Read Northwest Gbaya JEREMII 51 Bible Online

JEREMII 51 - Northwest Gbaya bible

JEREMII 51

¹GASA WAN tɔ̧ɔ̧ woyo: «Mi tɛ tom ŋma gasa búk-ɗaŋ-mɔ pi̧ zu Babilɔŋ in o bíí tɛ ye'i lɛŋ.

²Mi tɛ tom o gɛnɛ pii zu a̧ mɛ pɛfi a̧, mɛ́ kai o mɔ tɛ nù kɔ̧-a̧ lɛŋ yinɛ. Wese bɔnɛ‘i, o bíí tɛ́ tɛ̀ nɛ̀ fara lɛŋ tik zu a̧.»

³K’ɛ́nɛ́ e o wan-góò in o wi-pi̧-laa-boi, ká bá nɛ̀ o daŋa wi-biro mɛ yak géè na. Ɛ̀nɛ̀ há̧ o wi-biro kɔ̧-a̧ lɛŋ ha̧‘m.[35]

⁴O wi nɛ̀ baa da̧i̧ tɛ fé ɓɔn nù ko o be Kaldee, ɓɛɛ o wan nɛ̀ wa toka tok sar tɛ fe nɛ̀ mgbara kira kɔ-wa nɛnɛ.

⁵Wen nù kɔ-wa duna nɛ̀ ɗaŋmɔ ti Sa̧a̧ Wi ko Israɛl, ɓɛɛ bó nɛ́‘e GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl in Juda fee fee na.

⁶Ɛ̀nɛ̀ yú mɔ gbo Babilɔŋ yak, kóó o ndé a̧ kpásí tɛ-wi ŋgaɓo! Kà bó hegɔ na, ŋgimbi nɛ̀ mɔɔ-oi-ɗaŋmɔ kɔ̧-a̧ bé tɛ̀ɛ́ tik zu a̧‘i, ɛ́nɛ́ tɛ kum. Ŋgimbi'i tɛ duk nɛ́ ŋgimbi-kifa-er ko GASA WAN ha̧ Babilɔŋ nyɛm nɛ̀ ɗoŋ deemɔ kɔ̧-a̧.

⁷Babilɔŋ duka so nɛ́ ŋma be ɗele-nɔ-dɔ̧ɔ̧, nɛ‘i dee so nɛ̀ lɔr, nɛ̀ duka so kɔ̧̀ er Sɔ̧. Dɔ̧ɔ̧ mɛ́ kɔ̧́ a̧ gbɛ so nɛ́ o bíí zu nù lɛŋ; o tugun bíí lɛŋ nɔɔ so dɔ̧ɔ̧‘i, ɓɛɛ zu-wa zik ɗaŋ lɛŋ.

⁸Ahai Babilɔŋ tika nù, ɓɛɛ gba ɗɛ́sɛ́-ɗɛ́sɛ́. Ɛ̀nɛ̀ áí nú zu a̧, ɛ̀nɛ̀ á nyina yí da̧i̧ kɔ̧-a̧, ŋmafara o da̧i̧ nɔ‘i tɛ wìì.

⁹Ɛ́ɛ́ wee mɛ kpasi Babilɔŋ, ɓɛɛ zɛɛ kɔ̧-a̧ ŋgaia. Ɛ̀nɛ̀ yú katɛ a̧, ɓɛɛ kóó o ndé a̧ sí ɗoŋ tɛ nù kɔ‘i, wen mɔ kɔ̧-a̧‘i hɔɔ mgbák yiwese mɛ.

¹⁰GASA WAN kpasa yɛ! Ɛ̀nɛ̀ tɛ́, ɛ̀ɛ̀ nɛ́ɛ̀ wé ɗoŋ tom ko GASA WAN Sɔ̧ k’ɛɛ sɛn Siɔŋ mɛ.

¹¹Ɛ̀nɛ̀ bɛ́ŋ nú o góò k’ɛnɛ, ɛ̀nɛ̀ káí o ŋgee k’ɛnɛ. GASA WAN tuna taamɔ ko o wannu Mɛd mɛ́ nɛ̀ɛ́ ɗaŋ Babilɔŋ yinɛ nyɛm nɛ̀ ɗoŋ ee-zu-mɔ kɔ̧-a̧. Mɛ̀ nɛ́ kifa-er ko GASA WAN, kifa-er nɛ̀ tɛ̀ɛ́ nɛ̀ yiwese.

