Read Northwest Gbaya O AIA-NÚ 3 Bible Online

O AIA-NÚ 3 - Northwest Gbaya bible

O AIA-NÚ 3

¹Mi nɛ wi nɛ zɔka bɔnɛ nyasi ko GASA WAN.

²A̧ baa'm pi̧ ti tum ha̧‘m mɛ nɛ nɔ sɛnɛ, nɛ̀ bó nɛ́ tɛ sa̧a̧mɔ na.

³Kànà nɛ mi ɛ̀n'am ɓɛɛ, a̧ GASA WAN nukuri ɓɔnsɛnɛ.

⁴A̧ sɛkɛra'm ɓɛɛ mi ɔ̧k ba gba̧a̧, ɓɛɛ a̧ gbin o gba̧a̧-tɛ‘m mbɛt.

⁵A̧ ɔna'm; a̧ zika'm e see-a nɛ bɔnɛ in tu̧u̧-see.

⁶A̧ pi̧i̧ am ti tum hee o gba̧a̧-fio nɛ̀ ɔ́ kɔ̧́ kɔ̧̀ pɛ nɛ pɛ'ɛ ga.

⁷A̧ dee garo zik am kpa nu ŋmaa, wen ká‘m tɛ̀ɛ́ yar; a̧ saŋa'm sútúk pi̧ nu nɛ ŋga nyak-boi.

⁸Nɛ oi hiɗimɔ in sara kɔ‘m, kɔ̧-a̧ nɛ zɔka mɔ yak zu aia-nú kɔ‘m.

⁹A̧ kpee yuwar kɔ‘m nɛ o zɔm gasa ta, ɓɛɛ yuwar kɔ‘m ɗaŋ lɛŋ.

¹⁰A̧ pɛm am hee ŋga saɗi-nyɔŋ-wi[6] ga, hee dila nɛ hu̧si ɗoŋ mɔ mɛ ba saɗi’ɛ ga.

¹¹A̧ dee ha̧‘m mɛ yɔ yuwar kɔ‘m; a̧ pi̧a'm tɛ bɔnɛ kpul, ɓɛɛ e'm ɓɔn hi̧i̧.

¹²A̧ ŋgaŋa kusaa-goo kɔ̧-a̧, ɓɛɛ kpe'm e nu mɛ pi̧.

¹³A̧ pi̧a'm tɛ guntir nɛ góò kɔ̧ ɓaro kɔ̧-a̧ lɛŋ.

¹⁴Mi kifa wi-bɔkɔ ti dukbíí kɔ‘m; wese lɛŋ kɔ-wa kànà nɛ́ zɛkɛɗa'm mam nɛnɛ.

¹⁵GASA WAN ha̧a̧ nɛ ɗaŋ paŋ wa̧a̧-te ha̧‘m nyɔŋ in paŋ mɔ kpírírí ha̧‘m mɛ nɔ.

¹⁶A̧ dee ha̧‘m mɛ ŋger ŋga ta, ɓɛɛ a̧ pi̧‘m tɛ bùk.

¹⁷GASA WAN, ɛnɛ baa ga̧a̧mɔ yinɛ nyɛi̧ nɛ‘m; mi iŋ oi bɔtɛ ɓɔna.

¹⁸Ɓɛɛ sa'm tɔ̧: «Ɓɛɛ kɔ‘m a̧ kaɗa'i, ŋma mɔ ha̧‘m mɛ e ta nɛ GASA WAN bo ɓɔna nde?»

¹⁹Tɛ‘nɛ́ a̧ mbaŋ ɗoŋ bɔnɛ in yambala-a kɔ‘m. Mɔ‘i nɛ paŋ mɔ in ma̧a̧da̧!

²⁰Taamɔ kɔ‘m duk ɓɔn tɛ bɔnɛ nɔ‘i, ɓɛɛ see-am yeli kànà yeli lɛŋ.

²¹Oi mɔ n'am tɛ ta wen kpaa nɔɔ-ŋgiɗi nɛ mɔ'ɔ:

²²Dee demɔ ko GASA WAN in bíí kaɗi na, kɔ̧ɔ̧mɔ kɔ̧-a̧ sitɛ bíí mbɛt kaɗi na ɓɔnsɛnɛ.

