Read Northwest Gbaya JEREMII 48 Bible Online

JEREMII 48 - Northwest Gbaya bible

JEREMII 48

¹Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ zu Mɔab nɛ́ mɔ'ɔ: «Ɛ̧ɛ̧ nɛ́ ge ŋgamɔ ge nɛ̀ tika zu Nɛbo’ɛ ge! Ye kɔ-wa ɗaŋa lɛŋ! Foe baa Kiriataim, biro baa a̧; foe baa gasa ye'i nɛ̀ gbina a nù.

²Hura-nin ko Mɔab kaɗa; sɛn Hɛsbɔŋ, wa ba nɛ́ o ɗaŋ keta zu a̧ tɔ̧ nɛnɛ‘e: ‹Ɛ̀ɛ̀ nɛ́ ɛ̀ɛ̀ mbɔ́lí tugun bíí'ɛ yinɛ.› Mɛ mbɛt Madmɛn, wa kpee nú mɛ, gba-paa a̧a̧ ɗoŋ mɛ.

³Wi zii nɛ́ saa sara wen gbakamɔ nɛ̀ war Horonaim mɛ̀ tɛnɛ; mɔ kuma kaɗi, mɔ ɗaŋa lɔkɔti-lɔkɔti.

⁴Mɔ ko Mɔab hɔ oi mɔ ɓɔna, wi zii nɛ́ tiger o bem kɔ̧-a̧ fara hiɗi mɔ ŋgúr-ŋgúr.

⁵Wi daŋ kaya Luhit nɛ̀ mi̧i̧kɔ̧a; tɛ̀ zira-a nɛ̀ Horonaim, wi zii nɛ́ o hiɗimɔ-bɔnɛ zu o mɔ nɛ̀ ɗaŋa.

⁶Ɛ̀nɛ̀ yú mɔ yak bee, kóó o ndé à̧ má nɛ́ kɔ‘i! Ɛ̀nɛ̀ nɛ́ɛ̀ yá Arɔɛr ŋga-gbárà hee tuifuu zaŋbɛɛ ga.[27]

⁷Mɔab, kɔ-mɛ, mɛ́ dúk tɛ-mɛ nɛ̀ ŋgai tɛ-mɛ, in mbɔi kɔ-mɛ; ɓɛɛ ɛ̧ɛ̧ kinii'i, mɔ baa mɛ́ kaɗi. Wa tɛ ba sɔ̧ kɔ-mɛ Kɛmɔs yaknɛ si gɔni-nù mɛ, in o wiɗaf'aa gú nɛ̀ o wan kɔ̧-a̧ lɛŋ nɛ̀ bara-biro.

⁸Mɔ nɛ̀ GASA WAN tɔ̧ nɛ́ mɔ'ɔ. Wi-ɗaŋ-mɔ ɗaŋa mɔ tɛ ye k’ɛnɛ lɛŋ; ŋma ye kpɔk ɓɔn na, o mɔ mɛ́ kɔ̧̀ ɗɔŋgɔ k’ɛnɛ lɛŋ ɗaŋa hɔ nɛnɛ bɔkɔ-nù mɛ̀ mbɛt.

⁹Ɛ̀nɛ̀ mbó mɔɔ-sedaako-fio e nɛ̀ nin Mɔab, wen ye kɔ̧-a̧ ɗaŋa kifi nɛ́ bɛɛ-oi, nɛ̀ ŋma bíí beka ɔ sɛnɛ ɓɔna.

¹⁰Fom a̧ bá bíí nɛ̀ de tom ko GASA WAN nɛ̀ tɛɛri, in nɛ̀ kɔ̧́ ha̧ tok tɛ-wi mɛ fo nú gba-paa kɔ̧-a̧ na!

