Read Northwest Gbaya JEREMII 20 Bible Online

JEREMII 20 - Northwest Gbaya bible

JEREMII 20

¹Wi-ɗafi-sɔ̧ Pasehur, bem ko Imɛr nɛ̀ duka so nɛ́ wi-duk-zu o wi-de-tom kɔ̧ Tua ko GASA WAN zia wen nɛ̀ Jeremii tɔ̧a'i lɛŋ.

²Ɓɛɛ nɛ́ mɔ'ɔ n'aa gusa Jeremii, wi-tɔ̧-wen oi nú Sɔ̧, hɛr a̧ tɛ te ká̧ nú garo ko Bɛnjamin, wan mɛ nú Tua ko GASA WAN.

³Nɛ̀ mɔ sa̧a̧ kaɗi, Pasehur tɛ̀ɛ̀ mɛ bur a̧ tɛ te yinɛ, ɓɛɛ Jeremii tɔ̧ ha̧ a̧: «GASA WAN beka sa mɛ‘e ‹Pasehur› siti ɓɔna, ɓɛɛ a̧ tɛ sa mɛ‘e ‹Mɔɔ-kíì-dam-fara-lɛŋ!›

⁴Mɔ nɛ̀ GASA WAN tɔ̧ɔ̧ nɛ́ mɔ'ɔ: Mi tɛ de mɛ nɛ̀ zɔm mɔɔ-gɔn-ɗɛɗɛ-wi wen mɛ nɛ̀ tɛ-mɛ, in wen o sɛm kɔ-mɛ mbɛt. O wisɛn ko o sɛm kɔ-mɛ tɛ gbɛ wa nɛ̀ gba-paa ɓɔn yí-mɛ́. Mi ee o be Juda er wannu Babilɔŋ ha̧ a̧ mɛ kai o ŋma yaknɛ nɛ̀ bara-biro si nù kɔ̧-a̧, ɓɛɛ a̧ gbɛɛ o ŋma yinɛ nɛ̀ gba-paa.

⁵O nyɔnɔ mɛ kɔ̧́ dam saaye’ɛ lɛŋ, o kpaamɔ kɔ̧-a̧ lɛŋ, o demɔ kɔ̧-a̧ lɛŋ, gú nɛ̀ o mbɔi ko o wannu Juda lɛŋ, mi ee er o wisɛn kɔ-wa, ha̧ wa mɛ ɓar mɔ, kai yaknɛ lɛŋ si Babilɔŋ mɛ.

⁶Ɓɛɛ nɛ̀ war kɔ-mɛ, Pasehur, mɛ in o bíí nɛ̀ ya kɔ̧́ tua kɔ-mɛ lɛŋ, wa tɛ kai'nɛ́ yaknɛ nɛ̀ bara-biro. Mɛ tɛ hɔ Babilɔŋ, ɓɛɛ nɛ́ sɛn hi̧i̧ a̧ mɛ tɛ fe, nɛ́ hi̧i̧ a̧ wa tɛ gun mɛ, mɛ in o sɛm kɔ-mɛ lɛŋ nɛ̀ mɛ dali so wen oi nú o géé-sɔ̧ ha̧ wa nɛ̀ ndela.»

⁷GASA WAN, ɛ́nɛ́ kpaa mgbélé tɛ‘m, nɛ̀ mbetɛ, mi mgbela nyɛmna. Ɛ́nɛ́ dee mɔ in am nɛ̀ ŋgai, ɓɛɛ ɛ́nɛ́ de hɔ sɔŋkur-aa. Wese lɛŋ, o bíí zɛkɛɗi nɛ‘m, wa lɛŋ mam nɛ‘m.

⁸Ŋgimbi lɛŋ n'am bé tɛ̀ɛ́ tɔ̧ wen, mi tɛ ak gbakamɔ hiɗi nɛ̀ mɔ‘e: «Dee ŋgamɔ in ɗaŋa mɔ!» Wese lɛŋ mi duk nɛ́ mɔɔ-dara, in mɔɔ-zɛkɛɗi wen wèn k’ɛnɛ n'am tɔ̧, GASA WAN.

