Read Northwest Gbaya JEREMII 19 Bible Online

JEREMII 19 - Northwest Gbaya bible

JEREMII 19

¹Nɛ́ mɔ'ɔ nɛ̀ GASA WAN tɔ̧ɔ̧ ha̧ Jeremii: «Mɛ̀ nɛ́ɛ̀ hi̧fi ŋma kpánà, ɓɛɛ mɛ́ hók o ŋma gasawi mgbara dukbíí in o ŋma mgbara o wi-ɗafi-sɔ̧;

²mɛ̀ mgbɔ́ wa gbo nɛ̀ nú garo Gbara-Kpánà si kɔ̧̀ ɗɔŋgɔ Bɛn-Hinɔm, á̧ mɛ̀ tɔ̧́ o wen n'am tɛ tɔ̧ ha̧ mɛ‘i ha̧ wa.

³Mɛ̀ tɔ̧́ ha̧ wa'e, ɛ́nɛ́ o wannu Juda in o bíí Jerusalɛm, ɛ̀nɛ̀ zíí mɔ nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ h’ɛnɛ nɛ́ mɔ'ɔ: Mi tɛ fo ŋma ŋgamɔ pi̧ fara’ɛ, ɓɛɛ kóó o ndé nɛ̀ bé tɛ̀ɛ́ zii nyɛrɛ-a, ɗɛɗɛ-a tɛ gɔn.

⁴O be Juda ee am duk, ɓɛɛ wa ɗaŋ fara’ɛ nɛ̀ dɔɔ-kpoo-sɔ̧, ɗafi nɛ̀ o ŋma sɔ̧ nɛ̀ de ŋma mɔ ha̧ wa, in nɛ̀ de ŋma mɔ ha̧ o zɔmdáa kɔ-wa, kà bó nɛ̀ o wannu Juda na mbɛt. Wa duna fara’ɛ nɛ̀ tɔk-tɛ o bíí nɛ̀ duk zóóŋ géè.

⁵Wa mboo kusa fara-ɗafi-Bal wen dɔɔ o bem kɔ-wa nɛ̀ kpoo-sɔ̧ sɛnɛ ha̧ Bal. Bo nɛ mi a̧ tɔ̧ɔ̧ ha̧ wa mɛ de mɔ‘i na; mi tɔ̧ so kɔ‘m ŋma wen hegɔ kà‘m ta nɛ̀ mɔ zu-a na mbɛt.

⁶Nɛ́ mi GASA WAN a̧ tɔ̧ wen’ɛ. Nɛ̀ mbetɛ, ŋgimbi tɛ hɔ nɛ̀ bíí beka sa fara’ɛ‘e ‹Tafɛt› kóó ‹Ɗɔŋgɔ Bɛn-Hinɔm› ɓɔna, ɓɛɛ wi tɛ sa'e nɛ́ ‹Ɗɔŋgɔ-gbɛ-wi›.

⁷Mi tɛ yaŋgi yuwar-tɔ̧ɔ̧-wen in deemɔ ko Juda in Jerusalɛm yinɛ sɛn fara’ɛ; mi tɛ de ha̧ o wisɛn kɔ-wa nɛ̀ zɔk ko tɛ-wa na mɛ kum wa a nù nɛ̀ gba-paa, ɓɛɛ mi tɛ de ha̧ wɔr-wa mɛ duk nɛ́ nyɔŋmɔ ko o nɔ̧́í̧ in o saɗi-zaŋbɛɛ.

⁸Mi tɛ de ha̧ ye’ɛ mɛ duk nɛ́ mɔɔ-kíì, ɓɛɛ ɗɛɗɛ o bíí lɛŋ nɛ̀ tɛ ɓir fara'i tɛ gɔn; wa bé tɛ̀ɛ́ zɔk o mɔ nɛ̀ ɗaŋa, wa tɛ tɔ̧‘e: ‹Ho! Oee zɔm mɔ nɛ̀ ɗaŋa tɛ ye’ɛ wa!›

⁹Mi tɛ de ha̧ wa mɛ nyɔŋ mur-tɛ o bem kɔ-wa mɛ́ be-wiwii-a in be okoo-a hee kpoo ga, nyɔŋ nɛ̀ ŋmaa in o ŋmaa mbɛt zaŋ dita-see in ŋga bɔnɛ, nɛ̀ o wisɛn kɔ-wa nɛ̀ zɔk ko tɛ-wa na, tɛ pi̧ zu wa'i.

¹⁰«Mɛ̀ gbá kpánà'ɛ ɓɔn yí o wi nɛ̀ nɛ́ in mɛɛ‘i,

¹¹ɓɛɛ mɛ̀ tɔ̧́ ha̧ wa'e ndé, wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: Mi tɛ ɗaŋ dukbíí'ɛ in ye’ɛ hee mɔ'ɔ nɛ̀‘i gba nɛ̀ kpánà nɛ̀‘i nyɛm mɛ ɗafi woyo ɓɔna ga. Hee mɔ'ɔ nɛ̀ fara-gun-bíí beka nyɛm na ga, wi tɛ nɛ̀ɛ́ gun wa sɛn Tafɛt mɛ mbɛt.

¹²GASA WAN tɔ̧a, mɔ n'am dee ha̧ Tafɛt'i, nɛ́ kalemɔ‘i a̧‘m tɛ de in ye’ɛ ká bá nɛ̀ o bíí mɛ sɛnɛ mbɛt.

¹³O tua ye Jerusalɛm in o tua ko o wannu Juda, nɛ̀ wa dɔɔ o fuu-nyama zu wa ha̧ o geemɔ mɛ yiwese in nɛ̀ wa aa zɛzɛ zu wa ha̧ o ŋma sɔ̧ lɛŋ tɛ kifi duk nɛ́ o ndiŋ fara hee Tafɛt ga.»

¹⁴Jeremii pia ɗoŋ nɛ̀ Tafɛt fara nɛ̀ GASA WAN toma a̧ mɛ nɛ̀ɛ́ tɔ̧ wen oi nú-wi sɛnɛ‘i. A̧ yora nú-zala Tua ko GASA WAN, ɓɛɛ a̧ tɔ̧ wen ha̧ dukbíí lɛŋ‘e ndé:

¹⁵«Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mi tɛ tom o bɔnɛ lɛŋ n'am tɔ̧ɔ̧ nɛnɛ‘i pii zu ye’ɛ in o be ye mɛ wan nɛ̀ ya zik a̧, wen wa dee ŋgazu in am, wa kɔ̧ so mɛ zii wen nú‘m na.»