¹²Ɛ̀nɛ̀ bá tutuwal-biro nɛ̀ ŋgɔn, ɛ̀nɛ̀ bá zu'nɛ́ dúk nɛ̀ o garo Babilɔŋ. Ɛ̀nɛ̀ á o wi-pɛm-mɔ nɛ̀ dɔka-a, ɛ̀nɛ̀ á o wi-pɛm-mɔ mɛ zɔk mɔ, ɛ̀nɛ̀ gbá o mbaŋtol. Nɛ̀ mbetɛ, mɔ nɛ̀ GASA WAN tɔ̧ɔ̧ so zu o bíí Babilɔŋ‘i, nɛ́ mɔ‘i a̧ a̧ ta, de nɛ̀ mɔ.

¹³Babilɔŋ, mɛ́ wan-ɔ-ká̧ o gasa nana-yì'ɛ, mɛ́ yàá-wanmbɔi’ɛ, sɔŋkur mɔ kɔ-mɛ hɔa, mɛ kpaa o mɔɔ-oi-tom kɔ-mɛ lɛŋ kaɗi.

¹⁴GASA WAN nɛ̀ a̧a̧ nɛ̀ ŋgayamɔ lɛŋ kana mɔ nɛ̀ tɛ-wi, ɓɛɛ tɔ̧: «Mi aa o bíí zu mɛ nɛ̀ dɔka-a hee o gba-dɔya ga; ɓɛɛ wa tɛ bìì gima-ŋgan-mɔ[36] zu mɛ.»

¹⁵GASA WAN dee nù tɛ ŋgai kɔ‘i, a̧ dee o mɔɔ zu nù lɛŋ tɛ iŋa-mgbara-mɔ kɔ̧-a̧, in a̧ tata yiwese tɛ iŋamɔ kɔ̧-a̧.

¹⁶Nɛ́ a̧ a̧ ha̧ nú, ɓɛɛ o yì mɔi̧a ŋmaa sɛn yiwese mɛ, ɓɛɛ o tura-zan daŋa nɛ̀ ndaa-zan, o pi̧i̧-kórò dee ha̧ kórò mɛ hɔ, ɓɛɛ o búk gboo nɛ̀ fara kɔ‘i mɛ tɛnɛ mbɛt.

¹⁷O bíí lɛŋ sakala tɛ mɔ‘i, wa iŋ mgbara-a na; ziimɔ baa o wi-nɔ̀ì̧ o géé-sɔ̧, wen o mɔɔ nɔ‘i bó nɛ́ kpasamɔ na, wen nɛ̀ ɔmi bó tɛ-wa na.

¹⁸Mɔɔ nɔ‘i nɛ́ o géé tum-mɔ, nɛ́ mɔɔ-mami; ŋgimbi kita ko Sɔ̧, wa tɛ kum lɛŋ.

¹⁹Ɓɛɛ nɛ̀ war ko Sɔ̧ ko Jakob, bo hee wa ga na; a̧ nɛ́ wan nɛ̀ dee mɔ lɛŋ, ɓɛɛ Israɛl nɛ́ dukbíí nɛ̀ duk nɛ́ mɔɔ-oi kɔ̧-a̧. Nin-a nɛ́ GASA WAN, Wan nɛ̀ a̧a̧ nɛ̀ ŋgayamɔ lɛŋ.

²⁰GASA WAN tɔ̧a: «Babilɔŋ, mɛ duka so nɛ́ dɔnɔ, boi-biro kɔ‘m. Mi too o tugun bíí a nù nɛ̀ mɛ́, ɗaŋ nɛ̀ o mɔɔ-wan kɔ-wa.

²¹Mi too o nyaŋa in o wi-daŋa-a, ká bá nɛ̀ o keekee-nyaŋa in wi-daŋa-a mbɛt a nù nɛ̀ mɛ.

²²Mi too o wiwii in o okoo a nù nɛ̀ mɛ́; mi too o sɔkawi in o be-ŋgaiwi a nù nɛ̀ mɛ́. Mi too o be-wiwii in o be-okoo a nù nɛ̀ mɛ́.

