Read Northwest Gbaya JEREMII 47 Bible Online

JEREMII 47 - Northwest Gbaya bible

JEREMII 47

¹Wen’ɛ nɛ́ wen nɛ̀ GASA WAN tɔ̧ɔ̧ ha̧ Jeremii wi-tɔ̧-wen oi nú Sɔ̧ zu o be Filistii nɛti ha̧ wannu Egiptɛ mɛ tik Gaza nɛ̀ biro.

²A̧ tɔ̧a: «O yì ha̧ ha̧a̧ nɛ̀ war ká̧-zan-mɛ́-ŋgɔn mɛ tɛnɛ, wa kifi nɛ́ o ŋga som-yì nɛ̀ fok nɛ̀ ŋgai. Yì‘i ha̧a̧ kpe zu nù in o mɔ mɛ zu nù lɛŋ, o ye in o bíí nɛ̀ ɔ sɛnɛ mbɛt. O bíí ya hiɗi nɛ̀ mɔ, ai nɛ̀ nú wen ha̧ ŋma bíí mɛ gbak wa; o bíí tɛ nù‘i lɛŋ ya hiɗi nɛ̀ mɔ nɛ̀ ŋgaya-a

³wen giti naŋ o nyaŋa-war-yì nɛ̀ wa zii fara kɔn ŋmaa tɛnɛ, in giti naŋ o keekee fara nɔ̀ì̧ tɛnɛ. Tɛ o dáà-wan-bem gbina, ɓɛɛ see-wa bo tɛ o bem kɔ-wa ɓɔna.

⁴Ɛ̧ɛ̧ wese’ɛ nɛ́ wese kuma-a ko o be Filistii lɛŋ, ŋma oi nda bíí nɛ̀ tɛ duk mɛ́ ye ɗoŋ o bíí Tir in Sidɔŋ bo na. Nɛ̀ mbetɛ, GASA WAN kuma o be Filistii; o be Filistii nɔ‘i nɛ́ oi ndaa o bíí see-kisi Kaftɔr nɛ̀ ɓɔna so.

⁵O wi Gaza kpuia zu zim nɛ̀ mɔ, Askelɔŋ duk kɔ‘i wékéké. Ɛ́nɛ́ oi o bíí bɔkɔ-nù nɛ̀ mɔ hɔɔ yɔɔ zu nɛ'ɛ, ɛ́nɛ́ tɛ kaɗi aa da̧i̧ tɛ‘nɛ́ mɛ gese ge?

⁶Ɛ̧ɛ̧ zɔm ŋgamɔ'ɛ ho! Oee gba-paa ko GASA WAN wa, mɛ beka ɔm tɛ-mɛ na nde? Mɛ̀ sí ɗoŋ kɔ̧́ koɓo, ɓɛɛ mɛ̀ ɔ́m tɛ-mɛ, mɛ̀ dúk kéɗéŋ.

⁷Hee ge gba-paa tɛ ɔm tɛ-wi ge? Mɛ̀ nɛ́ GASA WAN a̧ ha̧a̧ nú ha̧ a̧, tóm nɛ̀ a̧ si zu Askelɔŋ, in si war ká̧ zaŋ gba-tɔp.»