Read Northwest Gbaya JEREMII 3 Bible Online

JEREMII 3 - Northwest Gbaya bible

JEREMII 3

¹GASA WAN tɔ̧a: «Kà ŋma wiwii ndak kóò kɔ‘i, ɓɛɛ kà kóò‘i yak nɛ́ɛ̀ ba mbe wíì, kuti wíì‘i tɛ si ɗoŋ tɛ kóò‘i woyo ɓɔ nde? Kà wi’ɛi de hegɔ, fom tɛ ba nù‘i; ɓɛɛ kɔ-mɛ Israɛl nɛ̀ mɛ e tɛ-mɛ ha̧ o bíí nɛ̀ mbɔɗɔnu nɛnɛ'ɛ, mɛ tɛ pii ɗoŋ tɛ‘m woyo ɓɔ nde?

²Mɛ̀ bá yí-mɛ́ nɛ̀ ŋgɔn si zu kaya,[2] a̧ mɛ̀ zɔ́k mɔ a̧‘i! Nɛ́ ge fara ge a̧ mɛ de dàlà sɛnɛ na ge? Mɛ duka so ka̧ o yuwar pɛm nɛ̀ o dàlà kɔ-mɛ, hee mɔ'ɔ nɛ̀ o Arab yaa so nɛnɛ ŋga-gbárà ga. Mɛ fɛŋa nù nɛ̀ ɗaŋ yuwar deemɔ kɔ-mɛ in ɗaŋ taamɔ kɔ-mɛ mbɛt.

³Nɛ́ mɔ‘i a̧ dee ha̧ kórò mɛ gɔn, ɓɛɛ kuti kórò a nù nɛ haya-a na. Zu-a'i mɛ duk kànà ɓɔn tɛ deemɔ nɛ̀ mbɔɗɔnu kɔ-mɛ nɛnɛ‘i; mɛ kpɛk'e mɛ de nɛ́ mɔɔ-búù na.

⁴Ɓɛɛ kinii, mɛ́ sá nɛ́ mɔ pii tɛ‘m'e: ‹Mi nɛ́ dáà kɔ-mɛ, nɛ̀ duka so nɛ́ sɛm kɔ-mɛ, ŋgimbi nɛ̀ mɛ duka nɛ̀ bem.

⁵Mɛ ta mɔ‘e mi beka kpa ɗaŋsee zu mɛ yaknɛ sɔ̧i̧i̧ na; mɛ‘e mi beka kasi kiri kɔ̧ see-am in mɛɛ siti na mbɛt.› Ɓɛɛ tɛ tɔ̧a-a nɛ̀ mɛ tɔ̧ hegɔ‘i, mɛ e yuwar dee ɗaŋmɔ‘i duk na. Ɓɛɛ wan nɛ̀ mɛ de siti'i tɛ̀ɛ̀ yak zale.»

⁶Ŋgimbi wan ko wannu Josias, GASA WAN tɔ̧ɔ̧ wen ha̧‘m hee mɔ'ɔ ga: «Mɛ zɔka mɔ nɛ̀ Israɛl, yàà-ŋgazu dea'i? Zu-a dama zu kusa kaya lɛŋ in o ɗɔɔ da̧a̧ wa̧a̧-te mbɛt, wen dee dàlà kɔ̧-a̧ nɛnɛ.

⁷Mi taa so kɔ‘m'e, ɗoŋ o dee mɔɔ nɔ‘i lɛŋ, a̧ tɛ̀ɛ́ pii so ɗoŋ tɛ‘m woyo wó, ɓɛɛ a̧ pii ɗoŋ na. Juda nya-a nɛ̀ mbo zu ha̧ Sɔ̧ na zɔka mɔ‘i mbɛt.

