Read Northwest Gbaya JEREMII 32 Bible Online

JEREMII 32 - Northwest Gbaya bible

JEREMII 32

¹Wen nɛ̀ GASA WAN tɔ̧ɔ̧ ha̧ Jeremii tɛ ɓu pɛ ɔɔ-wan ko Sedesias wannu Juda nɛ́ mɔ'ɔ. Duka nɛ́ ɓu-zua-mɔɔrɔ-ɗoŋ-taar pɛ ɔɔ wan ko Nabukɔdɔnɔsɔr.

²Ŋgimbi'i, o gíí wi-biro ko wannu Babilɔŋ kɛra Jerusalɛm, ká wa kpee so Jeremii wi-tɔ̧-wen oi nú Sɔ̧ e kɔ̧́ bee-gara ko o wi-pɛm-mɔ, kɔ̧́ tua-wan ko wannu Juda kaɗi.

³Sedesias, wannu Juda kpee so nú a̧ e hi̧i̧ de nɛ̀ ŋmaa in a̧‘e: «Wen ge sa mɛ tɔ̧‘e, GASA WAN tɔ̧a'e: ‹Mi tɛ e ye’ɛ ɗɔɔ ŋgai ko wannu Babilɔŋ, a̧ tɛ ba a̧!› ge?

⁴Mɛ‘e, kóó nɛ́ Sedesias wannu Juda beka nyaŋ er o wi-biro ko o be Kaldee na; a̧ tɛ ye er wannu Babilɔŋ; a̧ tɛ zɔk nɛ̀ gbaayí ɓɛɛ a̧ tɛ tɔ̧ wen in a̧ mbɛt nɛ̀ tɛ-a, wen ge?

⁵Mɛ‘e, GASA WAN tɔ̧a̧‘e, yàà-ŋgo-biro tɛ mgbɔ Sedesias si Babilɔŋ, a̧ tɛ duk hi̧i̧ hɔ ŋgimbi n'am tɛ ta mɔ wen-aa. K’ɛ́ɛ́ ɗaŋ tɛ yɛ mɛ yor naŋ-biro in o be Kaldee géè na, wen ŋma mɔ n’ɛ̀ɛ̀ tɛ de in wa bo na.»

⁶Nyɛrɛmɔ ko Jeremii nɛ́ mɔ'ɔ: GASA WAN tɔ̧ɔ̧ wen ha̧‘m hee mɔ'ɔ ga:

⁷«Hanameɛl, bem ko nya dáà kɔ-mɛ Salum, tɛ tɛ̀ɛ́ tɔ̧ ha̧ mɛ‘e ndé, mɛ̀ hí̧fí fɔ kɔ‘i nɛ̀ duk sɛn Anatot, wen mɛ́ nɛ́ mgbak kóó-wi kɔ‘i nɛ̀ duk nɛ́ wi-gɔn-zu fɔ‘i.

⁸Hanameɛl bem ko nya dáà kɔ‘m tɛ̀ɛ̀ kpa'm sɛn kɔ̧́ bee-gara ko o wi-pɛm-mɔ nyɛm nɛ̀ ɗoŋ wen nɛ̀ GASA WAN tɔ̧ɔ̧ so, ɓɛɛ tɔ̧ ha̧‘m: ‹Mɛ̀ tɛ́ɛ̀ gɔ́n zu fɔ kɔ‘m nɛ̀ a̧a̧ sɛn Anatot nɛ̀ duk zaŋ nù ko Bɛnjamin, in wen mgbak wi mɛ ba mɔɔ-oi-am nɛ́ mɛ́ ɓɛɛ, nɛ́ mɛ'ɛ nyɛma mɛ gɔn zu fɔ'ɛ. Mɛ̀ gɔ́n nɛ́ gɔna zu fɔ'ɛ ɓɛɛ.› Ɓɛɛ mi iŋ‘e, nɛ́ wen ko GASA WAN a̧ a̧ tɔ̧ nɛnɛ‘i.

⁹Mi hi̧fa fɔ‘i nɛ̀ duk sɛn Anatot'i er Hanameɛl, bem ko nya dáà kɔ‘m tɛ kɔya sede ɓu-zua-mɔɔrɔ-ɗoŋ-yiitoo,

¹⁰mi yɔra kalata zu mɔ‘i, ɓɛɛ mi e tumbal kɔ‘m sɛnɛ, nɛ̀ yí o wi-sedaako n'am saa so tɛnɛ, ɓɛɛ mi we sede-a nɛ̀ mɔɔ-we-mɔ.

