Read Northwest Gbaya JEREMII 36 Bible Online

JEREMII 36 - Northwest Gbaya bible

JEREMII 36

¹GASA WAN tɔ̧ɔ̧ wen’ɛ ha̧ Jeremii tɛ naar pɛ ɔɔ-wan ko Joakim, bem ko Josias wannu Juda:

²«Mɛ̀ bá ŋma kara kalata a̧ mɛ̀ yɔ́r o wen lɛŋ n'am tɔ̧ɔ̧ ha̧ mɛ zu Israɛl, in Juda ká bá nɛ̀ o tugun bíí lɛŋ, wese n'am ku̧u̧ nɛ̀ naŋ tɔ̧ɔ̧ wen ha̧ mɛ tɛ ŋgimbi ɔɔ-wan ko Josias hɔ sɔsɔɔ sɛnɛ.

³Ŋmafara o be Juda tɛ ta mɔ zu ŋgamɔ lɛŋ n'am ta mɛ pi̧ zu wa, ɓɛɛ hegɔ, wi nɛ kpai ɗaŋ naŋanɔ kɔ‘i, mi tɛ e o ɗaŋmɔ in o yɔɔ-kaya kɔ-wa lɛŋ ha̧ wa.»

⁴Jeremii pi̧i̧ tom sa Baruk bem ko Nɛriya, ɓɛɛ Jeremii tɔ̧ o wen nɛ̀ GASA WAN tɔ̧ɔ̧ ha̧ a̧ lɛŋ ha̧ Baruk, ɓɛɛ Baruk yɔr wa zaŋ kalata.

⁵Ɓɛɛ Jeremii tɔ̧ ha̧ Baruk: «Wa dora'm, mi nyɛm mɛ́ nɛ̀ kɔ̧́ Tua ko Sɔ̧ na;

⁶mɛ̀ nɛ́ nɛ̀ tɛ-mɛ ŋma wese-zima-yì, ɓɛɛ sɛn hi̧i̧, mɛ̀ yór ti giiwi, ɓɛɛ mɛ̀ tɔ́r o wen ko GASA WAN n'am saa nɛ̀ mɛ́ yɔra zaŋ kara kalata’ɛ ha̧ wa. Mɛ̀ tɔ́r ha̧ o be Juda lɛŋ nɛ̀ tɛ́ nɛ̀ o saaye kɔ-wa nɛtɛ nɛtɛ.

⁷Ŋmafara aia-nú kɔ-wa tɛ hɔ tɛ GASA WAN, ɓɛɛ ha̧ kóó o ndé mɛ kpai ɗaŋ yuwar deemɔ kɔ‘i wen nyimsea ko GASA WAN zu o wi nɔ'ɔ ɔ gasa nyɛmna.»

⁸Baruk bem ko Nɛriya dee mɔ nɛ̀ Jeremii wi-tɔ̧-wen oi nú Sɔ̧ tɔ̧ɔ̧ ha̧ a̧ mɛ de'i nɛ̀ mboozu. A̧ tɔra wen ko GASA WAN zaŋ kara kalata'i kɔ̧́ Tua ko Sɔ̧.

⁹Tɛ mɔɔrɔ pɛ ɔɔ-wan ko Joakim bem ko Josias wannu Juda, tɛ mɔɔrɔ-ɗoŋ-naar fio-zɛ, wa saa o bíí Jerusalɛm in o be saaye Juda lɛŋ nɛ̀ tɛ̀ɛ̀ so Jerusalɛm, wen ha̧ wa mɛ zim yì ti GASA WAN.

¹⁰Ɓɛɛ Baruk tɔr o wen ko Jeremii zaŋ kalata'i sɛn kɔ̧́ Tua ko Sɔ̧, kɔ̧̀ gɔna-bɛr-tua ko Gɛmaria bem ko Safaŋ, wi-yɔr-mɔ, bee-gara mɛ kɔ̧́ a̧, ká̧ mbe nú Tua ko Sɔ̧. A̧ tɔra mɔ‘i ha̧ giiwi lɛŋ.

