Read Northwest Gbaya JEREMII 27 Bible Online

JEREMII 27 - Northwest Gbaya bible

JEREMII 27

¹Tɛ ku̧u̧ naŋ ɔɔ wan ko Sedesias bem ko Josias wannu Juda, GASA WAN tɔ̧ɔ̧ wen ha̧ Jeremii.

²Gba̧a̧-wen'i nɛ́ mɔ'ɔ: «Mɛ̀ ɓáɓí o gba̧a̧-pɛr in mɛ̀ sɛ́k o kpàŋá, ɓɛɛ mɛ̀ káí a gun ger-mɛ.

³Mɛ̀ tóm o ŋma kpàŋá nɔ‘i ha̧ wannu Edɔm, wannu Mɔab, in wannu ko o be Amɔŋ, ká bá nɛ̀ wannu Tir in Sidɔŋ mbɛt; mɛ̀ tóm mɔɔ nɔ‘i ha̧ wa nɛ̀ o gasawi kɔ-wa nɛ̀ wa toma pii tɛ Sedesias wannu Juda sɛn Jerusalɛm.

⁴Mɛ tɛ e tom nú wa mɛ nɛ̀ɛ́ tɔ̧ ha̧ o wan kɔ-wa'e ndé: Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ ha̧ wa nɛ́ mɔ'ɔ:

⁵Nɛ́ mi a̧ dee nù in o bíí gú nɛ̀ o saɗi nɛ̀ ya zaŋ-aa tɛ zɔm ŋgai kɔ‘m, ɓɛɛ mi tɛ ha̧ mɔɔ nɔ‘i ha̧ wi nɛ̀ see-am kɔ̧a̧.

⁶Kinii, mi ee o nú nɔ'ɔ lɛŋ ɗɔɔ ŋgai ko wi-de-tom kɔ‘m Nabukɔdɔnɔsɔr wannu Babilɔŋ; kóó nɛ́ o saɗi-zaŋbɛɛ mbɛt, mi ee wa er-a ha̧ wa mɛ de tom ha̧ a̧.

⁷O tugun bíí lɛŋ tɛ de tom-bara ha̧ a̧, in o bem kɔ̧-a̧ ká bá nɛ̀ o be-koo-aa mbɛt, ɓɛɛ ŋma ŋgimbi tɛ hɔ nɛ̀ nù kɔ̧-a̧ tɛ duk ɗɔɔ ŋgai ko o ŋma ŋga tugun bíí in o ŋma wannu, ɓɛɛ a̧ mbɛt tɛ de tom ha̧ wa.»

⁸GASA WAN tɔ̧a: «Kà ŋma tugun bíí, kóó nɛ́ mɔɔ-wan bɛ̧ dee tom ha̧ Nabukɔdɔnɔsɔr wannu Babilɔŋ, bɛ̧́ nɛ́ pí̧í̧ kpàŋà kɔ̧-a̧ ger-wi, mi tɛ de ŋmaa in wa nɛ̀ gba-paa, kaɓa in ŋga zɛɛ-geŋa, hɔ ŋgimbi n'aa tɛ kum wa lɛŋ.

⁹Ɓɛɛ nɛ̀ war k’ɛnɛ, wen nɛ̀ o wi-tɔ̧-wen oi nú Sɔ̧, o wan-gbánà, o wi-ɔ-zu, o wi-zɔk-mɔ in o wi-de-mɔɔ-kifi k’ɛnɛ nɔ‘i tɔ̧ h’ɛnɛ‘e, ɛnɛ beka de bara ha̧ wannu Babilɔŋ na wó‘i, k’ɛ́nɛ́ kpɛk na,

¹⁰wen mɔ nɛ̀ wa tɔ̧ h’ɛnɛ‘i nɛ́ ndela; tɛ mɔ‘i, wa tɛ de h’ɛnɛ mɛ duk nɛ̀ nyɛi̧a-a nɛ̀ nù k’ɛnɛ. Nɛ̀ mbetɛ, mi tɛ pɛsi'nɛ́ ɓɛɛ ɛ́nɛ́ kuma lɛŋ.»

¹¹GASA WAN tɔ̧a̧: «Ɓɛɛ kà ŋma tugun bíí kpɛk mɛ pi̧ kpàŋà ko wannu Babilɔŋ ger-wi mɛ de tom ha̧ a̧, mi tɛ e a̧ mɛ duk tɛ nù kɔ̧-a̧ gɛ́ɗɛ́k; a̧ tɛ de tom tɛ nù‘i, ɓɛɛ a̧ duka ɓɔn hi̧i̧.

¹²«Ɓɛɛ ko Sedesias, wannu Juda, mɔ n'am tɔ̧ ha̧ a̧ nɛ́ mɔ'ɔ: Ɛ́nɛ́ in dukbíí kɔ-mɛ lɛŋ, ɛ̀nɛ̀ pí̧ kpàŋà ko wannu Babilɔŋ ger'nɛ́, ɛ̀nɛ̀ dé tom ha̧ a̧ in dukbíí kɔ̧-a̧, h’ɛnɛ mɛ kpasi.