¹¹«Mɔab duka so tɛ ga̧a̧mɔ nɛ̀ de-a tɛ ŋgimbi ŋgaiwi kɔ‘i mɛ tɛnɛ; ŋma ŋgamɔ fo so a̧ si ŋma fara na. A̧ duka so oi-aa mgbítíŋ nɛ̀ ga̧a̧-a̧, hee ŋma de mbiɗi-dɔ̧ɔ̧ ga. Wa gbai so a̧ si kɔ̧́ ŋma nyɛk na. Nɛ́ hegɔ a̧ demɔ kɔ̧-a̧ ɓɔna nɛnɛ tɛ-a, ɓɛɛ nyɔ̧ɔ̧-a̧a̧ duk ɓɔn oi-aa.»[28]

¹²GASA WAN'e, «Zu mɔ‘i, wese tɛ hɔ n'am tɛ tom o bíí mɛ nɛ̀ɛ́ gbai wa a nù hee mɔ'ɔ nɛ̀‘i gbai nɛ̀ dɔ̧ɔ̧ a nù'ɛ ga; wa tɛ gbai mɔ nɛ̀ a̧a̧ kɔ̧̀ kpánà lɛŋ a nù, ɓɛɛ wa gbaa kpánà‘i.

¹³Gɛ̧ɛ̧mɔ tɛ ba Mɔab wen zu Kɛmɔs hee mɔ'ɔ nɛ̀ gɛ̧ɛ̧mɔ baa so nɛ̀ o be Israɛl zu Bɛtɛl nɛ̀ duka so nɛ́ mɔɔ-e-nɛ-ta kɔ-wa’ɛ ga.

¹⁴«Ɛ́nɛ́ o be Mɔab, hee ge ɛ́nɛ́ tɛ tɔ̧‘e, ɛ́nɛ́ nɛ́ o ŋgaŋa-wi, o yaa-ŋgo-biro, ge?

¹⁵Wannu nɛ̀ nin-a nɛ́ GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: Wi-ɗaŋ-Mɔab a̧ daŋ tɛnɛ mɛ tik o ye kɔ̧-a̧‘i; wa tɛ gbɛ o daŋa ŋgaiwi kɔ̧-a̧ hee mɔ'ɔ nɛ‘i gbɛ nɛ̀ saɗi sɛn fara-gɔn-ndai’ɛ ga.

¹⁶«Mɔab hɛɗa ɗaŋa-a kaɗi, ŋgamɔ duk dɔ̧́ɔ̧́ mɛ tik zu a̧.

¹⁷Ɛ̀nɛ̀ nɛ́ɛ̀ hɔ tɛ-a, ɛ́nɛ́ o bíí nɛ ɔ katɛ a̧, ɛ́nɛ́ o de sɛm kɔ̧-a̧, ɓɛɛ ɛ̀nɛ̀ tɔ̧́‘e: ‹Ho! Ɛ̧ɛ̧ nɛ́ gba ge ŋgayamɔ gèé? Gba ye’ɛ nɛ́ mɔ'ɔ nɛ̀ gbina a nù nɛ̀ oi ŋgamɔ kɔ‘i lɛŋ'ɛ!›

¹⁸«O bíí nú Dibɔŋ, ɛ̀nɛ̀ zír zu damti-wan k’ɛnɛ, ɛ̀nɛ̀ dúk zu buk-paa, wen wan-ɗaŋ-Mɔab a̧ daŋ tɛnɛ pii tɛ‘nɛ́‘i; a̧ tɛ́ gbin o ŋga fara k’ɛnɛ lɛŋ.

¹⁹Ɛ́nɛ́ o be Arɔɛr, ɛ̀nɛ̀ yór yuwar ɛ̀nɛ̀ pɛ́m mɔ, ɛ̀nɛ̀ ák o wi-yu-mɔ yak in o wan nɛ̀ mɔ hɔɔ yɔɔ zu wa'e, nɛ́ ge a̧ yak ge?

²⁰Búù baa Mɔab zu tika-a kɔ-wa; ɛ̀nɛ̀ híɗí mɔ, ha̧ o bíí mɛ́ tɛ̀ɛ́ gbak'nɛ́! Ɛ̀nɛ̀ tɔ̧́ si ká̧ zaŋ Arnɔŋ mɛ‘e ndé, Mɔab ɗaŋa!

²¹«Kita a̧ tɛ‘i, a̧ tɛ tik zu o wi-ɔ bɔkɔ-nù, Holɔŋ, Yasa, Mefat,

²²Dibɔŋ, Nɛbo, Bɛt-Diblataim,

²³Kiriataim, Bɛt-Gamul, Bɛt-Mɛɔŋ,

²⁴Kɛriot, Bɔsra, mɔ nɛ̀ tɔ̧a'e, nú Mɔab nɛ̀ oi-aa lɛŋ, o wan mɛ nyɛi̧a fara, in o wan nɛ̀ nyɛi̧ na mbɛt.»

