Read Northwest Gbaya JEREMII 5 Bible Online

JEREMII 5 - Northwest Gbaya bible

JEREMII 5

¹«Ɛ̀nɛ̀ yár dam mgbara kira Jerusalɛm lɛŋ, ɛ̀nɛ̀ zɔ́k mɔ, ɓɛɛ ɛ̀nɛ̀ kíí mɔ mbɛt. Ɛ̀nɛ̀ kíí mɔ dam fara lɛŋ sɛn beegara ye Jerusalɛm, ɛ́nɛ́ nyɛma kpaa ŋma kpasa bíí hi̧i̧ nde? Ŋma bíí kpɔk nɛ̀ de mɔ nɛ̀ yuwar-a nɛ̀ de-a a̧a̧ sɛnɛ nde? Ŋma bíí nɛ̀ duk nɛ́ wi-tɔ̧-kpasawen a̧a̧ sɛnɛ? Kà ŋma bíí a̧ bòó sɛnɛ hegɔ, ɓɛɛ mi beka ɗaŋ ye'i ɓɔna.»

²Nɛ̀ mbetɛ, kóó wa á̧ kàná mɔ‘e: «Ti-bee[4] GASA WAN nɛ̀ duk kpasa...» kanamɔ kɔ-wa duk nɛ́ ɔrmɔ.

³GASA WAN, bó nɛ́ ɛnɛ kɔ̧ɔ̧ mɛ zɔk nɛ́ mboozu na nde? Ɛ́nɛ́ gusi wa, ɓɛɛ nyim tɛ-wa na. Ɛ́nɛ́ a̧ kum wa mɛ kum kaɗi'i, wa zii mbɔrɔ k’ɛnɛ na; wa ŋgaia see-wa hee ta ga, wa bɛ̧ɛ̧ pia ɗoŋ pii tɛ‘nɛ́.

⁴Ɓɛɛ mi taa kɔ‘m'e, wa nɛ́ o ŋma geɗek bíí hegɔ nɛ̀ kɔ̧ zaŋ gɔn na, wa iŋ o yuwar ko GASA WAN na, wa iŋ yuwar duka-a ko Sɔ̧ kɔ-wa na mbɛt.

⁵Mi tɛ nɛ sitɛ o gasawi wen ha̧‘m mɛ tɔ̧ nyɛrɛ in wa, wen war kɔ-wa, wa iŋa yuwar ko GASA WAN, in yuwar duka-a ko Sɔ̧ kɔ-wa, ɓɛɛ wa hee o ŋmaa ga: wa mbo zu ha̧ a̧ na, wa de nɛ́ ŋgazu e nɛ̀ a̧ duk.

⁶Hegɔ‘i, wa tɛ kifi mɔɔ-nyɔŋ ko o dila-zaŋbɛɛ, o gbóò mɛ́ ndaɗa-nù tɛ a̧k wa nɛ̀ er ŋmaa. O gɔ̧ tɛ kɛr o ye kɔ-wa; ŋgimbi nɛ‘i be tɛ̀ɛ́ tɔ̧‘e ha'i gbó wó, ɓɛɛ wa tɛ a̧k wa wen ŋgazu in ɗaŋmɔ kɔ-wa nɛ̀ dɔk dɔk siti siti'i.

⁷«Ɓɛɛ tɛ yuwar'i, mi tɛ e ɗaŋmɔ ha̧ mɛ héé ge, Jerusalɛm? O bem kɔ-mɛ nɛ́ mɔ'ɔ nɛ̀ e nɛ‘m duk, kan nɛ̀ mɔ nɛ̀ nin o géé-sɔ̧'ɛ! Mi duna wa nɛ̀ demɔ, zu-a'i, wa nɛ́ nɛ́ ɗoŋ o géé-sɔ̧; wa ir nɛ́ o ŋmaa zu kó-de-mɔ nɛ̀ mbɔɗɔnu.

⁸Wa hɔɔ ŋmaa in daŋa ŋgai-nyaŋa nɛ̀ wɔ daŋa ŋmaa gbɛ, ɓɛɛ nɛ̀ ma yì hiɗi nɛ̀ mɔ, ndak nɛ̀ ɗoŋ kóò ko ŋma-a.