¹¹Mi baa kalata fɔ‘i, ɓɛɛ mi ba wan nɛ̀ tumbal a̧a̧ sɛnɛ in wan nɛ̀ duk géè nɛ̀‘i hu̧i̧a nyɛm nɛ̀ ɗoŋ o yɔramɔ in o heembea,

¹²ɓɛɛ mi ha̧ ha̧ Baruk, bem ko Nɛriya, bem ko Masɛya, nɛ̀ gbaayí Hanameɛl, bem ko nya dáà kɔ‘m in nɛ̀ gbaayí o wi-sedaako kalata fɔ‘i in nɛ̀ gbaayí o be Juda lɛŋ nɛ̀ yaa so bee-gara ko o wi-pɛm-mɔ.

¹³Ɓɛɛ mi tɔ̧ ha̧ Baruk nɛ̀ gbaayí wa lɛŋ‘e:

¹⁴Ɛ̧ɛ̧ nɛ́ wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl: ‹Mɛ̀ káí o kalata nɔ'ɔ, kalata fɔ'ɛ in wan nɛ̀ hu̧i̧a hu̧i̧ mbɛt, a̧ mɛ̀ á wa kɔ̧̀ kpánà wen ha̧ wa mɛ duk ɗoŋ-aa nyɛi.›

¹⁵Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl nɛ́ mɔ'ɔ: wi tɛ hi̧fi kànà o tua, o fɔ in fɔ-nyak-dɔ̧ɔ̧ zu nù'ɛ woyo.»

¹⁶Ɗoŋ n'am ha̧a̧ kalata ɗɔra fɔ‘i ha̧ Baruk bem ko Nɛria kaɗi, mi wora GASA WAN hee mɔ'ɔ ga:

¹⁷«Ho! GASA WAN Sɔ̧, nɛ́ ɛ́nɛ́'ɛ dee yiwese in nù tɛ zɔm ŋgai k’ɛnɛ; ŋma mɔ nɛ̀ ŋgaia gan'nɛ́ bo na!

¹⁸Nɛ́ ɛ́nɛ́ a̧ dé kó ha̧ o bezaŋ nɛ̀ kòó ɗoŋ ŋmaa hɔ tɛ booro, ɓɛɛ ɛ́nɛ́ pi̧i̧ bɔnɛ zu o bem oi ɗaŋmɔ ko o dáà kɔ-wa. Nin'nɛ́ nɛ́ Sɔ̧ nɛ̀ ɔ gasa, ŋga wi-biro, GASA WAN nɛ̀ a̧a̧ nɛ̀ ŋgayamɔ lɛŋ.

¹⁹Kpasa wi-tɔ̧-mbɔrɔ in gasa wi-de-mɔ hɔ gba̧a̧ nɛ́ ɛ́nɛ́; yí‘nɛ́ a̧a̧ zu naŋanɔ ko bíí lɛŋ, ɓɛɛ ɛ́nɛ́ ha̧ mɔ ha̧ bíí nyɛm nɛ̀ ɗoŋ deemɔ kɔ-wa in nyɛm nɛ̀ ɗoŋ tom kɔ-wa mbɛt.

²⁰Sɛn nú Egiptɛ, ɛ́nɛ́ usa tɛ‘nɛ́ tɛ o mɔɔ-kifi nɛ̀‘i zɔk mɔɔ-oi-aa hɔ sɔsɔɔ'ɛ, ɓɛɛ nin'nɛ́ hu̧r sɛn Israɛl in sɛn zu nù lɛŋ, hee mɔ'ɔ nɛ̀‘i zɔk sɔsɔɔ'ɛ ga mbɛt.

²¹Ɛ́nɛ́ kaia dukbíí k’ɛnɛ o be Israɛl gbonɛ nú Egiptɛ, usi nɛ̀ tɛ‘nɛ́ tɛ o mɔɔ-kifi mɛ ŋgai mɛ er'nɛ́, de nɛ̀ o ŋgayamɔ, pi̧ nɛ̀ gasa kíì tɛ o bíí.

