Read Northwest Gbaya JEREMII 37 Bible Online

JEREMII 37 - Northwest Gbaya bible

JEREMII 37

¹Wannu Sedesias bem ko Josias ɔɔ wan oi Kɔnia, bem ko Joakim, ɓɛɛ nɛ́ Nabukɔdɔnɔsɔr wannu Babilɔŋ a̧ baa a̧ pi̧ tɛ wan sɛn nù Juda.

²Ŋma bíí nɛ̀ zia wen nɛ̀ GASA WAN tɔ̧ɔ̧ nɛ̀ nú Jeremii wi-tɔ̧-wen oi nú Sɔ̧, bo na; kóó nɛ́ Sedesias, kóó nɛ́ o wi-de-tom kɔ̧-a̧, kóó nɛ́ o be-nù Juda mbɛt.

³Wannu Sedesias toma Yehukal bem ko Sɛlɛmia in Sɛfania wi-ɗafi-sɔ̧, bem ko Masɛya sitɛ Jeremii wi-tɔ̧-wen oi nú Sɔ̧ tɔ̧ nɛnɛ‘e: «Ɛ̀nɛ̀ tɔ̧́ ha̧ a̧, mi kɔfa a̧, a̧ a̧ áí nú ha̧ GASA WAN Sɔ̧ k’ɛɛ wen zu yɛ.»

⁴Jeremii duk yar so nɛ́ mɔ kɔ‘i géè mgbara dukbíí. Wa ba so a̧ pi̧ zɔɓɔ tɛ ŋgimbi'i na.

⁵Nɛ́ mɔ'ɔ nɛ̀ o gíí wi-biro ko wannu Egiptɛ gboo Egiptɛ, ba nɛ́ biro tɛnɛ; o be Kaldee nɛ̀ kɛra so Jerusalɛm zia nyɛrɛmɔ‘i, ɓɛɛ wa kur yak e Jerusalɛm duk.

⁶Ɓɛɛ nɛ́ mɔ'ɔ nɛ̀ GASA WAN tɔ̧ɔ̧ ha̧ Jeremii wi-tɔ̧-wen oi nú-wi mɛ kifi nú ha̧ o betom ko wannu'e ndé:

⁷«Wen nɛ̀ GASA WAN Sɔ̧ ko Israɛl tɔ̧ nɛ́ mɔ'ɔ: Mɔ n’ɛnɛ tɛ tɔ̧ ha̧ wannu Juda nɛ̀ toma'nɛ́ tɛnɛ mɛ tɛ̀ɛ́ ak am nɛ́ mɔ'ɔ: O gii wi-biro ko wannu Egiptɛ nɛ̀ kura nɛ̀ Egiptɛ mɛ́ tɛ̀ɛ́ gbak'nɛ́‘i tɛ gir tɛ si ɗoŋ si fara kɔ-wa sɛn Egiptɛ mɛ.

⁸O be Kaldee tɛ pii ɗoŋ mɛ bi ye’ɛ, wa tɛ ba, ɓɛɛ wa pi̧i̧ wee tɛ ye’ɛ.

⁹Wen ko GASA WAN nɛ́ mɔ'ɔ: K’ɛ́nɛ́ ɔr tɛ‘nɛ́ ta nɛnɛ‘e, o be Kaldee yaka yak wɔsɔsɔ tɛ̀ k’ɛnɛ na. Wa yak na.

¹⁰Kóó ɛ́nɛ́ kuma so o gíí wi-biro Kaldee nɛ̀ bi'nɛ́'ɛ lɛŋ, kóó nɛ́ be oi o wan-da̧i̧ a̧ ɓɔna, wa tɛ kur nɛ̀ oi da̧i̧ kɔ̧́ tua-laa kɔ-wa, mɛ pi̧ wee tɛ ye’ɛ.»

¹¹Hee mɔ'ɔ nɛ̀ o gíí wi-biro Kaldee yaka e Jerusalɛm duk, ɓɛɛ gbin yak ti o gii wi-biro ko wannu Egiptɛ ga,

¹²Jeremii kɔ̧ɔ̧ so mɛ gbo Jerusalɛm mɛ nɛ si nù ko Bɛnjamin, wen ha̧ a̧ mɛ nɛ̀ɛ́ zɔk mgbara mɔ zu mɔɔ-oi nútua kɔ̧-a̧.

