Read Northwest Gbaya JEREMII 8 Bible Online

JEREMII 8 - Northwest Gbaya bible

JEREMII 8

¹GASA WAN'e, «Tɛ ŋgimbi'i, wa tɛ a̧ŋ o gba̧a̧-fio o wannu in o gasawi Juda, o gba̧a̧ o wi-ɗafi-sɔ̧ in o wi-tɔ̧-wen oi nú Sɔ̧, in gba̧a̧ o bíí Jerusalɛm mbɛt gbonɛ nɛ̀ kɔ̧-fio.

²Wa tɛ kai wa a wese, a ti nyaŋa-zɛ in o sɔra nɛ̀ wa kɔ̧ɔ̧ so, ɓɛɛ ká wa de tom ha̧ wa, nɛ̀ wa nɛ̀ɛ̀ so ɗoŋ wa, nɛ̀ wa zɔka so mɔ tɛ wa, ɓɛɛ ká wa gu nù ti wa mbɛt; wa beka kai o gba̧a̧ nɔ‘i mɛ gun woyo ɓɔna; wa tɛ ɓuk kifi nɛ́ geemɔ mbulɛɛ.»

³GASA WAN nɛ̀ a̧a̧ nɛ̀ ŋgayamɔ lɛŋ tɔ̧a: «O oi bíí lɛŋ nɛ̀ tɛ ɓɔn nɛ̀ yí mgbara ɗaŋ dukbíí'ɛ tɛ kɔ̧ nɛ́ fio gan duka-kpasa, sɛn fara lɛŋ n'am tɛ ndak wa pɛsi si sɛnɛ.»

⁴Wen nɛ̀ GASA WAN tɔ̧ nɛ́ mɔ'ɔ. «Mɛ̀ tɔ̧́ ha̧ wa'e, wi yo nù, ɓɛɛ wi kur ŋgɔn na nde? Wi yɔ kaya, ɓɛɛ wi pii ɗoŋ na nde?

⁵Jerusalɛm, wen ge sa o bíí nɔ'ɔ ɓɔn tɛ yɔɔ kaya de nɛ̀ ŋgazu siti siti’ɛ ge? Wa kasi nɛ́ taamɔ ɗaŋmɔ kɔ-wa nɛ̀ nɔa-a, ɓɛɛ wa kɔ̧ pia ɗoŋ tɛ‘m na.

⁶Mi yeŋa zer-am nɛ̀ de-a sitɛ wa, o ee-zu-mɔ kɔ-wa de na. Ŋma bíí mgbara wa mɛ nyim tɛ zu ɗaŋ kɔ‘i, tɔ̧ nɛnɛ‘e, mɔ nɛ̀‘i de’ɛ duk bɔɔ héé ge ndé? wó, ɓɛɛ ká ee ɗaŋ deemɔ‘i duk, bo na. Kóó o ndé ba nɛ́ yuwar kɔ‘i nɛ̀ nú-tum, hee nyaŋa fara biro ga.

⁷Kóó nɛ́ o nɔ̧́í̧-gba-dɔya iŋa ŋgimbi kura-a kɔ‘i; o kerŋgeɗe, o gbiiwara in o sɔkɔyɔkɔ iŋa ŋgimbi pia-ɗoŋ kɔ‘i mbɛt; ɓɛɛ o bíí kɔ‘m iŋ o geŋa kɔ‘m na.

⁸Héé ge ɛnɛ tɛ tɔ̧‘e: ‹Ɛɛ a̧a̧ nɛ̀ iŋa-mgbara-mɔ wen nɛ̀ Heembea ko GASA WAN a̧a̧ mgbara yɛ,› ge? Wen o wi-yɔr-kalata mgbara'nɛ́ ɗaŋa wen-tɛ Heembea nɛ̀ o ndela kɔ-wa!

⁹«Búù baa o wi-iŋ-mgbara-mɔ; wa iŋ mɔ mɛ de siti na, ɓɛɛ wa tik nɛ̀ ɗaŋ-a wen wa ee wen ko GASA WAN tɛ geemɔ. Iŋa-mgbara-mɔ kɔ-wa tɛ gbak wa hee ge?»

¹⁰Zu mɔ‘i, GASA WAN tɔ̧a: «Mi tɛ ha̧ o kóò kɔ-wa ha̧ o ŋma bíí, in fɔ kɔ-wa ha̧ o wi nɛ̀ tɛ duk zu wa, wen wa lɛŋ, o gasawi in o obem mbɛt kii nɛ yuwar kpaamɔ kɔ‘i; o wi-tɔ̧-wen oi nú Sɔ̧ in o wi-ɗafi-sɔ̧ de nɛ mɔɔ-ndela.

