Read Northwest Gbaya JEREMII 50 Bible Online

JEREMII 50 - Northwest Gbaya bible

JEREMII 50

¹Wen nɛ̀ GASA WAN tɔ̧ zu Babilɔŋ, nù ko o be Kaldee, nɛ̀ nú Jeremii, wi-tɔ̧-wen oi nú-a nɛ́ mɔ'ɔ:

²«Ɛ̀nɛ̀ wé ɗoŋ mɔ'ɔ ha̧ o tugun bíí; ɛ̀nɛ̀ dé mɔɔ-usi-mɔ zu mɔ‘i ha̧ wa, ɛ̀nɛ̀ wé ɗoŋ mɔ lɛŋ ha̧ wa, k’ɛ́nɛ́ hu̧si mɔ kpɔk nɛ̀ wa na! Ɛ̀nɛ̀ tɔ̧́ ha̧ wa'e Babilɔŋ tika! Kinii, ziimɔ in gɛ̧ɛ̧mɔ baa o géé-sɔ̧ kɔ-wa; nɛ̀ mbetɛ, ziimɔ baa Bɛl, ɓɛɛ gɛ̧ɛ̧mɔ duk zu Marduk!

³Nɛ̀ mbetɛ, ŋma tugun bíí mɛ́ ká̧-zan-mɛ́-ŋgɔn baa zu dúk nɛ̀ a̧, ɓɛɛ nɛ́ tugun bíí‘i a̧ tɛ ɗaŋ nù kɔ̧-a̧ kifi géé ŋga-gbárà kotoro, nɛ̀ bíí beka ɔ sɛnɛ ɓɔna. Kóó nɛ́ bíí, kóó nɛ́ saɗi beka duk fara'i ɓɔna, wen o mɔ lɛŋ yuu mɔ yak e fara'i duk.»

⁴GASA WAN tɔ̧a: «Sɛn tɛ ŋgimbi'i, o be Israɛl in o be Juda tɛ pii ɗoŋ in o ŋmaa, nɛ́ nɛ̀ nɔ̀, hí̧í̧ nɛ̀ kɔ̧a̧ nɛ̀ yuwar, kíí nɛ̀ GASA WAN Sɔ̧ kɔ-wa.

⁵Wa ak nɛ́ yuwar mɛ nɛ̀ si Siɔŋ, ɓɛɛ nɛ́ yuwar'i a̧ wa zika yí-wa si sɛnɛ, ɓɛɛ nɔ̀ kɔ-wa'i mɛ nɛ́ wen ha̧ wa mɛ́ kpa ŋmaa in GASA WAN tɛ nɔɔ-tɔk, nɛ̀ tɛ duk ɓɔnsɛnɛ, nɛ̀ tɛ-wa beka bi ɗoŋ-aa na kpoo nɛ kpoo.

⁶Dukbíí kɔ‘m yaa so hee o be-sami nɛ̀ yɔa ga; o wi-dai-wa dee so ha̧ wa mɛ yɔ. Nɛ́ wa'i a̧ dee so ha̧ o sami mɛ pɛsi dam mgbara o kaya, ɓɛɛ nɛ́ mɔ'ɔ nɛ̀ wa yara nɛ̀ zu o kaya in o zu-tɔ̧, ɓɛɛ wa iŋ oi fara-duk kɔ-wa ɓɔna.

⁷O mɔ lɛŋ nɛ̀ kpaa so wa, nyɔŋ nɛ́ wa; o wisɛn kɔ-wa tɔ̧ɔ̧ so'e ndé, o mɔ nɛ̀‘i de ha̧ wa bo nɛ́ ɗaŋmɔ na, wen nɛ́ wa a̧ dee déé ɗaŋmɔ ti GASA WAN ɛ̧. Yuwar deemɔ nɛ̀ yuwar-a in o mɔɔ-e-nɛ-ta ko o dáà kɔ-wa duka so nɛ́ GASA WAN!