⁹Kà‘m tɔ̧‘e ndé: «Mi beka ta mɔ wen wèn k’ɛnɛ ɓɔna, mi beka tɔ̧ wen sa nɛ̀ nin'nɛ́ ɓɔna,» wó, nɛ́ ŋgimbi'i, a̧ see-am duk gbɛŋ nɛnɛ hee wee ga, ɓɛɛ baa ŋgai kɔ‘m lɛŋ yinɛ; mi nyɔŋ nin-am tɛ mɔ‘i takaɗi!

¹⁰Mi zii kànà nɛ́ ɗaŋa wen-tɛ‘m nɛ̀ o bíí ɗaŋ nɛ̀ katɛ‘m nɛnɛ; wa sa'm'e «Mɔɔ-kíì-dam-fara-lɛŋ!» O ŋma bíí mɛ́ tɔ̧‘e: «Ɛ̀ɛ̀ gbá ndaa-a!» Ɓɛɛ o ŋma tɔ̧ɔ̧ kɔ‘i'e: «Ɛ̀ɛ̀ gbá ndaa-a ŋgaɓo!» Kóó nɛ́ o gba de sɛm kɔ‘m mbɛt kii nɛ́ o be gɔɔmɔ kɔ‘m, ha̧ wa mɛ kpa ŋma be yɔɔ-kaya kɔ‘m, ɓɛɛ sɛka wa tɔ̧a'e: «Ɛ́ɛ́ baa a̧ kaɗi! Ɛ̀ɛ̀ dé mɔ bá tɛ-a oi k’ɛɛ.»

¹¹Ɓɛɛ GASA WAN, ɛ́nɛ́ a̧a̧ katɛ‘m hee ŋga wi-biro ga; o wi-nukur'am tɛ kɔ̧ naŋ, ɓɛɛ wa beka de mɔ kɔ-wa hɔ sɔŋkur-aa na. Foe tɛ de wa, wa beka de hɔ gba̧a̧ na; kànà nɛ́ mɔɔ-búù a̧ tɛ duk zu wa kpoo nɛ kpoo. Tɛ-wi beka bi ɗoŋ mɔ‘i na.

¹²GASA WAN nɛ̀ a̧a̧ nɛ ŋgayamɔ lɛŋ, ɛ́nɛ́ nɛ̀ zɔk wi-de-mɔ nɛ̀ yuwar-a, ɛ́nɛ́ nɛ̀ zɔk kɔ̧ see-wi in taamɔ ko bíí, mi tɛ zɔk kifa-er k’ɛnɛ ha̧ wa, wen mi ee mɔ kɔ‘m lɛŋ er'nɛ́.

¹³Ɛ̀nɛ̀ bíí gima ha̧ GASA WAN, ɛ̀nɛ̀ zɔ́n GASA WAN, wen nɛ́ a̧ a̧ kpasi o wisan sɛn ɗɔɔ ŋgai ko o wi-de-ɗaŋmɔ.

¹⁴Fom a̧ bá wese nɛ̀ wa kòó nɛ‘m! Ká Sɔ̧ tok de yoŋgo zu wese nɛ̀ nàà kɔ‘m kòó nɛ‘m na.

¹⁵Fom a̧ bá wi nɛ̀ nɛ̀ɛ̀ tɔ̧ wen koa'm ha̧ dáà kɔ‘m ha̧ nɛ̀ desee ha̧ a̧‘e: «Mɛ kpaa be-wiwii!»

¹⁶Wi’ɛi a̧ dúk hee o ye nɛ̀ GASA WAN ɗaŋa, nɛ̀‘i beka nyɛm mɛ ɗafi woyo ɓɔna ga. Mɛ tutuyɛ lɛŋ a̧ a̧ zíí nɛ́ aia-nú ko bíí, ɓɛɛ mɛ bu-wese a̧ a̧ zíí nɛ́ o gayamɔ-biro.

¹⁷Wen ge Sɔ̧ de so ha̧‘m mɛ fe ɓɔn kɔ̧́ zaŋ nàà kɔ‘m na ge? Hegɔ‘i, nàà kɔ‘m tɛ̀ɛ́ duk so nɛ́ pɛsi-fio kɔ‘m, bó nɛ́ zaŋ-aa tɛ̀ɛ́ sɔk ha̧ a̧ mɛ ko'm na.

¹⁸Wen ge sa wa koa'm, ha̧‘m mɛ iŋ bɔnɛ in dita-see, in ha̧ ziimɔ mɛ ba'm ti o bíí wese lɛŋ ge?