²³A̧ de demɔ in yɛɛ dam ɗoŋ wese lɛŋ. GASA WAN, yuwar deemɔ k’ɛ́nɛ́ in bíí nɛ kpasamɔ ɓɔnsɛnɛ!

²⁴«GASA WAN nɛ war mɔ kɔ‘m; nɛ mɔ‘i ɓɛɛ sa'm e ta nɛ a̧.»

²⁵GASA WAN nɛ gba de-wi wen wi nɛ kii a̧, in nɛ e see tɛ-a.

²⁶Duka-a nɛ̀ oi nú pɛm nɛ GASA WAN mɛ kpasi wi ɔ dee.

²⁷Yambaya munyal nɛ̀ bem tɛnɛ nɛ gba demɔ nyɛmna.

²⁸Kà GASA WAN úsí bɔnɛ há̧ bíí, ɓɛɛ wi’ɛi a̧ duk ɛ̀nɛ̀-wí nɛ̀ oi-nú keɗeŋ.

²⁹A̧ a̧ ɔ nu zu fuunu, ŋmafara Sɔ̧ tɛ gbak a̧!

³⁰A̧ a̧ e ká̧ yí-a ha̧ wi-mbɛr-aa, a̧ a̧ nɔ ŋgiɗi tɛ da̧ra̧ ko bíí mbɛt.

³¹Wen GASA WAN siŋ bíí pi̧ nu hegɔ ɓɔn ndo-ndo-ndo na;

³²kà nɛ́ bòò nɛ́ see-aa a̧ nyima, a̧ tɛ de ko nɛ ɗoŋ, wen kɔ̧ɔ̧mɔ kɔ̧-a̧ ɔ gasa nyɛmna.

³³Wen bó nɛ́ a̧ kpa desee tɛ usa bɔnɛ ɗaŋ nɛ see bíí sɔɔ gee na!

³⁴Ŋgimbi kaia o bara-biro nu kɔ-wa, i̧si̧ nɛ wa nɛ naŋ,

³⁵ŋgimbi deemɔ in o bíí nɛ yuwar-a na ti Wan nɛ duk ŋgɔn mɛ,

³⁶ŋgimbi ɓira wen e nú bíí ti kita, bó nɛ́ GASA WAN a̧ zɔk'i na?

³⁷Nɛ o'o nyɛma tɔ̧ɔ̧ wen ɓɛɛ mɔ dea o, kà bó nɛ́ Sɔ̧'ɔ̧ tɔ̧ɔ̧ wen ha̧ mɔ‘i mɛ de na o?

³⁸Bó nɛ́ kpɔk nú Wan nɛ duk ŋgɔn mɛ a̧ mɔɔ-ɗaŋsee in mɔɔ-desee gbo nɛnɛ na?

³⁹Bíí nɛ duk kpasa ai nú wen ge? Bó nɛ́ zu ɗaŋmɔ n'aa de'i a̧ a̧ duk kànà kpasa'i na?

⁴⁰Ɛ̀ɛ̀ kíí mɔ tɛ yuwar deemɔ k’ɛ́ɛ́, ɛ̀ɛ̀ tá mɔ zu-a, ɓɛɛ ɛ̀ɛ̀ píí ɗoŋ tɛ GASA WAN.

⁴¹Ɛ̀ɛ̀ nyɛi̧ er yɛ in ɛ̀ɛ̀ há̧ see yɛ ha̧ GASA WAN nɛ duk yiwese mɛ.

⁴²K’ɛ́ɛ́, ɛ́ɛ́ dee ŋgazu, ɛ́ɛ́ mbo zu h’ɛ́nɛ́ na, ɓɛɛ nɛ̀ war k’ɛ́nɛ́, ɛ̀nɛ̀ e ɗaŋmɔ k’ɛ́ɛ́ h’ɛ́ɛ́ na!

⁴³Ŋga nyimsea baa'nɛ, ɓɛɛ ɛ́nɛ́ kúr, ndak nɛ yɛ, kum nɛ yɛ, ko de'nɛ́ h’ɛ́ɛ́ na mbɛt.

