Read Northwest Gbaya JEREMII 35 Bible Online

JEREMII 35 - Northwest Gbaya bible

JEREMII 35

¹Wen nɛ̀ GASA WAN tɔ̧ɔ̧ ha̧ Jeremii ŋgimbi-wan ko Joakim bem ko Josias wannu Juda nɛ́ mɔ'ɔ:

²«Mɛ̀ nɛ́ tɛ o bezaŋ Rekab, ɓɛɛ mɛ̀ tɔ̧́ wen ha̧ wa, mɛ̀ mgbɔ́ wa si kɔ̧́ Tua ko Sɔ̧, sɛn kɔ̧́ ŋma gɔna-bɛr-tua, ɓɛɛ mɛ̀ há̧ dɔ̧ɔ̧ ha̧ wa nɔ́.»

³Mi nɛ̀ɛ̀ kii Yazania bem ko Yirmɛya, bem ko Habasinia, o nya-a lɛŋ in o bem kɔ̧-a̧ lɛŋ, be nú-gara ko o be Rekab nɛ̀ oi gun.

⁴Mi mgbɔɔ wa si kɔ̧́ Tua ko Sɔ̧, kɔ̧̀ gɔna-bɛr-tua ko bem ko Hanaŋ, bem ko Yigdalia bíí ko Sɔ̧; mɛ̀ nɛ́ gɔna-bɛr-tua nɛ̀ duk ká̧ gɔna-bɛr-tua ko o gasawi, wan nɛ̀ duk zu gɔna-bɛr-tua ko Masɛya bem ko Salum wi-pɛm-nú-tua.

⁵Ɓɛɛ nɛ́ mɔ'ɔ n'am ee kpáná-dɔ̧ɔ̧ in ɗele-nɔa-a ti o be nú-gara ko Rekab, ɓɛɛ mi tɔ̧ ha̧ wa: «Ɛ̀nɛ̀ nɔ́.»

⁶Ɓɛɛ wa kifi nú: «Ɛ́ɛ́ nɔ k’ɛɛ dɔ̧ɔ̧ na. Zɔmdáa k’ɛɛ Yonadab bem ko Rekab bee so mɔ a zu yɛ‘e: K’ɛ́ɛ́ nɔ dɔ̧ɔ̧ na ndó-ndó-ndó, kóó nɛ́ ɛ́ɛ́, kóó nɛ́ o bezaŋ yɛ mbɛt.

⁷K’ɛ́ɛ́ de tua na, k’ɛ́ɛ́ gun o nyɔnɔ na, k’ɛ́ɛ́ gun o nyak-dɔ̧ɔ̧ na, o mɔɔ nɔ‘i beka duk nɛ́ o mɔ k’ɛɛ na. Ɛ́ɛ́ tɛ ɔ k’ɛɛ ɓɔn nɛ kɔ̧́ tua-laa ŋgimbi duka-a k’ɛɛ lɛŋ, ɓɛɛ nɛ́ hegɔ ɛ̀ɛ̀ tɛ ya nɛ̀ k’ɛɛ ɗoŋ-aa nyɛi zu nù n’ɛɛ ya sɛnɛ'ɛ.

⁸«Ɛ́ɛ́ mboo zu tɛ o heembea nɔ‘i nɛ̀ zɔmdáa k’ɛɛ Yonadab, bem ko Rekab ha̧a̧ h’ɛɛ‘i. Ɛ́ɛ́ nɔ k’ɛɛ dɔ̧ɔ̧ na ndó-ndó-ndó, kóó nɛ́ ɛɛ nɛ̀ tɛ yɛ, kóó nɛ́ o kóò k’ɛɛ, kóó nɛ́ o bem k’ɛɛ in o boko-bem k’ɛɛ mbɛt.

⁹Ɛ́ɛ́ de so k’ɛɛ o tua-ɔ-sɛnɛ na, ɛ́ɛ́ bo so k’ɛɛ nɛ̀ o fɔ-nyak-dɔ̧ɔ̧, kóó nɛ́ o ŋma fɔ na mbɛt.

¹⁰Ɛ́ɛ́ ɔ k’ɛɛ ɓɔn kɔ̧̀ o tua-laa, ɛ́ɛ́ mbo zu nɛ̀ ŋgaya-a tɛ o heembea nɛ̀ zɔmdáa k’ɛɛ Yonadab ha̧a̧ so h’ɛɛ‘i.