⁸«Ɛ̀nɛ̀ yú mɔ yak nú Babilɔŋ, nù ko o be Kaldee! Ɛ̀nɛ̀ gbó yák! Ɛ̀nɛ̀ dúk nɛ̀ kpɔra-a hee ŋma bara-wiwii-saɗi nɛ̀ duk ti ha̧ ŋma gíí saɗi’ɛ ga.

⁹Nɛ̀ mbetɛ, mi tɛ ir o gasa tugun bíí tɛ́ nù si war ká̧-zan-mɛ́-ŋgɔn mɛ mɔi̧ ŋmaa mɛ nɛ̀ɛ́ bi Babilɔŋ. Wa tɛ yor naŋ-biro in a̧ nɛ̀ ŋgaya-a, ɓɛɛ wa tɛ ba nù kɔ̧-a̧. O góò kɔ-wa nyun mɔ na hee ŋma ŋga wi-biro nɛ̀ píí nɛ̀ géé er na ga.»

¹⁰GASA WAN tɔ̧a: «Wa tɛ ɓar mɔ ko o bíí nú Kaldee lɛŋ, ɓɛɛ o wi nɛ̀ tɛ kai mɔ kɔ-wa tɛ ya nɛ̀ desee.»

¹¹«Í̧ì̧ wa! Ɛ̀nɛ̀ yá nɛ̀ desee, ɛ̀nɛ̀ yá nɛ̀ tortɛ, ɛ́nɛ́ o wi-ɗaŋ-mɔɔ-oi kɔ‘m! Ɛ̀nɛ̀ hɔ́ zaŋgule hee o nyaŋa ga; ɛ̀nɛ̀ hìɗì mɔ hee o nyaŋa nɛ̀‘i dai wen dɛma kpar-a’ɛ ga.

¹²Foe in búù baa nàà k’ɛnɛ, wan-ko'nɛ́‘i. Nù k’ɛnɛ tɛ sir de geemɔ ti o ŋma tugun bíí, fara'i tɛ kifi nɛ́ géé ŋga fara kotoro.

¹³«Tɛ ŋga nyimsea ko GASA WAN, bíí beka ɔ tɛ ye’ɛ ɓɔna. A̧ tɛ kifi duk nɛ́ ŋga-gbárà nɛ̀ oi-aa. Kíì tɛ́ ba o bíí lɛŋ nɛ̀ tɛ ɓir nɛ̀ ká̧ Babilɔŋ yak. Tɛ zɔka o mɔ nɛ̀ ɗaŋa tɛ ye'i, wa tɛ mi̧i̧ zu, tɔ̧ nɛ̀ wen nɛ̀ ɗɔɔ nú yaknɛ.

¹⁴«Ɛ́nɛ́ o wan-ŋgaŋ-kusaa’ɛ, ɛ̀nɛ̀ kɛ́r Babilɔŋ kpa nú ŋmaa, ɓɛɛ ɛ̀nɛ̀ sɛ́mbí a̧, wen a̧ dee ɗaŋmɔ ti GASA WAN.

¹⁵Ɛ̀nɛ̀ gáí mɔ-biro a zu a̧ nɛ̀ ge fara ge ndé lɛŋ, ha̧ a̧ mɛ nyɛi̧ er-a h’ɛnɛ. O mbiŋ-tua kɔ̧-a̧ tɛ ndur a nù, gú nɛ̀ o garo kɔ̧-a̧ lɛŋ. Mɔ‘i nɛ́ kifa-er ko GASA WAN. Ɛ̀nɛ̀ kífí er ha̧ a̧, ɛ̀nɛ̀ dé nɛ́ kalemɔ n'aa dee so in o ŋma bíí‘i in a̧.

¹⁶Ɛ̀nɛ̀ kúm o wi-gun-mɔ in o wi-mɔi̧-nyɔnɔ mɛ nú Babilɔŋ lɛŋ yinɛ. Kóó o ndé a̧ yú mɔ tá nɛ́ ɗoŋ dukbíí kɔ‘i si nù kɔ‘i, ti gba-paa nɛ̀ de ko ha̧ bíí na'i.»

