Read Northwest Gbaya JEREMII 4 Bible Online

JEREMII 4 - Northwest Gbaya bible

JEREMII 4

¹GASA WAN tɔ̧a: «Israɛl, kà a̧ bòò nɛ́ pia-ɗoŋ, nɛ́ sɛn tɛ‘m a̧ mɛ tɛ pii ɗoŋ sɛnɛ. Kà mɛ nɛ kaia o ndiŋmɔ kɔ-mɛ yinɛ yí‘m, ɓɛɛ mɛ beka yambali nɛnɛ ɓɔna.

²Kà mɛ nɛ́ kàná mɔ nɛ̀ nin GASA WAN nɛ̀ duk kpasa, kà kanamɔ‘i nɛ́ duka nɛ́ kpasa mɔ, nɛ̀ yuwar-a, in nɛ̀ de-a, ɓɛɛ o tugun bíí tɛ kpa toka-de-yoŋgo in zɔnamɔ mbɛt nɛ̀ ɗoŋ-am.»[3]

³GASA WAN tɔ̧ ha̧ o be Juda in o be Jerusalɛm: «Ɛ̀nɛ̀ gbútí fɔ, ɓɛɛ k’ɛnɛ gun mɔ nɛ̀ poo tɛnmɔ ɓɔna.

⁴Ɛ̀nɛ̀ gɔ́n bɔr'nɛ́ wen tu̧u̧ tɛ GASA WAN; ɛ̀nɛ̀ fó ɗaŋmɔ yinɛ kɔ̧́ see'nɛ́, ɛ́nɛ́ o be Juda in o be Jerusalɛm; kà bó hegɔ na, ɗaŋsee kɔ‘m tɛ kur hee wee ga mɛ bìì mɔ yaknɛ, nɛ̀ ŋma wi-bia-a yinɛ beka bo na, wen zu ɗaŋ yuwar deemɔ k’ɛnɛ.»

⁵Ɛ̀nɛ̀ hé mbéá sɛn Juda, ɓɛɛ ɛ̀nɛ̀ dé ha̧ o bíí Jerusalɛm mɛ zii mbɛt! Ɛ̀nɛ̀ tɔ̧́, wa a̧ dɔ́m o zak dam zu nù lɛŋ, wà a̧ híɗí mɔ nɛ̀ hee-ger. Ɛ̀nɛ̀ tɔ̧́, wa a̧ mɔ́í̧ ŋmaa si ye-ŋgárá!

⁶Wa a̧ bá tutuwal-biro nɛ̀ ŋgɔn si war Siɔŋ! Wa a̧ nɛ́ɛ̀ hu̧si! Ká wa yor nɛ̀ yuwar na! Nɛ́ gba ŋgamɔ a̧‘m fo tɛnɛ nɛ̀ ká̧-zan-mɛ́-ŋgɔn mɛ, nɛ́ gasa ɗaŋmɔ!

⁷Dila a̧ gbó nɛ̀ ti kasa kɔ‘i mɛ tɛnɛ‘i; wi-kum o tugun bíí a̧a̧ yuwar, a̧ kur nɛ̀ war fara kɔ̧-a̧ mɛ tɛnɛ ha̧ a̧ mɛ ɗaŋ nù k’ɛnɛ lɔkɔti-lɔkɔti kifi bɛɛ-oi; o gasa ye k’ɛnɛ tɛ bìì wee, ɓɛɛ o bíí tɛ gbin yak.

⁸Wen mɔ‘i, ɛ̀nɛ̀ á laa-bufu tɛ‘nɛ́! Ɛ̀nɛ̀ híɗí mɔ áí nɛ̀ nú, wen ŋga nyimsea ko GASA WAN beka yak zu yɛ na.

⁹GASA WAN tɔ̧a: «Ŋgai ko wannu in ko o be-wan tɛ gbin; gba̧a̧-tɛ o wi-ɗafi-sɔ̧ tɛ gbin, o wi-tɔ̧-wen oi nú Sɔ̧ tɛ tir a nù mbɛt.»

