Read Northwest Gbaya JEREMII 24 Bible Online

JEREMII 24 - Northwest Gbaya bible

JEREMII 24

¹GASA WAN dee ha̧‘m mɛ zɔk gɛsɛ waya-mbɔra yiitoo nɛ̀ ya katɛ ŋmaa ti Tua ko GASA WAN. Mɔ‘i dee so ɗoŋ ŋgimbi nɛ̀ Nabukɔdɔnɔsɔr wannu Babilɔŋ baa so nɛ̀ Yekonia bem ko Joakim wannu Juda nɛ̀ bara-biro yaknɛ nɛ̀ Jerusalɛm si nù kɔ‘i. A̧ kaia so Yekonia in o gasawi kɔ‘i, ká bá nɛ̀ o wi-dui-mɔ gú nɛ̀ o mgbák wi-iŋ-tom lɛŋ si sɛn Babilɔŋ.

²Ɛ̧ɛ̧ gɛsɛ kpɔk’ɛ duna so nɛ̀ o gba de ɔ̧ɔ̧ nyɔ̧ɔ̧ waya-mbɔra, ɓɛɛ ɓii ɛ̧ɛ̧ kpɔk’ɛ duna so kɔ‘i nɛ̀ o ɗaŋ waya-mbɔra nɛ̀‘i nyɛm mɛ nyɔŋ na.

³Ɓɛɛ GASA WAN tɔ̧ ha̧‘m: «Nɛ́ ge a̧ mɛ zɔk ge, Jeremii?» Mi kifa nú: «Mi zɔk nɛ o waya-mbɔra, o wan nɛ̀ duk nɛ̀ de-a nyɛmna, in o wan nɛ̀ de na nɛ̀‘i nyɛm mɛ nyɔŋ na.»

⁴Nɛ́ mɔ'ɔ nɛ̀ GASA WAN tɔ̧ɔ̧ wen ha̧‘m hee mɔ'ɔ ga:

⁵«Tɔ̧ɔ̧-wen ko GASA WAN, Sɔ̧ ko Israɛl nɛ́ mɔ'ɔ. Hee mɔ'ɔ nɛ̀‘i zɔ́k nɛ̀ o de waya-mbɔra nɔ'ɔ ga, mɛ̀ nɛ́ hegɔ a̧‘m zɔ́k nɛ̀ o be Juda n'am ndaka tɛ nù'ɛ yinɛ, ɓɛɛ nɛ̀ wa kaia nɛ̀ bara-biro yaknɛ si nù ko o be Kaldee.

⁶Yí‘m tɛ duk ɓɔn ɗoŋ wa, ɓɛɛ mi tɛ kai wa pii ɗoŋ tɛ nù'ɛ. Mi tɛ mbo wa, ɓɛɛ mi beka gbin wa a nù ɓɔna. Mi tɛ gun wa, ɓɛɛ mi beka zuɗi wa yinɛ ɓɔna.

⁷Mi tɛ ha̧ iŋa-mgbara-mɔ ha̧ wa, nɛ̀ tɛ de ha̧ wa mɛ iŋ am; mi nɛ́ GASA WAN, wa tɛ duk dukbíí kɔ‘m, ɓɛɛ kɔ‘m, mi tɛ duk nɛ́ Sɔ̧ kɔ-wa. Wa tɛ pii ɗoŋ tɛ‘m nɛ̀ see-wa lɛŋ.»

⁸GASA WAN tɔ̧a: «Ɓɛɛ mɔ nɛ̀‘i de nɛ̀ o ɗaŋ waya-te-mbɔra nɛ̀‘i nyɛm mɛ nyɔŋ na, nɛ́ mɔ‘i a̧‘m tɛ de nɛ̀ Sedesias wannu Juda, o gasawi kɔ̧-a̧ in oi bíí Jerusalɛm, in oi o bíí lɛŋ nɛ̀ ɓɔna tɛ nù'ɛ, ká bá nɛ̀ o wan nɛ ɓɔna nú Egiptɛ mɛ mbɛt.

⁹Mi tɛ de mɔ ba nú-wa nɛ̀ tɛ pi̧ kíì tɛ o bíí zaŋnu lɛŋ; ɓɛɛ fara lɛŋ n'am tɛ pɛsi wa si sɛnɛ, o bíí tɛ zɛkɛɗi wa, e nɛ̀ wa nɛ̀ tua-wen, ɓɛɛ o dɔka bíí tɛ da̧ ŋmaa, be nɛ̀ mɔ a zu o ŋmaa nɛ̀ nin-wa.

¹⁰Mi tɛ pi̧ gba-paa zu wa, kaɓa tɛ ba wa, in ŋga zɛɛ-geŋa tɛ kum wa yinɛ zu nù n'am ha̧a̧ so ha̧ wa in o dáà kɔ-wa mbɛt'i.»