¹¹Wa tɔ̧ wen tɛ ŋgamɔ nɛ kpa dukbíí kɔ‘m hee geɗek mɔ ga, tɔ̧ nɛnɛ‘e: ‹Mɔ duk kɔ‘i nɛ̀ de-a! Ŋma mɔ bo na!› Ɓɛɛ zu-a'i, ŋma mɔ kpɔk nɛ̀ duk nɛ̀ de-a bo na.

¹²Zu ŋgamɔ nɛ̀ wa de'i, foe de wa dee nde? Foe de wa na kóó tikiɗi! Wa iŋ géé iŋa foe na! Ɓɛɛ sa GASA WAN tɔ̧‘e, nɛ̀ mbetɛ, wa tɛ tir a nù hee o dɔka bíí ga, ŋgimbi n'am bé tɛ̀ɛ́ de ŋmaa in wa zu mɔ‘i.»

¹³«Taamɔ kɔ‘m kinii'i mɛ̀ nɛ́ ha̧‘m mɛ nduk wa kaɗi; wen wa duk hee nyak-dɔ̧ɔ̧ nɛ̀ waya-a bo na ga, hee te-mbɔra nɛ̀ waya-a bo na ga mbɛt; wa duk hee ŋma te nɛ̀ wa̧a̧-a̧ fee lɛsuu ga, hegɔ mi tɛ e ha̧ o bíí mɛ i̧si wa yak nɛ̀ zu wa.»

¹⁴«Wen ge s’ɛɛ ya keɗeŋ'ɛ ge? Ɛ̀ɛ̀ mɔ́í̧ ŋmaa, ɛ̀ɛ̀ yé saaye-ŋgárá, ɓɛɛ k’ɛɛ fo tɛ yɛ hi̧i̧ ɓɔna, wen GASA WAN Sɔ̧ k’ɛɛ kpee yɛ e nù, ɔn nɛ̀ yɛ nɛ̀ yì. Nɛ̀ mbetɛ, ɛɛ yɔɔ kaya ti GASA WAN.

¹⁵Ɛɛ yaa so k’ɛɛ e nɛ̀ ta'e, mɔ tɛ duk nɛ̀ de-a h’ɛɛ wó, ɓɛɛ ŋma demɔ bo na. Ɛɛ yaa so k’ɛɛ pɛm nɛ̀ wese nɛ̀ bɔnɛ k’ɛɛ tɛ kaɗi wó, ɓɛɛ nɛ́ ŋga mɔɔ-kíì a̧ tɛɛ kpa yɛ.

¹⁶O wisɛn hɔɔ Daŋ kaɗi; wi zii nɛ giti gɔna búk ko o nyaŋa nɛ̀ gɔn tɛnɛ; géé hiɗimɔ kɔ-wa dee ha̧ nù mɛ nak dam fara lɛŋ. Wa tɛ mɛ ɗaŋ nù in o mɔ mɛ zaŋ-aa lɛŋ, gu nɛ̀ ye in dukbíí nɛ̀ ya sɛnɛ mbɛt.»

¹⁷GASA WAN'e, «Mi tɛ tom o ɗaŋ gɔ́k, o kóró nɛ̀ bíí beka nyɛm mɛ ɔr na a mgbara'nɛ́ mɛ gɔm'nɛ́.»

¹⁸Nyina nyimmɔ kɔ‘m bo na; see-am ŋmana nɛ̀ ɗaŋ-a.

¹⁹Wi zii nɛ sara-bɔnɛ ko dukbíí kɔ‘m nɛ̀ tɛ nɛ̀ nyɛi̧a fara mɛ tɛnɛ‘e: «GASA WAN bo Siɔŋ na? Wannu kɔ̧-a̧ bo hi̧i̧ na nde?» «Wen ge sa wa tu̧ see-am nɛ̀ o géé-sɔ̧, in o géé tum mɔ kɔ-wa mɛ gɔni-fara ge?»

²⁰Mɔi̧a nyɔnɔ kaɗa, ŋgimbi-ɓar nɛ́ mɔ'ɔ nɛ̀ yaka mbɛt’ɛ, ɓɛɛ k’ɛɛ, ŋma mɔɔ-kpasi-yɛ tɛ bo hɔ̧ɔ̧ na.

²¹Gba̧a̧-tɛ‘m gbina wen gasa ɗaŋmɔ nɛ̀ kpaa dukbíí kɔ‘m; yí‘m baa tum, ɓɛɛ gɛ̧ɛ̧mɔ ba'm mbɛt.

²²Ŋma nyina-ga̧-nyimmɔ bo sɛn Galad ɓɔna? Ŋma wi-de-nyina bo hi̧i̧ na nde? Wen ge dukbíí kɔ‘m kpa daama na ge?

²³Nɛ́ o'o tɛ kpai zu'm nɛ̀ gɔna-yì, in yí‘m nɛ̀ kpút-kpút-mi̧i̧kɔ̧a̧ wen hi̧a̧ o fio mgbara dukbíí kɔ‘m o?