Read Northwest Gbaya JEREMII 23 Bible Online

JEREMII 23 - Northwest Gbaya bible

JEREMII 23

¹Nɛ́ GASA WAN a̧ tɔ̧ wen’ɛ: «Bɔnɛ a̧a̧ zu o ɗaŋ wi-dai-mɔ nɛ̀ e o mɔ-dai kɔ‘m pɛsi yɔ nɛnɛ.»

²Wen nɛ̀ GASA WAN Sɔ̧ ko Israɛl tɔ̧ zu o wi nɛ̀ tɛ̀ɛ́ dai so dukbíí kɔ̧-a̧ nɛ́ mɔ'ɔ: «Ɛ́nɛ́ ee o mɔ-dai kɔ‘m duk, ɓɛɛ wa pɛsi; ɛ́nɛ́ pɛm wa nɛ̀ de-a na. Ɓɛɛ kɔ‘m, mi tɛ duk ɗoŋ‘nɛ́ mɛ usi bɔnɛ h’ɛnɛ oi ɗaŋmɔ k’ɛnɛ. Nɛ́ mi GASA WAN a̧ tɔ̧ hegɔ.

³Kɔ‘m, mi tɛ mɔi̧ o oi gíí mɔ-dai kɔ‘m nɛ̀ tɛ o nù nɛtɛ nɛtɛ n'am pɛsa so wa si sɛnɛ; mi tɛ kai wa pii kɔ̧̀ ɓoramɔ kɔ-wa nɛ̀ wa tɛ nyɛɓi sɛnɛ nɛ̀ dɔka-a.»

⁴GASA WAN tɔ̧a: «Mi tɛ e o wi-dai-mɔ nɛ̀ tɛ dai wa nɛ̀ de-a, nɛ̀ kíì beka de wa ɓɔna, wa beka zɔk bɔnɛ na, ŋma mgbara wa nɛ̀ beka kɔ̧ sara na beka bo na!»

⁵GASA WAN tɔ̧a: «Ŋma ŋgimbi mi tɛ hok ŋma mgbák bem ko David ha̧ a̧ mɛ ɔ wan, ɓɛɛ a̧ tɛ ɔ wan nɛ̀ de-a; a̧ tɛ gɔn kita nɛ̀ de-a in nɛ̀ yuwar-a tɛ nù'ɛ.

⁶Ŋgimbi-wan kɔ̧-a̧, Juda tɛ kpasi, ɓɛɛ Israɛl tɛ duk nɛ̀ de-a; nin nɛ̀ wa tɛ ha̧ ha̧ wan'i nɛ́ mɔ'ɔ: ‹GASA WAN, wi-de-mɔ nɛ̀ yuwar-a in yɛɛ!›

⁷«Nɛ́ GASA WAN a̧ tɔ̧ wen’ɛ. O bíí tɛ kan mɔ nɛ̀ nin-am tɔ̧ nɛnɛ‘e: ‹GASA WAN nɛ̀ foo o be Israɛl daŋnɛ nɛ̀ nú Egiptɛ duk kpasa!› Wese tɛ hɔ nɛ̀ wa beka kan mɔ hegɔ ɓɔna,

⁸ɓɛɛ wa tɛ kan mɔ‘e: ‹GASA WAN nɛ̀ foo o bezaŋ Israɛl daŋnɛ, ɓɛɛ kai wa nɛ̀ nù mɛ ká̧-zan-mɛ́-ŋgɔn in nɛ̀ tɛ o nù n'aa pɛsa so wa si sɛnɛ piinɛ, mɛ ya tɛ nù kɔ-wa, duk kpasa!› »

⁹See-am gɔna, tɛ‘m lɛŋ nak nak; mi duk hee wi-gbɛ-dɔ̧ɔ̧ nɛ̀ dɔ̧ɔ̧ baa ga, wen GASA WAN, wen zu o sa̧a̧ wen kɔ̧-a̧.

¹⁰Nù'ɛ duna nɛ̀ o wi-gasi-géé-sɔ̧; mɔ kɔ-wa lɛŋ nɛ́ dee ɗaŋmɔ ɓɛɛ, ŋgai tɛ-wa nɛ́ dee mɔ nɛ̀ nyɛm yí-mɔɔ-dee na; mɛ̀ nɛ́ mɔ‘i a̧ dee ha̧ fom mɛ ba nù'ɛ; gba̧a̧-mɔ nɛ̀ dee ha̧ mɔ mɛ kor dam fara-dai-mɔ lɛŋ'ɛ nɛ́ mɔ‘i.

