Read Northwest Gbaya JEREMII 42 Bible Online

JEREMII 42 - Northwest Gbaya bible

JEREMII 42

¹O gasa wi-biro lɛŋ, Yohanaŋ bem ko Karea, in Azaria bem ko Hosaya in o bíí lɛŋ, o gasawi in o geɗek-wi tɛ̀ɛ̀ pii katɛ

²Jeremii wi-tɔ̧-wen oi nú Sɔ̧, ɓɛɛ tɔ̧ ha̧ a̧: «Ɛ̀nɛ̀ zíí aia-nú k’ɛɛ, ɛ̀nɛ̀ kɔ́fí GASA WAN Sɔ̧ k’ɛnɛ wen be oi yɛ tikiɗi nɛ̀ ɓɔna’ɛ; ɛ́ɛ́ n’ɛ̀ɛ́ yaa so nɛ́ gba gíí bíí, nɛ́ mɔ'ɔ n’ɛ̀ɛ́ sira pii ɗoŋ tikiɗi, hee mɔ'ɔ n’ɛnɛ zɔka kinii’ɛ ga.

³GASA WAN Sɔ̧ k’ɛnɛ a̧ úsí yuwar n’ɛɛ tɛ ba in mɔ n’ɛɛ tɛ de h’ɛɛ.»

⁴Jeremii wi-tɔ̧-wen oi nú Sɔ̧ tɔ̧ɔ̧ ha̧ wa: «Mi zia! Mi tɛ kɔfi GASA WAN Sɔ̧ k’ɛnɛ hee mɔ'ɔ n’ɛnɛ aka'm mɛ de ga; ɓɛɛ mi tɛ tɔ̧ wen lɛŋ nɛ̀ GASA WAN tɛ kifi nú zu-a sɛnɛ ha̧‘m h’ɛnɛ. Mi beka hu̧si ŋma mɔ nɛ̀ ɛnɛ na.»

⁵Ɓɛɛ wa tɔ̧ kɔ-wa ha̧ Jeremii hee mɔ'ɔ ga: «GASA WAN a̧ dúk nɛ́ kpasa wi-sedaako k’ɛɛ. Ɛɛ tɛ de mɔ nyɛm nɛ̀ ɗoŋ mɔ nɛ̀ GASA WAN k’ɛnɛ tɛ tɔ̧ h’ɛnɛ mɛ tɔ̧ h’ɛɛ.

⁶Kóó mɔ‘i a̧ dee tɛ yɛ, kóó de tɛ yɛ na, ɛɛ tɛ zii tiger GASA WAN Sɔ̧ k’ɛɛ n’ɛɛ tom'nɛ́ sitɛ a̧‘i. Mɔ lɛŋ tɛ́ nɛ̀ nɛ̀ de-a wen n’ɛɛ tɛ zii wen nú GASA WAN Sɔ̧ k’ɛɛ.»

⁷Ɗoŋ zɛ ɓu, GASA WAN tɔ̧ɔ̧ wen ha̧ Jeremii.

⁸Jeremii saa Yohanaŋ bem ko Karea in o gasa wi-biro lɛŋ nɛ̀ yaa so katɛ a̧, ká bá nɛ̀ dukbíí lɛŋ, o gasawi in o geɗek-wi,

⁹ɓɛɛ a̧ tɔ̧ ha̧ wa: «Wen nɛ̀ GASA WAN Sɔ̧ ko Israɛl n’ɛnɛ toma'm sitɛ a̧ nɛ̀ aia-nú k’ɛnɛ tɔ̧ nɛ́ mɔ'ɔ:

¹⁰K’ɛ̀nɛ̀ kpɛk mɛ duk tɛ nù'ɛ, ɓɛɛ mi tɛ ba'nɛ́ e ŋgɔn, mi beka ɗaŋ‘nɛ́ yinɛ na; mi tɛ gun'nɛ́, ɓɛɛ mi beka zuɗi'nɛ́ ɓɔna. Mi tɛ ba ŋgamɔ n'am dee in'nɛɛ‘i yinɛ.»

¹¹GASA WAN tɔ̧a: «Ká kíí wannu Babilɔŋ de'nɛ́ na; k’ɛ́nɛ́ yu a̧ ɓɔna, wen mi a̧a̧ in'nɛɛ ha̧‘m mɛ gbo'nɛ́, mi tɛ zuɗi'nɛ́ ɗɔɔ ŋgai kɔ̧-a̧ yinɛ.

¹²Mi tɛ de ha̧ ko mɛ de a̧ h’ɛnɛ, wen ha̧ a̧ mɛ e'nɛ́ ɓɔn zu nù k’ɛnɛ.