²²Ɛ́nɛ́ ha̧a̧ nù'ɛ ha̧ wa, mɛ nɛ́ nù n’ɛnɛ ha̧a̧ so nɛ̀ kanamɔ ha̧ o dáà kɔ-wa, nù nɛ̀ yibere in nɔ̧́-gɔrɔ fok sɛnɛ.

²³Wa yee tɛ nù'ɛ, ɓɛɛ wa ya sɛnɛ; mɔ kpɔk, wa zii tiger'nɛ́ na, wa nɛ́ ɗoŋ o usamɔ k’ɛnɛ na mbɛt; wa bɛ̧ɛ̧ dee mɔ lɛŋ n’ɛnɛ usa so ha̧ wa mɛ de. Mɛ̀ nɛ́ wen hegɔ s’ɛnɛ fo o ŋgamɔ nɔ'ɔ lɛŋ pi̧ zu wa.

²⁴«O yuwar nɛ̀ o be Babilɔŋ ɗafi tɛnɛ‘i hɛɗa yee ye kaɗi. Hee mɔ'ɔ nɛ̀ gba-paa, kaɓa in ŋga zɛɛ-geŋa tika saaye’ɛ kaɗi ga, ye’ɛ tika kɔ̧̀ er o be Kaldee nɛ̀ kɛra a̧ kaɗi. Mɔ n’ɛnɛ ee zu-a hɔɔ gba̧a̧ kaɗi, ɓɛɛ k’ɛ́nɛ́ nɛ́ zɔka-a ɓɛɛ.

²⁵Ɓɛɛ nɛ́ ɛ́nɛ́ GASA WAN Sɔ̧ a̧ tɔ̧ɔ̧ ha̧‘m'e: ‹A̧‘m wé dita bu-mbɔi hi̧fi nɛ̀ fɔ, sa nɛ̀ o wi-sedaako tɛnɛ! Ɓɛɛ nɛ̀ war ko ye’ɛ, nɛ́ tika-a ɗɔɔ ŋgai ko o be Kaldee ɓɛɛ nde?› »

²⁶Ɓɛɛ GASA WAN tɔ̧ ha̧ Jeremii:

²⁷«Mi, GASA WAN, mi nɛ́ Sɔ̧ ko o mɔ lɛŋ nɛ ya kpasa; ŋma mɔ a̧a̧ sɛnɛ nɛ̀ tɛ ŋgai gan am nde?»

²⁸GASA WAN tɔ̧a: «Nɛ̀ mbetɛ, mi tɛ e ye’ɛ kɔ̧̀ er o be Kaldee in Nabukɔdɔnɔsɔr wannu Babilɔŋ.

²⁹Wa tɛ ba ye, ɓɛɛ a̧ bia wee in o tua nɛ̀ wa ɗafa so géé-sɔ̧ Bal sɛnɛ, a nɛ̀ zɛzɛ nù ha̧ o ŋma sɔ̧, tu̧ nɛ̀ see-am.

³⁰Nɛ̀ mbetɛ, nɛ̀ ku̧u̧naŋ-a mɛ tɛnɛ, o be Israɛl in o be Juda de nɛ́ mɔ n'am kɔ̧ na; wa tu̧u̧ kànà see-am nɛ̀ ɗaŋ er deemɔ kɔ-wa.

³¹Ye’ɛ a̧ŋa ɗaŋsee in nyimsea kɔ‘m a ŋgɔn, ku̧u̧naŋ-a nɛ̀ tɛ ku̧u̧naŋ ye’ɛ mɛ tɛnɛ hɔ sɔsɔɔ‘i. Mi tɛ fo a̧ yinɛ yí‘m,

³²wen zu ɗaŋmɔ lɛŋ nɛ̀ o be Israɛl in o be Juda dea. O wannu kɔ-wa, o gasawi, o wi-ɗafi-sɔ̧, o wi-tɔ̧-wen oi nú Sɔ̧ ká bá nɛ̀ o be Juda in o bíí saaye Jerusalɛm, wa lɛŋ nɛ̀ oi-aa tu̧u̧ see-am.

³³Wa zika ɗoŋ e ha̧‘m, ɓɛɛ wa kɔ̧ so ha̧‘m mɛ zɔk sɔnti-wa na; mi usa mɔ ha̧ wa takaɗi, wa zii na, wa kpɛk usamɔ kɔ‘m na mbɛt.

