Read Northwest Gbaya JEREMII 25 Bible Online

JEREMII 25 - Northwest Gbaya bible

JEREMII 25

¹Wen nɛ̀ GASA WAN ee nú Jeremii mɛ tɔ̧ ha̧ o be Juda tɛ naar pɛ-wan ko Yoyakim bem ko Josias wannu Juda nɛ́ mɔ'ɔ. Duka nɛ́ kuti pɛ-wan ko Nabukɔdɔnɔsɔr wannu Babilɔŋ.

²Wen'i nɛ́ wen nɛ̀ Jeremii wi-tɔ̧-wen oi nú Sɔ̧ tɔ̧ɔ̧ ha̧ o bíí Juda in o bíí saaye Jerusalɛm lɛŋ,

³ku̧u̧naŋ-a tɛ ɓu-zua-taar pɛ-wan ko Josias bem ko Amɔŋ wannu Juda hɔ sɔsɔɔ. «Kinii dee pɛ ɓu-yiitoo-zua-taar a̧‘m tɔ̧ nɛ̀ wen nɛ̀ GASA WAN ee nú‘m mɛ tɔ̧ h’ɛnɛ takaɗi, ɛ́nɛ́ zii na.

⁴GASA WAN toma o wi-de-tom kɔ‘i, o wi-tɔ̧-wen oi nú Sɔ̧ lɛŋ h’ɛnɛ takaɗi, ɛ́nɛ́ zii wen nú-wa na, ɛ́nɛ́ mbo zu tɛ wen kɔ-wa na mbɛt.

⁵A̧ tɔ̧ɔ̧ so h’ɛnɛ‘e, ɛ̀nɛ̀ kpáí ɗaŋ duka-a k’ɛnɛ, ɛ̀nɛ̀ kpáí ɗaŋ er deemɔ k’ɛnɛ, ɓɛɛ ɛ́nɛ́ tɛ ɓɔn tɛ nù nɛ̀ GASA WAN ha̧a̧ h’ɛnɛ in o dáà k’ɛnɛ nɛ̀ ku̧u̧naŋ-a mɛ tɛnɛ, ɓɛɛ ɛ́nɛ́ tɛ ya hi̧i̧ kpoo nɛ kpoo.

⁶K’ɛ́nɛ́ nɛ́ ɗoŋ o ŋma sɔ̧, mɛ gu nù ti wa gasi nɛ̀ wa na; ɛ̀nɛ̀ káɗí tu̧u̧ see-am nɛ̀ o ɗaŋ deemɔ k’ɛnɛ, ɓɛɛ mi beka pi̧ ŋma ŋgamɔ zu'nɛ́ na.

⁷Nɛ́ GASA WAN a̧ tɔ̧ wen’ɛ. Ɛ́nɛ́ zii wen nú‘m na, ɓɛɛ ɛ́nɛ́ tu̧ nɛ́ see-am, dak nɛ̀ bɔnɛ pi̧ zu'nɛ́ nɛ̀ tɛ‘nɛ́ nɛ̀ o ɗaŋ deemɔ k’ɛnɛ.

⁸«Nɛ́ zu mɔ‘i, ɓɛɛ sa GASA WAN nɛ̀ a̧a̧ nɛ̀ ŋgayamɔ lɛŋ tɔ̧‘e: Hee mɔ'ɔ n’ɛ̀nɛ̀ mbo zu tɛ wen kɔ‘m na ga,

⁹mi tɛ de ha̧ dukbíí mɛ ká̧-zan-mɛ́-ŋgɔn in Nabukɔdɔnɔsɔr wannu Babilɔŋ, wi-de-tom kɔ‘m, mɛ kur; ɓɛɛ mi tɛ de ha̧ wa mɛ tik zu nù'ɛ gú nɛ̀ o bíí sɛnɛ lɛŋ, ká bá nɛ̀ o tugun bíí nɛ̀ ya zik wa lɛŋ. Mi tɛ kum'nɛ́ in wa lɛŋ, ɓɛɛ nù k’ɛnɛ tɛ kifi nɛ́ géé bɛɛ-oi kpoo nɛ kpoo, ɓɛɛ o bíí lɛŋ nɛ bé tɛ̀ɛ́ ɓir fara'i tɛ e er nú tɔ̧ nɛnɛ‘e: Ho! Ɛ̧ɛ̧ mɔ'ɔ nɛ́ gba gee! Nɛ́ mi GASA WAN a̧ tɔ̧ wen’ɛ.

¹⁰Wi beka zii géé gima-gbaŋa, kóó hiɗimɔ-tortɛ in nyɛŋɛ kà bó nɛ̀ yili-mgbɔɔ-kóò sɛn fara k’ɛnɛ na, ɓɛɛ ger mɔɔ-hɔn-fuu k’ɛnɛ tɛ kpe, wee lamba k’ɛnɛ tɛ bi mbɛt.

¹¹Nù‘i nɛ̀ oi-aa lɛŋ tɛ kifi nɛ́ bɛɛ-oi in ŋga-gbárà, ɓɛɛ o tugun bíí nɔ'ɔ tɛ de tom-bara ha̧ wannu Babilɔŋ tɛ pɛ ɓu-mɔɔrɔ-ɗoŋ-yiitoo.

