Read Northwest Gbaya JEREMII 52 Bible Online

JEREMII 52 - Northwest Gbaya bible

JEREMII 52

¹Sedesias a̧a̧ so nɛ̀ pɛ ɓu-yiitoo-zua-kpɔk ŋgimbi n'aa ɔɔ nɛ̀ wan kɔ̧-a̧, ɓɛɛ a̧ ɔ wan pɛ ɓu-zua-kpɔk sɛn Jerusalɛm; nin nàà kɔ̧-a̧ nɛ Hamutal, boko-bem ko Yirmɛya, be Libna.

²A̧ de mɔ nɛ̀ de tɛ GASA WAN na, hee mɔ'ɔ nɛ̀ Joakim dee so ga.

³Mɔ nɛ̀ dee so sɛn Jerusalɛm in sɛn Juda a̧ŋa gasa nyimsea ko GASA WAN pi̧ ŋgɔn, ɓɛɛ a̧ a wa taŋ nɛ̀ nyɛi̧a-a. Duka, ɓɛɛ Sedesias kur zu wannu Babilɔŋ.

⁴Tɛ mɔɔrɔ-ɗoŋ-naar pɛ-wan ko Sedesias, tɛ ɓu fio-zɛ, tɛ ɓu ɔɔ-zɛ, Nabukɔdɔnɔsɔr wannu Babilɔŋ hɔɔ nú Jerusalɛm, a̧ in o gíí wi-biro kɔ̧-a̧ lɛŋ. Wa baa fara nú ye Jerusalɛm, ɓɛɛ wa mbo mɔ zik nɛnɛ.

⁵Wa kpee ye'i e nù tɛ pɛ ɓu-zua-kpɔk tɛ ŋgimbi-wan ko wannu Sedesias.

⁶Tɛ mɔɔrɔ-ɗoŋ-naar ɔɔ-zɛ, tɛ naar fio-zɛ, ŋgimbi'i gasa kaɓa a̧a̧ so saaye'i, nɛ̀ o wanmbɔi mbɛt bo so nɛ̀ nyɔŋmɔ ɓɔna; tɛ mɔɔrɔ-ɗoŋ-naar ɔɔ-zɛ, tɛ naar fio-zɛ tɛ pɛ‘i,

⁷garo mbaŋa, ɓɛɛ o wi-biro lɛŋ yu mɔ yak saaye mɛ zɛ nɛ̀ nú garo mgbara ŋgeŋ yiitoo, mgbák ka̧ be fɔ ko wannu, ká o be Kaldee a̧ pɛm so kànà mɔ zik ye'i, ɓɛɛ wa ba yuwar si nú Jurdɛn.

⁸O wi-biro Kaldee ndaka pata wannu Sedesias, ɓɛɛ nɛ́ɛ̀ kpa a̧ sɛn bɔkɔ-nù Jeriko mɛ. O wi-biro kɔ̧-a̧ lɛŋ yuu mɔ yak e a̧ duk.

⁹O be Kaldee baa a̧, ɓɛɛ fo a̧ daŋnɛ si Ribla nú Hamat, ha̧ wannu Babilɔŋ mɛ́ tɔ̧ sɔŋkur wen zu a̧.

¹⁰Wannu Babilɔŋ gɔna ger o bem ko Sedesias nɛ̀ gbaayí-a, ɓɛɛ a̧ gɔn ger o mɔ-geŋa Juda lɛŋ sɛn Ribla mbɛt.

¹¹Hɔ-ɗoŋ-aa, a̧ oo yí Sedesias, ɓɛɛ a̧ hɛr a̧ nɛ̀ nyak-ndɛrɛ gbam ŋmaa yiitoo. Wannu Babilɔŋ baa a̧ si Babilɔŋ, ɓɛɛ a̧ pi̧ a̧ kɔ̧́ zɔɓɔ hɔ ŋgimbi fio kɔ̧-a̧.

¹²Tɛ ɓu ɔɔ-zɛ, tɛ mɔɔrɔ fio-zɛ, tɛ ɓu-zua-mɔɔrɔ-ɗoŋ-naar pɛ-wan ko Nabukɔdɔnɔsɔr, wannu Babilɔŋ, Nɛbuzaradaŋ gasawi zu o wi-pɛm-wannu nɛ̀ yá ɓɔn mgbák katɛ wannu hɔɔ sɛn Jerusalɛm.