¹¹Mikaya bem ko Gɛmaria, bem ko Safaŋ zia wen ko GASA WAN lɛŋ nyɛm nɛ̀ ɗoŋ mɔ nɛ̀ yɔra zaŋ kara kalata'i.

¹²A̧ zira si kɔ̧́ tua-wan, si kɔ̧́ bɛr-tua ko wi-yɔr-mɔ. O gasawi mɔi̧a so ŋmaa lɛŋ sɛn hi̧i̧ wen baa keta: mɛ̀ nɛ́ gasawi Elisama, Delaya bem ko Semaya, Ɛlnataŋ bem ko Akbɔr, sɛka Gɛmaria bem ko Safaŋ, Sedesias bem ko Hanania in oi o gasawi lɛŋ.

¹³Mikaya wee ɗoŋ o wen lɛŋ n'aa zia ŋgimbi nɛ̀ Baruk bem ko Nɛriya tɔra nɛ̀ kalata'i ha̧ giiwi ha̧ wa.

¹⁴Nɛ̀ wa baa keta kaɗi, o gasawi toma Yehudi bem ko Nɛtania, bem ko Sɛlɛmia, bem ko Kusi sitɛ Baruk wen tɔ̧a-a ha̧ a̧‘e ndé, a̧ a̧ bá kara kalata n'aa tɔra ti giiwi'i tɛnɛ ha'i. Baruk bem ko Nɛriya baa kara kalata'i, ɓɛɛ nɛ́ tɛ́ wa.

¹⁵Wa tɔ̧ɔ̧ ha̧ a̧: «Mɛ̀ dúk nù, a̧ mɛ̀ tɔ́r kara kalata’ɛ h’ɛɛ!» Baruk dee hee mɔ'ɔ nɛ̀ wa tɔ̧a ga.

¹⁶Nɛ̀ wa zia o wen nɔ‘i lɛŋ kaɗi, gasa kíì baa wa. Wa tɔ̧ɔ̧ ha̧ Baruk: «Tɛ yɛ beka bi ɗoŋ tɔ̧ɔ̧ o wen nɔ'ɔ lɛŋ ha̧ wannu na.»

¹⁷Wa aka a̧: «Mɛ̀ tɔ̧́ mgbara o wen nɔ'ɔ lɛŋ nɛ̀ mɛ yɔra zaŋ kalata’ɛ h’ɛɛ zii. Nɛ́ Jeremii a̧ tɔ̧a nde?»

¹⁸Baruk kifa nú ha̧ wa: «Nɛ́ a̧ nɛ̀ tɛ-a a̧ tɔ̧ɔ̧ o wen nɔ'ɔ ha̧‘m, ɓɛɛ kɔ‘m, mi yɔr kɔ‘m nɛ́ yɔra wa nɛ̀ yí mɔɔ-yɔr-mɔ, zaŋ kalata’ɛ.»

¹⁹O gasawi tɔ̧ɔ̧ ha̧ Baruk: «Mɛ̀ yák, mɛ̀ hú̧sí; Jeremii mbɛt! Ká ŋma bíí iŋ fara n’ɛnɛ hu̧sa̧ sɛnɛ na!»

²⁰Wa ee kara kalata'i ɓɔn kɔ̧́ bɛr-tua ko wi-yɔr-mɔ Elisama; wa yee si tɛ̀ ko wannu kɔ̧̀ o hu̧sa̧ bɛr-tua-duk kɔ̧-a̧, ɓɛɛ wa we ɗoŋ mɔ nɛ̀ yaka lɛŋ ha̧ a̧.

²¹Wannu toma Yehudi mɛ nɛ̀ɛ́ ba kara kalata'i; a̧ nɛ̀ɛ̀ ba kalata kɔ̧́ bɛr-tua ko wi-yɔr-mɔ Elisama, ɓɛɛ a̧ tɔr ha̧ wannu in o gasawi lɛŋ nɛ̀ yor zik a̧ kpa nú ŋmaa.

²²Wannu duka so ɔ nɛ́ wee kɔ̧̀ bɛr-tua-ɔ-wee kɔ‘i, duka so nɛ́ zɛ Girwɔ, wee duka so nyɛk nɛnɛ sɛn ti a̧.