²³Mi too o wi-dai-mɔ in o gíí mɔ-dai kɔ-wa a nù nɛ̀ mɛ́, mi too o wi-wa-fɔ in o ndai-wa-fɔ kɔ-wa a nù nɛ̀ mɛ́. Mi too o gasawi in o wi-duk-zu-nù a nu nɛ̀ mɛ́.»

²⁴GASA WAN tɔ̧a: «Mi tɛ de ha̧ ŋgamɔ mɛ tik zu Babilɔŋ in o bíí Kaldee lɛŋ oi o ɗaŋmɔ lɛŋ nɛ̀ wa dee in Siɔŋ, ɓɔn gbaayí‘nɛ́.

²⁵Mɛ kaya yàá-ɗaŋ-mɔ'ɛ, mi a̧a̧ nɛ̀ mɔnɛ kɔ-mɛ, mɛ́ wan-ɗaŋ-nù lɛŋ'ɛ! Mɛ̀ zɔ́k er-am n'am usi si ɗɔɔ yí-mɛ́'ɛ! Mi tɛ de ha̧ mɛ mɛ ai nɛ̀ zu kusa ta tik nù, mi tɛ de ha̧ mɛ mɛ kifi zɔm yoŋgoŋgo wee.»

²⁶GASA WAN tɔ̧a̧: «Mi beka kpa ŋma ta-e-mgbii-tua, kóó wan mɛ e nɛ̀ naŋ-tua tɛ-mɛ ɓɔna. Mɛ tɛ kifi nɛ́ géé ŋga-gbárà hegɔɔ kpoo nɛ kpoo.

²⁷«Ɛ̀nɛ̀ bá tutuwal-biro e ŋgɔn zu nù, ɛ̀nɛ̀ dɔ́m mbia mgbara o tugun bíí. Ɛ̀nɛ̀ mɔ́í̧ o tugun bíí mɛ de biro in a̧, ɛ̀nɛ̀ sá o ŋma mɔɔ-wan tɛnɛ pii zu a̧; o wi nɔ‘i nɛ́ Arara, Mini in Askenaz. Ɛ̀nɛ̀ é tom er o gasa wi-biro mɛ́ ba biro duk nɛ̀ a̧; ɛ̀nɛ̀ mɔ́í̧ o nyaŋa ye ŋmaa hee gíí gba-dɔya ga.

²⁸Ɛ̀nɛ̀ mɔ́í̧ o tugun bíí lɛŋ mɛ de biro in a̧; o wi nɔ‘i nɛ́ o wannu Mɛd, o gasawi kɔ-wa, o gasa wi-duk-zu nù kɔ-wa lɛŋ in o mɔɔ-wan kɔ-wa nɛ̀ oi-aa lɛŋ.

²⁹Nù tɛ pi̧, ɓɛɛ duka nak nɛnɛ, ŋgimbi nɛ̀ o ee-zu-mɔ ko GASA WAN zu Babilɔŋ bé tɛ̀ɛ́ hɔ gba̧a̧; a̧ tɛ de ha̧ nú Babilɔŋ mɛ́ kifi duk nɛ́ géé ŋga-gbárà nɛ̀ o bíí beka duk sɛnɛ na!

³⁰O ŋgaŋa wi-biro Babilɔŋ bɛ̧ɛ̧ biro, ɓɛɛ hu̧si nɛ̀ mgbii mɔ nɛnɛ. Ŋgai gboo tɛ-wa, wa kifa hee géé okoo ga. O wisɛn tɛ̀ɛ̀ gbin o nú-garo ye kɔ-wa, ɓɛɛ pi̧ wee tɛ o tua kɔ-wa.

³¹O betom gbar ma nɛ̀ yì nɛnɛ mɛ nɛ̀ɛ́ tɔ̧ ha̧ Wannu Babilɔŋ‘e ndé: Wa baa ye kɔ̧-a̧ lɛŋ.

³²O yuwar kpea, wee dama zu o ŋgárá, o wi-biro pɛsa lɛŋ!»