¹³A̧ pi̧i̧ wee tɛ Tua ko Sɔ̧, in tɛ tua ko wannu gú nɛ̀ o tua sɛn saaye lɛŋ, gana gan o tua ko o gasawi Jerusalɛm.

¹⁴War ko o garo Jerusalɛm, o wi-biro ko o be Kaldee gbina a nù lɛŋ sɛn ɗɔɔ ha̧a̧nú ko gasawi ko o wi-pɛm-wannu.

¹⁵Nɛbuzaradaŋ gasawi zu o wi-pɛm-wannu kaia o wanmbɔi nɛ̀ ɓɔna so saaye'i, o wi nɛ̀ yuu so mɔ si ɗoŋ wannu Babilɔŋ in o oi wi-iŋ tom-de-nɛ-er nɛtɛ nɛtɛ yaknɛ nɛ̀ bara-biro.

¹⁶Ɓɛɛ a̧ e oi o ŋma géé bíí ɓɔn hi̧i̧ mɛ wa o fɔ-nyak-dɔ̧ɔ̧ in o ŋma fɔ mbɛt.

¹⁷Ɓɛɛ nɛ̀ war ko o mbiŋ Tua ko Sɔ̧ nɛ̀ wa dee nɛ̀ ndɛrɛ, in o mɔɔ-tui-kpánà, bá nɛ̀ gba-kpáná-ndɛrɛ nɛ duk kɔ̧́ Tua ko GASA WAN'i, o be Kaldee gbina wa a nù lɛŋ ndúkú-ndúkú, ɓɛɛ kai o ndɛrɛ-a lɛŋ si Babilɔŋ mɛ.

¹⁸Wa kaia o nyɛk-a-bùk, o mɔɔ-kai-bùk in o paa, o be nyɛk-a-zɛzɛ, o be yee-nɔ-mɔ in o nyɛk-ndɛrɛ lɛŋ nɛ̀ ya wen dee tom kɔ̧́ Tua ko Sɔ̧.

¹⁹Gasawi zu o wi-pɛm-wannu kaia o gasa kpánà, o ɓii, o yee-a-zɛzɛ, o nyɛk-a-bùk, o dek-e-wee, o yee-nɔ-mɔ in o nyɛk nɛ̀‘i dee nɛ̀ lɔr in bu-mbɔi mbɛt.

²⁰O mbiŋ yiitoo, gba-kpánà kpɔk nɛ̀ a̧a̧ so hi̧i̧, o ndai ɓu-zua-yiitoo nɛ̀‘i dee nɛ̀ ndɛrɛ nɛ̀ ya ɗɔɔ gba-kpánà‘i, in o mɔɔ-tui-kpánà nɛ̀ wannu Salomɔŋ dee so wen Tua ko Sɔ̧, wi nyɛm mɛ we dita ndɛrɛ-a in ndɛrɛ o nyɛk nɔ‘i lɛŋ na.

²¹Kusa kuti mbiŋ duka nɛ́ mɛtrɛ mɔɔrɔ-ɗoŋ-taar; yoo-ɔm-a duka nɛ́ mɛtrɛ mɔɔrɔ-ɗoŋ-kpɔk, ndota ndɛrɛ-a duka nɛ́ hee pɛsa kɔ̧ er-wi ga, kɔ̧́ a̧ duka so hoŋkoyoŋ géè.

²²Wa dee so gan-ndui-ndɛrɛ kpe nɛ̀ zu a̧, nɛ̀ kusa-a duka nɛ́ mɛtrɛ yiitoo nɛ̀ reeta, ɓɛɛ wa a o waya-kóɓó-ndɛrɛ zu gan-ndui'i kar nɛ̀ zu-a nɛ̀ ndɛrɛ mbɛt. O mbiŋ nɔ‘i yiitoo'i kànà hee ŋmaa ga, gú nɛ̀ o dap sɛn tɛ-wa lɛŋ.

²³Wa ɓoo so ndɛrɛ hee o be waya kóɓò ga a zu o gan-ndui nɔ‘i; o wan mɛ ká̧ a̧ duka nɛ́ ɓu-mɔɔrɔ-ɗoŋ-naar-zua-mɔɔrɔ-ɗoŋ-kpɔk, ɓɛɛ wa lɛŋ de gɔmŋmaa zu gan-ndui kpɔk kpɔk.

