Read Northwest Gbaya JEREMII 44 Bible Online

JEREMII 44 - Northwest Gbaya bible

JEREMII 44

¹Wen nɛ̀ GASA WAN tɔ̧ɔ̧ ha̧ Jeremii mɛ tɔ̧ ha̧ o be Juda lɛŋ nɛ̀ dee ye nú Egiptɛ sɛn Migdol, Dafne, Mɛmfis in nu Patros nɛ́ mɔ'ɔ.

²«Gba̧a̧-wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ɔ̧ ha̧ wa nɛ́ mɔ'ɔ: Ɛ́nɛ́ iŋa o ŋgamɔ lɛŋ n'am foo pi̧ zu Jerusalɛm in zu o ye Juda; kinii o ye nɔ‘i gbina a nù lɛŋ, bíí ɔ sɛnɛ ɓɔna.

³Mɛ̀ nɛ́ wen o ɗaŋmɔ nɛ̀ wa dea; wa tu̧u̧ see-am tɛ dɔɔ o ha̧a̧mɔ, gasi nɛ̀ o ŋma sɔ̧ nɛ̀ de so ŋma mɔ ha̧ wa, kóó h’ɛnɛ, kóó ha̧ o dáà k’ɛnɛ na mbɛt.

⁴Mi duka tɛ toma o wi-de-tom kɔ‘m, o wi-tɔ̧-wen oi nú‘m ha̧ wa mɛ́ tɔ̧ h’ɛnɛ‘e, k’ɛ́nɛ́ de o mɔɔ-sakayi n'am sɛna na wó, takaɗi;

⁵wa zii wen nú‘m na, wa yeŋ zer tɛ mɔ n'am tɔ̧ɔ̧ ha̧ wa mɛ́ kpai taamɔ tɛ ɗaŋ kɔ-wa in dɔɔ ha̧a̧mɔ ha̧ o ŋma sɔ̧ na.

⁶Hegɔ, ŋga nyimsea in tu̧u̧-see kɔ‘m tika zu wa, hee wee ga, dɔ o ye Juda in o be mgbara kira Jerusalɛm lɛŋ, ɓɛɛ fara'i kifi nɛ́ géé bɛɛ-oi kotoro. Nɛ́ mɔ‘i a'i zɔk sɔsɔɔ.

⁷«Ɓɛɛ kinii, wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: Wen ge s’ɛ́nɛ́ ndak ɗoŋ dee ɗaŋmɔ nɛ̀ dɔka-a in tɛ‘nɛ́ nɛ̀ tɛ‘nɛ́ ge? Ɛ́nɛ́ kɔ̧ɔ̧ ha̧ o wiwii in o okoo, o obem in o be zɔɗi-bem lɛŋ sɛn nù Juda mɛ kum gbuɗuk nde?

⁸Tɛ mɔ‘i, ɛ́nɛ́ tu̧ nɛ́ see-am tɛ o er deemɔ k’ɛnɛ. Ɛ́nɛ́ dɔ nɛ́ o ha̧a̧mɔ ha̧ o ŋma sɔ̧ sɛn nú Egiptɛ n’ɛ́nɛ́ tɛ̀ɛ̀ mɛ hu̧si sɛnɛ‘i. Ɛ́nɛ́ tɛ́ de ha̧ kpar'nɛ́ mɛ kaɗi, ɓɛɛ o tugun bíí zu nù lɛŋ tɛ sa nin'nɛ́, fom nɛ̀ o ŋmaa, da̧ nɛ̀ ŋmaa mbɛt.

⁹Tɛ‘nɛ́ bìí ɗoŋ o ɗaŋ deemɔ ko o dáà k’ɛnɛ, ká bá nɛ̀ ko o wannu Juda in ko o kóò kɔ-wa nde? Tɛ‘nɛ́ bìí ɗoŋ o ɗaŋ deemɔ k’ɛnɛ nɛ̀ tɛ‘nɛ́ in ko o kóò k’ɛnɛ, n’ɛ̀nɛ́ dee sɛn nù Juda dam mgbara kira Jerusalɛm nde?

¹⁰Hɔ nɛnɛ sɔsɔɔ‘i, ɛ́nɛ́ ta mɔ tɛ mɔ‘i na; ɛ́nɛ́ tu̧ tɛ‘m na, ɛ́nɛ́ nɛ́ nɔ̀ nyɛm nɛ̀ ɗoŋ o geŋa in o usamɔ n'am usa h’ɛnɛ in ha̧ o dáà k’ɛnɛ na.

¹¹«Tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl zu mɔ‘i nɛ́ mɔ'ɔ: Mi tɛ de ŋmaa in'nɛɛ, mi tɛ kum Juda lɛŋ.

