔ ɗafa, ɓɛɛ wa pi̧ o tu̧ laa in gbɛ̧ laa mbɛt tɛ wa. Mɔɔ nɔ‘i lɛŋ nɛ́ tom ko o kpasa wi-iŋ-tom.

¹⁰Ɓɛɛ GASA WAN Sɔ̧ nɛ́ kpasawen nɛ̀ mbetɛ; a̧ nɛ́ Sɔ̧ nɛ́ duk kpasa, wannu nɛ̀ duk kpoo nɛ kpoo. Kà a̧ de nyimsea, ɓɛɛ nù naka, ɓɛɛ o tugun bíí nyɛm mɛ ya ɗɔɔ tu̧u̧-see kɔ̧-a̧ na.

¹¹Mɔ n’ɛnɛ tɛ tɔ̧ ha̧ wa nɛ mɔ'ɔ: «O sɔ̧ nɔ'ɔ nɛ̀ bó nɛ́ wa a̧ dee yiwese in nù na’ɛ, a̧ yámbálí ɓɔn zu nù ɗɔɔ yiwese’ɛ.»[12]

¹²GASA WAN dee nù tɛ ŋgai kɔ‘i; a̧ dee o mɔ zu nù lɛŋ tɛ iŋa-mgbara-mɔ kɔ̧-a̧; a̧ tata o yiwese tɛ iŋamɔ kɔ̧-a̧.

¹³Nɛ́ à̧ à̧ ha̧ nú, ɓɛɛ o yi mɔi̧a ŋmaa sɛn yiwese mɛ, ɓɛɛ o tura-zan daŋa nɛ̀ ndaa-zan, o pi̧i̧-kórò dee ha̧ kórò mɛ hɔ, ɓɛɛ o búk gbo nɛ̀ fara kɔ‘i mɛ tɛnɛ mbɛt.

¹⁴O bíí lɛŋ sakala tɛ mɔ‘i, wa iŋ mgbara-a na; ziimɔ baa o wi-ɓu o géé-sɔ̧ zu o mɔ nɛ̀ wa dea, wen o mɔɔ nɔ‘i bó nɛ́ kpasamɔ na, wen nɛ̀ ɔmi bó tɛ-wa na.

¹⁵Mɔɔ nɔ‘i nɛ́ o géé tum-mɔ, nɛ́ mɔɔ-mami; ŋgimbi kita ko Sɔ̧, wa tɛ kum lɛŋ.

¹⁶Ɓɛɛ nɛ̀ ko Sɔ̧, Dua-see Jakob,[13] bo hee wa ga na; a̧ nɛ́ wan nɛ̀ dee mɔ lɛŋ, ɓɛɛ Israɛl nɛ́ dukbíí nɛ̀ duk nɛ́ mɔɔ-oi kɔ̧-a̧; nin-a nɛ́ GASA WAN, wan nɛ̀ a̧a̧ nɛ̀ ŋgayamɔ lɛŋ.

¹⁷Ɛ́nɛ́ o bíí Jerusalɛm, biro kɛra'nɛ́ kaɗi, ɛ̀nɛ̀ hɛ́r tui k’ɛnɛ.

¹⁸Wen nɛ̀ GASA WAN tɔ̧ nɛ́ mɔ'ɔ: «Kinii mi tɛ pɛsi o bíí zu nù'ɛ a taŋ, mi tɛ nasi wa ká mɔ tɛ̀ɛ́ hɔ yɔɔ zu wa.»

¹⁹«Oee mi wa! Ɛ̧ɛ̧ nɛ́ ge ŋgayamɔ ge! Da̧i̧ kɔ‘m bo nɛ́ da̧i̧ wìì na. Kɔ‘m mi'e: bɔnɛ kɔ‘m a̧‘i, mi tɛ tui nɛ́ tuia-a.

²⁰Tua-laa kɔ‘m ɗaŋa! O nyak-aa lɛŋ ŋmana yinɛ! O bem kɔ‘m in o mɔ-dai kɔ‘m lɛŋ kuma; ŋma bíí kpɔk mɛ ba tua-laa kɔ‘m e ŋgɔn bo na, ŋma bíí kpɔk mɛ ɗafi fara-duk kɔ‘m woyo bo na mbɛt.»

²¹O wi-dai-mɔ dee mgbélé mɔ; wa kii GASA WAN na. Mɛ̀ nɛ́ hegɔ sa wa de tom kɔ-wa sa̧ na, ɓɛɛ wa e o mɔ-dai yambali.

²²Ɛ̀nɛ̀ zíí ŋga nyɛrɛ mɔ'ɔ: mɛ̀ nɛ́ ŋma ŋgamɔ a̧ de mɔ tɛnɛ nɛ̀ war ká̧-zan-mɛ́-ŋgɔn mɛ́ tɛ̀ɛ́ ɗaŋ o ye nù Juda lɔkɔti-lɔkɔti kifi ŋga-gbárà, fara-yaa kɔ o gba-toyo.

²³GASA WAN, mi iŋa, bíí bó nɛ́ wan-zɔk-yuwar kɔ‘i nɛ̀ tɛ-wi na; wi-nɛ-nyɛi̧a-nɔ̀ bó nɛ̀ ŋgai mɛ zɔk naŋanɔ kɔ‘i nɛ̀ tɛ-wi nɛ̀ de-a na.

²⁴Ɛ̀nɛ̀ úsí mɔ ha̧‘m, GASA WAN, ɛ̀nɛ̀ úsí mɔ ha̧‘m nɛ̀ ga̧a̧-see, ɓɛɛ bó nɛ́ sɛn tɛ nyimsea na, wen ká‘m tɛɛ fe.

²⁵See'nɛ́ a̧ ɗáŋ zu o wi nɛ̀ iŋ‘nɛ́ na'i, in zu o dukbíí nɛ̀ ɗafi'nɛ́ na mbɛt'i, wen wa kɛra o bezaŋ Jakob kum nɛ̀ wa, ɓɛɛ ɗaŋ o mɔɔ-nù kɔ-wa lɛŋ.