Read Northwest Gbaya JEREMII 39 Bible Online

JEREMII 39 - Northwest Gbaya bible

JEREMII 39

¹Mɔ nɛ̀ dea tɛ ŋgimbi tika-a ko Jerusalɛm nɛ́ mɔ'ɔ. Tɛ mɔɔrɔ-ɗoŋ-naar pɛ-wan ko Sedesias wannu Juda, tɛ ɓu fio-zɛ, Nabukɔdɔnɔsɔr wannu Babilɔŋ in o gíí wi-biro kɔ‘i lɛŋ hɔɔ sɛn Jerusalɛm, ɓɛɛ wa kɛr ye.

²Tɛ ɓu-zua-kpɔk pɛ ɔɔ-wan ko Sedesias, tɛ naar fio-zɛ, tɛ mɔɔrɔ-ɗoŋ-naar ɔɔ-zɛ, o be Babilɔŋ mbaŋa garo ye nɛnɛ si saaye.

³O gasa wi-biro ko wannu Babilɔŋ tɛɛ ba fara sɛn gasa beegara: mɛ̀ nɛ́ Nɛrgal-Sarɛsɛr, gasa wi-duk-zu o wi-biro, Sin-Magir, Nebu-Sarsekim, gasawi kɔ̧̀ kira ko wannu, in Nɛrgal-Sarɛsɛr, gasawi ko o wi-biro ká bá nɛ̀ o oi dɔka o gasa wi-biro lɛŋ.

⁴Sedesias wannu Juda in o wi-biro kɔ‘i iŋa'e wa hɔɔ kaɗi, wa yuu mɔ yak saaye mɛ zɛ nɛ̀ tɛ̀ be fɔ ko wannu, nɛ̀ ká̧ nú garo nɛ̀ gbo nɛ̀ mgbara o ŋgeŋ yiitoo, ɓɛɛ wa ba nɛ́ yuwar si Araba mɛ.

⁵Ɓɛɛ o wi-biro Kaldee ndak ɗoŋ wa nɛnɛ, ɓɛɛ nɛ́ɛ̀ kpa Sedesias sɛn bɔkɔ-nú Jeriko. Wa baa a̧, ɓɛɛ wa mgbɔ a̧ daŋnɛ pii Ribla, nù ko Hamat sitɛ Nabukɔdɔnɔsɔr wannu Babilɔŋ nɛ̀ gɔna kita zu a̧.

⁶Wannu Babilɔŋ gbɛɛ o bem ko Sedesias sɛn Ribla ɓɔn yí-a. Wannu Babilɔŋ gbɛɛ o gasawi Juda mbɛt,

⁷ɓɛɛ a̧ o yí Sedesias, hɛr a̧ nɛ̀ nyak-ndɛrɛ gbam ŋmaa yiitoo wen baa a̧ si Babilɔŋ.

⁸Ɓɛɛ nɛ̀ war ko tua-wan in o tua-mbɔi, o be Kaldee pi̧i̧ wee sɛnɛ, ɓɛɛ wa to o garo Jerusalɛm a nù.

⁹Nɛbuzaradaŋ, gasawi ko o wi-pɛm-wannu kaia o wanmbɔi nɛ̀ ɓɔna so kɔ‘i sɛn saaye in o wi nɛ̀ yuu so mɔ sitɛ a̧ in o oi bíí lɛŋ nɛ̀ bara-biro yaknɛ si Babilɔŋ.

¹⁰A̧ ee o ŋma wisan ɓɔn tɛ nù‘i, ɓɛɛ a̧ ha̧ o fɔ-nyak-dɔ̧ɔ̧ in o ŋma fɔ ha̧ wa.

¹¹Nabukɔdɔnɔsɔr wannu Babilɔŋ ha̧a̧ so heembea zu mɔ ko Jeremii, ha̧ Nɛbuzaradaŋ gasawi ko o wi-pɛm-wannu'e:

¹²«Mɛ̀ bá a̧, mɛ̀ zɔ́k a̧ nɛ̀ de-a; ká mɛ́ de ŋma ɗaŋmɔ kpɔk in a̧ na, ɓɛɛ mɔ lɛŋ n'aa tɛ ak, mɛ̀ dé ha̧ a̧.»

¹³Nɛbuzaradaŋ gasawi zu o wi-pɛm-wannu, Nɛbusasbaŋ gasawi kɔ̧̀ kira ko wannu, Nɛrgal-Sarɛsɛr gasawi ko o wi-biro ká bá nɛ̀ o oi gasa wi-biro ko wannu Babilɔŋ lɛŋ

¹⁴toma ha̧ wa mɛ ba Jeremii sɛn beegara ko o wi-pɛm-mɔ tɛnɛ mɛ e a̧ er Gedelias bem ko Ahikam, bem ko Safaŋ nɛ̀ tɛ e ha̧ a̧ mɛ si ɗoŋ tɛ̀ kɔ̧-a̧. Nɛ́ hegɔ a̧ Jeremii ɓɔna nɛnɛ mgbara dukbíí.

¹⁵GASA WAN tɔ̧ɔ̧ ha̧ Jeremii hee mɔ'ɔ ga ŋgimbi nɛ̀ wa kpee so nɛ̀ a̧ e kɔ̧́ beegara ko o wi-pɛm-mɔ.

¹⁶«Mɛ̀ nɛ́ɛ̀ tɔ̧ ha̧ Ebɛd-Mɛlɛk be Kus hee ndé, wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mi tɛ de ha̧ mɔ n'am tɔ̧ɔ̧ so wen-aa zu ye’ɛ mɛ hɔ gba̧a̧. Mi tɛ pi̧ nɛ́ ŋgamɔ zu ye’ɛ, nɛ̀ bó nɛ́ demɔ na. Mɛ tɛ zɔk kànà mɔ‘i nɛ̀ yí-mɛ́.»

¹⁷GASA WAN tɔ̧a: «Wese'i, mi tɛ gbo mɛ er o wi nɛ̀ mɛ de kíí-wa.

¹⁸Mi tɛ kpasi mɛ nɛ̀ mbetɛ, mɛ beka fe fio gba-paa na. Kà mɛ ha̧ tɛ-mɛ ha̧‘m, mɛ tɛ duk nɛ̀ desee wen nɛ̀ mɛ kpasa. Nɛ́ GASA WAN a̧ tɔ̧ɔ̧ hegɔ.»