¹³Wen ge mɛ kɔ̧ɔ̧ mɛ kum, mɛ in dukbíí kɔ-mɛ ɗɔɔ gba-paa, kaɓa in ŋga zɛɛ-geŋa nyɛm nɛ̀ ɗoŋ mɔ nɛ̀ GASA WAN tɔ̧ɔ̧ so zu tugun bíí nɛ̀ tɛ bɛ̧ dee tom ha̧ wannu Babilɔŋ ge?

¹⁴K’ɛ́nɛ́ kpɛk wen ko o wi-tɔ̧-wen oi nú Sɔ̧ k’ɛnɛ nɔ‘i nɛ̀ tɔ̧ h’ɛnɛ‘e ndé, ɛnɛ beka de tom-bara ha̧ wannu Babilɔŋ na wó‘i, na! Wa de nɛ́ ndela h’ɛnɛ.»

¹⁵GASA WAN tɔ̧a: «Mi tom wa na, ɓɛɛ mɔ nɛ̀ wa tɔ̧ nɛ̀ nin-am h’ɛnɛ‘i nɛ́ ndela. Hegɔ, mi tɛ pɛsi'nɛ́ ɓɛɛ ɛnɛ tɛ kum, ɛnɛ in o wi-tɔ̧-wen oi nú Sɔ̧ nɛ̀ tɔ̧ wen h’ɛnɛ‘i.»

¹⁶Nɛ́ mɔ'ɔ nɛ̀ GASA WAN tɔ̧ɔ̧ woyo: «Wen n'am tɔ̧ ha̧ o wi-ɗafi-sɔ̧ in o bíí nɔ'ɔ lɛŋ nɛ́ mɔ'ɔ: K’ɛ́nɛ́ kpɛk wen ko o wi-tɔ̧-wen oi nú Sɔ̧ nɛ̀ tɔ̧ h’ɛnɛ‘e, wa tɛ kai o nyɛk kɔ̧́ Tua ko GASA WAN piinɛ ɗoŋ nɛ̀ Babilɔŋ mɛ kinii wó‘i, na. Wen nɔ‘i nɛ̀ wa tɔ̧ h’ɛnɛ‘i nɛ́ ndela.

¹⁷K’ɛ́nɛ́ kpɛk wen kɔ-wa na; ɛ̀nɛ̀ dé k’ɛnɛ nɛ́ tom ha̧ wannu Babilɔŋ, ɓɛɛ h’ɛ́nɛ́ kpásí. Wen ge ɛ́nɛ́ kɔ̧ɔ̧ bɔɔ ha̧ ye’ɛ mɛ kifi nɛ́ bɛɛ-oi ge?

¹⁸Kà o wi nɔ‘i nɛ́ bòò nɛ́ o kpasa wi-tɔ̧-wen oi nú Sɔ̧, kà wen ko Sɔ̧ nɛ́ bòó kɔ̧̀ nú-wa mɛ tɔ̧, ɓɛɛ wa a̧ áí nú ha̧ GASA WAN nɛ̀ a̧a̧ nɛ̀ ŋgayamɔ lɛŋ, wen ká wa tɛ́ɛ̀ kai oi o nyɛk nɛ̀ ɓɔna kɔ̧́ Tua ko Sɔ̧ in o wan mɛ kɔ̧ tua-wan in wan mɛ Jerusalɛm mbɛt yaknɛ si Babilɔŋ mɛ ɛ̧.

¹⁹«Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ zu o mbiŋ-tua, zu gba-kpánà in zu o mɔɔ-tui-kpánà ká bá nɛ̀ oi o nyɛk lɛŋ nɛ̀ ɓɔna sɛn saaye’ɛ,

²⁰(zu o mɔ lɛŋ nɛ̀ Nabukɔdɔnɔsɔr wannu Babilɔŋ ee so duk ŋgimbi n'aa kaia so nɛ̀ Yekonia bem ko Yoyakim wannu Juda ká bá nɛ̀ o gasawi Juda in Jerusalɛm lɛŋ yaknɛ nɛ̀ bara-biro, nɛ̀ Jerusalɛm si Babilɔŋ), nɛ́ mɔ‘i.

²¹«Nɛ̀ mbetɛ, wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ zu o nyɛk nɛ̀ ɓɔna kɔ̧́ Tua ko Sɔ̧, kɔ̧́ tua-wan in nɛ̀ ɓɔna sɛn Jerusalɛm mbɛt nɛ́ mɔ'ɔ:

²²GASA WAN tɔ̧a: Wa tɛ kai o mɔɔ nɔ'ɔ si Babilɔŋ, ɓɛɛ wa tɛ ɓɔn hi̧i̧ hɔ wese n'am tɛ ta mɔ wen wa, ɓɛɛ mi tɛ fo wa daŋnɛ pii ɗoŋ pii fara’ɛ woyo.»