³⁴Wa kai nɛ́ o ndiŋmɔ a kɔ̧́ Tua kɔ‘m fara nɛ̀ nin-am a̧a̧ sɛnɛ, fɛŋ nɛ̀ Tua'i.

³⁵Wa mboo fara-ɗafi-Bal sɛn kɔ̧̀ ɗɔŋgɔ Bɛn-Hinɔm wen dɔɔ o bem in o boko-bem kɔ-wa ɗafi nɛ̀ Mɔlɛk. Bo nɛ mi'i aka wa mɛ de mɔ‘i na; i̧i̧ mɔ‘i bo so nɛ́ taamɔ kɔ‘m na mbɛt, ɓɛɛ nɛ́ wa nɛ̀ ta-tɛ-wa a̧ dee gasa mɔɔ-búù‘i pi̧ nù, nɛ̀ dee ha̧ o be Juda mɛ yɔ.»

³⁶Ɓɛɛ kinii, tɔ̧ɔ̧-wen ko GASA WAN, Sɔ̧ ko Israɛl zu ye’ɛ n’ɛnɛ tɔ̧ nɛnɛ‘e tika kɔ̧ er wannu Babilɔŋ wen gba-paa, kaɓa in ŋga zɛɛ-geŋa wó‘i, nɛ́ mɔ'ɔ:

³⁷«See-am nyima so nɛ̀ ŋgaya-a nyɛmna zu o bíí tɛ ye’ɛ, ɓɛɛ sa'm pɛsi wa dam zaŋnu fara lɛŋ. Kinii, mi tɛ mɔi wa pii ɗoŋ fara’ɛ nɛ̀ ŋma mɔ nɛ̀ tɛ fo wa bo na.

³⁸Wa tɛ ya dukbíí kɔ‘m, ɓɛɛ mi tɛ duk Sɔ̧ kɔ-wa.

³⁹Mi tɛ ha̧ de taamɔ ha̧ wa lɛŋ in ha̧ o ŋmaa mɛ tu̧ tɛ‘m ɓɔnsɛnɛ, ɓɛɛ ha̧ wa mɛ ya nɛ̀ desee yaknɛ hegɔɔ hɔ nɛnɛ tɛ o bezaŋ-wa mɛ.

⁴⁰Mi tɛ nɔ tɔk in wa nɛ̀ nduti-a beka bo na, mi beka kaɗi dee demɔ in wa na, ɓɛɛ mi tɛ de ha̧ wa mɛ yu'm, nɛ̀ wa beka e'm duk na kpoo nɛ kpoo.

⁴¹Mi tɛ kpa desee tɛ dee demɔ in wa, ɓɛɛ mi tɛ de ha̧ wa mɛ duk tɛ nù'ɛ mgbítíŋ hegɔɔ kpoo nɛ kpoo; mi tɛ e see-am in kiitɛ‘m lɛŋ tɛ dee mɔ‘i.»

⁴²Ɓɛɛ sa GASA WAN tɔ̧‘e: «Hee mɔ'ɔ mɛ̀ nɛ́ mí á̧ dee ha̧ ŋgamɔ'ɛ mɛ tik zu dukbíí'ɛ ga, kale-a mbɛt hegɔ, mi tɛ de ha̧ wa mɛ kpa demɔ n'am ha̧a̧ so nú ha̧ wa wen-aa.

⁴³Ɛ́nɛ́ ya tɔ̧ nɛnɛ in o ŋmaa'e, nù'ɛ nɛ̀ o be Babilɔŋ baa so'i kifa duk nɛ́ géé ŋga-gbárà nɛ̀ o bíí kà bó nɛ̀ saɗi bo sɛnɛ na; ɓɛɛ mɔ kpɔk, wi tɛ hi̧fi o fɔ tɛ nù'ɛ woyo.»

⁴⁴GASA WAN tɔ̧a: «Wi tɛ we dita bu-mbɔi hi̧fi nɛ̀ o fɔ, wi tɛ de kalata-a, wi tɛ e tumbal sɛnɛ nɛ̀ yí o wi-sedaako; o mɔɔ nɔ‘i lɛŋ tɛ de sɛn nù ko Bɛnjamin, ka̧ Jerusalɛm, tɛ o ye ko Juda, o wan mɛ zu kaya, o wan mɛ bɔkɔ-nù in o wan mɛ Nɛgɛb, wen mi tɛ ɗafi wa woyo.»