⁸Mi zɔka mbɛt; mi ndaka Israɛl, yàà-ŋgazu wen zu dàlà n'aa dea'i, ɓɛɛ mi ha̧ kalata-gbia-a ha̧ a̧. Kóó hegɔ mbɛt, nya-a Juda nɛ̀ mbo zu ha̧‘m na de kíì na; a̧ baa kànà nɛ́ kale yuwar dee dàlà‘i mbɛt.

⁹Mɛ̀ nɛ́ hegɔ, a̧ ɗaŋa nù kɔ̧-a̧ tɛ dee mɔɔ-búù de nɛ̀ dàlà, gasi nɛ̀ ta in te mbɛt.

¹⁰Sɛn zu mɔ‘i lɛŋ, Juda nɛ̀ mbo zu ha̧‘m na'i pii ɗoŋ tɛ‘m nɛ̀ see lɛŋ na. Kpaa-mbe-ta kɔ̧-a̧ nɛ́ ɔrmɔ. GASA WAN tɔ̧ɔ̧ hegɔ!»

¹¹GASA WAN tɔ̧ɔ̧ ha̧‘m: «Mgbara Juda nɛ mbo zu ha̧‘m na in Israɛl yaa-ngazu, nɛ́ Israɛl a̧ de be mɔ nɛ̀ yuwar-a.

¹²Mɛ̀ nɛ́ si war ká̧-zan-mɛ́-ŋgɔn, ɓɛɛ mɛ̀ hé mbéá'ɛ: Mɛ̀ píí ɗoŋ, Israɛl yàà-ŋgazu! Nɛ́ GASA WAN a̧ tɔ̧ hegɔ. Mi beka kai sɔnti'm zu mɛ ɓɔna, wen mi nɛ́ wi-de-ko ha̧ bíí. GASA WAN tɔ̧ɔ̧ hegɔ. Mi kasi kiri zu bíí ɗoŋ-aa nyɛi na.

¹³Ɓɛɛ mɛ iŋ kànà ɗaŋmɔ kɔ-mɛ; mɛ̀ íŋ‘e mɛ dee ŋgazu in GASA WAN Sɔ̧ kɔ-mɛ; ɛ́nɛ́ pɛsa dam ti o da̧a̧ wa̧a̧-te lɛŋ kii nɛ̀ o gɔni sɔ̧, ɓɛɛ ɛ́nɛ́ zii wen nú‘m na.» GASA WAN a̧ tɔ̧ hegɔ!

¹⁴«Ɛ̀nɛ̀ píí ɗoŋ, ɛ́nɛ́ o be-yàà-ŋgazu nɔ'ɔ! GASA WAN tɔ̧ɔ̧ hegɔ, wen mi nɛ́ wan k’ɛnɛ. Mi tɛ kai'nɛ́, bíí kpɔk tɛ ye kpɔk, bíí yiitoo tɛ nú-gara kpɔk kpɔk mbɛt, wen ha̧‘m mɛ kai'nɛ́ siɗoŋ si Siɔŋ.

¹⁵Mi tɛ ha̧ o bíí nɛ̀ see-am hoka, mɛ dai'nɛ́, ɓɛɛ o wi nɔ‘i tɛ dai'nɛ́ nɛ̀ yuwar kpasa iŋa-mgbara-mɔ nɛ̀ mboozu.

¹⁶Ŋgimbi n’ɛnɛ bé tɛ̀ɛ́ dɔk sɛn zu nù‘i kaɗi, wese'i, wi beka ak mɔ‘e: ‹Kuɓa nɔɔ-tɔk ko GASA WAN a̧a̧ déè ndé,› na. Wi beka ta mɔ wen-aa ɓɔna, ɓɛɛ wi beka de mbe-a ɓɔna mbɛt. GASA WAN tɔ̧ɔ̧ hegɔ.