¹¹Ɓɛɛ nɛ́ ŋgimbi nɛ̀ Nabukɔdɔnɔsɔr, wannu Babilɔŋ dee nɛ̀ biro ba nɛ̀ nù'ɛ, ɛ́ɛ́ tɔ̧ɔ̧ nɛnɛ‘e, gana so ɛ̀ɛ̀ yé Jerusalɛm, ɛ̀ɛ̀ kpásí er o wi-biro ko o be Kaldee in o be Aram nɔ'ɔ. Nɛ́ hegɔ ɛ́ɛ́ yee nɛnɛ Jerusalɛm ɓɔn nɛnɛ hɛ̧ɛ̧.»

¹²Ɓɛɛ GASA WAN tɔ̧ ha̧ Jeremii:

¹³«Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl nɛ́ mɔ'ɔ: Mɛ̀ nɛ́ɛ̀ ak o be Juda in o bíí saaye Jerusalɛm'e, wa beka kpɛk usamɔ kɔ‘m in zia wen nú‘m na nde?

¹⁴Ɛ̀nɛ̀ zɔ́k o wi nɔ'ɔ nɛ̀ mbo zu tɛ heembea-nɔɔ-dɔ̧ɔ̧ nɛ̀ Yonadab bem ko Rekab dora nú o bezaŋ wa. Wa nɔ dɔ̧ɔ̧ na hɔ sɔsɔɔ‘i, mbo nɛ̀ zu tɛ usamɔ ko zɔmdáa kɔ-wa; ɓɛɛ kɔ‘m, mi tɔ̧ wen h’ɛnɛ gbɔsi gbɔsi takaɗi, ɛnɛ zii wen nú‘m na.

¹⁵Mi duka tɛ toma o wi-de-tom kɔ‘m, o wi-tɔ̧-wen oi nú‘m mɛ tɔ̧ h’ɛnɛ‘e, ɛ̀nɛ̀ kpáí ɗaŋ naŋanɔ in ɗaŋ er deemɔ k’ɛ́nɛ́, k’ɛ́nɛ́ nɛ́ ɗoŋ o ŋma sɔ̧ gasi nɛ̀ wa na, hegɔ ɓɛɛ ɛ́nɛ́ tɛ ɓɔn tɛ nù n'am ha̧a̧ h’ɛnɛ in o dáà k’ɛnɛ wó, takaɗi. Ɛ́nɛ́ yeŋ zer'nɛ́ tɛ mɔ‘i na, ɛ́nɛ́ zii wen nú‘m na mbɛt.

¹⁶War ko o bem ko Yonadab, wa mboo zu tɛ o usamɔ nɛ̀ zɔmdáa kɔ-wa usa ha̧ wa, ɓɛɛ ko dukbíí'ɛ, a̧ zii wen kɔ‘m na.

¹⁷Tɔ̧ɔ̧-wen ko GASA WAN, Sɔ̧ ko Israɛl nɛ̀ a̧a̧ nɛ̀ ŋgayamɔ lɛŋ nɛ́ mɔ'ɔ: Mi tɛ pi̧ o ŋga bɔnɛ lɛŋ n'am taa so mɛ pi̧ zu Juda in o bíí Jerusalɛm lɛŋ‘i zu wa, wen n'am tɔ̧ɔ̧ wen ha̧ wa, ɓɛɛ wa zii na, in wen n'am saa wa, ɓɛɛ wa kɔ̧ sara nú‘m na.»

¹⁸Jeremii tɔ̧ɔ̧ ha̧ o be nú-gara ko Rekab: «Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl h’ɛnɛ nɛ́ mɔ'ɔ. Hee mɔ'ɔ n’ɛnɛ mboo zu tɛ o usamɔ in o heembea ko zɔmdaa k’ɛnɛ Yonadab, de nɛ̀ mɔ lɛŋ n'aa tɔ̧ɔ̧ h’ɛnɛ mɛ de ga,

¹⁹hegɔ GASA WAN nɛ̀ a̧a̧ nɛ ŋgayamɔ lɛŋ, Sɔ̧ ko Israɛl tɔ̧a'e, be nútua ko Yonadab bem ko Rekab tɛ yor ti'm mɛ de tom ha̧‘m kpoo nɛ kpoo.»