Read Northwest Gbaya JEREMII 33 Bible Online

JEREMII 33 - Northwest Gbaya bible

JEREMII 33

¹GASA WAN tɔ̧ɔ̧ wen ha̧ Jeremii woyo ŋgimbi n'aa ɓɔna so kànà nɛnɛ kɔ̧́ bee-gara ko o wi-pɛm-mɔ mɛ.

²«Tɔ̧ɔ̧-wen ko GASA WAN nɛ̀ dee nù, nɛ ɗafa a̧ ha̧ a̧ mɛ duk nɛ̀ nɔa-a, nɛ̀ nin-a nɛ́ GASA WAN nɛ́ mɔ'ɔ:

³Mɛ̀ sá mɔ pii tɛ‘m, mi tɛ kifi nú ha̧ mɛ, mi tɛ usi o gasamɔ ha̧ mɛ, o gasa hu̧samɔ nɛ̀ mɛ iŋ na.

⁴Mi GASA WAN, Sɔ̧ ko Israɛl, mi a̧a̧ nɛ̀ ŋma mɔ mɛ tɔ̧ h’ɛnɛ zu o tua gasa ye’ɛ nɛ̀ ɗaŋa lɔkɔti-lɔkɔti’ɛ, gú nɛ̀ o tua-wan ko o wannu Juda. Wen-aa nɛ́ mɔ'ɔ. Kura-a mɛ bi o be Kaldee nɛ̀ oi o mɔɔ-biro kɔ-wa, ɛnɛ beka de pi̧ nù na. Mɔ‘i tɛ de ha̧ o wɔr bíí n'am tɛ gbɛ tɛ tu̧u̧-see in ŋga nyimsea kɔ‘m mɛ dun ye’ɛ. O bíí Jerusalɛm dee ɗaŋmɔ yak zale, nɛ̀ pi̧i̧ gɛ̧ɛ̧mɔ tɛ‘m zu ye kɔ-wa.

⁶Ɓɛɛ nɛ̀ ɗoŋ, mi tɛ gbak wa hee mɔ'ɔ nɛ̀‘i gbak nɛ̀ ŋma wan-da̧i̧'ɛ ga, ɓɛɛ wa tɛ kpa haya-tɛ nɛ̀ de-a. Mi tɛ de ha̧ wa mɛ ya tɛ ga̧a̧mɔ yaknɛ, nɛ̀ ŋma mɔ mɛ fo wa beka bo na.

⁷Mi tɛ ɗafi Juda in Israɛl woyo; mi tɛ ɗafi wa nɛ̀ de-a woyo hee mɔ'ɔ nɛ̀ wa yaa so nɛnɛ nɛti ga.

⁸Mi tɛ ɗafi war-tɛ-wa oi ɗaŋmɔ nɛ̀ wa dee so in am; mi tɛ e ɗaŋmɔ lɛŋ nɛ̀ wa dee so in am, de nɛ̀ ŋgazu in am, ha̧ wa.

⁹Mɔ‘i tɛ de ha̧ nin-am mɛ hu̧r, nɛ̀ tɛ duk nɛ́ zɔm gasa zɔnamɔ wen am, hee gba de mbɔi-tɛ ga sɛn ti o tugun bíí lɛŋ zaŋnu nɛ̀ bé tɛ̀ɛ́ zii nyɛrɛ o de mɔɔ nɔ‘i lɛŋ n'am tɛ de in Juda in ha̧ Israɛl, ɓɛɛ kíì in naka-tɛ tɛ ba wa wen zu o demɔ in de duka-a siti n'am tɛ ha̧ o be Israɛl.»

¹⁰Wen nɛ̀ GASA WAN tɔ̧ nɛ́ mɔ'ɔ: «Fara’ɛ n’ɛnɛ tɔ̧ k’ɛnɛ‘e nɛ́ géé bɛɛ-oi nɛ̀ bíí in o saɗi bo sɛnɛ na wó'ɛ, nɛ̀ mbetɛ, mɔ da̧a̧ kpe nù ko Juda lɛŋ gú nɛ̀ o mgbara kira Jerusalɛm mbɛt, mɔ ya sélélé, géé foomɔ ko saɗi ká bá nɛ̀ ger bíí bo na. Ɓɛɛ mɔ kpɔk,

¹¹wi tɛ zii o hiɗimɔ-nyɛŋɛ, gbaŋa-tortɛ sɛn fara'i woyo, in gima ko o wi nɛ̀ tɛ kai o mɔɔ-ɗafi-sɔ̧ wen zɔna Sɔ̧ tɛnɛ kɔ̧́ Tua ko GASA WAN tɔ̧ nɛnɛ‘e: ‹Ɛ̀ɛ̀ gásí GASA WAN nɛ̀ a̧a̧ nɛ̀ ŋgayamɔ lɛŋ, wen a̧ ɔ dee, ɓɛɛ a̧ yor ɗoŋ o ha̧a̧nú kɔ̧-a̧ kpoo nɛ kpoo!› » GASA WAN tɔ̧a: «Mi tɛ ɗafi nù'ɛ woyo, ɓɛɛ a̧ tɛ duk hee a̧ duka so nɛti ga.»

