Read Northwest Gbaya JEREMII 13 Bible Online

JEREMII 13 - Northwest Gbaya bible

JEREMII 13

¹Mɔ nɛ̀ GASA WAN tɔ̧ɔ̧ ha̧‘m nɛ́ mɔ'ɔ: «Mɛ̀ nɛ́ɛ̀ hí̧fí kanda yɛ́m-yɛ́m zɔ̧-laa, a̧ mɛ̀ már guntir-mɛ, ɓɛɛ ká mɛ pi̧ a̧ ɗɔɔ yì na.»

²Ɓɛɛ nɛ́ mɔ'ɔ n'am hi̧fa kanda nyɛm nɛ̀ ɗoŋ wen ko GASA WAN, ɓɛɛ mi mar guntir-am.

³GASA WAN tɔ̧ɔ̧ ha̧‘m woyo:

⁴«Mɛ̀ nɛ́ sɛn Pɛrat nɛ̀ oi kanda nɛ̀ mɛ mara guntir-mɛ‘i, ɓɛɛ mɛ̀ hú̧sí kanda'i mgbara ta.»

⁵Mi baa kanda'i nɛ́ɛ̀ hu̧si sɛn Pɛrat hee mɔ'ɔ nɛ̀ GASA WAN tɔ̧ɔ̧ ha̧‘m ga.

⁶Ɗoŋ dɔka zɛ, GASA WAN tɔ̧ɔ̧ ha̧‘m woyo: «Mɛ̀ sí ɗoŋ sɛn Pɛrat, ɓɛɛ mɛ̀ bá kanda n'am tɔ̧ɔ̧ so mɛ hu̧si hi̧i̧‘i.»

⁷Nɛ́ mɔ'ɔ n'am sii ɗoŋ si Pɛrat, fara n'am hu̧sa̧ so kanda'i sɛnɛ‘i mɛ ba. Ɓɛɛ kanda'i ɗaŋa mbɔr lɛŋ, ŋma mɔ nɛ̀‘i tɛ de nɛnɛ bo na.

⁸Ɓɛɛ GASA WAN tɔ̧ ha̧‘m'e:

⁹«Wen kɔ‘m nɛ́ mɔ'ɔ: Nɛ́ hegɔ a̧‘m tɛ ɗaŋ nɛ̀ mɔɔ-duk-tɛ ko Juda, nɛ̀ duk nɛ́ zak-duk-tɛ ko Jerusalɛm mbɛt yinɛ.

¹⁰O wi nɔ'ɔ nɛ́ o gba wi-ŋgazu nɛ̀ zii wen nú‘m na, nɛ̀ ɓɔn tɛ dee ŋgazu, nɛ̀ nɛ́ ɗoŋ o ŋma sɔ̧, gasi nɛ̀ wa, gu nɛ̀ nù ti wa. Wa à̧ kífí duk hee kanda’ɛ nɛ̀ beka de ŋma mɔ ɓɔna’ɛ ga!

¹¹Nɛ́ mi GASA WAN, a̧ tɔ̧ wen’ɛ: Mi hɛra so o be Israɛl in o be Juda lɛŋ tɛ‘m hee mɔ'ɔ nɛ̀‘i mar nɛ̀ kanda guntir-wi’ɛ ga, wen ha̧ wa mɛ ya dukbíí kɔ‘m, nɛ̀ tɛ gɔn foe yí‘m, mɛ ba nin-am e ŋgɔn, in ha̧ wa mɛ duk hee mɔɔ-ɗafi-tɛ kɔ‘m ga mbɛt wó, ɓɛɛ wa kɔ̧ mɛ zii wen nú‘m na.»

¹²Mɛ̀ nɛ́ɛ̀ tɔ̧ ha̧ wa'e ndé: «Mɔ nɛ̀ GASA WAN Sɔ̧ ko Israɛl tɔ̧ nɛ mɔ'ɔ: Tom ko gba-kpánà nɛ́ wen dɔ̧ɔ̧.» Kà wa nɛ́ a̧ra̧ ndaa-wen'i tɔ̧ nɛnɛ‘e: «Ɛ́ɛ́ iŋa nɛ̀ de-a'e, tom ko kpánà nɛ́ wen dɔ̧ɔ̧,» wó,

¹³ɓɛɛ mɛ̀ tɔ̧́ ha̧ wa'e: GASA WAN tɔ̧a: «Mi tɛ de ha̧ o bíí nù'ɛ lɛŋ mɛ gbɛ dɔ̧ɔ̧, gú nɛ̀ o wi-ɗafi-sɔ̧ in o wi-tɔ̧-wen oi nú Sɔ̧, ká bá nɛ̀ o bíí Jerusalɛm lɛŋ.

¹⁴Mi tɛ kai wa yo nɛ̀ ŋmaa, o dáà tɛ yo ŋmaa in o bem kɔ‘i; mi tɛ kum wa lɛŋ nɛ̀ ko beka de'm tɛ ɗaŋa wa yinɛ na.»

¹⁵GASA WAN tɔ̧a: «Ɛ̀nɛ̀ yéŋ zer'nɛ́, ɛ̀nɛ̀ zíí wen’ɛ: k’ɛ́nɛ́ ŋmaŋ tɛ‘nɛ́ mɛ e wen’ɛ tɛ geemɔ na.