¹²Mi tɛ de ŋmaa in oi o be Juda nɛ̀ kaia ŋmaa nɛ́ɛ̀ hu̧si sɛn nú Egiptɛ mɛ‘i. Wa tɛ kum lɛŋ, wa tɛ tir a nù sɛn nú Egiptɛ, nú gba-paa in kaɓa. Wa lɛŋ, o geɗek-wi in o gasawi tɛ fe nɛ́ fio gba-paa in kaɓa; wa tɛ kifi nɛ́ mɔɔ-búù, nɛ̀‘i tɛ sa nin-wa fom nɛ̀ o bíí, be nɛ̀ mɔ a zu ŋmaa, da̧ nɛ̀ ŋmaa mbɛt.

¹³Mi tɛ de ŋmaa in o wi nɛ̀ ɔ nú Egiptɛ hee mɔ'ɔ n'am dee so nɛ ŋmaa in Jerusalɛm nɛ̀ gba-paa, kaɓa in ŋga zɛɛ-geŋa’ɛ ga.

¹⁴Ŋma bíí nɛ̀ tɛ yu mɔ yak mɛ́ kpasi mgbara o wi nɛ̀ ɓɔna so Juda, ɓɛɛ nɛ̀ tɛ̀ɛ̀ hu̧si nú Egiptɛ bo na; sɛka ŋma bíí nɛ̀ tɛ́ si ɗoŋ si nù Juda nɛ̀ wa ta mɛ si ɗoŋ sɛnɛ‘i, beka bo na mbɛt. Wa beka si ɗoŋ sɛn hi̧i̧ ɓɔna, kà á̧ bòò nɛ́ o ŋma bíí nɛ̀ mɔ tɛ hɔ yɔɔ zu wa nde, ɛ̧.»

¹⁵O wi nɛ̀ iŋa so'e o kóò kɔ‘i dɔɔ so o ha̧a̧mɔ ha̧ o ŋma sɔ̧, ká bá nɛ̀ o gba gíí okoo nɛ̀ mɔi̧a wese'i, gú nɛ̀ o bíí lɛŋ nɛ̀ dee so ye nú Egiptɛ sɛn Patros, kifa nú ha̧ Jeremii'e nde:

¹⁶«Kóó wen'i nɛ̀ mɛ̀ tɔ̧ h’ɛɛ‘i, mɛ tɔ̧ nɛ̀ nin GASA WAN ndé, ɛɛ beka zii na.

¹⁷Ɛ́ɛ́ tɛ de k’ɛɛ mɔ lɛŋ n’ɛɛ taa mɛ de: dɔɔ o ha̧a̧mɔ ha̧ Ko-wan mɛ yiwese, aa o zɛzɛ nù ha̧ a̧ hee mɔ'ɔ n’ɛɛ dee so tɛ o ye nù Juda gú nɛ̀ o be mgbara kira Jerusalɛm ga. Ɛ́ɛ́ nɛ̀ tɛ yɛ dee mɔ‘i, o dáà k’ɛɛ, o wannu k’ɛɛ, gú nɛ̀ o gasawi k’ɛɛ mbɛt; ɓɛɛ ɛ́ɛ́ ya so nyɔŋ nɛ̀ mɔ nɛ̀ fee-see, zaŋ yɛ sur, ɛ́ɛ́ iŋ so k’ɛɛ ŋma ŋgamɔ na.

¹⁸Ŋgimbi n’ɛɛ kaɗa nɛ̀ dɔɔ o ha̧a̧mɔ ha̧ Ko-wan mɛ yiwese in aa-zɛzɛ nù ha̧ a̧, mɔ lɛŋ ɓan nɛ́ yɛ, ɓɛɛ nɛ́ mɔ'ɔ n’ɛɛ kum nɛ́ kuma-a nú gba-paa in kaɓa’ɛ.»

¹⁹O okoo tɛ̀ɛ̀ tɔ̧ kɔ‘i mbɛt'e: «Ŋgimbi n’ɛ̀ɛ̀ dɔ so nɛ̀ o ha̧a̧mɔ ha̧ Ko-wan mɛ yiwese, bó nɛ́ o wíì k’ɛɛ iŋa so na nde? Bó nɛ́ wa kɔ̧ɔ̧ so ɗɔɔ o makala n’ɛɛ gi so in aa-zɛzɛ n’ɛɛ a so nù ha̧ a̧ mbɛt na nde?»

²⁰Ɓɛɛ Jeremii tɔ̧ ha̧ dukbíí lɛŋ, o wiwii in o okoo nɛ̀ kifa so nú ha̧ a̧:

²¹«O ha̧a̧mɔ n’ɛnɛ duka dɔ nɛ̀ tɛ̀ ye o nù Juda in nɛ̀ o mgbara kira Jerusalɛm nɛnɛ‘i, ɛ́nɛ́ nɛ̀ tɛ‘nɛ́, in o dáà k’ɛnɛ, ká bá nɛ̀ o wan k’ɛnɛ, o gasawi in o wanmbɔi k’ɛnɛ mbɛt, bó nɛ́ mɔ n’ɛnɛ dea'i duk ɓɔn tɛ taamɔ ko GASA WAN nɛ̀ tɛ-a mbaŋ ɗoŋ-aa'i na nde?