¹²Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ nɛ́ mɔ'ɔ: «Sɛn fara’ɛ nɛ̀ mɔ ɗaŋa lɛŋ kifi duk nɛ́ géé bɛɛ-oi géè'ɛ, nɛ̀ o bíí in saɗi bo sɛnɛ na’ɛ, in tɛ o ye kɔ-wa nɛ̀ ɗaŋa mbɛt’ɛ, wi tɛ gun bɔr-mɔ sɛnɛ woyo; ɓɛɛ nɛ́ fara'i a̧ o wi-dai-sami tɛ de ha̧ o sami kɔ‘i mɛ ɔm tɛ sɛnɛ.»

¹³GASA WAN tɔ̧a: «O sami tɛ gbar woyo ti wi-tɔr-wa, tɛ o ye mɛ mgbara kaya, tɛ o ye bɔkɔ-nù hɔ nɛnɛ tɛ o ye Nɛgɛb, tɛ nù ko Bɛnjamin mbɛt, ká bá nɛ̀ Jerusalɛm in tɛ o ye nù Juda lɛŋ.»

¹⁴GASA WAN tɔ̧a: «Wese tɛ hɔ n'am tɛ de ha̧ ha̧a̧nú n'am ha̧a̧ so ha̧ o be Juda in ha̧ o be Israɛl mɛ hɔ gba̧a̧.

¹⁵Tɛ kpɔk kale ŋgimbi'i, mi tɛ de ha̧ ŋma mgbák bem ko David mɛ kur, nɛ̀ tɛ ye ɗoŋ deemɔ nɛ̀ tana-a in deemɔ nɛ̀ yuwar-a tɛ nù'ɛ.

¹⁶Wese'i, Juda tɛ kpasi, ɓɛɛ Jerusalɛm tɛ duk nɛ̀ de-a, nɛ̀ ŋma mɔ beka fo a̧ na. Nin nɛ̀‘i tɛ sa nɛ ye'i nɛ́ ‹GASA WAN wi-de-mɔ nɛ̀ yuwar-a in yɛɛ!› »

¹⁷GASA WAN tɔ̧a: «Kànà nɛ́ o bezaŋ David a̧ tɛ ɔ wan zu damti-wan ko o be Israɛl ɓɛɛ kpoo nɛ kpoo.

¹⁸Mɛ̀ nɛ́ kalemɔ mbɛt, wen o be Levii, kànà nɛ́ wa a̧ tɛ ya nɛ́ o wi-ɗafi-sɔ̧ mɛ yor ti'm dɔ nɛ̀ o kpoo-sɔ̧ in o ha̧a̧mɔ ɗafi nɛ̀‘m mbɛt dam ɗoŋ wese lɛŋ.»

¹⁹Nɛ́ mɔ'ɔ nɛ̀ GASA WAN tɔ̧ɔ̧ ha̧ Jeremii.

²⁰«Gba̧a̧-wen nɛ̀ mí GASA WAN tɔ̧a'i nɛ́ mɔ'ɔ: K’ɛ̀nɛ̀ nɛ́ nyɛma mɛ ɗaŋ ha̧a̧nú kɔ‘m zu wese ká bá nɛ̀ zɛ, wen ká wa tɛɛ gbo tɛ ŋgimbi-a,

²¹ɓɛɛ nɔɔ-tɔk kɔ‘m in David wi-de-tom kɔ‘m tɛ ɗaŋ mbɛt; ŋma bezaŋ-aa nɛ̀ tɛ duk zu damti-wan kɔ̧-a̧ sɛn Jerusalɛm beka bo ɓɔna. Kpɔk mɔ‘i tɛ de kànà in nɔɔ-tɔk kɔ‘m in o wi-ɗafi-sɔ̧, o be Levii, o wi-de-tom kɔ‘m mbɛt.

²²Mɔ nyɛm mɛ de hegɔ na. Mi tɛ de ha̧ o bezaŋ David wi-de-tom kɔ‘m in o be Levii nɛ̀ ya nɛ́ gasawi kɔ‘m mɛ dɔk hee o sɔra mɛ yiwese nɛ̀‘i nyɛm mɛ tɔr na, in nyɛmɛ ká̧ gba-tɔp nɛ̀‘i nyɛm mɛ tɔr na ga mbɛt.»

²³GASA WAN tɔ̧ɔ̧ ha̧ Jeremii:

²⁴«Mɛ zɔka mbɛt, o wi nɔ'ɔ ta kɔ‘i'e ndé, mi GASA WAN pi̧i̧ o be nutua ko Israɛl in Juda n'am hoka’ɛ taŋ. Nɛ́ hegɔ a̧ wa ba kɔ-wa nɛ́ dukbíí kɔ‘m nɛ̀ bó nɛ́ tugun bíí yí wa ɓɔna e tɛ geemɔ.»

²⁵Ɓɛɛ GASA WAN tɔ̧: «Mi n'am nɔɔ tɔk in wese in zɛ, in nɛ̀ ɗafa mɔ nɛ̀ de-a tɛ yuwar mɔ mɛ yiwese in mɛ mbɔɗɔnu,

²⁶ɛnɛ taa so k’ɛnɛ‘e, mi tɛ̀ɛ́ pi̧ so bezaŋ Jakob in bezaŋ David wi-de-tom kɔ‘m nù sɔɔ géè? Mi tɛ̀ɛ́ bɛ̧ so hoka wi nɛ̀ tɛ ɔ wan zu kpar Abraham, Izak, in Jakob mgbara o bezaŋ wa'i nde? Weyaa! Mi tɛ ɗafi wa woyo wen ko de'm dee ha̧ wa.»