¹³«Ɓɛɛ k’ɛ́nɛ́ bɛ̧ zia wen nú GASA WAN Sɔ̧ k’ɛnɛ, tɔ̧ nɛnɛ‘e: ‹Ɛ́ɛ́ kɔ̧ mɛ ya tɛ nù'ɛ na,› na;

¹⁴ɓɛɛ k’ɛ̀nɛ̀ tɔ̧‘e: ‹Weyaa, ɛ́ɛ́ kɔ̧ɔ̧ mɛ yak si nú Egiptɛ mɛ, fara n’ɛɛ beka iŋ biro ɓɔna, n’ɛɛ beka zii dɔma zak wen biro ɓɔna, n’ɛɛ beka zɔk bɔnɛ-ɓana-nyɔŋmɔ ɓɔna; nɛ́ hi̧i̧ ɛ́ɛ́ kɔ̧ɔ̧ mɛ ɓɔn sɛnɛ,› wó,

¹⁵nɛ̀ mbetɛ, ɛ̀nɛ̀ zíí wen ko GASA WAN, ɛ́nɛ́ oi wi nɛ̀ ya kpasa sɛn Juda’ɛ! Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: K’ɛ̀nɛ̀ ba yuwar mɛ yak si Egiptɛ, mɛ hu̧si tɛ‘nɛ́ sɛn hi̧i̧ nɛ̀ mbetɛ,

¹⁶gba-paa n’ɛnɛ yu'i tɛ nɛ̀ɛ́ kpa'nɛ́ sɛn nú Egiptɛ‘i; kaɓa n’ɛnɛ yu'i tɛ nɛ̀ ɗoŋ‘nɛ́ hɔ hi̧i̧; ɓɛɛ nɛ́ sɛn hi̧i̧ ɛ̀nɛ̀ tɛ kum.

¹⁷O bíí nɛ̀ tɛ ba yuwar mɛ nɛ̀ɛ́ hu̧si sɛn Egiptɛ tɛ fe fio gba-paa, kaɓa in ŋga zɛɛ-geŋa. Ŋma bíí nɛ̀ tɛ kpasi sɛn tɛ ŋga bɔnɛ n'am tɛ fo pi̧ zu'nɛ́‘i bo na.»

¹⁸Jeremii tɔ̧ɔ̧ ha̧ wa woyo'e: «Nɛ̀ mbetɛ, tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl nɛ́ mɔ'ɔ: Hee mɔ'ɔ nɛ̀ nyimsea kɔ‘m in tu̧u̧-see kɔ‘m tika nɛnɛ zu o bíí Jerusalɛm ga, kale-a mbɛt, tu̧u̧-see kɔ‘m tɛ tik zu'nɛ́ ŋgimbi n’ɛnɛ bé tɛ̀ɛ́ hɔ nɛnɛ Egiptɛ; ɓɛɛ ɛ́nɛ́ tɛ kifi geemɔ; ɓɛɛ o bíí tɛ sa nin'nɛ́ fom nɛ̀ ŋmaa, be nɛ̀ mɔ a zu ŋmaa, da̧ nɛ̀ ŋmaa mbɛt. Ɓɛɛ ɛ́nɛ́ beka zɔk fara’ɛ ɓɔna.»

¹⁹Jeremii tɔ̧ɔ̧ ha̧ wa woyo: «Ɛ́nɛ́ oi o bíí nɛ̀ ɓɔna kpasa sɛn Juda’ɛ, GASA WAN hee ndé, k’ɛ́nɛ́ nɛ́ si Egiptɛ na! Ɛ́nɛ́ iŋa nɛ̀ mbetɛ, sɔsɔɔ, mi nɛ́ wi-sedaako k’ɛnɛ.

²⁰Ɛ́nɛ́ tɛ̀ɛ́ yɔ kɔya-tɛ‘nɛ́; ɛ́nɛ́ nɛ̀ tɛ‘nɛ́ toma'm sitɛ GASA WAN, Sɔ̧ k’ɛnɛ tɔ̧ nɛnɛ ha̧‘m'e, a̧‘m nɛ́ɛ̀ ai nú wen'nɛ́ ha̧ GASA WAN Sɔ̧ k’ɛnɛ, a̧‘m tɔ̧́ mgbak mɔ nɛ̀ GASA WAN Sɔ̧ k’ɛnɛ tɔ̧a, ɓɛɛ ɛnɛ tɛ de.

²¹Mi tɔ̧ɔ̧ mɔ‘i h’ɛnɛ kinii, ɓɛɛ ɛ́nɛ́ mbo zu ha̧ GASA WAN Sɔ̧ k’ɛnɛ na; ɛ́nɛ́ zii gba̧a̧ mɔ n'aa ee nú‘m mɛ tɔ̧ h’ɛnɛ na.

²²Kinii, ɛ́nɛ́ nyɛma mɛ iŋ nɛ̀ mbetɛ‘e, ɛ́nɛ́ tɛ fe fio gba-paa, kaɓa in ŋga zɛɛ-geŋa sɛn fara n’ɛnɛ kɔ̧ɔ̧ mɛ nɛ̀ɛ́ husi sɛnɛ‘i.»