Read Northwest Gbaya JEREMII 16 Bible Online

JEREMII 16 - Northwest Gbaya bible

JEREMII 16

¹Ɓɛɛ GASA WAN tɔ̧ ha̧‘m:

²«Mɛ beka ba kóò na, mɛ beka ko o be-wiwii kà bó nɛ̀ o be-okoo sɛn zaŋnu’ɛ na.

³Wen nɛ̀ GASA WAN tɔ̧ zu o bem in o boko-bem nɛ̀ wa kòò zu nù'ɛ, ká bá nɛ̀ o dáà in o nàá-wan-bem nɔ‘i nɛ́ mɔ'ɔ:

⁴Wa tɛ fe nɛ́ fio-kaɓa, nɛ̀ bíí beka gun wa na in bíí beka hi̧i̧ wa na mbɛt. Wa tɛ ɓuk kifi nɛ́ géé ɓukamɔ mbulɛɛ; biro in kaɓa tɛ kum wa, ɓɛɛ wɔr-wa tɛ duk nɛ́ nyɔŋmɔ ko o tama in o gbóò.»

⁵GASA WAN tɔ̧a ha̧‘m woyo: «Ká mɛ́ ye tua fara nɛ̀ wa mɔi ŋmaa sɛnɛ hí̧í̧ nɛ̀ fio na; ká mɛ́ nɛ hɔ tɛ o bíí fara-fio na; ká mɛ́ de ko in wa na, wen mi baa ga̧a̧mɔ, deako in kɔ̧ɔ̧mɔ kɔ‘m yinɛ zu wa. Nɛ́ mi GASA WAN a̧ tɔ̧ wen’ɛ.

⁶O gasa bíí in o geɗek bíí tɛ fe zu nù‘i, ɓɛɛ bíí beka gun wa na; wi beka hi̧i̧ wa na, tik nɛnɛ nɛ̀ ger na,[17] wi beka kpui zu-wi na mbɛt.

⁷Wi beka ha̧ nyɔŋmɔ ha̧ wi nɛ̀ fio fee er-a mɛ ha̧ ga̧a̧-see ha̧ a̧ na. Wi beka ha̧ mɔɔ-nɔ ha̧ a̧ mɛ ha̧ nɔɔ-ŋgiɗi ha̧ a̧ na mbɛt, kóó nɛ́ dáà, kóó nɛ́ nàà kɔ̧-a̧ a̧ fea.

⁸«Mɛ beka ye tua gbaŋa mɛ duk nyɔŋ nɛ̀ mɔ, nɔ nɛ̀ mɔ in wa na.

⁹Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl, tɔ̧ nɛ́ mɔ'ɔ: Mi tɛ de ha̧ hiɗimɔ-tortɛ, in o mɔɔ-desee, ká bá nɛ̀ gima ko wi-ba-kóò, in nyɛŋɛ ko ko-ba-wíì mɛ kaɗi sɛn fara’ɛ nɛ̀ gbaayí‘nɛ́, tɛ ŋgimbi n’ɛnɛ ya sɛnɛ'ɛ.

¹⁰«Ŋgimbi nɛ̀ mɛ bé tɛ̀ɛ́ tɔ̧ wen nɔ'ɔ lɛŋ ha̧ o wi nɔ‘i, ɓɛɛ kà wa ak mɔ‘e: ‹Wen ge sa GASA WAN foo gasa ŋgamɔ pii zu yɛ ge, ɗaŋmɔ k’ɛɛ nɛ́ ge? Nɛ́ ge yɔɔ-kaya ge ɛ́ɛ́ dee ti GASA WAN Sɔ̧ k’ɛɛ ge nde?›

¹¹Ɓɛɛ mɛ̀ kífí nú ha̧ wa'e: GASA WAN tɔ̧a: mɛ̀ nɛ́ wen nɛ̀ o zɔmdáa k’ɛnɛ ee am duk mɛ ndak ɗoŋ o ŋma sɔ̧, gasi nɛ̀ wa, gu nɛ nù ti wa mbɛt; kɔ‘m, wa ee am duk, ɓɛɛ wa kasi usamɔ kɔ‘m na.

