Read Northwest Gbaya JEREMII 28 Bible Online

JEREMII 28 - Northwest Gbaya bible

JEREMII 28

¹Tɛ kale pɛ‘i, mɛ̀ nɛ́ wen nɛ̀ tɔ̧‘e tɛ naar pɛ-wan ko Sedesias wannu Juda, tɛ mɔɔrɔ fio-zɛ, Hanania wi-tɔ̧-wen oi nú Sɔ̧ bem ko Azur, nɛ̀ tugun-aa nɛ́ be Gabaɔŋ tɔ̧ɔ̧ ha̧‘m nɛ̀ yí o wi-ɗafi-sɔ̧ in dukbíí lɛŋ sɛn kɔ̧́ Tua ko GASA WAN hee ndé:

²«Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mi gbina kpàŋà ko wannu Babilɔŋ.

³Pɛ yiitoo’ɛ beka kaɗi na, ɓɛɛ mi kaia o nyɛk kɔ̧́ Tua ko GASA WAN nɛ̀ Nabukɔdɔnɔsɔr wannu Babilɔŋ kaia so yaknɛ si Babilɔŋ mɛ‘i pii ɗoŋ fara’ɛ.

⁴GASA WAN tɔ̧ɔ̧ woyo mbɛt: Mi tɛ kai Yekɔnia bem ko Joakim wannu Juda in o be Juda nɛ̀ wa kaia nɛ̀ bara-biro si Babilɔŋ pii ɗoŋ, wen mi gbina kpàŋà ko wannu Babilɔŋ kaɗi.»

⁵Jeremii wi-tɔ̧-wen oi nú Sɔ̧ kifa nú ha̧ Hanania wi-tɔ̧-wen oi nú Sɔ̧ nɛ̀ yí o wi-ɗafi-sɔ̧ in nɛ̀ yí o bíí lɛŋ nɛ̀ yaa kɔ̧́ Tua ko GASA WAN.

⁶A̧ kifa nú tɔ̧ nɛnɛ‘e: «Mɔ a̧ dé kànà hegɔ! GASA WAN a̧ dé mɔ‘i! GASA WAN a̧ yór ɗoŋ wen nɛ̀ mɛ tɔ̧a'i ha̧ o nyɛk kɔ̧́ Tua ko Sɔ̧, in o bíí nɛ̀ wa kaia so yaknɛ si Babilɔŋ mɛ pii ɗoŋ fara’ɛ woyo.

⁷Ɓɛɛ mɛ̀ zíí war wen n'am tɔ̧ ha̧ mɛ in ha̧ dukbíí'ɛ lɛŋ:

⁸O wi-tɔ̧-wen oi nú Sɔ̧ nɛ̀ dee so tom kɔ-wa nɛti h’ɛɛ in mɛɛ ɓeemɛ tɔ̧ɔ̧ so wen zu o gasa nù in o gasa mɔɔ-wan nɛ̀ dɔka-a, mbaŋ nɛ̀ tɛ wa wen biro, ŋga bɔnɛ in o ŋga zɛɛ-geŋa.

⁹Kà ŋma wi-tɔ̧-wen oi nú Sɔ̧ tɔ̧ wen ga̧a̧mɔ, nɛ́ ŋgimbi nɛ̀ wen'i hɔ gba̧a̧ a'i iŋ nɛnɛ‘e ndé, kpasa wi-tɔ̧-wen oi nú Sɔ̧ nɛ̀ GASA WAN toma tɛnɛ nɛ́ mɔ‘i.»

¹⁰Ɓɛɛ Hanania wi-tɔ̧-wen oi nú Sɔ̧ kpɔ̧i̧ kpàŋà ger Jeremii ɓii wi-tɔ̧-wen oi nú Sɔ̧, ɓɛɛ ba gbin a nù.

¹¹Wi-tɔ̧-wen oi nú Sɔ̧ Hanania tɔ̧ɔ̧ wen’ɛ nɛ̀ yí dukbíí lɛŋ: «Wen nɛ GASA WAN tɔ̧ nɛ́ mɔ'ɔ: Nɛ́ hegɔ pɛ yiitoo’ɛ beka kaɗi na, mi tɛ gbin kpàŋà ko Nabukɔdɔnɔsɔr, wannu Babilɔŋ, ɓɛɛ mi kpɔ̧i̧a yinɛ ger o tugun bíí lɛŋ.» Wi-tɔ̧-wen oi nú Sɔ̧ Jeremii baa war, ɓɛɛ yak kɔ‘i.

¹²Ɗoŋ nɛ̀ wi-tɔ̧-wen oi nú Sɔ̧ Hanania gbina kpàŋá nɛ̀ duka so ger wi-tɔ̧-wen oi nú Sɔ̧ Jeremii kaɗi, GASA WAN tɔ̧ɔ̧ wen ha̧ Jeremii'e:

¹³«Mɛ̀ nɛ́ɛ̀ tɔ̧ ha̧ Hanania'e, mɔ nɛ̀ GASA WAN tɔ̧ɔ̧ nɛ́ mɔ'ɔ: Hee mɔ'ɔ nɛ̀ mɛ gbina kpàŋá-te yinɛ ga, mɛ̀ dé mbe-a nɛ̀ boi e oi-aa.

¹⁴Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mɛ̀ nɛ́ kpàŋá-boi a̧‘m kɔ̧ɔ̧ ha̧ o tugun bíí nɔ'ɔ lɛŋ mɛ pi̧ ger wen dea-a nɛ̀ tom ha̧ Nabukɔdɔnɔsɔr wannu Babilɔŋ; wa tɛ de tom ha̧ a̧; kóó nɛ́ o saɗi-zaŋbɛɛ mbɛt, mi ee wa er-a.»

¹⁵Ɓɛɛ wi-tɔ̧-wen oi nú Sɔ̧ Jeremii tɔ̧ ha̧ Hanania: «Mɛ̀ zìì, Hanania, GASA WAN tom mɛ na, nɛ́ mɛ́ a̧ dee ha̧ o wi nɔ'ɔ mɛ ndaɗi in o géé tum-mɔ.

¹⁶Nɛ̀ mbetɛ, wen nɛ̀ GASA WAN tɔ̧ nɛ́ mɔ'ɔ: ‹Mi tɛ ndak mɛ zu nù yinɛ; mɛ tɛ fe mɛ pɛ'ɛ, wen nɛ́ mɛ́'ɛ usa yuwar dee ŋgazu in GASA WAN ha̧ o wi nɔ'ɔ.› »

¹⁷Ɓɛɛ Hanania wi-tɔ̧-wen oi nú Sɔ̧ fe tɛ kale pɛ‘i, tɛ mɔɔrɔ-ɗoŋ-yiitoo fio-zɛ.