Read Northwest Gbaya JEREMII 14 Bible Online

JEREMII 14 - Northwest Gbaya bible

JEREMII 14

¹Mɔ nɛ̀ GASA WAN tɔ̧ɔ̧ ha̧ Jeremii zu ŋga kaara nɛ́ mɔ'ɔ:

²«Juda a̧a̧ tɛ zima-mɔ, wen o ye kɔ̧-a̧ duk tɛ kuma-a nɛnɛ, wa ya de na; wa tira a nù, wa ya hi̧i̧ nɛ̀ nù kɔ-wa: hiɗimɔ-bɔnɛ nɔi̧ nɛ̀ Jerusalɛm mɛ.

³O dita-bíí tom nɛ́ o wi-de-tom kɔ-wa mɛ nɛ̀ɛ́ ɗu yì, ɓɛɛ wa kpa yì na. Wa nɛ, ɓɛɛ wa pia ɗoŋ nɛ̀ o géé nyɛk, wa iŋ mɔ mɛ de na, mɔ gana wa, ɓɛɛ wa ya sɛnɛ yelem géè.

⁴O wi-wa-fɔ iŋ mɔ mɛ de na; nù ku̧u̧ naŋ mbaŋa-a wen nɛ̀ kórò bo na, ɓɛɛ wa ya sɛnɛ yelem géè mbɛt.

⁵Ɓɛɛ si zaŋbɛɛ mɛ, kà zambɛrɛ ko, ɓɛɛ ee bem duk yak kɔ‘i, wen nɛ̀ ŋma géé be ɓɔɔ-mɔ bo na.

⁶O tuifuu-zaŋbɛɛ yor nɛ̀ o zu kaya nɛnɛ, de nɛ̀ pɛ̀r nɛ̀ ti búk hee o gba-toyo ga; yí-wa mbɔia tɛ kia zɔ̧ nɛ̀ ti mɔ nɛnɛ ɓɛɛ wa kpa na.»

⁷«Kà o ɗaŋmɔ k’ɛɛ nɛ́ dee ɗaŋ sedaako zu yɛ, ɓɛɛ GASA WAN, ɛ̀nɛ̀ dé ko h’ɛɛ wen nin'nɛ́. Íì, ɛɛ kaɗi kafa'nɛ́ tɛ deemɔ k’ɛɛ na; ɛɛ dee ɗaŋmɔ ti'nɛ́.

⁸Mɔɔ-e-ta ko Israɛl, ɛ́nɛ́ nɛ́ wan-kpasi-bíí tɛ ŋgimbi bɔnɛ, wen ge s’ɛnɛ e tɛ‘nɛ́ hee ŋma gɛnɛ ga, kóó hee ŋma wi-nɛ-gɛnɛ nɛ̀ ɔ zɛ kpɔk, ɓɛɛ kura kɔ‘i yak’ɛ ga, sɛn tɛ nù k’ɛɛ ge?

⁹Wen ge s’ɛnɛ e tɛ‘nɛ́ hee bíí nɛ̀ mɔ yeka a̧ ga, ge? Kóó hee ŋgaŋa-wi nɛ̀ nyɛm mɛ kpasi bíí kɔ‘i ɓɔna ga, ge? Zu o mɔɔ nɔ‘i lɛŋ, GASA WAN, ɛ́nɛ́ a̧a̧ mgbara yɛ, nin'nɛ́ a̧a̧ zu yɛ. K’ɛ́nɛ́ e yɛ duk na.»

¹⁰Wen nɛ̀ GASA WAN tɔ̧ ha̧ o wi nɔ'ɔ nɛ́ mɔ'ɔ: «Nɛ̀ mbetɛ, o wi nɔ'ɔ kɔ̧ɔ̧ kɔ‘i nɛ́ yambala-a nɛnɛ, wa zɔk ɗoŋ naŋanɔ kɔ-wa nɛ̀ de-a na.» Mɔ‘i de tɛ GASA WAN na; hegɔ, tɛ-a tɛ mbaŋ ɗoŋ ɗaŋmɔ kɔ-wa, ɓɛɛ a̧ dee bɔnɛ in wa nyɛm nɛ̀ ɗoŋ ɗaŋmɔ‘i.

¹¹GASA WAN tɔ̧ɔ̧ ha̧‘m'e: «Ká mɛ́ ai nú ha̧‘m wen o wi nɔ'ɔ na; ɓɛɛ ká mɛ́ ta mɔ wen ŋma demɔ wen wa na mbɛt.

¹²Kóó wa a̧ zim so nɛ́ yì, mi beka zii aia-nú kɔ-wa na; kóó wa dɔɔ so nɛ kpoo-sɔ̧ ha̧ nɛ̀ o ha̧a̧mɔ ha̧‘m mbɛt, mi beka kpɛk na. Mi tɛ kum wa nɛ̀ gba-paa, kaɓa in nɛ̀ zɛɛ-geŋa mbɛt.»