¹²War k’ɛnɛ, ɛ́nɛ́ dee mɔ nɛ̀ ɗaŋ-a gan ko o zɔmdáa k’ɛnɛ. O ndé ɓɔn kànà nɛ́ zaŋ ŋgazu kɔ‘i, ɛnɛ zii wen nú‘m na.

¹³Wen zu mɔ‘i, mi tɛ ndak'nɛ́ yinɛ tɛ nù'ɛ sitɛ ŋma nù nɛ̀ ɛ́nɛ́ in o zɔmdáa k’ɛnɛ iŋ na; sɛn hi̧i̧ ɛnɛ tɛ gasi o ŋma sɔ̧ zɛ nɛ wese, ɓɛɛ ɛnɛ beka kpa gbakamɔ kɔ‘m ɓɔna.»

¹⁴Nɛ́ GASA WAN a̧ tɔ̧ wen’ɛ: «O bíí kan mɔ nɛ̀ nin-am tɔ̧ nɛnɛ‘e: GASA WAN nɛ̀ foo o be Israɛl daŋnɛ nɛ̀ nú Egiptɛ duk kpasa! Wese tɛ hɔ nɛ̀ wa beka kan mɔ hegɔ ɓɔna,

¹⁵ɓɛɛ wa tɛ kan mɔ‘e ndé, GASA WAN nɛ̀ foo o be Israɛl piiɗoŋ nɛ̀ ká̧-zan-mɛ́-ŋgɔn in nɛ̀ tɛ o nù n'aa pɛsa so wa si sɛnɛ duk kpasa! Nɛ̀ mbetɛ, mi tɛ kai wa pii ɗoŋ tɛ nù n'am ha̧a̧ so ha̧ o zɔmdaa kɔ-wa.»

¹⁶GASA WAN tɔ̧a: «Mi tɛ tom o wi-ba-zoro nɛ̀ dɔka-a mɛ nɛ̀ɛ́ ba wa. Mi tɛ tom o wi-de-gia nɛ̀ dɔka-a mɛ ndak wa nɛ̀ zu o kaya lɛŋ, in o zu-tɔ̧ hɔ nɛnɛ mgbara o ta mbɛt.

¹⁷Yí‘m ɓɔn kànà tɛ o naŋanɔ kɔ-wa lɛŋ, ŋma mɔ nɛ̀ yɔɔ yí‘m bo na. Ɗaŋmɔ kɔ-wa duk ɓɔn yí‘m.

¹⁸Ɓɛɛ kuti mɔ n'am tɛ de, nɛ́ dea-a ha̧ mɔɔ-oi-ɗaŋmɔ in yɔɔ-kaya kɔ-wa mɛ tik zu wa war yiitoo, wen wa ɗaŋa nù kɔ‘m nɛ̀ o mbɔramɔ kɔ-wa, ɓɛɛ wa dun mɔɔ-oi kɔ‘m nɛ̀ o mɔɔ-nyɛr kɔ-wa mbɛt.»

¹⁹GASA WAN, ɛ́nɛ́ nɛ́ ŋgai kɔ‘m, fara-ɔm-tɛ‘m in fara-hu̧si kɔ‘m wese-bɔnɛ! Nɛ́ sɛn tɛ‘nɛ́ a̧ o tugun bíí tɛ gar pii sɛnɛ nɛ̀ nduti-nù dam fara lɛŋ, ɓɛɛ wa tɛ tɔ̧: «O sɔ̧ nɛ̀ o zɔmdáa k’ɛɛ a̧a̧ so nɛnɛ nɛ́ o géé tum-mɔ nɛ̀ gba̧a̧-mɔ bo so tɛ-wa na.

²⁰O géé bíí nɛ̀ bó nɛ́ sɔ̧ na nyɛma so mɛ de sɔ̧ nde?»

²¹Ɓɛɛ GASA WAN tɔ̧: «Ɛ̧ɛ̧ kinii’ɛ, mi tɛ usi ŋgai kɔ‘m in ŋgayamɔ kɔ‘m mbɛt ha̧ wa, ɓɛɛ wa tɛ iŋ‘e mi nɛ́ GASA WAN.»