²⁵GASA WAN tɔ̧a: «Ŋgai ko Mɔab lɛŋ gbina, ɓaa Mɔab gbina,[29] ŋgai kɔ̧-a̧ kaɗa.

²⁶«Ɛ̀nɛ̀ nɔ́sí a̧ nɛ̀ dɔ̧ɔ̧ wen n'aa taa so'e, wi gana GASA WAN. A̧ tɛ kin tɛ-a nɛ̀ ɔ̧i̧ kɔ̧-a̧, wen ha̧ a̧ mɛ kifi nɛ́ mɔɔ-zɛkɛɗi ko bíí.

²⁷Mɔab, tɛ-mɛ a̧ mbáŋ ɗoŋ duka-a nɛ̀ mɛ́ duka so zɛkɛɗi nɛ̀ Israɛl'ɛ. Mɛ kpaa so a̧ mgbara o wi-zuzu, sɛka mɛ tɔ̧ nɛ̀ wen kɔ̧-a̧, mi̧i̧ nɛ̀ zu-mɛ'ɛ nde?

²⁸«Ɛ́nɛ́ o be Mɔab, ɛ̀nɛ̀ kúr yak tɛ o ye nɔ'ɔ; ɛ̀nɛ̀ nɛ́ɛ̀ ya mgbara ta, ɛ̀nɛ̀ yá hee o gbaku̧i̧ nɛ̀ de yáá kɔ‘i tɛ o hu̧sa̧ fara nú di̧i̧'ɛ ga.

²⁹«Ɛ́ɛ́ zia nyɛrɛ ŋmaŋa-tɛ ko Mɔab; a̧ so kànà nɛ́ wi-ŋmaŋ-tɛ nɛ̀ mbetɛ! Ɛ̧ɛ̧ nɛ́ ge ŋgazu in gasa zu ge nɛ̀ duk tɛ-a’ɛ gèé? Ɛ̧ɛ̧ nɛ́ ge ɗaŋ-nú-wen in duka-tɛ gèé?»

³⁰GASA WAN tɔ̧a: «Mi iŋa ŋmaŋa-tɛ in ŋmaŋa-zaŋ-wen kɔ̧-a̧; mɔ n'aa de lɛŋ bó nɛ́ kpasamɔ na.

³¹«Mi ai nú wen zu Mɔab, ɓɛɛ hegɔ‘i mi sa nɛ́ o bíí mɛ tɛ̀ɛ́ gbak a̧; mi gɔfi nɛ́ mɔ wen zu bɔnɛ ko o bíí Kir-Hɛrɛs.

³²Nyak-dɔ̧ɔ̧ ko Sibma, mi hi̧a kɔ̧a̧ zù mɛ́ gan Yazɛr; gbaa-er-mɛ nɛ̀ɛ̀ hɔ kur gba-tɔp, hɔ nɛnɛ Yazɛr mɛ. Wi-ɗaŋ-mɔ tika zu nyɔnɔ kɔ-mɛ in waya-nyak-dɔ̧ɔ̧ kɔ-mɛ.

³³Mɔab, gasa tortɛ nɛ̀ ba so'nɛ́ zu nyɔnɔ in o nyak-dɔ̧ɔ̧ k’ɛnɛ tɛ kaɗi; mi tɛ de ha̧ dɔ̧ɔ̧ mɛ́ ɔ̧si̧ kɔ̧̀ o kpánà k’ɛnɛ, ɓɛɛ o ndikira gima-vati-dɔ̧ɔ̧ tɛ kaɗi mbɛt.

³⁴«Wi zii nɛ́ sara gbakamɔ nɛ wa sa si Hɛsbɔŋ hɔ nɛnɛ Eleale mɛ. Ger-wa kura nɛ̀ Sɔar hɔ nɛnɛ Yahas, Horonaim in Eglat-Selisaya, wen kóó nɛ́ o yì mɛ Nimrim ɔ̧sa lɛŋ mbɛt.»

³⁵GASA WAN tɔ̧a: «Mi tɛ kum o bíí Mɔab nɛ̀ mboo kusa-fara, ɓɛɛ ká wa dɔ kpoo-sɔ̧ in o ha̧a̧mɔ sɛnɛ ɗafi nɛ̀ o sɔ̧ kɔ-wa'i.