³³Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ, Sɔ̧ ko Israɛl tɔ̧ nɛ́ mɔ'ɔ: «Babilɔŋ, yàà-de be-zɔŋa hɔɔ ŋmaa in ŋma fara-gusi-alkamaari nɛ‘i a̧a̧ tɛ ɗafa-a. Ɗoŋ-aa beka nyɛi̧ na, ɓɛɛ wi mɔi̧a nyɔnɔ zu a̧.»

³⁴«Nabukɔdɔnɔsɔr, wannu Babilɔŋ nyɔŋa'm, a̧ nɔɔ tɔk-tɛ‘m, ɓɛɛ e'm hee ŋma nyɛk nɛ̀‘i ndala kɔ̧́ a̧ ndal ga; a̧ gura'm hee ndiɓa ga. Zaŋ-aa sura nɛ̀ mbɔ-tɛ‘m, ɓɛɛ a̧ siŋ am pi̧ nù zɔgbɔk.

³⁵O bíí Siɔŋ tɔ̧a'e, o bɔnɛ kɔ‘i in o ŋgamɔ nɛ̀ tika zu wi a̧ tík zu Babilɔŋ! Jerusalɛm tɔ̧a'e, tɔk tɛ-wi a̧ tík zu o be Kaldee!»

³⁶GASA WAN tɔ̧a: «Nɛ̀ mbetɛ, Jerusalɛm, mi tɛ zɔk yuwar mɔ kɔ-mɛ nɛ̀ tɛ‘m, ɓɛɛ mi kifa er oi nú-mɛ. Mi tɛ de ha̧ gba-tɔp kɔ̧-a̧ mɛ ɔ̧si, in ha̧ kpút-kpút-yì kɔ̧-a̧ mɛ ɔ̧si mbɛt.

³⁷Babilɔŋ tɛ kifi nɛ́ o gbina-ŋgeŋ, fara-ɔɔ ko o gba-toyo, ŋga-gbárà nɛ̀ duk nɛ́ mɔɔ-kíì, nɛ̀ o bíí beka duk sɛnɛ na.

³⁸Ɓɛɛ ɛ̧ɛ̧ tɛ ŋgimbi’ɛ, o be Babilɔŋ hiɗi nɛ́ mɔ hee bao-dila ga, tuɓi nɛ̀ da̧ hee o be dila ga mbɛt.

³⁹Ɓɛɛ war kɔ‘m, tɛ ŋgimbi tortɛ kɔ-wa'i, mi ɗafi kɔ‘m nɛ́ gasa nyɔŋmɔ mɛ ha̧ ha̧ wa.» GASA WAN tɔ̧a: «Mi tɛ nɔsi wa nɛ̀ dɔ̧ɔ̧ nɛ̀ tɛ́ gbɛ wa a nù; wa tɛ tir yá, nɛ̀ wa beka tun na.

⁴⁰Mi tɛ kai wa si fara-gɔn-saɗi hee mɔ'ɔ nɛ̀‘i kai nɛ̀ o sami, o vala sami in o vala gbadua si fara-gɔn-wa’ɛ ga.»

⁴¹«Ho! Sesak,[37] zɔm gasa ŋgiri ye nɛ̀‘i duka so mɛ́ zɔn dam zaŋnu fara lɛŋ'ɛ nɛ́ mɔ'ɔ nɛ̀ biro baa’ɛ! Ho! Babilɔŋ nɛ́ mɔ'ɔ nɛ̀ tɛ̀ɛ̀ kifi nɛ́ bɛɛ-oi kotoro géè sɛn mgbara o tugun bíí nɔɔ'ɛ!

⁴²Gba-tɔp hura Babilɔŋ, ɓɛɛ pɛŋi kpe zu a̧ lɛŋ.

⁴³O ye kɔ̧-a̧ kifa nɛ́ géé bɛɛ-oi in kora fara kotoro nɛ̀ bíí nyɛm mɛ ɔ sɛnɛ na; ŋma bíí ɓir géé ɓira-a yak fara'i na mbɛt.

