Read Northwest Gbaya JEREMII 38 Bible Online

JEREMII 38 - Northwest Gbaya bible

JEREMII 38

¹Sɛfatia bem ko Mataŋ, Gedalia bem ko Pasehur, Yukal bem ko Selemia in Pasehur bem ko Malkia zia o wen nɛ̀ Jeremii duka tɛ wee ɗɔŋ-aa ha̧ o bíí lɛŋ tɔ̧ nɛnɛ‘e:

²«Wen nɛ̀ GASA WAN tɔ̧ nɛ́ mɔ'ɔ: Wi nɛ̀ tɛ ɓɔn saaye’ɛ tɛ fe nɛ́ fio gba-paa, kaɓa in ŋga zɛɛ-geŋa. Wi nɛ̀ tɛ gbo yak sitɛ o be Kaldee tɛ duk kpasa, ɓɛɛ a̧ tɛ duk tɛ-a wen n'aa kpasa. Nɛ mbetɛ, wi’ɛi beka fe na.

³Wen nɛ̀ GASA WAN tɔ̧ nɛ́ mɔ'ɔ: Ye’ɛ tɛ ye kɔ̧̀ er wannu Babilɔŋ, wa tɛ ba a̧ nɛ̀ mbetɛ.»

⁴O gasawi tɔ̧ɔ̧ ha̧ wannu: «Wa a̧ gbɛ́ wi’ɛ gbɛɛ yinɛ, wen n'aa gbin nɛ́ gba̧a̧-tɛ o oi wi-biro-pɛm ye’ɛ, gú nɛ̀ o bíí lɛŋ nɛ̀ o wen nɔ‘i n'aa tɔ̧‘i. Bo nɛ a̧ kii nɛ́ de duka-a ko dukbíí na, ɓɛɛ a̧ kii nɛ́ bɔnɛ kɔ-wa.»

⁵Wannu Sedesias kifa nú: «A̧ a̧a̧ kɔ̧̀ er'nɛ́; wannu bo nɛ̀ ŋgai mɛ de ŋma mɔ yak zu'nɛ́ na.»

⁶Wa baa Jeremii pi̧ kɔ̧̀ gɔna-yì ko be-wan Malkia nɛ̀ duk mgbák beegara ko o wi-pɛm-mɔ. Wa zira a̧ nɛ̀ nyak si kɔ̧̀ gɔna-yì‘i. Yì bo so kɔ̧́ a̧ na, duka so nɛ́ ɓɔtɛ ɓɛɛ. Jeremii bina ɓɔtɛ duk sɛnɛ.

⁷Ebɛd-Mɛlɛk be Kus, ŋma kpɔk mgbara o gasawi kɔ̧́ tua ko wannu zia'e, wa pi̧i̧ Jeremii kɔ̧̀ gɔna-yì, ɓɛɛ ŋgimbi'i ká wannu duka so nú garo ko Bɛnjamin.

⁸Ebɛd-Mɛlɛk gboo kɔ̧́ tua-wan ɓɛɛ a̧ nɛ́ɛ̀ tɔ̧ wen-aa ha̧ wannu.

⁹A̧ tɔ̧ɔ̧ ha̧ a̧‘e: «Nyaa wannu, mɔ lɛŋ nɛ̀ ɔ wi nɔ'ɔ dee in Jeremii wi-tɔ̧-wen oi nú Sɔ̧ de na. Wa pi̧i̧ a̧ kɔ̧̀ gɔna-yì, wɔ tɛ gbɛ a̧ nɛ̀ fio sɛn kɔ̧̀ kɔ̧̀‘i, wen brɛt bo saaye’ɛ ɓɔna.»

¹⁰Ɓɛɛ wannu ha̧ nú ha̧ Ebɛd-Mɛlɛk be Kus hee mɔ'ɔ ga: «Mɛ̀ káí o bíí taar nɛnɛ in mɛɛ, ɛ̀nɛ̀ dák Jeremii wi-tɔ̧-wen oi nú Sɔ̧ gbonɛ, wen ká a̧ tɛ̀ɛ́ fe.»

¹¹Ebɛd-Mɛlɛk kaia o bíí in a̧, ɓɛɛ a̧ si ɗoŋ nú tua-wan; a̧ kaia o ŋma a̧ka̧ túí fara-a-mɔ, ɓɛɛ wa kpo nú nyak pi̧ ha̧ Jeremii.

¹²Ebɛd-Mɛlɛk be Kus tɔ̧ɔ̧ ha̧ Jeremii: «Mɛ̀ káí o a̧ka̧ túí nɔ'ɔ á ɗɔɔ ɓaa-mɛ ɗɔɔ o nyak.» Jeremii dee hegɔ,

¹³ɓɛɛ wa dak Jeremii gbonɛ nɛ̀ kɔ̧̀ gɔna-yì‘i nɛ̀ o nyak nɔ‘i, ɓɛɛ wa e a̧ kɔ̧̀ bee-gara ko o wi-pɛm-mɔ.

¹⁴Wannu Sedesias pi̧i̧ tom sa Jeremii wi-tɔ̧-wen oi nú Sɔ̧ ha̧ wa mɛ mgbɔ a̧ nɛnɛ tɛ-wi ká̧ taar nú Tua ko Sɔ̧. Wannu tɔ̧ɔ̧ ha̧ Jeremii: «Mi tɛ ak mɛ; ká mɛ hu̧si mɔ nɛ̀‘m na.»