⁹GASA WAN tɔ̧a: Mi beka usi so bɔnɛ ha̧ wa na? Mi beka kifi er ha̧ pɛrti wi nɔ'ɔ na nde?

¹⁰Ɛ̀nɛ̀ dáŋ zu o garo kɔ-wa, ɛ̀nɛ̀ ɗáŋ mɔ, ɓɛɛ k’ɛ́nɛ́ ɗaŋ mɔ lɛŋ na. Ɛ̀nɛ̀ ɓír o nyak-dɔ̧ɔ̧ a nù, wa bó nɛ́ kɔ‘m na.

¹¹Nɛ́ GASA WAN a̧ tɔ̧ wen’ɛ: o bíí nù ko Israɛl in ko Juda dee ŋgazu in am nɛ̀ mbetɛ.»

¹²O be Juda kafa GASA WAN tɔ̧ nɛnɛ‘e: «A̧ bo na, ɗaŋmɔ beka tik zu yɛ na; ɛɛ beka iŋ k’ɛɛ gba-paa, kóó kaɓa na mbɛt.

¹³Wen ko o wi-tɔ̧-wen oi nú Sɔ̧ nɛ́ géé búk, bó nɛ́ Sɔ̧ a̧ tɔ̧ wen ha̧ wa na. Mɔ‘i nɛ̀ wa tɔ̧a'i a̧ sí ɗoŋ zu wa.»

¹⁴Mɛ̀ nɛ́ wen hegɔ a̧ GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ tɔ̧ wen’ɛ: «Hee mɔ'ɔ nɛ wa tɔ̧ɔ̧ hegɔ ga, Jeremii, wen kɔ‘m n'am ee kɔ̧̀ nú-mɛ́ tɛ duk nɛ́ wee, ɓɛɛ o wi nɔ'ɔ tɛ duk nɛ́ kora gua nɛ̀ wee'i tɛ dɔ a nù.»

¹⁵Ɓɛɛ a̧ tɔ̧ woyo: «Ɛnɛ o be Israɛl, mi tɛ fo ŋma tugun bíí nɛ̀ nyɛi̧a fara pi̧ zu'nɛ́; nɛ́ ŋma ŋga tugun bíí nɛ̀ mbɔi na, nɛ̀ tugun-wa dúk tɛnɛ ɓeemɛ, n’ɛ̀nɛ̀ iŋ nú kɔ-wa, kà bó nɛ̀ gba̧a̧ wen kɔ-wa na mbɛt.

¹⁶Ɓaro-góò kɔ-wa nɛ́ kɔ̧́-fio nɛ̀ nú-a kpe na; wa lɛŋ nɛ́ o ŋgaŋa wi-biro.

¹⁷Wa tɛ nyɔŋ o nyɔnɔ kpɛɛfɔ k’ɛnɛ, in o brɛt k’ɛnɛ lɛŋ. Wa tɛ nyɔŋ o bem k’ɛnɛ mɛ be-wiwii-a in be-okoo-a; wa tɛ nyɔŋ o be mɔ-dai in o gasa mɔ-dai k’ɛnɛ, gu nɛ̀ o nyak-dɔ̧ɔ̧ in o te-mbɔra k’ɛnɛ. Ŋgimbi nɛ̀ wa bé tɛ̀ɛ́ tɛ nɛ̀ gba-paa kɔ-wa, wa tɛ gbin o ye-ŋgárá k’ɛnɛ n’ɛ̀nɛ̀ é nɛ̀ ta'i.»

¹⁸GASA WAN'e ndé: «Kóó tɛ ŋgimbi'i mbɛt, mi beka kum'nɛ́ a nù lɛŋ na.

¹⁹K’ɛ̀nɛ̀ bé tɛ̀ɛ́ ak mɔ‘e ndé: ‹Wen ge sa GASA WAN Sɔ̧ k’ɛɛ pi̧ bɔnɛ zu yɛ hegɔ‘i ge nde?› ɓɛɛ Jeremii, mɛ̀ kífí nú ha̧ wa'e ndé: Mɛ̀ nɛ́ wen nɛ̀ wa ee am duk mɛ gasi nɛ́ o sɔ̧ ko o gɔni-duk sɛn nù k’ɛnɛ hɛ̧ɛ̧; nɛ́ mɔ‘i ɛ̀nɛ̀ tɛ nɛ̀ kànà mɛ de bara ha̧ o ŋma gɔni-duk tɛ gɔni-nù mɛ.»