⁴⁴Mi tɛ de ŋmaa in Bɛl sɛn Babilɔŋ, mi tɛ ɓar mɔ n'aa nyɔŋ kɔ̧̀ nú-a'i yinɛ. O tugun bíí beka nɛ sitɛ a̧ ɓɔna. «Garo Babilɔŋ tɛ gbin,

⁴⁵ɛ́nɛ́ dukbíí kɔ‘m, ɛ̀nɛ̀ gbó tɛ̀ kɔ̧-a̧; kóó o ndé a̧ kíí mɛ́ kpasi tɛ-wi ɗɔɔ ŋga nyimsea ko GASA WAN ŋgaɓo!

⁴⁶«Ká ɗɛɗɛ‘nɛ́ gɔn na, k’ɛ́nɛ́ de kii zu nyɛrɛ mɔɔ-nù'ɛ n’ɛnɛ zii’ɛ na. Pɛ nɛ̀ yak’ɛ lɛŋ, kànà nɛ́ o nyɛrɛmɔ nɛtɛ nɛtɛ a'i zii. Nyɛrɛ o ŋgamɔ zu nù'ɛ a̧a̧ sɛnɛ, in nyɛrɛmɔ ko o ŋma ŋga wannu nɛ̀ bi ŋmaa a̧a̧ sɛnɛ mbɛt.»

⁴⁷GASA WAN tɔ̧a: «Nɛ̀ mbetɛ, wese tɛ hɔ nɛ‘i tɛ de ŋmaa in o géé-sɔ̧ Babilɔŋ. Nú Babilɔŋ lɛŋ beka duk nɛ̀ de-a na, ɓɛɛ o wi nɛ̀ baa ɗaŋ da̧i̧ sɛn tɛ̀ kɔ̧-a̧ tɛ fe.

⁴⁸Ɓɛɛ yiwese in nù gú nɛ̀ o mɔ nɛ a̧a̧ sɛnɛ lɛŋ tɛ ŋgan mɔ zu Babilɔŋ, ŋgimbi nɛ̀ o wi-ɗaŋ-mɔ tɛ́ tɛ nɛnɛ pii zu a̧ nɛ̀ war ká̧-zan-mɛ́-ŋgɔn.»

⁴⁹War ko Babilɔŋ kuma so o bíí nɛ̀ dɔka-a sɛn zaŋnu fara lɛŋ, ɓɛɛ kinii nɛ́ war kɔ̧-a̧ ha̧ a̧ mɛ tik oi o be Israɛl n'aa gbɛɛ so.

⁵⁰Ɛ́nɛ́ o bíí nɛ̀ gba-paa hɔɔ yɔɔ zu'nɛ́, ɛ̀nɛ̀ kúr, ɛ̀nɛ̀ yák! Kóò, wen nɛ̀ nù k’ɛnɛ biti nɛ̀ nyɛi̧a-a, ɛ̀nɛ̀ kɔ́fí Sɔ̧, ɓɛɛ nɛ̀ taamɔ wen Jerusalɛm a̧ píí ɗoŋ kɔ̧́ see'nɛ́.

⁵¹«Ɛ́ɛ́ kpa desee tɛ zia dara nɛ o bíí da̧ nɛ̀ yɛ na; foe de yɛ dee. O gɛnɛ yee kɔ̧̀ o sa̧a̧-fara kɔ̧́ Tua ko GASA WAN.»

⁵²GASA WAN tɔ̧a: «Nɛ̀ mbetɛ, wese tɛ hɔ n'am tɛ de ŋmaa in o géé-sɔ̧ Babilɔŋ, ɓɛɛ tɛ nù kɔ̧-a̧ lɛŋ, o wi nɛ̀ baa gasa da̧i̧ tɛ gɔfi mɔ.»

⁵³GASA WAN tɔ̧a: «Kóó Babilɔŋ daŋa so nɛ́ yiwese mɛ, nɛ́ɛ̀ de ŋga tua kɔ‘i sɛnɛ, mi tɛ tom o bíí mɛ nɛ̀ɛ́ ɗaŋ a̧.»

⁵⁴GASA WAN tɔ̧a: «Wi zii nɛ́ saa-sara wen gbakamɔ nɛ̀ Babilɔŋ mɛ tɛnɛ! Gasa ŋgamɔ tika nù ko o be Kaldee!

