Read Northwest Gbaya JEREMII 17 Bible Online

JEREMII 17 - Northwest Gbaya bible

JEREMII 17

¹«Wa yɔra yɔɔ-kɔya ko Juda nɛ̀ boi nɛ nú-a nɛ́ diama̧a̧; wen'i yɔra kɔ̧́ see-wa in zu o zak zu fara-ɗafi-sɔ̧ kɔ-wa mbɛt.

²Hee mɔ'ɔ nɛ̀ wa tɔ̧ nyɛrɛ zu o bem kɔ-wa ga, mɛ̀ nɛ́ hegɔ mbɛt a̧ wa tɔ̧ nɛ̀ wen zu o fara-ɗafi-sɔ̧ in o sɛka-te kɔ-wa nɛ̀ duk katɛ o ɓɔɔ wa̧a̧-te, zu o kusa-fara mɛ.

³Ɛnɛ o wi-gasi-sɔ̧ nɛ̀ zu kaya nɛ̀ zaŋbɛɛ nɛnɛ'ɛ, mi tɛ de ha̧ o bíí mɛ kai o mbɔi in o demɔ k’ɛnɛ lɛŋ yaknɛ wen zu ɗafa sɔ̧ k’ɛnɛ nɛ̀ zu o kusa-fara nɛ̀ dama zu nù k’ɛnɛ lɛŋ'ɛ.

⁴Ɛnɛ tɛ e kànà nù n'am ha̧a̧ so h’ɛnɛ nɛ̀ mɔɔ-oi duk; mi tɛ e ha̧ o wisɛn k’ɛnɛ mɛ kai'nɛ́ yaknɛ nɛ̀ bara sitɛ ŋma nù n’ɛnɛ iŋ na, wen ɛnɛ a̧ŋa nyimsea kɔ‘m a ŋgɔn hee wee ga nɛ̀ beka bi na ndó-ndó-ndó.»

⁵Wen nɛ̀ GASA WAN tɔ̧ nɛ́ mɔ'ɔ: «Fom a̧a̧ zu wi nɛ̀ e ta nɛ̀ bíí nɛ̀ duk ɓɛɛ ká fea’ɛ; ŋgai ko wi’ɛi nɛ́ geemɔ, see-aa bo tɛ GASA WAN na.

⁶Wi’ɛi tɛ duk hee ŋma be te mɛ́ zu ndaɗa-nù ga; ŋma be desee beka hɔ tɛ-a na, ɓɛɛ a̧ tɛ duk ɓɔn fara sɔkɔr-ta, sɛn ŋga-gbárà mɛ nɛ̀ bíí nyɛm mɛ ɔ sɛnɛ na.

⁷Toka-de-yoŋgo a̧ dúk zu bíí nɛ̀ e ta nɛ̀ GASA WAN; GASA WAN nɛ́ wi-e-nɛ-ta kɔ̧-a̧.

⁸A̧ tɛ duk hee ŋma te nɛ̀‘i guna ka̧ yì, ɓɛɛ nɛ̀ kunin-a yee nù hɔ tɛ yì ga. A̧ beka iŋ gbɛŋmɔ na, wa̧a̧-a̧ tɛ duk nɛ̀ ɓɔa-a nɛnɛ; kóó nɛ́ pɛ ŋga kaara a̧ hɔ, ŋma mɔ beka de a̧ na, a̧ beka nyaŋ nɛ̀ waya-a na.

⁹See-wi nɛ́ mɔɔ-ɔr-wi gan o ŋma mɔ lɛŋ; O'o tɛ iŋ mgbara mɔ kɔ̧-a̧ o?

¹⁰«Nɛ́ mi GASA WAN a̧ zɔk o taamɔ ko o bíí hɔ nduti-a mɛ, ɓɛɛ nɛ̀ ha̧ mɔ ha̧ bíí, nyɛm nɛ̀ ɗoŋ naŋanɔ in yí-tom kɔ̧-a̧.

¹¹Wi nɛ̀ kpa mbɔi nɛ̀ yuwar zuzu hɔɔ ŋmaa in ŋma nana gbafɔ nɛ̀ sii gu zu gɔni kui nɛ̀ bó nɛ́ kɔ̧-a̧ na. Tɛ duka-a ko wi’ɛi siti n'aa tɛ sɔk na, mbɔi kɔ̧-a̧‘i tɛ yɔ er-a, ɓɛɛ sɔŋkur-aa a̧ tɛ kifi duk nɛ́ wi nɛ̀ kɔ̧-ta-a gɔn na.»

¹²Sa̧a̧ fara-gasi-sɔ̧ k’ɛɛ hɔɔ ŋmaa in ŋma gba de damti nɛ̀‘i dea e zu kaya nɛ̀ ku̧u̧naŋ-a mɛ.

¹³GASA WAN, ɛnɛ nɛ́ mɔɔ-e-nɛ-ta ko Israɛl, ziimɔ tɛ ba o wi nɛ̀ e'nɛ́ duk, o bíí lɛŋ nɛ̀ a̧r tɛ nɛ̀ ɛ́nɛ́ tɛ kum, wen wa ee GASA WAN nɛ̀ duk nɛ́ kput-kput yì nɛ̀ ɔ̧si na duk.

¹⁴Ɛ̀nɛ̀ há̧ haya-tɛ ha̧‘m GASA WAN, ɓɛɛ ha̧ tɛ‘m hai; ɛ̀nɛ̀ kpás'am, ɓɛɛ ha̧‘m kpasi wen ɛ́nɛ́ nɛ́ mɔɔ-zɔn kɔ‘m.

