Read Northwest Gbaya JEREMII 43 Bible Online

JEREMII 43 - Northwest Gbaya bible

JEREMII 43

¹Ŋgimbi nɛ̀ Jeremii kaɗa tɔ̧ɔ̧ wen nɛ̀ GASA WAN Sɔ̧ kɔ-wa ee nú-a ha̧ a̧ mɛ tɔ̧ ti dukbíí kaɗi,

²Azaria, bem ko Hosaya, Yohanaŋ bem ko Karea, in o wan-ŋgazu nɔ‘i lɛŋ tɔ̧ɔ̧ ha̧ Jeremii: «Nɛ́ wen-ndela a̧ mɛ tɔ̧. GASA WAN Sɔ̧ k’ɛɛ tom kɔ‘i mɛ́ mɛ́ tɛ̀ɛ́ dor yɛ tɛ nɛa-a mɛ hu̧si sɛn nú Egiptɛ mɛ na.

³Nɛ́ Baruk bem ko Nɛriya a̧ ir mɛ mɛ dor yɛ. A̧ kɔ̧ɔ̧ mɛ e yɛ kɔ̧̀ er o be Kaldee, ha̧ wa mɛ gbɛ yɛ, mɛ kai yɛ nɛ̀ bara-biro si Babilɔŋ.»

⁴Kóó nɛ́ Yohanaŋ bem ko Karea, kóó nɛ́ o gasawi ko o wi-biro, kóó nɛ́ ŋma bíí nɛtɛ, zii tiger GASA WAN nɛ̀ sa wa mɛ ɓɔn tɛ nù Juda'i na.

⁵Yohanaŋ bem ko Karea in o wi-duk-zu o wi-biro kaia o oi be Juda lɛŋ, o wan nɛ̀ pia so ɗoŋ pii Juda ŋgimbi nɛ̀ wa pɛsa so nɛnɛ dam tɛ o nù katɛ wa.

⁶Wa kaia o wiwii, o okoo, ká bá nɛ̀ o obem in o boko-be-wan gú nɛ̀ o bíí lɛŋ nɛ́ Nɛbuzaradaŋ, gasawi zu o wi-pɛm-wannu ee so mɛ ya in Gedalias bem ko Ahikam, bem ko Safaŋ, ká bá nɛ̀ Jeremii wi-tɔ̧-wen oi nú Sɔ̧, in Baruk bem ko Nɛriya mbɛt.

⁷Wa bɛ̧ɛ̧ zia wen ko GASA WAN, ɓɛɛ wa kai ŋmaa si Egiptɛ, nɛ́ɛ̀ hɔ́ Dafne.

⁸Ɓɛɛ GASA WAN tɔ̧ wen ha̧ Jeremii sɛn Dafne hee mɔ'ɔ ga:

⁹«Mɛ̀ káí o gasa ta, ɓɛɛ mɛ̀ á ɗɔɔ naŋ, fara nɛ̀ wa yɔka nɛ̀ gua sɛn beegara nɛ̀ duk si war nú tua-wan ko wannu Egiptɛ sɛn Dafne. Mɛ̀ dé mɔ‘i nɛ gbaayi o ŋma be Juda,

¹⁰ɓɛɛ mɛ̀ tɔ̧́ ha̧ wa: Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Mi tɛ tom ha̧ wa mɛ sa wi-de-tom kɔ‘m Nabukɔdɔnɔsɔr wannu Babilɔŋ tɛnɛ, mi tɛ e damti-wan kɔ̧-a̧ zu o ta nɛ̀ mɛ́ guna'i; ɓɛɛ a̧ tɛ tati mɔɔ-kpe-zu-wan e zu a̧.

¹¹Nabukɔdɔnɔsɔr tɛ hɔ wen ɗaŋa nú Egiptɛ. Wi nɛ tɛ fe, tɛ fe; o wi nɛ wa tɛ kai nɛ̀ bara-biro yaknɛ, tɛ yak kɔ‘i nɛ́ bara-biro; o wi nɛ̀ tɛ fe nɛ́ fio gba-paa, tɛ fe kànà nɛ́ fio gba-paa'i!

¹²Mi tɛ pi̧ wee tɛ tua ko o sɔ̧ Egiptɛ; Nabukɔdɔnɔsɔr tɛ dɔ o sɔ̧ nɔ‘i, a̧ tɛ kai wa yaknɛ, a̧ tɛ kai o mɔ lɛŋ yinɛ sɛn nú Egiptɛ hee mɔ'ɔ nɛ̀ wi-dai-mɔ gbɛ nɛ̀ o kpɛ̧ yinɛ tɛ laa kɔ‘i’ɛ ga, ɓɛɛ a̧ tɛ yak mɔ kɔ̧-a̧ nɛ̀ yɔli.

¹³A̧ tɛ gbin o ta-zu-nù kɔ̧́ tua ko sɔ̧-wese nɛ̀ duk sɛn Heliopolis sɛn nú Egiptɛ yinɛ, ɓɛɛ a̧ tɛ dɔ tua ko o sɔ̧ Egiptɛ a nù gbuɗuk.»