¹²Nɛ́ GASA WAN a̧ tɔ̧ wen’ɛ. Ɓɛɛ ŋgimbi nɛ̀ pɛ ɓu-mɔɔrɔ-ɗoŋ-yiitoo nɔ‘i bé tɛ̀ɛ́ dam kaɗi, mi tɛ kifi er ha̧ wannu Babilɔŋ in tugun bíí‘i ká bá nɛ̀ nù ko o be Kaldee zu o ɗaŋ gbɛɛ-zu kɔ-wa. Mi tɛ de ha̧ fara'i mɛ kifi duk nɛ́ ŋga-gbárà kpoo nɛ kpoo.

¹³Mi tɛ de ha̧ ŋgamɔ n'am tɔ̧ɔ̧ wen-aa mɛ hɔ gba̧a̧ zu nù'ɛ. Wen'i lɛŋ yɔra zaŋ kalata’ɛ, ɓɛɛ nɛ́ wen'i a̧ Jeremii tɔ̧ɔ̧ zu o tugun bíí lɛŋ.

¹⁴Ɓɛɛ nɛ̀ war ko o bíí Babilɔŋ, wa tɛ de bara ha̧ o ŋma zɔm gasa tugun bíí in o ŋma ŋga wannu; mi tɛ de ha̧ ɗaŋ tom nɛ̀ er-wa dea mɛ tik zu wa si ɗoŋ woyo.»

¹⁵Wen nɛ̀ GASA WAN Sɔ̧ ko Israɛl tɔ̧ɔ̧ ha̧‘m nɛ́ mɔ'ɔ: «Mɛ bá ɗele-dɔ̧ɔ̧ nɛ̀ duna nɛ̀ nyimsea kɔ‘m, ɓɛɛ mɛ̀ nɛ́ɛ̀ ha̧ ha̧ o tugun bíí nɔ'ɔ lɛŋ n'am tom mɛ sitɛ wa’ɛ.

¹⁶Wa tɛ nɔ, zu-wa tɛ zik, ɓɛɛ naŋ-wa tɛ mbali ŋmaa tɛ zɔka gba-paa n'am tɛ pi̧ mgbara wa.»

¹⁷Mi baa ɗele'i er GASA WAN, ɓɛɛ mi nɛ́ɛ̀ ha̧ ha̧ o tugun bíí lɛŋ n'aa toma'm sitɛ wa.

¹⁸Mi ee dɔ̧ɔ̧‘i nú Jerusalɛm in o gasa ye nù Juda ká bá nɛ̀ o gasawi lɛŋ, wen dea-a ha̧ nù kɔ-wa mɛ ɗaŋ kifi géé bɛɛ-oi, nɛ̀ tɛ de ha̧ o wi-ɓir-war nɛ̀ tɛ hɔ hi̧i̧ mɛ mbɛr yí-see nɛ̀ kíì; fara'i tɛ duk nɛ́ mɔɔ-búù nɛ̀ o bíí tɛ ba e tɛ mɔɔ-fom ŋmà-wí. Nɛ́ mɔ‘i ɛ̀ɛ̀ zɔk yi-ɛɛ sɔsɔɔ‘i!

¹⁹Ɓɛɛ kalemɔ‘i tik zu o ŋma tugun bíí mbɛt: Faraɔŋ, wannu Egiptɛ, in o gasawi kɔ‘i ká bá nɛ̀ o be-wan in o bíí nù kɔ̧-a̧ lɛŋ;

²⁰o gɔni-dùk nɛ̀ zaŋa ŋmaa, o wannu Us lɛŋ, in o wannu Filistii lɛŋ, wannu Askelɔŋ, wannu Gaza, wannu Ekrɔŋ in o oi bíí Asdod;

²¹o be Edɔm, o be Mɔab in o be Amɔŋ;

²²o wannu Tir in o wannu Sidɔŋ lɛŋ, o wannu mɛ kur gba-tɔp lɛŋ,

²³o be saaye Dedan, Tema, Buz in o wi-kpui-ka̧-yí lɛŋ nɛ̀ ɔ ŋga-gbárà mɛ;

²⁴o wannu Arab lɛŋ in o wannu ko o gɔni-dùk nɛ̀ zaŋa ŋmaa nɛ̀ ɔ ŋga-gbárà mɛ;

²⁵o wannu Zimri, o wannu Elam in o wannu Mɛd lɛŋ;

²⁶o wannu mɛ ká̧-zan-mɛ́-ŋgɔn lɛŋ, o wan nɛ̀ nyɛi na, in o wan nɛ̀ ɔ nyɛi̧a mbɛt, ká bá nɛ̀ o mɔɔ-wan zu nù lɛŋ hegɔ ɗoŋ ŋmaa, ɗoŋ ŋmaa nɛnɛ, ɓɛɛ nɛ́ wannu Sesak[22] a̧ tɛ nɔ dɔ̧ɔ̧‘i nɛ̀ sɔŋkur-aa.