¹⁷Israɛl duka so hee sami nɛ̀ yɔɔ so, ɓɛɛ o dila duk so ndak nɛnɛ ga. Nɛti nɛ́ wannu Asirii a̧ ku̧u̧ so naŋ nyɔŋa a̧, ɓɛɛ Nabukɔdɔnɔsɔr, wannu Babilɔŋ nyɔŋ a̧ hegɔɔ hɔ tɛ gba̧a̧.

¹⁸Nɛ̀ mbetɛ, tɔ̧ɔ̧-wen ko GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl nɛ́ mɔ'ɔ: «Mi tɛ de ŋmaa in wannu Babilɔŋ ká bá nɛ̀ nù kɔ̧-a̧, hee mɔ'ɔ n'am dee so nɛ̀ ŋmaa in wannu Asirii’ɛ ga.

¹⁹«Mi tɛ mgbɔ Israɛl si ɗoŋ tɛ̀ de fara-nyɔŋ-mɔ kɔ‘i, ɓɛɛ a̧ tɛ yar nɛ̀ zu kaya Karmɛl in zu kaya Basaŋ, nyɔŋ nɛ̀ mɔ zaŋ-aa sur in nɛ̀ zu kaya Efraim in kaya Galad mbɛt.»

²⁰GASA WAN tɔ̧a: «Tɛ ŋgimbi'i, wi tɛ kii yɔɔ-kaya ko Israɛl, ɓɛɛ wi beka kpa na. Wi tɛ kii o ɗaŋmɔ ko Juda, ɓɛɛ wi beka kpa na mbɛt. Mi tɛ e ɗaŋmɔ ko o wi n'am ee mɛ kpasi ha̧ wa.»

²¹GASA WAN tɔ̧a: «Mɛ̀ bá biro dúk nɛ̀ nú Maratim![34] Mɛ̀ bá biro dúk nɛ̀ a̧ in o bíí nú Pɛkod. Mɛ̀ kúm wa ɓɛɛ mɛ̀ há̧ o oi bíí nɛ̀ ɓɔna ha̧‘m; mɛ̀ dé mɔ lɛŋ n'am tɔ̧ɔ̧ ha̧ mɛ.

²²Oee zɔm giti biro wa! Oee o gba mɔ nɛ̀ ɗaŋ wa!

²³Ho! Zɔm dɔnɔ-gusi-nù'ɛ, nɛ́ mɔ'ɔ nɛ̀ gbina a nù nduku-nduku’ɛ! Ho! Babilɔŋ nɛ́ mɔ'ɔ nɛ̀ kifa ŋga-gbárà mgbara o tugun bíí'ɛ!

²⁴Mi tuia ŋma pɛ́r ha̧ mɛ, nɛ̀ baa mɛ Babilɔŋ, ɓɛɛ mɛ iŋ na. Wa kpaa mɛ, ba mɛ wen nɛ̀ mɛ baa zu-mɛ we nɛ̀ GASA WAN.

²⁵«GASA WAN hu̧i̧a fara-a-boi-biro kɔ‘i, ɓɛɛ kai o boi gbonɛ zu nyimsea kɔ‘i. Nɛ̀ mbetɛ, nɛ́ GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ a̧ de mɔ zu nù ko o be Kaldee.

²⁶Ɛ̀nɛ̀ gár tɛnɛ nɛ̀ nduti-nù mɛ, ɛ̀nɛ̀ yé kɔ̧ dam kɔ-wa, ɛ̀nɛ̀ káí o mɔ mɛ kɔ̧́ a̧ a kpɔk fara, ɓɛɛ ɛ̀nɛ̀ dɔ́ lɛŋ ha̧ GASA WAN. K’ɛ́nɛ́ e ŋma mɔ sɛn saaye'i ɓɔn na!

²⁷Ɛ̀nɛ̀ kúm o ŋga wi-biro kɔ-wa lɛŋ, ɛ̀nɛ̀ káí wa si fara-gɔn-saɗi mɛ. Oee ŋgamɔ nɛ̀ tɛ kpa wa wa! Ŋgimbi kɔ-wa hɔɔ kaɗi! Ŋgimbi nɛ̀ wa tɛ kifi nú zu ɗaŋ deemɔ kɔ-wa hɔɔ kaɗi!