²⁰«Ɛ̀nɛ̀ tɔ̧́ wen’ɛ ha̧ o bezaŋ Jakob, ɓɛɛ ɛ̀nɛ̀ tóm wen-aa ha̧ wa si Juda mɛ mbɛt.

²¹Ɛ́nɛ́ o wi nɔ'ɔ nɛ̀ bɛɗɛ-zu bo na, nɛ̀ taamɔ k’ɛnɛ ɗuk na’ɛ, ɛ̀nɛ̀ zìì: wa a̧a̧ nɛ̀ yí, ɓɛɛ wa zɔk mɔ na; wa a̧a̧ nɛ̀ zer, ɓɛɛ wa zii mɔ na mbɛt.

²²GASA WAN'e ndé: Ɛ́nɛ́ yú kíí tɛ‘m na, tɛ‘nɛ́ nak ti'm na nde? Mi Wan nɛ̀ ee nyɛmɛ nɛ̀ gbìsí mgbara gba-tɔp in nù, gbìsì nɛ̀ tɛ duk ɓɔnsɛnɛ nɛ̀ yì beka yak zu a̧ na’ɛ. Yì tɛ pɛŋi ɓɛɛ a̧ beka de ŋma mɔ na; o gasa pɛŋa-yì tɛ kur nɛ̀ beka yak zu gbìsì‘i na mbɛt.

²³Ɓɛɛ see o wi nɔ'ɔ ɔ ŋgaya, wa nɛ́ o wi-ŋgazu; wa a̧ra̧ e'm duk, ba yuwar kɔ-wa yak.»

²⁴Wa tɔ̧ géé tɔ̧a-a'e: «Ɛ̀ɛ̀ yú kíí GASA WAN Sɔ̧ k’ɛɛ, wan nɛ̀ ha̧ kórò nyɛm nɛ̀ ɗoŋ ŋgimbi-a, in nɛ̀ e ŋgimbi mɔi̧a-nyɔnɔ h’ɛɛ mbɛt’ɛ na.

²⁵Mɛ̀ nɛ́ o ɗaŋmɔ k’ɛnɛ a̧ ɗaŋ yuwar nɔ'ɔ, o yɔɔ-kaya k’ɛnɛ a̧ kpe o yuwar demɔ nɔ'ɔ;

²⁶wen o ɗaŋwi a̧a̧ mgbara dukbíí kɔ‘m; wa pɛm mɔ hee wi-tui-pɛr be nɔ̧́í̧ ga; wa tui nɛ́ pɛr, ɓɛɛ bàà nɛ́ o bíí.

²⁷O tua kɔ-wa duna nɛ̀ o mɔɔ-zuzu hee gɛsɛ a̧ duna nɛ̀ o nɔ̧́í̧ ga; nɛ́ hegɔ a̧ wa kifa duk nɛ́ o gasawi in o gasa wan-mbɔi.

²⁸Wa ɔ ŋmaŋa in tɛ-wa ɔ dee; ɗaŋmɔ kɔ-wa yaka zale: wa yu kíí gɔni mɔ, in mɔ ko be-oi na mbɛt. Yuwar kpaamɔ kɔ-wa nɛ́ mɔ‘i. Wa ta mɔ wen o wisan na.»

²⁹GASA WAN'e ndé: «Mi beka usi so bɔnɛ ha̧ wa na? Mi beka kifi er ha̧ pɛrti zuduk bíí'ɛ na nde?

³⁰«Nɛ́ mɔɔ-búù in mɔɔ-kíì a̧ de zu nù'ɛ.

³¹O wi-tɔ̧-wen oi nú Sɔ̧ tɔ̧ nɛ́ wen-ndela,[5] o wi-ɗafi-sɔ̧ kai nɛ́ mɔ hee mɔ'ɔ nɛ̀ wa kɔ̧ɔ̧ ga, ɓɛɛ mɔ‘i dee tɛ dukbíí kɔ‘m. Ɓɛɛ mbe mɔ n’ɛnɛ tɛ de ɗoŋ mɔ‘i nɛ́ ge nde?»