¹⁰Ɓɛɛ sa'm tɔ̧: «Ho GASA WAN Sɔ̧, nɛ̀ mbetɛ, ɛnɛ dee mɔ ba tɛ dukbíí'ɛ, in o bíí Jerusalɛm tɔ̧ nɛnɛ ha̧ wa'e, wa tɛ kpa ga̧a̧mɔ, ɓɛɛ nɛ́ mɔ'ɔ nɛ̀ gba-paa kum nɛ́ ɛɛ'ɛ.»

¹¹Ɓɛɛ tɛ ŋgimbi'i, GASA WAN tɛ tɔ̧ ha̧ dukbíí'ɛ, in ha̧ o bíí Jerusalɛm'e ndé: «Ŋma ŋga búk tɛ yu nɛ̀ ŋga-gbárà, ba nɛ̀ yuwar sitɛ dukbíí kɔ‘m, bó nɛ́ a̧ tɛ mɛ pɛfi mɔ na, bó nɛ́ a̧ tɛ mɛ mbii mɔ na mbɛt.

¹²Tɛ ha̧a̧nú kɔ‘m, ŋma ŋga búk a̧ yu tɛnɛ nɛ̀ hi̧i̧‘i; kinii, mi tɛ gɔn kita zu wa.»

¹³«Wisɛn tika zu yɛ hee tura-zan ga, o keekee-nyaŋa kɔ̧-a̧ ya hee wan-wee ga, o nyaŋa kɔ̧-a̧ haia gan o ndio. Ho! Ɛɛ fea, ɛɛ kuma kaɗi!»

¹⁴«Jerusalɛm, mɛ̀ fɔ́r o ɗaŋ kɔ-mɛ sɛn kɔ̧ see-mɛ yinɛ lɛŋ, wen ha̧ mɛ mɛ kpasi; mɛ tɛ e o ɗaŋ taamɔ kɔ-mɛ‘i duk mɛ gese ge?

¹⁵Wa ku̧u̧ naŋ hee mbéá nɛ̀ Daŋ mɛ. Nyɛrɛ ŋgamɔ tɛ nɛ̀ zu kaya Efraim mɛ.

¹⁶«Ɛ̀nɛ̀ mbáŋ tɛ o tugun bíí, ɛ̀nɛ̀ mɔ́í̧ ŋmaa, ɛ́nɛ́ o be Jerusalɛm; o wi-biro a̧ tɛ nɛ̀ ŋma nyɛi̧a gɔni-nù tɛnɛ‘i; wa gai nɛ́ mɔ a zu o ye Juda.

¹⁷Wa tɛ kɛr Jerusalɛm kpa nú ŋmaa hee o wi-pɛm-fɔ ga, GASA WAN, wen wa dee ŋgazu in am. GASA WAN tɔ̧ɔ̧ hegɔ.»

¹⁸Naŋanɔ kɔ-mɛ in o deemɔ kɔ-mɛ nyɛma so kànà ha̧ mɔ mɛ kpa mɛ hegɔ. Mɔ‘i nɛ́ mɔɔ-oi ɗaŋ kɔ-mɛ; ɔ paŋa nɛ́ mbetɛ. Mɔ‘i tɛ ba nɛ́ mgbák yí see-mɛ.

¹⁹Zaŋ-am! Zaŋ-am wa! Mɔ'ɔ ba tɛ‘m'i! Yí-see-am gɔn gɔn baram-baram, to nɛnɛ mgbut-mgbut! Mi nyɛm mɛ kpe nú‘m ɓɔna, wen mi zia dɔma mbia, in gayamɔ-biro.

²⁰O bíí hiɗi nɛ́ mɔ‘e, mɔ ɗaŋa yak zale! Nɛ̀ mbetɛ, nù ɗaŋa lɛŋ; o be tua-nú-fɔ kɔ‘m ɗaŋa hee gɔma-yí ga, o tua-laa kɔ‘m mbɛt.