¹⁶Ɛ̀nɛ̀ tú̧ tɛ GASA WAN Sɔ̧ k’ɛnɛ, nɛti ha̧ a̧ mɛ tom tum tɛnɛ, nɛti h’ɛnɛ mɛ kɔ̧ naŋ‘nɛ́ nɛ̀ o kaya sɛn ti tum. Ɛ́nɛ́ pɛ́m so nɛ́ sa̧a̧mɔ, ɓɛɛ a̧ kpai sa̧a̧mɔ‘i nɛ̀ gba tum kpɔ̧ɔ̧-kpɔ̧ɔ̧, kifi nɛ́ zɔm tum ŋga-kórò.

¹⁷K’ɛ̀nɛ̀ zii wen’ɛ na, ɓɛɛ mi̧i̧kɔ̧a tɛ mbaŋ yí‘m nɛ̀ war fara-duk kɔ‘m, wen ŋmaŋa-tɛ k’ɛnɛ; mi̧i̧kɔ̧a tɛ fok yí‘m, wen wa tɛ kai dukbíí nɛ̀ duk nɛ́ mɔ-dai ko GASA WAN yaknɛ nɛ̀ bara-biro.»

¹⁸«Mɛ̀ tɔ̧́ ha̧ wannu in nàà kɔ‘i mɛ zir zu damti-wan, wen nɛ̀ laasɔ̧i̧-mɔɔ-wan kɔ-wa yuu zu wa kaɗi.

¹⁹Biro kpee o gasa ye mɛ nú Nɛgɛb lɛŋ, ŋma bíí mɛ ye hi̧i̧ bo na! Wa kaia o be Juda lɛŋ yaknɛ nɛ̀ bara-biro; oi bíí kóó kpɔk duk na.»

²⁰«Ɛ́nɛ́ o be Jerusalɛm, ɛ̀nɛ̀ bá yi'nɛ́ nɛ̀ ŋgɔn, ɛ̀nɛ̀ zɔ́k biro nɛ̀ ba piinɛ nɛ̀ ká̧-zan-mɛ́-ŋgɔn mɛ tik'nɛ́‘i. Mɔ-dai kɔ‘m n'am ee so'nɛ́ zu-wa’ɛ a̧a̧ déè? O gba de sami k’ɛnɛ nɔ‘i a̧a̧ bɔɔ déè?

²¹Nɛ́ ge ɛ̀nɛ̀ tɛ tɔ̧ ŋgimbi nɛ̀ o gɔni-dùk n’ɛnɛ dee sɛm in wa tɛ kur mɛ ɔ wan zu'nɛ́ ge? Ŋgimbi'i mɔ tɛ ba tɛ‘nɛ́ hee mɔ'ɔ nɛ̀ mɔ ba nɛ̀ tɛ okoo tɛ ŋgimbi kóó bem’ɛ ga.

²²Jerusalɛm, mɛ tɛ ak tɛ-mɛ nɛ̀ tɛ-mɛ‘e: ‹Wen ge sa mɔ'ɔ hɔɔ zu'm ge?› Mɛ̀ nɛ́ wen gasa ɗaŋmɔ a̧ wa ta̧i̧ nɛ̀ laa kɔ-mɛ nɛ̀ ŋgɔn ɔ nɛnɛ in mɛɛ nɛ̀ ŋgai'i.

²³«Bíí[15] nyɛma so mɛ kpai ndàrá-tɛ? Gɔ̧ nyɛma so mɛ kpai dap-tɛ-wi nde? Ɓɛɛ k’ɛ́nɛ́, nɛ̀ ɗaŋmɔ hira tɛ‘nɛ́'ɛ, ɛ́nɛ́ nyɛma so mɛ de demɔ nde?

²⁴Mi tɛ pɛsi'nɛ́ hee mɔ'ɔ nɛ̀ ŋga hara-búk kai nɛ̀ o zɔ̧ pɛsi yaknɛ'ɛ ga.

²⁵«Nɛ́ mi GASA WAN a̧ tɔ̧ wen’ɛ! War mɔ n'am ɗafa e, nɛ̀ tɛ kpa mɛ nɛ́ mɔ'ɔ: Tɛ-mɛ bìí ɗoŋ-am, ɓɛɛ mɛ ndaɗi in o géé tum-mɔ;

²⁶ɓɛɛ hegɔ, kɔ‘m, mi tɛ kpɔ̧i̧ laa tɛ-mɛ yinɛ, wen ha̧ o bíí mɛ zɔk zim-tɛ-mɛ.

²⁷O ndaka ɗoŋ géé-sɔ̧ kɔ-mɛ, o tɔ̧ɔ̧-wen tara-zu[16] kɔ-mɛ, dee dàlà kɔ-mɛ nɛ̀ zan nɛ̀ foe de mɛ na! Nɛ̀ zu o kaya in kpɛɛfɔ mbɛt, mi zɔka o ndiŋmɔ kɔ-mɛ! Ho Jerusalɛm! Mɛ kɔ̧ mɛ ɗafi war-tɛ-mɛ, mɛ nɛ̀ ɗoŋ-am na! Nɛ́ ge ŋgimbi ge a̧ mɛ tɛ kaɗi nɛ̀ dee o mɔɔ nɔ‘i ge?»