Read Northwest Gbaya JEREMII 11 Bible Online

JEREMII 11 - Northwest Gbaya bible

JEREMII 11

¹Wen nɛ̀ GASA WAN tɔ̧ɔ̧ ha̧ Jeremii nɛ́ mɔ'ɔ:

²«Ɛ̀nɛ̀ zíí gba̧a̧ wen nɔɔ-tɔk'ɛ.» Ɓɛɛ a̧ tɔ̧ woyo'e, «Wen nɛ̀ mɛ tɛ tɔ̧ ha̧ o be Juda in o bíí Jerusalɛm nɛ́ mɔ'ɔ.

³Mɛ̀ tɔ̧́ ha̧ wa'e ndé: GASA WAN Sɔ̧ ko Israɛl tɔ̧a'e: Bɔnɛ tɛ tik zu o bíí nɛ̀ mbo zu tɛ yuwar nɔɔ-tɔk'ɛ na.

⁴Nɔɔ-tɔk‘i, mi nɔɔ so in o zɔmdaa k’ɛnɛ ŋgimbi n'am kaia so nɛ wa gbonɛ nɛ ŋga-fara-bɔnɛ nú Egiptɛ, ɓɛɛ mi tɔ̧ ha̧ wa'e: Ɛ̀nɛ̀ zíí wen nú‘m, ɓɛɛ ɛ̀nɛ̀ dé mɔ lɛŋ n'am tɔ̧ h’ɛnɛ‘i; hegɔ, ɛ́nɛ́ tɛ ya nɛ́ dukbíí kɔ‘m, ɓɛɛ mi tɛ duk nɛ́ Sɔ̧ k’ɛnɛ.

⁵Hegɔ, mi tɛ kasi ha̧a̧nú n'am ha̧a̧ so ha̧ o zɔmdáa k’ɛnɛ, tɔ̧ nɛnɛ‘e, mi tɛ ha̧ nù nɛ̀ yibere in gɔrɔ fok sɛnɛ ha̧ wa sɔsɔɔ.» Ɓɛɛ mi kifi nú: «Mɔ a̧ dé hego GASA WAN!»

⁶GASA WAN tɔ̧ɔ̧ ha̧‘m woyo: «Mɛ nɛ́ɛ̀ tɔ̧ nú-wen’ɛ dam o ye Juda gú nɛ̀ o mgbara kira Jerusalɛm lɛŋ hee mɔ'ɔ ga: Ɛ̀nɛ̀ zii gba̧a̧ wen nɔɔ-tɔk'ɛ, ɓɛɛ ɛ̀nɛ̀ kásí yuwar-a nɛ̀ de-a.

⁷Mi aia so nú ha̧ o zɔmdáa k’ɛnɛ, ku̧u̧naŋ-a nɛ̀ ŋgimbi n'am kaia so nɛ̀ wa daŋnɛ nɛ̀ Egiptɛ hɔ sɔsɔɔ‘i ndé, wa a̧ zíí wen nú‘m. Mi mbɔi tɛ aia nú, tɔ̧ nɛ̀ wen'i ha̧ wa na.

⁸Ɓɛɛ bo nɛ wa zia wen nú‘m na, wa yeŋ zer tɛ wen'i na mbɛt. Wa duka tɛ dee ɗaŋ ŋgazu kɔ-wa siti nɛnɛ. Mɛ̀ nɛ́ hegɔ mi dee ŋgamɔ in wa zu yuwar nɔɔ-tɔk n'am ha̧a̧ so nú sɛnɛ ha̧ wa, ɓɛɛ ká wa mbo zu sɛnɛ na'i.»

⁹GASA WAN tɔ̧ɔ̧ ha̧‘m woyo: «O be Juda in o bíí Jerusalɛm ee nú in o ŋmaa.

¹⁰Wa sii ɗoŋ tɛ kale ɗaŋmɔ ko o zɔmdáa kɔ-wa nɛ̀ bɛ̧ɛ̧ so zia wen nú‘m; ɓɛɛ nɛ́ mɔ'ɔ nɛ̀ wa mbɛt tɛɛ zik tɛ, nɛ́ ɗoŋ o ŋma sɔ̧, ɗafi nɛ̀ wa. Nɛ́ hegɔ a̧ o be Israɛl in o be Juda gbina nɛ̀ nɔɔ-tɔk n'am nɔɔ so in o zɔmdaa kɔ-wa.»

¹¹Ɓɛɛ GASA WAN tɔ̧ ha̧‘m woyo: «Kinii, mi tɛ fo ŋgamɔ nɛ̀ wa beka gbo ɗɔɔ-aa na pi̧ zu wa; wa tɛ sa'm mɛ gbak wa, ɓɛɛ mi beka pi̧ nú‘m tɛ-wa na.