²¹Mi tɛ kaɗi zɔka tutuwal-biro mɛ gese ge? Mi tɛ kaɗi zia mbia-biro mɛ gese ge?

²²«Nɛ̀ mbetɛ, dukbíí kɔ‘m iŋ mɔ na; wa iŋ am na. Wa ya hee o bem ga, taamɔ bo na. Wa iŋ mgbara mɔ na; mɔ nɛ̀ wa iŋa nɛ́ dee ɗaŋmɔ, wa iŋ dee demɔ na.»

²³Mi zɔka mɔ, ɓɛɛ nù nɛ́ mɔ'ɔ nɛ̀ duk puturu, mɔ bo sɛnɛ na’ɛ, ɓɛɛ sa̧a̧mɔ bo yiwese na mbɛt.

²⁴Kà‘m zɔk o kaya wó, wa lɛŋ nak nak; o zu-tɔ̧ lɛŋ pi̧ pi̧i̧ liki-liki-liki.

²⁵Mi zɔka mɔ woyo, ɓɛɛ bíí kóó kpɔk bo na, o nɔ̧́í̧ lɛŋ yuu mɔ yak mbɛt.

²⁶Mi zɔka mɔ nɛ̀ de-a, ɓɛɛ nù nɛ̀ duka so mɛ dɛm o waya-te, nɛ́ mɔ'ɔ nɛ̀ kifa ŋga-gbárà kotoro’ɛ; ɓɛɛ GASA WAN dɔ o ye lɛŋ nɛ̀ ŋga nyimsea kɔ‘i.

²⁷GASA WAN tɔ̧a: «Nù lɛŋ tɛ kifi geemɔ, ɓɛɛ bo nɛ mi tɛ ɗaŋ a̧ nɛ̀ oi gun yinɛ lɛŋ na.

²⁸Nɛ́ zu mɔ‘i sa nù duk tɛ zima mɔ, ɓɛɛ yiwese ba tum ŋgɔn mɛ mbɛt; mɔ n'am tɔ̧ɔ̧ tɛ hɔ gba̧a̧, mi beka e wen kɔ‘m'i duk na, mi beka kpai nú‘m na mbɛt.»

²⁹Tɛ gitimɔ nɛ̀ o wi-daŋ-nyaŋa in o wi-pi̧-góò de, o bíí saaye lɛŋ yuu mɔ pɛsi yak: o ŋma maa kɔ‘i si ti mɔ, o ŋma maa kɔ‘i si mgbara ta; wa pɛsa lɛŋ e ye duk wékéké.

³⁰Ɓɛɛ kɔ-mɛ Jerusalɛm, mɔ nɛ mɛ de’ɛ nɛ́ ge? Mɛ́ pi̧ kɔ-mɛ nɛ́ o gbɛ̧ laa tɛ-mɛ, a nɛ̀ de kísí lɔr ger-mɛ, pi̧ nɛ̀ o finaari yí-mɛ́ mbɛt, ɓɛɛ ɗafa-tɛ kɔ-mɛ tɛ ba tɛ-mɛ sɔɔ géè. O wi-de-wɔ-mɛ e nɛ́ mɛ tɛ geemɔ, wa kii mɛ gbɛ nɛ́ mɛ yinɛ.

³¹Mi zii nɛ́ aia-nú ko ŋma be-zɔŋa nɛ̀ kɔ̧ɔ̧ mɛ ko kuti bem kɔ‘i. Hiɗimɔ‘i nɛ́ hiɗimɔ ko de ye Jerusalɛm nɛ̀ hiɗi gɔn, nɛ̀ nyɛi̧ nɛ́ er tɔ̧ nɛnɛ‘e: «Oi mi wa! Ɛ̧ɛ̧ mi yee kɔ̧̀ er o wi-gbɛ-zu kaɗi!»