¹⁷Ŋgimbi'i, wa tɛ sa nin Jerusalɛm'e ‹Damti ko GASA WAN›. Nɛ́ sɛn fara'i a̧ o tugun bíí lɛŋ tɛ mɔi̧ sɛnɛ nɛ̀ nin GASA WAN nɛ̀‘i gbara ha̧ Jerusalɛm, ɓɛɛ wa beka nɛ́ ɗoŋ o ɗaŋ taamɔ-ŋgazu kɔ-wa mɛ ti ɓɔna.

¹⁸Ŋgimbi'i o be Juda in Israɛl tɛ ya kpɔk in o ŋmaa, ɓɛɛ wa tɛ zir lɛŋ nɛ̀ war nù mɛ ká̧-zan-mɛ́-ŋgɔn mɛ tɛnɛ pii tɛ nù n'am baa ha̧ so nɛ̀ mɔɔ-oi ha̧ o dáà kɔ-wa.»

¹⁹«Mi taa so kɔ‘m mɛ́ dè kpasa mɔ ha̧ mɛ mgbara o dɔka o bem, ha̧‘m mɛ ha̧ gba de fara-duk ha̧ mɛ, nɛ̀ tɛ de gan ko o dɔka tugun bíí! Mi taa so'e, ɛnɛ tɛ̀ɛ́ sa'm'e ‹Dáà!› n’ɛ̀nɛ̀ beka zik so ɗoŋ‘nɛ́ e ha̧‘m ɓɔna.

²⁰Ɓɛɛ hee mɔ'ɔ nɛ̀ okoo de nɛ̀ ŋgazu in wíì'ɛ ga, nɛ́ hegɔ ɛ́nɛ́ o be Israɛl dee nɛ́ ŋgazu in am mbɛt. GASA WAN tɔ̧ɔ̧ hegɔ.

²¹«Mi zii nɛ́ hiɗimɔ nɛ̀ zu o kaya mɛ tɛnɛ; mɛ̀ nɛ́ o be Israɛl a̧ hi̧i̧ kɔ̧a̧, ai nɛ̀ nú, wen wa baa nɛ́ ɗaŋ war; tɛ-wa bìí ɗoŋ am, mi GASA WAN Sɔ̧ kɔ-wa.

²²Ɛ̀nɛ̀ píí ɗoŋ, ɛ́nɛ́ o be-yàà-ŋgazu nɔ'ɔ, mi tɛ de ha̧ ŋgazu k’ɛnɛ mɛ kaɗi!» «Íì, ɛ́ɛ́ nɛ́ mɔ'ɔ n’ɛɛ pii ɗoŋ tɛ‘nɛ́'ɛ, wen ɛnɛ nɛ́ GASA WAN Sɔ̧ k’ɛɛ.

²³Nɛ̀ mbetɛ, mɔ nɛ̀ de mɔ nɛ̀ zu o kaya tɛnɛ‘i nɛ́ ɔrmɔ. Wa de nɛ́ géé gitimɔ sɔɔ géè; mɛ̀ nɛ́ sɛn tɛ GASA WAN Sɔ̧ k’ɛɛ a̧ Israɛl tɛ kpa yuwar-kpasa-a.

²⁴Mɔɔ-búù nɛ̀ o dáà k’ɛɛ duka so de, ɓɛɛ k’ɛɛ ɓɔna nɛ̀ bem, nyɔŋa o mɔ kɔ-wa lɛŋ, o be mɔ-dai in o gasa-a, gu nɛ̀ o bem kɔ-wa mɛ be-wiwii-a in be-okoo-a.

²⁵Nɛ̀ mbetɛ, ziimɔ nyɛma so kànà mɛ ba yɛ! Búù‘i a̧ tík zu yɛ, wen ɛɛ yɔɔ kaya ti GASA WAN Sɔ̧ k’ɛɛ, ɛɛ in o dáà k’ɛɛ, ŋgimbi n’ɛɛ ɓɔna nɛ̀ bem hɔ sɔsɔɔ. Ɛɛ zii so wen ko GASA WAN Sɔ̧ k’ɛɛ na.»