²²GASA WAN nyɛm so mɛ de munyal zu o yɔɔ-kaya in o ɗaŋmɔ n’ɛnɛ de'i ɓɔna; ɓɛɛ sa nù k’ɛnɛ kifi duk nɛ́ bɛɛ-oi kotoro, ɓɛɛ kifi nɛ́ mɔɔ-fom-ŋmaa nɛ̀ bíí bo sɛnɛ na. Nɛ́ mɔ‘i a̧‘i zɔk sɔsɔɔ‘i!

²³Ŋgamɔ nɛ̀ tika zu'nɛ́ kinii’ɛ, mɛ̀ nɛ́ wen zu dɔɔ o ha̧a̧mɔ n’ɛ̀nɛ́ dɔɔ so ha̧ o ŋma sɔ̧; mɔ‘i nɛ́ ɗaŋmɔ ɛ́nɛ́ dea ti GASA WAN. Ɛ́nɛ́ mbo zu tɛ wen kɔ̧-a̧ na, ɛ́nɛ́ nɛ́ ɗoŋ usamɔ kɔ̧-a̧, kà bó nɛ̀ kasa o heembea in o geŋa kɔ̧-a̧ na mbɛt. Nɛ́ mɔɔ-oi mɔ‘i a̧ tika zu'nɛ́ tɛ mɔ n’ɛɛ zɔk sɔsɔɔ'ɛ.»

²⁴Ɓɛɛ Jeremii tɔ̧ ha̧ dukbíí lɛŋ, o wiwii gú nɛ̀ o okoo woyo: «Ɛ̀nɛ̀ zíí wen ko GASA WAN, ɛ́nɛ́ o be Juda nɛ̀ a̧a̧ sɛn nú Egiptɛ'ɛ!

²⁵Tɔ̧ɔ̧-wen ko GASA WAN nɛ a̧a̧ nɛ ŋgayamɔ lɛŋ, Sɔ̧ ko Israɛl h’ɛnɛ nɛ́ mɔ'ɔ: Ɛ́nɛ́ in o kóò k’ɛnɛ tɔ̧ɔ̧ so'e, kóó ge a̧ dee ge, ɛ́nɛ́ beka e ha̧a̧nú k’ɛnɛ ha̧ Ko-wan mɛ yiwese duk na, ɓɛɛ nɛ́ mɔ'ɔ n’ɛnɛ dɔ nɛ̀ o ha̧a̧mɔ, a nɛ̀ zɛzɛ nù ha̧ a̧. Ɛ̀nɛ̀ yór kànà ɗoŋ ha̧a̧nú k’ɛnɛ‘i, ɓɛɛ ɛ̀nɛ̀ dé mɔ n’ɛ̀nɛ́ tɔ̧a'i ŋgaɓo!

²⁶Nɛ̀ mbetɛ, ɛ̀nɛ̀ zíí wen ko GASA WAN, ɛ́nɛ́ o be Juda nɛ̀ de ye sɛn nú Egiptɛ. GASA WAN tɔ̧a'e: Mi kana mɔ nɛ̀ nin-am nɛ̀ ɔ gasa, nɛ̀ ŋma be Juda beka kan mɔ nɛ̀ nin-am sɛn nú Egiptɛ tɔ̧ nɛnɛ‘e, ‹GASA WAN dúk kpasa,› ɓɔna.

²⁷Ɛ̧ɛ̧ kinii’ɛ, mi bó ɗoŋ wa mɛ ha̧ de duka-a ha̧ wa ɓɔna, ɓɛɛ mi tɛ pi̧ nɛ́ ŋgamɔ zu wa. O be Juda nɛ̀ ya nú Egiptɛ'ɛ lɛŋ tɛ kum nú gba-paa in kaɓa.

²⁸Ɓɛɛ o ŋma bíí mɛ mgbara'nɛ́ kpɔk kpɔk nɛ̀ gba-paa'i tɛ yak zu wa tɛ si ɗoŋ nɛ̀ nú Egiptɛ si nù Juda, ɓɛɛ o wi nɔ‘i nɛ̀ baa hu̧si so nú Egiptɛ mɛ‘i tɛ iŋ mgbara mɔ k’ɛɛ in'nɛɛ. Wen kɔ‘m a̧ dee kpasamɔ náà, kóó nɛ́ wen k’ɛnɛ a̧ dee dee kpasamɔ nde?»

²⁹GASA WAN tɔ̧a: «Mɔɔ-usi-mɔ nɛ̀ tɛ́ usi h’ɛnɛ‘e, mi tɛ de ŋmaa in'nɛɛ sɛn fara’ɛ nɛ́ mɔ'ɔ.

³⁰Mi ee Hofra wannu Egiptɛ kɔ̧̀ er o wisɛn kɔ̧-a̧ nɛ̀ kii mɛ́ gbɛ a̧, hee mɔ'ɔ n'am ee so nɛ̀ Sedesias wannu Juda kɔ̧̀ er wisɛn kɔ̧-a̧ Nabukɔdɔnɔsɔr wannu Babilɔŋ nɛ̀ kia so mɛ́ gbɛ a̧ ga. Nɛ́ mi GASA WAN a̧ tɔ̧ wen’ɛ.»