³⁶«Hegɔ mi gɔfi nɛ́ mɔ nɛ̀ ɗaŋsee kɔ̧́ see-am zu Mɔab in zu o bíí Kir-Hɛrɛs hee mɔ'ɔ nɛ̀‘i zii nɛ̀ giti fol-ɗaŋsee’ɛ ga, wen o mɔ nɛ̀ wa kpaa so lɛŋ yɔa.[30]

³⁷Hegɔ, wa lɛŋ kpuia zu-wa in o zera kɔ-wa mbɛt. Wa ee da̧i̧ kɔ̧̀ er-wa nɛ̀ tɛ-wa, ɓɛɛ wa a bufu tɛ-wa zim nɛ̀ mɔ.»

³⁸GASA WAN tɔ̧a: «Aia-nú dama nɛ̀ zu o tua, in o bee-gara ko Mɔab lɛŋ. Mi tɛ gba Mɔab a nù hee mɔ'ɔ nɛ̀‘i gba nɛ kpánà nɛ̀ de tɛ-wi na a nù'ɛ ga.

³⁹Ho! O'o Mɔab nɛ́ mɔ'ɔ nɛ̀ tika ɗaŋ lɛŋ'ɛ nde! Ɛ̀nɛ̀ hí̧í̧ a̧! A̧ zika ɗoŋ nɛ̀ foe, kifi duk nɛ́ mɔɔ-búù in mɔɔ-zɛkɛɗi ko o bíí mɛ katɛ a̧.»

⁴⁰Wen nɛ̀ GASA WAN tɔ̧ nɛ́ mɔ'ɔ: «Ɔ hee mɛ̀ nɛ́ ŋma tama a̧ bu̧i̧, ɓɛɛ sa nyɛi̧ ɓaa-wi si zu Mɔab ga.

⁴¹«Biro nyɔŋa o gasa ye mɛ́ nú Mɔab lɛŋ, gú nɛ̀ o ŋga-fara-biro mbɛt.[31] «Yàà-ŋgo-biro tɛ kpa bɔnɛ hee okoo nɛ̀ zaŋ nyim mɛ ko bem ga.

⁴²«Mɔab ɗaŋa lɛŋ, a̧ bó nɛ́ dukbíí ɓɔna, wen n'aa tɔ̧ɔ̧ so'e wi gana GASA WAN.»

⁴³GASA WAN tɔ̧a: «Gasa mɔɔ-kíì a̧ tík zu'nɛ́, ɛ́nɛ́ o bíí nú Mɔab! Ɛ̀nɛ̀ tík kɔ̧̀ gboŋgo! Yɔk a̧ bá‘nɛ́!

⁴⁴Wi nɛ̀ bé tɛ̀ɛ́ yu mɔ yak tik gasa mɔɔ-kíì‘i à̧ tík kɔ̧̀ gboŋgo! Wi nɛ̀ tɛ daŋ kɔ̧̀ gboŋgo'i a̧ bá yɔk. Mi fo nɛ́ pɛ-bɔnɛ oi ɗaŋmɔ ko Mɔab pi̧ zu a̧.

⁴⁵O wi-yu-mɔ mbɔia tɔkɔrɔ ɓɛɛ wa yor mɛ́ e zu-wa ɗɔɔ gi̧ɔ̧ Hɛsbɔŋ; nɛ́ mɔ'ɔ nɛ̀ leɓe-wee gboo nɛ̀ saaye'i nɛ̀ kɔ̧̀ kira-wan ko wannu Sihɔŋ, ɓɛɛ bu̧i̧ nɛ́ɛ̀ tik zu nù ko wi-ari nɔ‘i, bíí nɛnɛ nɛ̀ mgbara-nù mɛ hegɔɔ yak nɛnɛ hɔ see nù kɔ-wa mɛ.

⁴⁶Oee bɔnɛ kɔ-mɛ wa, Mɔab! O bíí ko Kɛmɔs lɛŋ kuma. Wa kaia o bem in o boko-bem kɔ-mɛ yaknɛ nɛ̀ bara.

⁴⁷«Ɓɛɛ tɛ ŋma ŋgimbi nɛ̀ ɗoŋ, mi tɛ ba Mɔab e ŋgɔn woyo. GASA WAN tɔ̧ɔ̧ hegɔ.» Sɔŋkur wen ko Sɔ̧ zu Mɔab kaɗa hegɔ.