¹¹GASA WAN tɔ̧a̧: «O wi-tɔ̧-wen oi nú Sɔ̧ in o wi-ɗafi-sɔ̧ nɛ́ o wi-ɗaŋ; mi zɔk kànà ɗaŋ kɔ-wa hɔ kɔ̧́ Tua kɔ‘m mɛ mbɛt.

¹²Mɛ̀ nɛ́ hegɔ sa yuwar kɔ-wa ba dɛ́rɛ́; wa tɛ yɔ mɔ zaŋ tum, ɓɛɛ wa yoo nù. Mi tɛ fo bɔnɛ pi̧ zu wa, ŋgimbi nɛ̀ wa tɛ kifi nú zu ɗaŋmɔ kɔ-wa.

¹³Nɛ́ mi GASA WAN a̧ tɔ̧ wen’ɛ; o wi-tɔ̧-wen oi nú Sɔ̧ mɛ Samarii n'am zɔka deemɔ kɔ-wa ha̧a̧ ɗaŋsee ha̧‘m nyɛmna: wa duka mɛ tɔ̧ wen oi nú Bal, mgbɔ nɛ̀ dukbíí kɔ‘m Israɛl yɔ nɛ̀ kaya.

¹⁴Ɓɛɛ tɛ̀ ko o wi-tɔ̧-wen oi nú Sɔ̧ mɛ Jerusalɛm, mi zɔka ŋma ŋgamɔ tɛ-wa. Wa ndak nɛ́ ɗoŋ o géé-sɔ̧, de nɛ̀ zɔm ndela ɓɔnsɛnɛ; wa ir nɛ́ o wi-de-ɗaŋmɔ mɛ de ɗaŋmɔ siti, nɛ̀ wa nyɛm mɛ e ɗaŋ kɔ-wa duk na. Kɔ‘m, deemɔ kɔ-wa yak ŋmaa in o bíí Sɔdɔm na; o bíí saaye'i hɔɔ ŋmaa in bíí Gɔmɔr.»

¹⁵Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, zu o wi-tɔ̧-wen oi nú Sɔ̧ nɔ‘i nɛ́ mɔ'ɔ: «Mi tɛ de ha̧ wa mɛ nɔ paŋmɔ, mi tɛ de ha̧ wa mɛ nɔ ɔ̧nɔ̧ wen ɗaŋmɔ gboo nɛ̀ tɛ̀ o wi-tɔ̧-wen oi nú Sɔ̧ mɛ Jerusalɛm pɛsi nɛnɛ zu nù'ɛ lɛŋ.»

¹⁶Wen nɛ̀ GASA WAN nɛ̀ a̧a̧ nɛ ŋgayamɔ lɛŋ tɔ̧ nɛ́ mɔ'ɔ: «K’ɛ́nɛ́ pɛm nɛ́ wen nɛ̀ o wi-tɔ̧-wen oi nú Sɔ̧ nɔ‘i tɔ̧ h’ɛnɛ‘i na. Wa ɔr nɛ́ ɛ́nɛ́, mɔ nɛ̀ wa tɔ̧ duk nɛ́ taamɔ kɔ-wa mɛ tɛ-wa; bo nɛ wen nɔ‘i tɛ́ nɛ̀ tɛ̀‘m na.

¹⁷Wa tɔ̧ ha̧ o wi nɛ̀ e wen kɔ‘m tɛ geemɔ‘e: ‹Ŋma mɔɔ-de'nɛ́ bo na!› Ɓɛɛ war ko o wi nɛ̀ ɓɔna tɛ dee ŋgazu siti, wa tɛ̀ɛ̀ tɔ̧ ha̧ wa'e: ‹Ŋma ŋgamɔ mɛ hɔ zu'nɛ́ bo na!›

¹⁸Nɛ́ o mgbara ó wi-tɔ̧-wen oi nú Sɔ̧ nɔ‘i a̧ zia mgbak wen mɛ nú‘m o? Wi nɛ̀ zia wen kɔ‘m sa̧ zèr nɛ́ o? Nɛ́ o'o yeŋa zèr tɛ wen kɔ‘m ɓɛɛ ká zii mgbara-a o?»