¹²O bíí saaye Juda in o bíí Jerusalɛm tɛ nɛ̀ɛ́ ai nú ha̧ o géé-sɔ̧ nɛ̀ wa ɗafi so, ɓɛɛ o sɔ̧ nɔ‘i nyɛm mɛ kpasi wa tɛ ŋgimbi-bɔnɛ‘i na.

¹³Ho! Juda, o sɔ̧ kɔ-mɛ dɔka nyɛm nɛ̀ ɗoŋ o ye kɔ-mɛ lɛŋ, ɓɛɛ o fara-dɔ-kpoo-sɔ̧ Bal[14] dɔka dam mgbara kira Jerusalɛm lɛŋ!

¹⁴Ɓɛɛ kɔ-mɛ Jeremii, ká mɛ́ ye ɗoŋ o wi nɔ'ɔ ɓɔna! Ká mɛ́ ai nú mɛ wen wa ɓɔna mbɛt! Ŋgimbi nɛ̀ wa bé tɛ̀ɛ́ sa'm tɛ ŋgimbi-bɔnɛ kɔ-wa, mi beka pi̧ nú‘m tɛ-wa na.»

¹⁵GASA WAN'e: «Nɛ́ ge a̧ o yaa-dua-see-am nɔ'ɔ tɛ mɛ de kɔ̧́ Tua kɔ‘m ge? Yuwar deemɔ kɔ-wa ɔ yukuta! O ha̧a̧nú in o kpoo-sɔ̧ nyɛma mɛ fo bɔnɛ yinɛ zu wa nde? Mɛ̀ nɛ́ hegɔ a̧ wa tɛ yu nɛ̀ ɗɔɔ-aa nde?

¹⁶Nin nɛ̀ GASA WAN ha̧a̧ so ha̧ wa nɛti nɛ́ ‹De da̧a̧ te-nɔ̧́ nɛ̀ o waya-a dé ha̧ a̧ mɛ duk nɛ́ gba demɔ.› Ɓɛɛ tɛ zɔm giti mɔ, mi pi̧i̧ wee tɛ da̧a̧ wa̧a̧-a̧, ɓɛɛ o gbaa-er-a gbin a nù.»

¹⁷Mɛ̀ nɛ́ GASA WAN nɛ̀ a̧a̧ nɛ̀ ŋgayamɔ lɛŋ, nɛ̀ guna mɛ́, a̧ pi̧ bɔnɛ zu mɛ wen ɗaŋmɔ nɛ̀ o be Juda in o be Israɛl dea. Wa tu̧u̧ see-aa tɛ dɔɔ o kpoo-sɔ̧ ha̧ Bal.

¹⁸Ŋgimbi nɛ̀ GASA WAN wee nɛ̀ ɗoŋ mɔ kɔ-wa ha̧‘m, ɓɛɛ n'am zia mgbara mɔ‘i kaɗi, mi kpaa ndaa yuwar deemɔ kɔ-wa.

¹⁹Mi duka so hee be-sami nɛ̀ a̧a̧ nɛ̀ mboozu, nɛ̀‘i mgbɔ si fara-gɔn-saɗi ga; mi iŋ so kɔ‘m'e, o ɗaŋ keta nɔ‘i kɔ-wa'i lɛŋ zɔk nɛ‘m na. Wa tɔ̧a'e: «Ɛ̀ɛ̀ gɔ́m te’ɛ ŋgimbi n'aa biti nɛ̀ tɔra’ɛ, ɛ̀ɛ̀ fó a̧ yinɛ tɛ nù ko o wi-duk-kpasa, ká‘i zii nin-a ɓɔna!»

²⁰GASA WAN nɛ̀ a̧a̧ nɛ̀ ŋgayamɔ lɛŋ, nɛ́ ɛ́nɛ́ a̧ ɔ wan nɛ̀ yuwar-a, zɔk nɛ̀ taamɔ ko o bíí; mi tɛ zɔk kifa-er n’ɛnɛ tɛ kifi ha̧ wa, wen mɔ kɔ‘m lɛŋ, mi ee er'nɛ́.

²¹Wen nɛ̀ GASA WAN tɔ̧ ha̧ o bíí Anatot nɛ̀ kɔ̧ɔ̧ mɛ gbɛ Jeremii tɔ̧ nɛnɛ‘e: «Kà mɛ e tɔ̧ɔ̧ wen nɛ̀ nin GASA WAN duk na, mɛ tɛ fe er yɛ,» wó‘i, nɛ́ mɔ'ɔ.

²²GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: «Mi tɛ de ŋmaa in wa; o be-ŋgaiwi kɔ-wa tɛ fe nɛ́ fio gba-paa, ɓɛɛ o bem in o boko-bem kɔ-wa tɛ kum tɛ kaɓa.

²³Mi tɛ pi̧ ŋgamɔ zu o be Anatot ŋgimbi kita kɔ-wa mɛ kum wa lɛŋ nɛ̀ oi gun.»