Read Northwest Gbaya JEREMII 46 Bible Online

JEREMII 46 - Northwest Gbaya bible

JEREMII 46

¹Wen’ɛ nɛ́ wen nɛ̀ GASA WAN tɔ̧ɔ̧ ha̧ Jeremii wi-tɔ̧-wen oi nú Sɔ̧ zu o tugun bíí.

²GASA WAN tɔ̧ɔ̧ wen zu Egiptɛ in zu o wi-biro ko Nɛko wannu Egiptɛ, ká a̧ duk so sɛn Karkɛmis ká̧ zaŋ yí Efrat, ŋgimbi nɛ̀ Nabukɔdɔnɔsɔr, wannu Babilɔŋ gana nɛ̀ a̧ nɛ̀ biro sɛn tɛ naar pɛ-wan ko Joakim bem ko Josias wannu Juda.

³«Ɛ̀nɛ̀ nɛ́k o ŋgee, o gasa-a in o geɗek-a, ɛ̀nɛ̀ gbár yak si yí biro!

⁴Ɛ̀nɛ̀ hɛ́r o nyaŋa, o wi-daŋ-nyaŋa, ɛ̀nɛ̀ dáŋ! Ɛ̀nɛ̀ gbár nɛ̀ o mɔɔ-gu-zu'nɛ́, ɛ̀nɛ̀ a nú sɛ́ɛ̀ siti; ɛ̀nɛ̀ pí̧ o laa-boi tɛ‘nɛ́!

⁵«Ɓɛɛ ɛ̧ɛ̧ nɛ ge? Nɛ́ ge a̧‘m zɔk’ɛ ge? Bele zara wa lɛŋ, wa si nɛ́ ɗoŋ nɛ̀ ndaa. Wa gɔma o ŋgaŋa-wi kɔ-wa zakati nɛ̀ nù, wa yu nɛ́ mɔ nduɗɛɛ yaknɛ. Wa zɔk géé zɔka mɔ si ɗoŋ ɓɔna; mɔɔ-kíì dama fara lɛŋ. Nɛ́ GASA WAN a̧ tɔ̧ wen’ɛ!

⁶Kóó nɛ́ wi-iŋ-mgbara-mɔ nyɛm mɛ yu mɔ yak na; kóó nɛ́ ŋgaŋa-wi nyɛm mɛ kpasi tɛ-wi na: Nɛ̀ ká̧-zan-mɛ́-ŋgɔn ká̧ zaŋ Efrat, wa kɔ̧́ nɛ́ naŋ tir nɛnɛ a nù.

⁷«Nɛ́ o'o duk hee yì Nil ga nɛ̀ ha̧ daŋnɛ, hee ŋma gasa nana-yì nɛ̀ yí-a kpa̧i̧ kpa̧i̧'ɛ ga o?

⁸Nɛ́ Egiptɛ a̧ duk hee yì Nil nɛ̀ ha̧ daŋnɛ, hee ŋma gasa nana-yì nɛ̀ yí-a kpa̧i̧ kpa̧i̧ ga. Egiptɛ tɔ̧ɔ̧ so kɔ‘i'e, wi tɛ ha̧, wi tɛ kpe zu nù, ɓɛɛ wi kuma o ye, in o wi-ɔ-sɛnɛ lɛŋ.

⁹O nyaŋa, ɛ̀nɛ̀ gɔ́m pamyala; o keekee, ɛ̀nɛ̀ gɔ́m nɛ̀ ŋgai; o ŋgaŋa-wi a̧ gɔ́m siti: o bíí Kus in o bíí Put, o wan-zika-ŋgee, ká bá nɛ̀ o bíí Lud o wi-pi̧-góò mbɛt!

¹⁰Ɓɛɛ war ko GASA WAN, Sɔ̧ nɛ̀ a̧a̧ nɛ̀ ŋgayamɔ lɛŋ, wese'i nɛ́ wese-kifa-er, wen usa bɔnɛ ha̧ o wisɛn kɔ̧-a̧; gba-paa hɔɔ ŋmaa in ŋma ŋga saɗi-nyɔŋ-bíí, nɛ̀ nyɔŋ bíí, ɓɛɛ ká zaŋ sura, ɓɛɛ ká tɔk tɛ-wa gbɛɛ a̧ hee dɔ̧ɔ̧'ɛ ga. Mɔ‘i duk nɛ́ ɗafa-sɔ̧ wen GASA WAN Sɔ̧, wan ŋgayamɔ lɛŋ, tɛ́ nù mɛ́ ká̧-zan-mɛ́-ŋgɔn ká̧ zaŋ yí Efrat mɛ.