¹⁹Gba-búk ko GASA WAN, nɛ̀ duk nɛ́ ŋga nyimsea kɔ̧-a̧ hɔa; ŋga búk'i a̧ ɓoɓi'i, ɓoɓi nɛnɛ zu o wi nɛ̀ wen baa.

²⁰Nyimsea ko GASA WAN beka ga̧ na hɔ ŋgimbi n'aa dee kànà mɔ n'aa taa so mɛ de'i. Nɛ́ ɗoŋ-aa'i tɛ ŋma ŋgimbi ɛ̀nɛ̀ tɛ zii nɛ̀ mgbara-a.

²¹«Mi tom kɔ‘m o wi-tɔ̧-wen oi nú Sɔ̧ nɔ‘i na, ɓɛɛ wa a̧ nɛ́ kɔ-wa'i; mi tɔ̧ kɔ‘m ŋma wen ha̧ wa na mbɛt, ɓɛɛ wa a̧ tɔ̧ kɔ-wa wen yaknɛ‘i!

²²Kà wa a̧ zii so mgbák wen kɔ‘m gáà, wa tɛ̀ɛ́ tɔ̧ so nɛ́ wen kɔ‘m'i ha̧ dukbíí kɔ‘m. Wa tɛ̀ɛ́ de so ha̧ wa mɛ e ɗaŋ naŋanɔ in o ɗaŋ deemɔ kɔ-wa duk.»

²³«Mi nɛ́ Sɔ̧ nɛ̀ zɔk mɔ ɓɔn ti'm hɛ̧ɛ̧ ɓɛɛ nde? Bo nɛ mi nɛ́ Sɔ̧, Wan nɛ zɔk mɔ nɛ̀ nyɛi̧a-a yaknɛ sɔ̧i̧i̧ na nde?

²⁴GASA WAN tɔ̧a: Kóó nɛ́ ŋma bíí a̧ hu̧si sɛn ŋma fara mɛ, mi nyɛm mɛ zɔk a̧ na nde? Nɛ́ GASA WAN a̧ tɔ̧. Bo nɛ mi duna mbɔɗɔnu in yiwese mbɛt na nde?»

²⁵«Mi zia mɔ nɛ̀ o wi-tɔ̧-wen oi nú Sɔ̧ tɔ̧ de nɛ̀ ndela nɛ̀ nin-am'e, wi ɔɔ zu, wi ɔɔ zu wo'i!

²⁶Wa tɛ kaɗi ɔra dukbíí kɔ‘m nɛ̀ géé wen mɛ gese ge? Nɛ́ ge taamɔ ge a̧ a̧a̧ zu o wi-tɔ̧-wen oi nú Sɔ̧ nɔ'ɔ nɛ̀ tɔ̧ wen ndela nɛnɛ'ɛ ge? Wa gɔn nɛ̀ géé ta géè.

²⁷Wa ta kɔ-wa'e ndé, o zu nɔ‘i nɛ̀ wa we ɗoŋ-aa ha̧ o ŋmaa'i, mɛ̀ nɛ́ wen dea-a ha̧ tɛ dukbíí kɔ‘m mɛ bi ɗoŋ-am, hee mɔ'ɔ nɛ̀ tɛ o dáà kɔ-wa bìì so nɛ̀ ɗoŋ nin-am wen zu Bal kɔ-wa ga.

²⁸Ka wi-tɔ̧-wen oi nú Sɔ̧ nɛ́ ɔɔ zu kɔ‘i, ɓɛɛ a̧ a̧ tɔ̧́ kànà nɛ́ zu kɔ̧-a̧‘i! Ɓɛɛ wi nɛ̀ a̧a̧ nɛ̀ wen kɔ‘m, a̧ a̧ tɔ̧́ kànà nɛ́ wen kɔ‘m'i!» Nɛ́ GASA WAN a̧ tɔ̧ wen'i. «Ka'i zaŋ zɔ̧ nɛ̀ gba̧a̧ alkamaari na!» GASA WAN'e ndé,

²⁹Wen kɔ‘i hɔɔ ŋmaa in wee ká bá nɛ̀ dɔnɔ-mbaŋ-ta.

³⁰GASA WAN'e ndé: «Mi tɛ de ŋmaa in o wi-tɔ̧-wen oi nú Sɔ̧ nɛ̀ ɗaŋ wen kɔ‘m nɛ̀ nú ŋmaa nɛnɛ!»