²⁸Ɛ̀nɛ̀ zíí ŋma gitimɔ nɛ̀ de mɔ‘i. O wi-yu-mɔ in o wi nɛ̀ mɔ hɔɔ yɔɔ zu wa sɛn nú Babilɔŋ tɛ̀ɛ̀ pii Siɔŋ mɛ tɔ̧ nyɛrɛ mɔ zu kifa-er ko GASA WAN Sɔ̧ k’ɛɛ. Nɛ́ kifa-er nɛ̀ tɛ̀ɛ́ nɛ̀ yiwese.

²⁹Ɛ̀nɛ̀ mɔ́í̧ o wan-góò lɛŋ mɛ bi Babilɔŋ, ɛ̀nɛ̀ kɛ́r a̧ zik kpa nú ŋmaa, wen ká ŋma bíí kpɔk tɛ́ɛ̀ yu mɔ yak. Ɛ̀nɛ̀ dé mɔ in a̧ nyɛm nɛ̀ ɗoŋ deemɔ kɔ̧-a̧. Ɛ̀nɛ̀ dé nɛ́ kale mɔ n'aa de in o ŋma bíí‘i ha̧ a̧. A̧ dee nɛ́ ŋgazu in GASA WAN, Sa̧a̧ Wi ko Israɛl.»

³⁰GASA WAN'e: «Nɛ̀ mbetɛ, kale wese'i, o daŋa wi-biro kɔ̧-a̧ tɛ yo nù ɓɔn bee-gara ye'i, wi beka zii ger o wi-biro kɔ̧-a̧ ɓɔna.»

³¹Wen nɛ̀ GASA WAN, Sɔ̧ nɛ̀ a̧a̧ nɛ ŋgayamɔ lɛŋ tɔ̧ nɛ mɔ'ɔ: «Mɛ́ Babilɔŋ, yàà-ŋga-zu’ɛ, mi a̧a̧ nɛ mɔnɛ kɔ-mɛ! Wese kɔ-mɛ hɔɔ kaɗi, nɛ́ ŋgimbi nɛ̀ mɛ́ tɛ́ kifi nú zu ɗaŋ deemɔ kɔ-mɛ.

³²Yàà-ŋga-zu’ɛ tɛ́ kɔ̧ naŋ ɓɛɛ yoo nù; ŋma bíí beka ba a̧ e ŋgɔn na. Mi tɛ pi̧ ŋma wee zu o ye kɔ̧-a̧, nɛ̀ tɛ dɔ o mɔ katɛ a̧ lɛŋ.»

³³Wen nɛ̀ GASA WAN Sɔ̧ ko Israɛl nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «Wa dee ŋgamɔ in o be Israɛl, gú nɛ̀ o be Juda; wa kɛ̧ mgbara-a na. O dáa-bara kɔ-wa kasi nɛ́ wa, wa kɔ̧ mɛ ɗai er tɛ-wa na.

³⁴Ɓɛɛ wi-ye-ɗoŋ-wa ɔ ŋgaya: nin-a nɛ́ GASA WAN nɛ̀ a̧a̧ nɛ̀ ŋgayamɔ lɛŋ. A̧ tɛ am mɔ zu wa nɛ̀ ŋgaya-a, ha̧ nù kɔ-wa mɛ kpa ga̧a̧mɔ kɔ‘i, in ha̧ ɗɛɗɛ o bíí saaye Babilɔŋ mɛ gɔn.»

³⁵GASA WAN tɔ̧a: «Gba-paa a̧ kúm o be Kaldee, in o bíí saaye Babilɔŋ, o gasawi in o wi-iŋ-mgbara-mɔ kɔ̧-a̧!

³⁶Gba-paa a̧ nɛ́ ɗoŋ o wan-zɔk-mɔ, wen wa nɛ́ o mgbelewi! Gba-paa a̧ dúk ɗoŋ o ŋgaŋa-wi kɔ̧-a̧, tɛ-wa a̧ gbín!