¹¹«Egiptɛ, mɛ yàà-be-zɔŋa’ɛ, mɛ̀ dáŋ si nú Galad, á̧ mɛ̀ kíí nyina-ga̧-nyimmɔ. O dɔka ɗafa-tɛ kɔ-mɛ‘i nɛ́ tom takaɗi, wen ŋma mɔ nɛ̀ tɛ́ de ha̧ nyimmɔ kɔ-mɛ mɛ́ ga̧, bo na.

¹²O tugun bíí zii nɛ́ nyɛrɛ mɔɔ-búù kɔ-mɛ, wen hiɗimɔ kɔ-mɛ dama zaŋnu lɛŋ. O ŋgaŋa-wi kɔ̧ nɛ́ naŋ nɛ̀ ŋmaa, tir nɛnɛ a zu ŋmaa.»

¹³Wen nɛ̀ GASA WAN tɔ̧ɔ̧ ha̧ Jeremii wi-tɔ̧-wen oi nú Sɔ̧ wen mbaŋa tɛ-wa'e ndé, Nabukɔdɔnɔsɔr, wannu Babilɔŋ tɛ̀ɛ̀ mɛ tik nú Egiptɛ wó'ɛ nɛ́ mɔ'ɔ:

¹⁴«Ɛ̀nɛ̀ dé ha̧ wa mɛ iŋ mɔ'ɛ sɛn nú Egiptɛ; ɛ̀nɛ̀ dé ha̧ wa mɛ zii wen’ɛ sɛn Migdol, Mɛmfis in sɛn Dafne mbɛt. Ɛ̀nɛ̀ tɔ̧́‘e: ‹Mɛ̀ kúr, mɛ̀ yór à̧ nɔ́!› Gba-paa a̧ nyɔŋ katɛ mɛ‘i.

¹⁵Ɛ̧ɛ̧ nɛ́ gba ge? Apis[26] yu nɛ́ mɔ! Wiwii ndai kɔ-mɛ yor géé yora-a na!

¹⁶GASA WAN sɔmgba a̧, ɓɛɛ a̧ si tik nù; o bíí mbɛt yoo nù, tir a zu ŋmaa, tɔ̧ nɛnɛ‘e: ‹Ɛ̀ɛ̀ kúr, ɛ̀ɛ̀ sí ɗoŋ mgbara dukbíí k’ɛɛ, si nù k’ɛɛ mɛ, ɗoŋ yɛ a̧ nyɛ́í̧ nɛ̀ gba-paa nɛ́ de ko ha̧ bíí na!›

¹⁷Ɛ̀nɛ̀ gɔ́n nin a zu wannu Egiptɛ‘e, ‹Wi-de-tua oi gɔna-kórò.›

¹⁸«Wannu nɛ̀ nin-a nɛ́ GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: Mi duk kpasa! Hee mɔ'ɔ nɛ̀ kaya Tabɔr yor nɛnɛ ɓɔn oi mgbara o dɔka kaya ga, in hee mɔ'ɔ nɛ̀ kaya Karmɛl yor ɓɔn oi ká̧ gba-tɔp’ɛ ga,

¹⁹nɛ́ hegɔ a̧ wisɛn k’ɛnɛ tɛ́ tɛ̀ nɛnɛ. Ɛ̀nɛ̀ hɛ́r o tùì k’ɛnɛ wen yaka-a si ŋma nù, ɛ́nɛ́ o bíí nú Egiptɛ; Mɛmfis tɛ bìì wee korkor, kifi nɛ́ géé ŋga-gbárà kotoro.

²⁰Egiptɛ duka so nɛ́ gba de daŋa zɔŋa-ndai, ɓɛɛ nɛ́ mɔ'ɔ nɛ̀ zi̧-ɓór-ɓór tɛ̀ɛ́ nɛ ká̧-zan-mɛ́-ŋgɔn ɓɛɛ zu̧ tɛ-a.