¹⁵O bíí‘e: «Wen nɛ̀ GASA WAN tɔ̧ɔ̧ so'i a̧a̧ bɔɔ déè? Wen'i a̧ hɔ́ gba̧a̧ gɔ!»

¹⁶Ɓɛɛ kɔ‘m, bo nɛ mi'i ira'nɛ́ mɛ tom ŋgamɔ pi̧ zu wa na, mi yeŋ ɗaŋ wese ha̧ wa na mbɛt. Ɛ́nɛ́ iŋa hegɔ, o wen nɛ̀ gboo nɛ̀ nú‘m, ɛ́nɛ́ zia nɛ̀ zer'nɛ́.

¹⁷K’ɛ́nɛ́ pi̧ gasa kíì tɛ‘m na, ɛ́nɛ́ nɛ̀ duk nɛ́ fara-hu̧si kɔ‘m tɛ ŋgimbi bɔnɛ.

¹⁸Foe a̧ bá o wi-de-bɔnɛ in am, ká foe ba'm na; ɛ̀nɛ̀ pí̧ kíì tɛ-wa, nɛ́ bó nɛ́ mi na. Ɛ̀nɛ̀ fó ŋga bɔnɛ pi̧ zu wa, ɛ̀nɛ̀ mbɔ́lí wa war yiitoo.

¹⁹GASA WAN'e: «Mɛ̀ nɛ́ɛ̀ yor ká̧ nú garo ko o bíí fara nɛ̀ o wannu Juda ye nɛnɛ in nɛ̀ wa gbo nɛnɛ mbɛt, ká bá nɛ̀ o ŋma nú garo Jerusalɛm lɛŋ,

²⁰ɓɛɛ mɛ̀ tɔ̧́ ha̧ wa'e: O wannu Juda, o bíí Juda in o bíí saaye Jerusalɛm, ɛ́nɛ́ lɛŋ nɛ̀ gbo nɛ̀ o nú-garo nɔ'ɔ, ɛ̀nɛ̀ zíí wen ko GASA WAN.

²¹Gba̧a̧-wen ko GASA WAN'i nɛ́ mɔ'ɔ: K’ɛ́nɛ́ túí tui wese-ɔm-tɛ na; k’ɛ́nɛ́ tui mɔ gbonɛ nɛ̀ nú-garo Jerusalɛm wese'i na.

²²K’ɛ́nɛ́ tui mɔ gbonɛ nɛ̀ nú tua k’ɛ́nɛ́ wese-ɔm-tɛ na, ɓɛɛ k’ɛ́nɛ́ de ŋma tom wese'i na mbɛt. Ɛ̀nɛ̀ zɔ́k wese-ɔm-tɛ nɛ̀ de-a hee mɔ'ɔ n'am usa so ha̧ o zɔmdáa k’ɛnɛ ga.

²³Kɔ-wa, wa yeŋ zer tɛ wen kɔ‘m na, wa zii wen nú‘m na, ɓɛɛ wa bɛ̧ usamɔ kɔ‘m.

²⁴«Nɛ́ mi GASA WAN a̧ tɔ̧ wen’ɛ: K’ɛ̀nɛ̀ nɛ́ zia wen nú‘m, k’ɛ̀nɛ̀ nɛ́ tuia mɔ gbonɛ nɛ̀ nú garo saaye’ɛ wese-ɔm-tɛ na, k’ɛ̀nɛ̀ nɛ́ zɔka wese-ɔm-tɛ nɛ̀ de-a, mɛ de ŋma tom wese'i na mbɛt,

²⁵ɓɛɛ o wannu Juda nɛ̀ duk zu damti-wan ko David, nɛ̀ daŋ o keekee in o nyaŋa, wa in o be-wan kɔ-wa, ká bá nɛ̀ o be Juda in o bíí Jerusalɛm mbɛt tɛ duk tɛ yea-a nɛ̀ o nú-garo ye’ɛ siti, ɓɛɛ o bíí tɛ ɔ tɛ ye’ɛ kpoo nɛ kpoo.

²⁶O bíí tɛ tɛ nɛ̀ tɛ o ye wan mɛ nù ko Juda, in fara nɛtɛ nɛtɛ nɛ̀ zik Jerusalɛm, nù ko Bɛnjamin, in o ye wan mɛ si Bɔkɔ-nù hɔ nɛnɛ tɛ o ye mɛ zu kaya mɛ, in mɛ nú Nɛgɛb; wa tɛ kai o mɔɔ-ɗafi-sɔ̧ tɛnɛ, o wan mɛ dɔa-a, o wan mɛ gɔna-a, wan mɛ zu-nyɔnɔ, in o fuu-nyama, ká bá nɛ̀ ha̧a̧mɔ-dee-osoko, pii kɔ̧́ Tua ko GASA WAN.

²⁷Ɓɛɛ k’ɛ̀nɛ̀ zii wen nú‘m mɛ zɔk wese-ɔm-tɛ nɛ̀ de-a na, k’ɛ̀nɛ̀ tui mɔ gbonɛ nɛ̀ o nú-garo Jerusalɛm wese-ɔm-tɛ, ɓɛɛ mi tɛ pi̧ wee tɛ o nú-garo nɔ‘i, nɛ̀ tɛ dɔ o de tua Jerusalɛm a nù, ɓɛɛ wee'i beka bi na.»