³¹GASA WAN tɔ̧a: «Mi tɛ de ŋmaa in o wi-tɔ̧-wen oi nú Sɔ̧ nɛ̀ zaŋ wen kɔ‘m nɛ̀ ŋmaa in wen kɔ-wa, tɔ̧ nɛ̀ o polom-polom-wen.»

³²GASA WAN hee ndé: «Mi tɛ de ŋmaa in o wi-tɔ̧-wen oi nú Sɔ̧ nɛ̀ ɔ nɛ́ géé o zu-ɔr-mɔ, ɓɛɛ wa wee ɗoŋ-aa nɛ̀ ndela, tɔ̧ nɛ̀ géé ya-zu-wen nɛnɛ, yɔ nɛ̀ o bíí kɔ‘m. Kɔ‘m, mi tom wa na, mi e ŋma wen nú wa na mbɛt. Mɔ nɛ̀ wa de'i gbak dukbíí kɔ‘m kóó tikiɗi na.»

³³Nɛ́ mɔ'ɔ nɛ̀ GASA WAN tɔ̧ɔ̧ ha̧ Jeremii: «Kà ŋma bíí mgbara o wi nɔ'ɔ, kóó nɛ́ ŋma wi-tɔ̧-wen oi nú Sɔ̧, kóó nɛ́ ŋma wi-ɗafi-sɔ̧ a̧ aka mɛ‘e: ‹Tui ko GASA WAN nɛ́ ge nde?› Mɛ̀ tɔ̧́ ha̧ wa'e: Tui ko GASA WAN nɛ́ ɛ́nɛ́ nɛ̀ tɛ‘nɛ́‘i, ɓɛɛ nɛ́ mɔ‘i sa'm tɛ siŋ‘nɛ́ a̧ nù.

³⁴Kóó nɛ́ wi-tɔ̧-wen oi nú Sɔ̧, kóó nɛ́ wi-ɗafi-sɔ̧, kóó so nɛ́ ŋma géé bíí mgbara dukbíí kɔ‘m a̧ tɔ̧ wen zu tui ko GASA WAN, mi tɛ usi bɔnɛ ha̧ wi’ɛi gú nɛ̀ o bíí kɔ̧̀ kira kɔ̧-a̧ lɛŋ.

³⁵Wen nɛ̀ ɛ́nɛ́ tɛ ak ŋmaa sɛnɛ in o ŋmaa nɛ́ mɔ'ɔ: ‹Kifa-nú ko GASA WAN hee ge? Mɔ nɛ̀ GASA WAN tɔ̧ nɛ́ ge?›

³⁶Ɓɛɛ nɛ̀ war ko tui ko GASA WAN, k’ɛ́nɛ́ sa nin mɔ‘i ɓɔna. Tui ko o ndé tɛ duk nɛ́ wen kɔ̧-a̧ mɛ tɛ-a, wen ɛnɛ ɗaŋ nɛ́ wen ko Sɔ̧ wan nɛ duk kpasa, GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ k’ɛɛ.

³⁷Mɔ nɛ̀ mɛ tɛ tɔ̧ ha̧ wi-tɔ̧-wen oi nú Sɔ̧ nɛ́ mɔ'ɔ: GASA WAN kifa nú ha̧ mɛ hee ge? Mɔ nɛ̀ GASA WAN tɔ̧ nɛ́ ge?

³⁸GASA WAN'e: K’ɛ̀nɛ̀ nɛ́ tɔ̧ɔ̧ wen zu tui ko GASA WAN n'am dora'nɛ́ tɛ tɔ̧a-a'i, nɛ̀ mbetɛ, mi tɔ̧ h’ɛnɛ,

³⁹mi tɛ ba'nɛ́ hee mɔ'ɔ nɛ̀‘i ba nɛ̀ tui’ɛ ga, ɓɛɛ mi siŋa'nɛ́ pi̧ nù, ɛnɛ in ye n'am ha̧a̧ h’ɛnɛ in o dáà k’ɛnɛ.

⁴⁰Ɓɛɛ mi tɛ pi̧ búù zu'nɛ́ nɛ̀ tɛ duk ɓɔnsɛnɛ; ziimɔ k’ɛnɛ beka kaɗi na; ɓɛɛ tɛ-wi beka bi ɗoŋ-aa na mbɛt.»