Read Northwest Gbaya JEREMII 26 Bible Online

JEREMII 26 - Northwest Gbaya bible

JEREMII 26

¹Tɛ ku̧u̧naŋ ŋgimbi nɛ̀ Yoyakim, bem ko Josias ɔɔ nɛ̀ wan zu nù Juda, a̧ GASA WAN tɔ̧ɔ̧ nɛ̀ wen’ɛ ha̧ Jeremii:

²«Nɛ́ mi GASA WAN a̧ tɔ̧ wen’ɛ ha̧ mɛ: Mɛ̀ yór nú zala Tua ko GASA WAN, ɓɛɛ mɛ̀ tɔ̧́ wen lɛŋ n'am tɛ tɔ̧ ha̧ mɛ‘i zu o bíí saaye Juda lɛŋ nɛ̀ tɛ́ tɛ̀ mɛ gu nù kɔ̧́ Tua ko GASA WAN, ɓɛɛ ká mɛ e ŋma wen kpɔk ɓɔn na.

³Ŋmafara wa tɛ zii wen'i, ɓɛɛ kà wa kpɔk kpɔk nɛ́ ee ɗaŋ yuwar nɛ̀ wa ba'i dúk, ɓɛɛ mi tɛ e taamɔ ŋgamɔ n'am taa so mɛ pi̧ zu wa'i dúk.

⁴«Mɛ tɛ tɔ̧ ha̧ wa'e mɔ nɛ̀ GASA WAN tɔ̧ nɛ́ mɔ'ɔ: K’ɛ̀nɛ̀ mbó zu tɛ usamɔ kɔ‘m h’ɛnɛ na,

⁵k’ɛ̀nɛ̀ zíí wen ko o wi-de-tom kɔ‘m ná, o wi-tɔ̧-wen oi nú Sɔ̧ n'am tom h’ɛnɛ ɗoŋ ŋmaa ɗoŋ ŋmaa, n’ɛ̀nɛ̀ zii wen nú wa na'i,

⁶mi tɛ gbin tua’ɛ a nù hee mɔ'ɔ n'am dee so in Silo ga, ɓɛɛ ye’ɛ tɛ duk nɛ́ mɔɔ-búù nɛ̀ o tugun bíí zu nù lɛŋ tɛ ba e tɛ mɔɔ-fom ŋmà-wí.»

⁷O wi-ɗafi-sɔ̧, o wi-tɔ̧-wen oi nú Sɔ̧ in o bíí lɛŋ zii so nɛ́ wen ko Jeremii ŋgimbi n'aa tɔ̧ nɛ̀ o wen nɔ'ɔ kɔ̧́ Tua ko GASA WAN.

⁸Ŋgimbi nɛ̀ Jeremii kaɗa tɔ̧ɔ̧ wen nɛ̀ GASA WAN tɔ̧ɔ̧ ha̧ a̧ mɛ tɔ̧ ha̧ dukbíí nɛ̀ oi-aa lɛŋ kaɗi, o wi-ɗafi-sɔ̧ in o wi-tɔ̧-wen oi nú Sɔ̧ ká bá nɛ̀ dukbíí lɛŋ mɔi̧a kɛr a̧ e see-a kɔ̧́ Tua ko GASA WAN, ɓɛɛ tik tɛ a̧ tɔ̧ nɛnɛ‘e: «Kɔ-mɛ nɛ́ fio ɓɛɛ! Héé ge mɛ tɛ tɔ̧ wen nɛ̀ nin GASA WAN'e, Tua’ɛ tɛ ɗaŋ hee Silo ga, ɓɛɛ ye’ɛ tɛ gbin, nɛ̀ o bíí tɛ kur sɛnɛ pɛsi yak lɛŋ ge?»

¹⁰Ŋgimbi nɛ̀ o gasawi ko o bíí Juda zia mɔ‘i, ɓɛɛ wa daŋ nɛ̀ kɔ̧́ tua-wan si kɔ̧́ Tua ko GASA WAN, ba fara sɛn nú Mbe Nú Tua ko GASA WAN.

¹¹Nɛ́ mɔ'ɔ nɛ̀ o wi-ɗafi-sɔ̧ in o wi-tɔ̧-wen oi nú Sɔ̧ tɔ̧ɔ̧ ha̧ o gasawi in dukbíí lɛŋ‘e: «Mɔ nɛ̀ nyɛma wen wi’ɛ nɛ́ fio ɓɛɛ, wen a̧ tɔ̧ nɛ́ o ɗaŋ wen n’ɛnɛ zia nɛ̀ zer'nɛ́ mbɛt zu ye’ɛ.»

¹²Ɓɛɛ Jeremii tɔ̧ ha̧ o gasawi in dukbíí lɛŋ: «Nɛ́ GASA WAN a̧ tom am ha̧‘m mɛ tɔ̧ wen n’ɛnɛ zia'i zu Tua’ɛ in zu ye’ɛ oi nú-a.