¹³Ɓɛɛ mi kifi nú‘e: «Ho! GASA WAN Sɔ̧! Nɛ́ o wi-tɔ̧-wen oi nú‘nɛ́ a̧ tɔ̧ɔ̧ ha̧ wa'e, wa beka zɔk bɔnɛ biro in kaɓa na, ɓɛɛ GASA WAN tɛ ha̧ nɛ́ kpasa ga̧a̧mɔ ha̧ wa sɛn fara’ɛ.»

¹⁴GASA WAN kifa nú ha̧‘m zu mɔ‘i'e: «Wen nɛ̀ o wi-tɔ̧-wen oi nú‘m tɔ̧ nɛ̀ nin-am'i nɛ́ ndela; mi tom wa na; mi e ŋma wen nú wa na mbɛt, ŋma mɔ n'am tɔ̧ɔ̧ ha̧ wa mɛ tɔ̧ bo na. Mɔ nɛ̀ wa tɔ̧ h’ɛnɛ lɛŋ nɛ́ hɔɔ-zu-ndela, in géé kóó-tɛ tɛ ɔra-mɔ.

¹⁵Nɛ́ hegɔ sa mi GASA WAN tɔ̧ wen’ɛ ndé: War ko o wi-tɔ̧-wen oi nú‘m nɛ̀ tɔ̧ wen nɛ̀ nin-am, nɛ̀ bó nɛ́ mi'i tom wa na'i, nɛ̀ wa tɔ̧ kɔ-wa'e gba-paa in kaɓa beka tik nù'ɛ na wó‘i, kànà nɛ́ gba-paa in kaɓa'i a̧ tɛ kum wa.

¹⁶Gba-paa in kaɓa tɛ kum o wi-zii-wen kɔ-wa ŋgoɗoso dam o be mgbara kira Jerusalɛm lɛŋ. Ŋma bíí nɛ̀ tɛ gun wa in o kóò kɔ-wa, o bem ká bá nɛ̀ o boko-bem kɔ-wa, beka bo na. Nɛ́ hegɔ a̧‘m tɛ pi̧ nɛ̀ ɗaŋ kɔ-wa si ɗoŋ zu wa woyo.

¹⁷«Mɛ́ tɛ tɔ̧ wen’ɛ ha̧ wa: «Yí‘m ɓɔn fara fok nɛ̀ mi̧i̧kɔ̧a zɛ nɛ wese, mi̧i̧kɔ̧a gɔn yí‘m na; gba ŋgamɔ tika zu mgbák dukbíí kɔ‘m, ŋgamɔ‘i nɛ́ mɔɔ-kum-bíí.

¹⁸Kà‘m gbo mɛ́ nɛ̀ kpɛɛfɔ, ɓɛɛ o wɔr bíí nɛ̀ biro gbɛa nɛ́ mɔɔ nɔ'ɔ; kà‘m ye si saaye, o wi nɛ kaɓa baa nɛ́ mɔɔ nɔ'ɔ. O wi-tɔ̧-wen oi nú Sɔ̧ in o wi-ɗafi-sɔ̧ ma nɛ yì dam fara lɛŋ, wa iŋ mgbara mɔ nɛ̀ yak na!»

¹⁹«GASA WAN, ɛ́nɛ́ siŋa Juda pi̧ taŋ nde? Wɔ Siɔŋ busa tɛ‘nɛ́ kaɗi nde? Wen ge s’ɛnɛ gusa ɛɛ nɛ̀ ɗaŋ-a ba gba̧a̧-tɛ-yɛ n’ɛɛ beka kpasi na’ɛ ge? Ɛ́ɛ́ pɛma so nɛ́ haya-tɛ, ɓɛɛ ŋma demɔ n’ɛɛ kpaa bo na; ŋgimbi nɛ̀ zɛɛ k’ɛɛ tɛ̀ɛ́ kaɗi so, nɛ́ gasa kíì a̧ hɔa!

²⁰GASA WAN, ɛɛ iŋa ɗaŋmɔ k’ɛɛ, in yɔɔ-kaya ko o zɔmdaa k’ɛɛ;

²¹nɛ̀ mbetɛ, ɛɛ dee ɗaŋmɔ ti'nɛ́. Wen hura-nin'nɛ́, k’ɛ́nɛ́ e yɛ duk na; k’ɛ́nɛ́ pi̧ búù zu damti-gasamɔ k’ɛnɛ na; tɛ‘nɛ́ a̧ mbáŋ ɗoŋ nɔɔ-tɔk k’ɛnɛ in yɛɛ, k’ɛ́nɛ́ yai nɔɔ-tɔk‘i yinɛ na!

²²Mgbara o géé-sɔ̧ ko o tugun bíí, ŋma a̧a̧ sɛnɛ nɛ̀ dee ha̧ kórò mɛ hɔ nde? So nɛ́ yiwese a̧ ha̧ kórò nde? Bó nɛ́ ɛ́nɛ́ nɛ́ GASA WAN Sɔ̧ k’ɛɛ na nde? Yí-ɛ́ɛ́ duk ɓɔn tɛ‘nɛ́ wen nɛ́ ɛ́nɛ́ a̧ de o mɔɔ nɔ‘i lɛŋ.»