²³Ŋgimbi nɛ̀ Yehudi tɔr yɔramɔ taar kóó naar, ɓɛɛ wannu baa be-paa ko wi-yɔr-mɔ ɓir nɛ̀ kalata'i a tɛ wee; wannu ɓira kalata'i ɗoŋ ŋmaa, ɗoŋ ŋmaa hegɔɔ kalata'i bíí nɛ̀ wee lɛŋ.

²⁴Tɛ zia o wen nɔ‘i lɛŋ, kíì de wa na, wa a̧k laa tɛ-wa a nù na mbɛt; kóó nɛ́ wannu, kóó nɛ́ ŋma wi-de-tom kɔ̧-a̧.

²⁵Ɛlnataŋ, Delaya in Gɛmaria dora wannu tɛ dɔɔ kara kalata'i takaɗi, a̧ zii wen nú wa na.

²⁶A̧ ha̧a̧ nú ha̧ be-wan Jerameɛl, ha̧ Sɛraya bem ko Azriɛl in ha̧ Sɛlɛmia bem ko Abdeɛl, ha̧ wa mɛ ba wi-yɔr-mɔ Baruk in Jeremii wi-tɔ̧-wen oi nú Sɔ̧. Mɔ kpɔk, GASA WAN hu̧sa̧ wa.

²⁷Ɗoŋ nɛ̀ wannu dɔɔ nɛ̀ kara kalata nɛ̀ Jeremii tɔ̧ɔ̧ so ha̧ Baruk mɛ yɔr, ɓɛɛ ká a̧ yɔr'i, GASA WAN tɔ̧ɔ̧ ha̧ Jeremii:

²⁸«Mɛ̀ bá mbe kara kalata, ɓɛɛ mɛ̀ yɔ́r o wen lɛŋ nɛ̀ duka so zaŋ kuti kalata nɛ̀ Joakim wannu Juda dɔɔ so yinɛ‘i sɛnɛ.

²⁹Ɓɛɛ mɛ̀ tɔ̧́ ha̧ Joakim wannu Juda hee ndé: GASA WAN tɔ̧a, mɛ kpaa ɗaŋsee zu'm, dɔ nɛ̀ kara kalata’ɛ, wen n'am yɔra'e ndé, wannu Babilɔŋ tɛ tɛ̀ɛ́ ɗaŋ nù'ɛ nɛ̀ mbetɛ, kum nɛ̀ o bíí in o saɗi yinɛ.

³⁰Nɛ̀ mbetɛ, wen nɛ̀ GASA WAN tɔ̧ zu Joakim wannu Juda nɛ́ mɔ'ɔ: Ŋma bíí nɛ̀ tɛ duk oi-aa zu damti-wan ko David bo na. Wɔr-aa tɛ ɓɔn ti ŋga bu-wese in ŋga gɛ̧ɛ̧-zɛ.

³¹Mi tɛ kifi er ha̧ a̧, in o bezaŋ-aa ká bá nɛ̀ o wi-de-tom kɔ̧-a̧, wen zu o ɗaŋmɔ kɔ-wa; o gasa bɔnɛ lɛŋ n'am tɔ̧ɔ̧ so wen-aa ha̧ wa, ɓɛɛ ká wa zii so na'i, mi tɛ fo pi̧ zu wa, zu o bíí Jerusalɛm ká bá nɛ̀ o bíí Juda mbɛt.»

³²Jeremii baa ŋma mbe kara kalata, ɓɛɛ ha̧ ha̧ wi-yɔr-mɔ Baruk, bem ko Nɛriya. Baruk yɔra wen nɛ̀ Jeremii saa so ha̧ a̧ sɛnɛ. Mɛ̀ nɛ́ o wen lɛŋ nɛ̀ yɔra so zaŋ kalata nɛ̀ Joakim wannu Juda dɔɔ so'i, ɓɛɛ wa yɔr o ŋma mbe-a nɛ̀ hɔɔ ŋmaa in kuti-a zaŋ-aa mbɛt.