³⁷Gba-paa a̧ nɛ́ ɗoŋ o nyaŋa in o keekee-biro kɔ̧-a̧; gba-paa a̧ nɛ́ ɗoŋ o dukbíí nɛ̀ ye ɗoŋ-aa; wa a̧ kifi duk nɛ́ géé okoo. Gba-paa a̧ nɛ́ ɗoŋ fara-a-boi-biro kɔ̧-a̧, o bíí a̧ ɓar o mɔɔ nɔ‘i lɛŋ kai yaknɛ.

³⁸Gba-paa a̧ tík zu o yì kɔ̧-a̧, a̧ ɔ̧́sí̧ gɔ́n mgbot-mgbot, wen nù kɔ̧-a̧ duna nɛ̀ o géé-sɔ̧; nɛ́ o ɗaŋ mɔɔ nɔ‘i a̧ zik zu wa!

³⁹Mɛ̀ nɛ́ wen hegɔ sa gbaza tɛ ɔ kpɔk fara'i in o gba-toyo; o ndao tɛ ba fara sɛn hi̧i̧ mbɛt. Ŋma bíí beka ɔ fara'i ɓɔna, ŋma bíí beka duk hi̧i̧ na kpoo nɛ kpoo.

⁴⁰Mi tɛ ɗaŋ wa yinɛ hee mɔ'ɔ n'am ɗaŋa so nɛ̀ Sɔdɔm in Gɔmɔr ká bá nɛ̀ o be ye nɛ̀ yaa so zik wa’ɛ ga. Ŋma bíí beka ɔ fara'i ɓɔna, ŋma bíí mɛ́ duk hi̧i̧ beka bo na mbɛt.» GASA WAN tɔ̧ɔ̧ hegɔ.

⁴¹«Ŋma dukbíí a̧ tɛ́ nɛ̀ ká̧-zan-mɛ́-ŋgɔn mɛ‘i, ŋma gasa tugun bíí in o gíí wannu mɛ nduti-nù a̧ gar tɛnɛ‘i.

⁴²Wa kai nɛ́ o góò in o sɛ́ɛ̀ tɛ nɛnɛ; o wi nɔ‘i nɛ́ o ŋga bii nɛ̀ de ko ha̧ bíí na. Giti-wa hɔɔ ŋmaa in mgbimgba-a ko gba-tɔp, wa daŋ nɛ́ o nyaŋa. Wa nɛka gbar nɛnɛ tɛnɛ hee o gíí wi-biro ga mɛ́ bi mɛ Babilɔŋ, yàà-de-zɔŋa’ɛ.

⁴³Nyɛrɛ mɔ‘i aa zer wannu Babilɔŋ; tɛ-a gbina ɓɛɛ a̧ kpa tu̧u̧-see mbɛt, hee okoo nɛ̀ zaŋ nyim mɛ ko bem’ɛ ga.

⁴⁴Mi tɛ daŋ tɛnɛ hee dila nɛ̀ daŋ nɛ̀ kɔ̧̀ da̧a̧ kombo Jurdɛn pii tɛ ɓoramɔ'ɛ ga; mi tɛ ndak o bíí lɛŋ yinɛ fara'i hee gɔma-yí ga. Mi tɛ fo o daŋa wi-biro pii zu wa. Nɛ́ o'o tɛ we zu nɛ‘m o? Nɛ́ o'o tɛ ba'm si ti kita o? Nɛ́ ge wi-dai-mɔ ge a̧ tɛ yor ti'm ge?»

⁴⁵Ɛ̀nɛ̀ zíí ŋma mbe taamɔ nɛ̀ GASA WAN ɗafa zu Babilɔŋ. Zu-wen n'aa ee wen dea-a in o be Kaldee nɛ́ mɔ'ɔ: «Wa tɛ ɔr wa nɛnɛ sitɛ fio hee o be-sami ga, ɓɛɛ wa tɛ ɗaŋ nù kɔ-wa, wen zu wa.

⁴⁶Tɛ tika-a ko Babilɔŋ, nù naka. Nyɛrɛ mɔ‘i pɛsa dam mgbara o tugun bíí.»