²¹Kóó nɛ́ gɔni o wi-biro wan mɛ́ yoɓa-a nɛ̀ tɛ̀ɛ́ nɛ̀ mgbák nú Egiptɛ, nɛ̀ yaa hee mɛ̀ nɛ́ o be daŋa wiwii-ndai nɛ‘i zɔk nɛ̀ de-a’ɛ ga, wa mbɛt zika ɗoŋ yu mɔ in o ŋmaa soŋkpooŋ, wa yor géé yora-a na. Nɛ̀ mbetɛ, wese tika-a kɔ-wa nɛ́ mɔ'ɔ nɛ̀ tɛ tɛnɛ‘i, nɛ́ ŋgimbi nɛ̀ wa tɛ kifi nɛ̀ nú zu ɗaŋ deemɔ kɔ-wa.

²²O wi-biro ko o bíí Egiptɛ zika tɛ yu mɔ yak hee gɔ́k ga, giti-wa bo na; o wisɛn kɔ-wa gar wa nɛ̀ kpi̧i̧ hee wi-gɔm-te ga.»

²³GASA WAN tɔ̧a: «Ɛ̀nɛ̀ pɔ́í wa a nù hee mɔ'ɔ nɛ‘i pɔi nɛ̀ kombo’ɛ ga; hee da̧a̧ kombo nɛ‘i nyɛm mɛ́ ye sɛnɛ na ga! O wisɛn nɔ‘i dɔka gan o gba-dɔya, wi nyɛm mɛ́ tɔr wa na.

²⁴Ziimɔ baa Egiptɛ yàà-de be-zɔŋa’ɛ, a̧ tika kɔ̧̀ er o bíí mɛ ká̧-zan-mɛ́-ŋgɔn mɛ.»

²⁵GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧a: «Mi tɛ de ŋmaa in Amɔŋ Sɔ̧ ko Tebɛs; mi tɛ́ de ŋmaa in Egiptɛ in o sɔ̧ kɔ-wa in o wannu kɔ-wa, ká bá nɛ̀ kiitɛ wannu nɛ̀ zu-wi gú nɛ̀ o bíí lɛŋ nɛ̀ hu̧si ɗoŋ-aa.»

²⁶GASA WAN tɔ̧a: «Mi tɛ́ a wa kɔ̧̀ er o wi nɛ̀ kii mɛ gbɛ wa, kɔ̧̀ er Nabukɔdɔnɔsɔr wannu Babilɔŋ in o wi-de-tom kɔ̧-a̧. «Nɛ́ ɗoŋ ŋgimbi'i a̧ Egiptɛ tɛ́ kpa nɛ̀ duka-a nɛ̀ de-a hee kuti-a ga.»

²⁷«Ɓɛɛ kɔ-mɛ Jakob, wi-de-tom kɔ‘m, ká mɛ́ de kíì na, ká mɛ́ e ha̧ tɛ-mɛ mɛ́ mɔk na, Israɛl! Mi tɛ́ kai'nɛ́ pii ɗoŋ nɛ̀ tɛ̀ o nyɛi̧a fara, mi tɛ́ gbo o bezaŋ‘nɛ́ tɛ nù nɛ̀ wa de bara sɛnɛ. Jakob tɛ pii ɗoŋ, nɛ̀ ŋma mɔ nɛ̀ tɛ́ fo a̧ bo na. A̧ tɛ duk mgbítíŋ, ŋma bíí nɛ̀ tɛ pi̧ kíì tɛ-a beka bo na mbɛt.

²⁸Mɛ Jakob, wi-de-tom kɔ‘m, ká mɛ́ de kíì na, mi a̧a̧ ɗoŋ mɛ. Mi tɛ kum o tugun bíí lɛŋ fara n'am pɛsa'nɛ́ dam sɛnɛ; ɓɛɛ k’ɛ́nɛ́, mi beka kum'nɛ́ na; mi tɛ́ usi ɗoŋ deemɔ nɛ̀ yuwar-a h’ɛnɛ, nɛ̀ ŋma mɔ beka yɔ‘nɛ́ na! Nɛ́ mi GASA WAN a̧ tɔ̧ wen’ɛ!»