¹⁵Jeremii kifa nú ha̧ Sedesias hee mɔ'ɔ ga: «Kà‘m tɔ̧ nɛ́ kpasawen h’ɛnɛ, ɛnɛ tɛ gbɛ‘m; ɓɛɛ kà‘m tɔ̧ nɛ́ mbɔrɔ h’ɛnɛ mbɛt, ɛnɛ beka zii na!»

¹⁶Ɓɛɛ wannu Sedesias kan mɔ ha̧ nɛ̀ nú nɛ̀ hu̧sa-a ha̧ Jeremii'e: «GASA WAN nɛ ha̧ duka-kpasa h’ɛɛ duk kpasa! Mi beka gbɛ mɛ ɓɔna, ɓɛɛ mi beka e mɛ er o wi nɔ'ɔ nɛ̀ kii mɛ gbɛ mɛ'ɛ na mbɛt.»

¹⁷Ɓɛɛ Jeremii tɔ̧ ha̧ Sedesias: «Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: K’ɛ̀nɛ̀ kpɛk mɛ nɛ̀ɛ́ duk ɗɔɔ ŋgai ko o gasa wi-biro ko wannu Babilɔŋ, ɛ́nɛ́ tɛ kpasi, ɓɛɛ ye’ɛ beka bíí wee na, ɛnɛ tɛ duk kpasa in o bíí nutua k’ɛnɛ lɛŋ.

¹⁸Ɓɛɛ k’ɛ̀nɛ̀ duk ɗɔɔ ŋgai ko gasa wi-biro ko wannu Babilɔŋ na, ye’ɛ tɛ ye kɔ̧̀ er o be Kaldee nɛ̀ tɛ pi̧ wee sɛnɛ; ɓɛɛ k’ɛnɛ, ɛnɛ beka kpasi er wa na.»

¹⁹Wannu Sedesias kifa nú ha̧ Jeremii: «Mɔ nɛ̀ pi̧ kíì tɛ‘m nɛ́ o be Juda nɛ̀ yaka sitɛ o be Kaldee; ŋmafara mi tɛ tik er wa, ɓɛɛ wa tɛ usi bɔnɛ ha̧‘m pi̧ nɛ̀‘m nɛ̀ er ŋmaa.»

²⁰Jeremii tɔ̧a: «Ɛnɛ beka tik er wa na. Ɛ̀nɛ̀ zíí nɛ́ wen ko GASA WAN tɛ wen n'am tɔ̧'ɛ, ɓɛɛ mɔ tɛ yak zu'nɛ́ nɛ̀ de-a, ɓɛɛ ɛnɛ tɛ kpasi.

²¹Ɓɛɛ k’ɛ̀nɛ̀ bɛ̧ nɛa-a sitɛ o be Kaldee, mɔ nɛ̀ GASA WAN usa ha̧‘m tɛ mɔ‘i nɛ́ mɔ'ɔ:

²²Wa tɛ kai o okoo lɛŋ nɛ̀ ya kɔ̧́ tua ko wannu Juda nɛnɛ ha̧ gasa wi-biro ko wannu Babilɔŋ, ɓɛɛ o okoo nɔ‘i tɛ ya tɔ̧ nɛnɛ‘e: ‹O mgbák sɛm kɔ-mɛ nɔ‘i ɔra so nɛ́ mɛ́![24] Mɛ bina ɓɔtɛ, ɓɛɛ kɔ-wa, wa pɛsa e mɛ duk!›

²³«Wa tɛ mgbɔ o kóò kɔ-mɛ in o bem kɔ-mɛ lɛŋ ha̧ o be Kaldee. Kɔ-mɛ nɛ̀ tɛ mɛ, mɛ beka kpasi kɔ̧̀ er-wa na; wannu Babilɔŋ tɛ tik tɛ-mɛ, ɓɛɛ ye’ɛ tɛ bìì wee.»

²⁴Sedesias tɔ̧ɔ̧ ha̧ Jeremii: «Ká ŋma bíí zii wen n’ɛɛ tɔ̧ in mɛɛ'ɛ na; kà bo hegɔ na, mɛ tɛ fe.

²⁵O gasawi tɛ zii'e ɛɛ tɔ̧ɔ̧ nyɛrɛ in ŋmaa; kà wa tɔ̧ ha̧ mɛ, mɛ̀ wé ɗoŋ mɔ nɛ̀ mɛ tɔ̧ɔ̧ ha̧‘m wen ká‘i tɛɛ gbɛ mɛ, ká mɛ hu̧si mɔ nɛ̀ wi na, ge mɔ ge a̧ wannu tɔ̧ɔ̧ ha̧ mɛ ge nde, wó,

²⁶mɛ̀ kífí nú ha̧ wa'e: ‹Mi kɔ̧ɔ̧ so mɛ zɔk nɛ́ wannu ha̧‘m mɛ ai nú ha̧ a̧ wen ká a̧ tɛ̀ɛ́ tom am si ɗoŋ si kɔ̧́ tua ko Yɔnataŋ, wen ká‘m tɛɛ fe.› »

²⁷Zu mɔ‘i, o gasawi lɛŋ tɛɛ ak Jeremii; ɓɛɛ sɛn tɛ kifa nú kɔ̧-a̧, a̧ mboo zu tɛ mɔ nɛ̀ wannu tɔ̧a. Wa ir a̧ tɛ wen'i siti na; hegɔ, ŋma bíí kpa ndaa nyɛrɛ kɔ-wa'i na.

²⁸Jeremii ɓɔna kɔ̧́ beegara ko o wi-pɛm-mɔ hɔ ŋgimbi tika-a ko Jerusalɛm.