⁴⁴Ɛ́nɛ́ kpee yí‘nɛ́ nɛ tura-zan, wen ká kɔfa-sɔ̧ k’ɛɛ tɛɛ hɔ tɛ‘nɛ́.

⁴⁵Ɛ́nɛ́ dee h’ɛ́ɛ́ mɛ duk hee fara-a-yɔsɛ in mɔɔ-i̧si̧ nɛ naŋ ko o dukbíí ga.

⁴⁶O wisɛn k’ɛɛ lɛŋ dɔk nɛ wen a zu yɛ.

⁴⁷War mɔ k’ɛɛ nɛ bele in ɗuka kɔ̧, ká bá nɛ̀ zɔka bɔnɛ in tika-a.

⁴⁸Yí‘m mbaŋ nɛ miikɔ̧a wen tika-a ko dukbíí kɔ‘m.

⁴⁹Yí‘m pii nɛ miikɔ̧a vamgba-vamgba gee; yí‘m beka zɔm na wen bɔnɛ,

⁵⁰hɔ ŋgimbi nɛ GASA WAN tɛ oŋgi mɛ zɔk mɔ nɛ yiwese mɛ tɛnɛ.

⁵¹Dita-see mɔ nɛ tika zu o zɔŋa ye kɔ‘m,[7] gana'm.

⁵²O wi-sɛn-am gee ndaka'm hee mi nɛ nɔ̧́í̧ ga;

⁵³wa pi̧i̧ am kɔ̧́ kɔ̧ ha̧‘m mɛ fe, ɓɛɛ wa kpe nú‘m nɛ ta;

⁵⁴yì ha̧a̧ yak zu'm, ɓɛɛ mi e nú‘m tɛ hiɗimɔ‘e: «Tɛ‘m yɔa!»

⁵⁵Nɛ̀ kɔ̧̀ ɗúká kɔ̧̀ mɛ̀, mi saa nin'nɛ́, GASA WAN,

⁵⁶ɓɛɛ ɛ́nɛ́ zíí hiɗimɔ kɔ‘m. K’ɛ́nɛ́ kpe zer'nɛ́ tɛ gɔfamɔ in aia-nú kɔ‘m na!

⁵⁷Wese n'am sa nɛ ɛnɛ‘i, ɛnɛ ɗɔla pii ti, ɓɛɛ ɛ́nɛ́ tɔ̧́, «Ká kíì de mɛ na!»

⁵⁸GASA WAN, ɛnɛ ɗafa yuwar wen kɔ‘m, ɛnɛ kpasa'm.

⁵⁹GASA WAN, bo nɛ ɛnɛ zɔka gɔɔmɔ nɛ wa de in am'i na? Ɛ̀nɛ̀ gɔ́n kita zu'm nɛ yuwar-a.

⁶⁰Ɛnɛ zɔka wan o ŋgamɔ in o ɓira wen-ndela nɛ wa ɓira e nú‘m gɔ!

⁶¹GASA WAN, ɛnɛ zia gɔna da̧ra̧ nɛ wa gɔna e tɛ‘m'i, in ɓira wen kɔ-wa e nú‘m mbɛt'i.

⁶²O wi-sɛn-am fu̧i̧ nɛ wen e nɛ ɗɔra tɛ‘m ɓɔnsɛnɛ.

⁶³Ɛ̀nɛ̀ zɔ́k wa: kóó wa yor nɛ ŋgɔn, kóó wa ya nɛ nu, nin-am kifa nɛ gima-bìì kɔ-wa.

⁶⁴GASA WAN, ɛ́nɛ́ tɛ́ de ha̧ mɔɔ-oi-tom kɔ-wa mɛ tik zu wa.

⁶⁵Ɛ́nɛ́ tɛ́ ŋgai see-wa, ɓɛɛ ɛ́nɛ́ tɛ tok ɗaŋ yoŋgo a zu wa.

⁶⁶Ŋga nyimsea k’ɛ́nɛ́ tɛ ndak ɗoŋ wa, ɓɛɛ ɛnɛ tɛ kum wa zu nu’ɛ yinɛ!