¹³Ɓɛɛ kinii, ɛ̀nɛ̀ kpáí yuwar duka-a k’ɛnɛ, ɛ̀nɛ̀ é er ɗaŋ deemɔ k’ɛnɛ duk; ɛ̀nɛ̀ zíí sara nɛ̀ GASA WAN Sɔ̧ k’ɛnɛ sa nɛ̀ ɛnɛ, ɓɛɛ a̧ tɛ e ŋgamɔ n'aa taa so mɛ de in'nɛɛ‘i duk.

¹⁴Kɔ‘m, kinii mi a̧a̧ er'nɛ́. Mɔ n’ɛnɛ kɔ̧ɔ̧ mɛ de nɛ‘m lɛŋ, ɛ̀nɛ̀ dé, kà yuwar-a á̧ sa̧a̧ tɛ‘nɛ́.

¹⁵Ɓɛɛ ɛ̀nɛ̀ íŋ‘e ndé, k’ɛ̀nɛ̀ nɛ́ gbɛa'm, ɓɛɛ ɛ́nɛ́ in ye’ɛ gú nɛ̀ o bíí nɛ̀ ɔ sɛnɛ lɛŋ tɛ tui tɔk tɛ-wi nɛ̀ duk zóóŋ géè, wen nɛ́ GASA WAN a̧ toma'm tɛnɛ pii tɛ‘nɛ́ ha̧‘m mɛ tɔ̧ wen nɔ'ɔ lɛŋ h’ɛnɛ mɛ zii nɛ̀ mbetɛ.»

¹⁶Ɓɛɛ nɛ́ mɔ'ɔ nɛ̀ o gasawi in dukbíí nɛ̀ oi-aa lɛŋ tɔ̧ɔ̧ ha̧ o wi-ɗafi-sɔ̧ in o wi-tɔ̧-wen oi nú Sɔ̧: «Wi’ɛ beka fe ɓɔna; wen wen n'aa tɔ̧ɔ̧ h’ɛɛ, a̧ tɔ̧ɔ̧ nɛ̀ nin GASA WAN Sɔ̧ k’ɛɛ.»

¹⁷O ŋma kuti-wi tɛ nù‘i kura, ɓɛɛ tɔ̧ ha̧ giiwi lɛŋ nɛ̀ mɔi̧a:

¹⁸«Michee be Mɔrɛsɛt nɛ̀ dee so tom tɔ̧ɔ̧-wen oi nú Sɔ̧ ŋgimbi ko Ezekias wannu Juda tɔ̧ɔ̧ so ha̧ giiwi Juda lɛŋ‘e: Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: ‹Siɔŋ tɛ kifi fara-wa-fɔ, Jerusalɛm tɛ kifi bɛɛ-oi, ɓɛɛ zu kaya nɛ̀ Tua ko GASA WAN duk sɛnɛ tɛ kifi nɛ́ da̧a̧-mɔ.›

¹⁹Ezekias wannu Juda in dukbíí kɔ‘i gbɛɛ so a̧? Bo nɛ wa yuu kíí GASA WAN nɛ̀ ha̧a̧ ga̧a̧-see ha̧ a̧ na nde? GASA WAN ee ŋgamɔ n'aa taa so mɛ de in wa'i duk. Ɓɛɛ k’ɛ́ɛ́, k’ɛ̀ɛ̀ gbɛ wi’ɛ pi̧ nù sɔɔ géè, ɛɛ tɛ kpa bɔnɛ!»

²⁰Ŋma bíí mbɛt duka so tɔ̧ nɛ̀ wen oi nú GASA WAN; nin-a nɛ́ Uria bem ko Semaya be Kiriat-Yearim. A̧ tɔ̧ɔ̧ so wen mbɛt zu ye Jerusalɛm in zu nù Juda hee mɔ'ɔ nɛ̀ Jeremii tɔ̧a'i ga.

²¹Wannu Yoyakim in o gasa wi-biro kɔ‘i lɛŋ gú nɛ̀ o gasawi kɔ̧-a̧ zia wen nɔ‘i, ɓɛɛ wa kii mɛ gbɛ a̧. Nɛ̀ Uria zia mɔ‘i, kíì dee a̧, ɓɛɛ a̧ yu mɔ yak si Egiptɛ.

²²Ɓɛɛ nɛ́ mɔ'ɔ nɛ̀ wannu Yoyakim toma Elnataŋ bem ko Akbɔr in o ŋma bíí nɛnɛ ɗoŋ-aa si Egiptɛ mɛ.

²³Wa baa Uria nɛ̀ nú Egiptɛ, mgbɔ a̧ piinɛ ha̧ wannu Joakim, ɓɛɛ a̧ gbɛ a̧, ɓɛɛ ba wɔr-aa pi̧ kɔ̧́ kɔ̧̀ fara-gun o géé bíí.

²⁴Ɓɛɛ ko Jeremii, nɛ́ Ahikam bem ko Safaŋ a̧ yora ɗoŋ-aa, ɓɛɛ o bíí kpa yuwar mɛ gbɛ a̧ na.