¹³A̧ hɔɔ nú garo ye nɛ̀‘i sa'e Bɛnjamin, ɓɛɛ kpa ŋma wi-pɛm-mɔ, nin-wi’ɛi nɛ́ Yiria bem ko Sɛlɛmia, bem ko Hanania. Wi’ɛi dora Jeremii wi-tɔ̧-wen oi nú Sɔ̧ tɔ̧ nɛnɛ‘e: «Ɛ̧ɛ̧ nɛ̀ mɛ nɛ́ hɛ̧ɛ̧, mɛ́ nɛ́ sitɛ o be Kaldee!»

¹⁴Ɓɛɛ Jeremii kifi nú: «Nɛ́ ndela! Mi bó nɛ̀ taamɔ mɛ nɛ sitɛ o be Kaldee na.» Yiria kɔ̧ zia a̧ na. A̧ dɔra a̧, ɓɛɛ a̧ mgbɔ a̧ nɛnɛ si ti o gasawi.

¹⁵Ɓɛɛ see o gasawi tu̧ zu Jeremii; wa gusa a̧, hɛr a̧ ba pi̧ kɔ̧ tua ko wi-yɔr-mɔ Yɔnataŋ nɛ̀ wa ee nɛ̀ tua-zɔɓɔ.

¹⁶Nɛ́ hegɔ a̧ wa baa nɛ̀ Jeremii pi̧ kɔ̧́ bɛr-tua wan mɛ ɗɔɔ nù mɛ, ɓɛɛ a̧ duk hi̧i̧ ɗoŋ-aa nyɛi.

¹⁷Ŋma wese wannu Sedesias toma sa a̧, ɓɛɛ ak a̧ nɛ̀ hu̧sa-a kɔ̧́ tua-wan kɔ‘i'e: «Ŋma mbe nú-tom ko GASA WAN a̧a̧ sɛnɛ nde?» Jeremii kifa nú: «Íì, nɛ̀ mbetɛ. Mɛ tɛ ye kɔ̧̀ er wannu Babilɔŋ.»

¹⁸Ɓɛɛ Jeremii tɔ̧ ha̧ wannu Sedesias siti woyo: «Nɛ́ ge ɗaŋmɔ ge a̧‘m dee in'nɛ́ɛ, in o wi-de-tom k’ɛnɛ, ká bá nɛ̀ dukbíí'ɛ s’ɛnɛ baa nɛ̀‘m pi̧ nɛ̀‘m zɔɓɔ'ɛ ge?

¹⁹O wi-tɔ̧-wen oi nú Sɔ̧ nɛ̀ tɔ̧ɔ̧ h’ɛnɛ‘e ndé, kóó nɛ́ ɛnɛ, kóó nɛ́ nù'ɛ beka ye kɔ̧ er wannu Babilɔŋ na wó'ɛ, a̧a̧ déè?

²⁰Ɓɛɛ kinii, Nyaa wannu, ɛ̀nɛ̀ zíí aia-nú kɔ‘m, ɓɛɛ ɛ̀nɛ̀ dé ko ha̧‘m. K’ɛ́nɛ́ tom am si ɗoŋ kɔ̧́ tua ko wi-yɔr-mɔ Yɔnataŋ ɓɔna; fara'i nɛ́ fara fio.»

²¹Ɓɛɛ wannu Sedesias ha̧ nú ha̧ wa mɛ dor Jeremii e ɓɔn kɔ̧́ bee gara-pɛm-mɔ, ɓɛɛ ha̧ wa mɛ duk tɛ baa brɛt fara-dɔa-a mɛ ha̧ nɛnɛ ha̧ a̧ wese kpɔk kpɔk hɔ ŋgimbi nɛ̀ brɛt tɛ kaɗi nɛnɛ saaye'i. Hegɔ Jeremii ɓɔna beegara fara ko o wi-pɛm-mɔ‘i.