⁵⁵Nɛ́ GASA WAN a̧ ɗaŋ Babilɔŋ, kpe nɛ̀ zu o gasa hiɗimɔ kɔ̧-a̧‘i. Kóó giti gayamɔ ko o wisɛn nɔi̧a so hee gasa som-yì[38] ga, a̧ tɛ de ha̧ gitimɔ‘i mɛ kaɗi sélélé.

⁵⁶Nɛ̀ mbetɛ, wi-ɗaŋ-mɔ a̧ tɛ pii zu Babilɔŋ‘i; a̧ tɛ kai o yaa-ŋgo-biro kɔ-wa nɛ̀ bara, ɓɛɛ a̧ gbina o kusaa-góò kɔ̧-wa a nù. GASA WAN nɛ́ Sɔ̧-kifi-er; a̧ iŋa gusa bíí oi ɗaŋ deemɔ kɔ-wa.»

⁵⁷Wen ko wannu nɛ̀ nin-a nɛ́ GASA WAN, nɛ̀ a̧a̧ nɛ̀ ŋgayamɔ lɛŋ nɛ́ mɔ'ɔ: «Mi tɛ e dɔ̧ɔ̧ nú o gasawi ko wannu, o wi-iŋ-mgbara-mɔ, o wi-duk-zu zika-nù in o gasawi kɔ‘i, ká bá nɛ̀ o yaa-ŋgo-biro kɔ-wa lɛŋ. Wa tɛ tir yá nɛ̀ wa beka tun na.»

⁵⁸Wen nɛ̀ GASA WAN nɛ̀ a̧a̧ nɛ̀ ŋgayamɔ lɛŋ tɔ̧ nɛ́ mɔ'ɔ: «Zɔm ndota garo Babilɔŋ tɛ gbin a nù lɛŋ; o gba kusa nú garo tɛ bìì wee lɛŋ. Tom ko dukbíí tɛ duk nɛ́ tom takaɗi; tom ko o tugun bíí tɛ bìì wee sɔɔ géè!»

⁵⁹Ha̧a̧nú nɛ Jeremii, wi-tɔ̧-wen oi nú Sɔ̧ ha̧a̧ so ha̧ Sɛraya, bem ko Nɛriya, bem ko Masɛya ŋgimbi nɛ̀ Masɛya'i nɛ̀ɛ̀ so nɛnɛ si Babilɔŋ in Sedesias wannu Juda sɛn tɛ naar pɛ ɔɔ-wan kɔ̧-a̧ nɛ́ mɔ'ɔ. Sɛraya duka so nɛ́ wan zu zika-nù.

⁶⁰Jeremii tɔ̧ɔ̧ ha̧ Sɛraya:

⁶¹«Ŋgimbi nɛ̀ mɛ bé tɛ̀ɛ́ hɔ Babilɔŋ, ɓɛɛ nɛ̀ mɛ bé tɛ̀ɛ́ zɔk kalata’ɛ wen tɔra o wen nɛ̀ a̧a̧ zaŋ-aa lɛŋ ha̧ o bíí,

⁶²mɛ́ tɛ tɔ̧: ‹GASA WAN, nɛ́ ɛ́nɛ́ a̧ baa keta zu fara’ɛ ndé, ɛ́nɛ́ tɛ gbin fara’ɛ a nù, nɛ̀ ŋma mɔ kóó kpɔk beka duk na, kóó nɛ́ o bíí, kóó nɛ́ o saɗi. Fara’ɛ tɛ kifi nɛ́ ŋga-gbárà kotoro kpoo nɛ kpoo.›

⁶³Ŋgimbi nɛ̀ mɛ á̧ tɔra kalata’ɛ kaɗi, mɛ̀ kún ta sɛnɛ, ɓɛɛ mɛ̀ pí̧ a̧ ɗɔɔ Efrat,

⁶⁴tɔ̧ nɛnɛ‘e: ‹Nɛ́ hegɔ a̧ Babilɔŋ tɛ tik nɛnɛ, n'aa beka kur ɓɔna, wen zu o ŋgamɔ n'am ba tɛnɛ mɛ pi̧ zu a̧'ɛ.› » «Tom ko o tugun bíí baa tɛ-wa.» Sɔŋkur wen ko Jeremii nɛ́ mɔ‘i.