²⁷Nɛ mɔ'ɔ nɛ GASA WAN tɔ̧ɔ̧ ha̧‘m: «Mɛ tɛ tɔ̧ ha̧ wa: Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Ɛ̀nɛ̀ nɔ́ dɔ̧ɔ̧'ɛ ha̧ gbɛ‘nɛ́, ɛ̀nɛ̀ ɔ̧́í̧, ɛ̀nɛ̀ yó nù, ɓɛɛ ɛnɛ beka kur na ti gba-paa n'am tɛ pi̧ mgbara'nɛ'ɛ.

²⁸Kà wa nɛ́ bɛ̧ɛ̧ baa ɗele-dɔ̧ɔ̧'ɛ er-mɛ mɛ nɔ, ɓɛɛ mɛ̀ tɔ̧́ ha̧ wa'e, GASA WAN nɛ̀ a̧a̧ nɛ̀ ŋgayamɔ lɛŋ tɔ̧a'e, ɛnɛ tɛ nɔ kànà.

²⁹GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: Mi tɛ ku̧naŋ-a nɛ̀ ɗaŋa ye nɛ̀‘i saa so nin-am sɛnɛ, ɓɛɛ ɛnɛ tɔ̧ k’ɛnɛ‘e mɔ‘i tɛ hɔ yɔɔ zu'nɛ́? Bo na, ɛnɛ beka gbo ɗɔɔ-aa na, wen mi foo gba-paa pi̧ zu o bíí zaŋnu lɛŋ kaɗi!

³⁰Ɓɛɛ kɔ-mɛ, mɛ̀ tɔ̧́ o wen nɔ'ɔ oi nú‘m lɛŋ si zu wa, mɛ̀ tɔ̧́ ha̧ wa'e ndé: «GASA WAN mgbimgbi nɛ̀ ŋgɔn mɛ tɛnɛ; a̧ duk kɔ̧̀ sa̧a̧ tua kɔ̧-a̧ mɛ tuɓi nɛnɛ. A̧ a̧ tuɓi'i nɛ̀ mbetɛ, a̧ a̧ tuɓi si zu nù kɔ̧-a̧‘i, zu o bíí zu nù lɛŋ hee gayamɔ ko o wi-vati-dɔ̧ɔ̧ in o ŋmaa mɛ e see tɛ tom ga.

³¹Gitimɔ‘i hɔɔ nduti-nù lɛŋ; GASA WAN ku̧u̧ naŋ gɔna kita zu o tugun bíí; a̧ gɔn nɛ kita zu mur-tɛ lɛŋ, ɓɛɛ wi nɛ̀ kita tika tɛ fe nú gba-paa. Nɛ́ GASA WAN a̧ tɔ̧ɔ̧ hegɔ.»

³²Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «Ŋgamɔ‘i tɛ́ nɛ̀ ɗoŋ o dukbíí kpɔk kpɔk dam lɛŋ; gasa gba-búk kura nɛ̀ nduti-nù mɛ.»

³³Wese'i, ku̧u̧naŋ-a nɛ̀ zu-zan gɔm ndaa-zan mɛ, wi beka hi̧i̧ fio ko o bíí nɛ̀ GASA WAN kuma na, wi beka kai wa mɛ gun na mbɛt; wa tɛ ɓuk kifi nɛ́ géé ɓukamɔ mbulɛɛ.

³⁴Ɛ̀nɛ̀ gɔ́fí mɔ, ɛ́nɛ́ o gasawi, ɛ̀nɛ̀ híɗí mɔ, ai nɛ̀ nú. Ɛ̀nɛ̀ kín tɛ‘nɛ́ nɛ̀ nù, ɛ́nɛ́ o wi-dai-mɔ! Ŋgimbi k’ɛnɛ hɔɔ ha̧ wa mɛ gɔn'nɛ́ kaɗi; ɛ́nɛ́ tɛ yambali ɗaŋ hee o gba de nyɛk nɛ̀ tik nù ɓɛɛ ká gbaa ɗɛ́sɛ́-ɗɛ́sɛ́'ɛ ga.

³⁵Fara-hu̧sa-a bo wen o wi-dai-mɔ ɓɔna; fara-yu-mɔ si sɛnɛ bo wen wa ɓɔna mbɛt.

³⁶Wi zii nɛ́ hiɗimɔ in o gɔfamɔ ko o wi-dai-mɔ, wen GASA WAN ɗaŋ nɛ́ fara-dai-mɔ kɔ-wa.

³⁷O ɓoramɔ nɛ̀ duna so nɛ̀ o mɔ-dai ya sélélé ɗɔɔ ŋga nyimsea ko GASA WAN.

³⁸Wi tɛ tɔ̧‘e mɔ‘i hɔɔ ŋmaa in ŋma dila nɛ̀ kura yak e di̧i̧ kɔ‘i duk ga. Nù kɔ-wa ɗaŋa kifi nɛ́ ŋga-gbárà tɛ gba-paa nɛ̀ de ko na, ɗɔɔ ŋga nyimsea ko GASA WAN.