²⁴Gasawi zu o wi-pɛm-wannu baa Sɛraya wan-ɗafi-sɔ̧ in Sefania wi-hɔ-ɗoŋ-aa, ká bà nɛ̀ o wi-pɛm-nú Tua ko Sɔ̧ taar mbɛt.

²⁵A̧ baa ŋma mɔ-geŋa nɛ̀ duk zu o wi-biro, in bíí mɔɔrɔ-ɗoŋ-yiitoo nɛ̀ yaa katɛ wannu sɛn saaye'i. A̧ baa wi-yɔr-kalata ko gasawi ko o wi-biro nɛ̀ wa ee so mɛ hok o wi-biro, in o ŋma bíí ɓu-mɔɔrɔ-ɗoŋ-kpɔk nɛ̀ a̧a̧ saaye'i mbɛt.

²⁶Nɛbuzaradaŋ, gasawi zu o wi-pɛm-wannu kaia wa nɛnɛ ha̧ wannu Babilɔŋ sɛn Ribla.

²⁷Wannu Babilɔŋ gɔna kita fio zu wa, ɓɛɛ wa gbɛ wa sɛn Ribla nú Hamat. Nɛ́ hegɔ a̧ wa baa nɛ̀ Juda nɛ̀ bara-biro yaknɛ nyɛi nɛ̀ nù kɔ‘i.

²⁸O dɔka be Juda nɛ̀ Nabukɔdɔnɔsɔr kaia nɛ̀ bara-biro yaknɛ tɛ mɔɔrɔ-ɗoŋ-yiitoo pɛ-wan kɔ‘i nɛ́ bíí booro-taar-nɛ-ɓu-zua-taar.

²⁹Ɓɛɛ tɛ ɓu-zua-mɔɔrɔ-ɗoŋ-taar pɛ-wan kɔ̧-a̧, wa kaia o be Jerusalɛm gɔmŋmaa-mɔɔrɔ-ɗoŋ-taar-nɛ-ɓu-taar-zua-yiitoo yaknɛ.

³⁰Sɔŋkur-aa, tɛ ɓu-yiitoo-zua-taar pɛ-wan kɔ̧-a̧ woyo, Nɛbuzaradaŋ, gasawi zu o wi-pɛm-wannu kaia o be Juda gɔmŋmaa-mɔɔrɔ-ɗoŋ-taar-nɛ-ɓu-taar-zua-mɔɔrɔ yaknɛ nɛ̀ bara-biro. O bíí nɛ̀ wa kaia lɛŋ dee nɛ́ booro-naar-nɛ-gɔmŋmaa-mɔɔrɔ-ɗoŋ-kpɔk.

³¹Tɛ ɓu-taar-zua-mɔɔrɔ-ɗoŋ-yiitoo pɛ baa Joakim wannu Juda yaknɛ nɛ̀ bara-biro, tɛ ɓu-yiitoo-zua-mɔɔrɔ ɔɔ-zɛ, tɛ ɓu-zua-yiitoo fio-zɛ, Ewil-Mɛrodak wannu Babilɔŋ dee ko ha̧ Joakim wannu Juda, ká a̧ yee wan nɛ̀ mbe-a, ɓɛɛ a̧ gbo a̧ yinɛ kɔ̧́ zɔɓɔ.

³²A̧ tɔ̧ɔ̧ wen ha̧ a̧ nɛ̀ de-a, ɓɛɛ a̧ e a̧ tɛ gasa fara zu o dɔka wannu nɛ̀ yaa so in a̧ sɛn Babilɔŋ.

³³A̧ kpɔ̧i̧a o laa-zɔɓɔ tɛ Joakim yinɛ, ɓɛɛ Joakim nyɔŋ mɔ kpɔk in a̧ wese lɛŋ tɛ duka-a kɔ̧-a̧.

³⁴Duka-a kɔ̧-a̧ duka nɛ̀ de-a wese lɛŋ, wen wannu Babilɔŋ ɗafa yuwar mɔ ha̧ a̧ nyɛm nɛ̀ ɗoŋ o mɔ n'aa kɔ̧a̧ wese kpɔk kpɔk, hɔ nɛnɛ wese fio kɔ̧-a̧.