Read Northwest Gbaya EZEKIƐL 1 Bible Online

EZEKIƐL 1 - Northwest Gbaya bible

EZEKIƐL 1

¹Tɛ ɓu-taar pɛ, tɛ naar fio-zɛ, tɛ mɔɔrɔ ɔɔ-zɛ, mi duka so mgbara o bara-biro ká̧ zaŋ Kebar mɛ. Yiwese hu̧i̧a̧, ɓɛɛ Sɔ̧ hɔ zu ha̧‘m.

²Ŋgimbi'i, ɓɛɛ ká wannu Jɔakim duka bara-biro pɛ mɔɔrɔ kaɗi; ɓɛɛ nɛ tɛ mɔɔrɔ ɔɔ-zɛ‘i,

³a̧ GASA WAN tɔ̧ɔ̧ nɛ wen ha̧‘m Ezekiɛl wi-ɗafi-sɔ̧, bem ko Buzi sɛn ká̧ zaŋ Kebar tɛ nu ko o be Kaldee. Nɛ fara'i a̧ GASA WAN Sɔ̧ yora nɛnɛ ɗoŋ-am.

⁴Kà‘m tɛ zɔk mɔ wó, ɓɛɛ gba ŋga hara-búk nɛ mɔ'ɔ nɛ ɓoɓi nɛ war ŋgɔn mɛ‘i tɛnɛ'ɛ, in gba hama bu-zan in leɓe-wee nɛ sɔi in gba sa̧a̧mɔ nɛ duk kɔ‘i tok nɛnɛ lak-lak, ɓɛɛ ŋma mɔ hee yi wee-ndɛrɛ nɛ nɔ̧́í̧ ga, gbo nɛ see mɔ‘i daŋnɛ.

⁵Ɓɛɛ nɛ mɔ'ɔ n'am zɔka ŋma mɔ naar nɛ gbo nɛ yi mɔ‘i tɛnɛ nɛ hɔɔ ŋmaa in bíí.

⁶Wa kpɔk kpɔk a̧a̧ nɛ saŋa-yí naar naar, in wɔr-ɓaa-wa naar naar mbɛt.

⁷Ɓɛɛ wa yor nɛ tana-a zeeŋ, sɔ̧ɔ̧ naŋ-wa duk hee sɔ̧ɔ̧ naŋ ndai ga nɛ̀ duk tok nɛnɛ ŋgol-ŋgol hee ndɛrɛ ga.

⁸O er-wa hee er bíí ga a̧a̧ ɗɔɔ wɔr-ɓaa-wa, ɓɛɛ er-wa in ɓaa-wa ká bá nɛ̀ sɔnti-wa naar lɛŋ zika zɔk mɔ tan ti wa dam mgbii-zan naar.

⁹Nú wɔr-ɓaa-wa hɔŋ nɛ nu ŋmaa; kà wa kur mɛ nɛ nɔ, wa zik tɛ na, kóó o ndé nɛ nɔ tan sɔnti wi fara n'aa e zu si sɛnɛ‘i.

¹⁰Saŋa yí-wa mɛ ti hɔɔ ŋmaa in saŋa-yí bíí, wan mɛ wiiko hɔɔ ŋmaa in saŋa-yí dila, wan mɛ gale hɔɔ kɔ‘i ŋmaa in saŋa-yí ndai, ɓɛɛ wan mɛ ɗoŋ hɔ ŋmaa in saŋa-yí zua.

¹¹Wa kaia ɛ̧ɛ̧ ɓaa-wa yiitoo nɛ ŋgɔn ɓɛɛ ndɔŋ nu ɓaa-wa duɓi ŋmaa, ɓɛɛ oi ɓaa-wa yiitoo duk nɛ mɔɔ-kpe-tɛ-wa.

¹²Kóó o ndé nɛ́ nɔ tan sɔnti wi, ba nɛ̀ yuwar nɛ taamɔ usa ha̧ a̧, wa gir tɛ-wa na.

¹³Wa hɔɔ ŋmaa in o mɔ nɛ ya kpasa; ŋma mɔ gboo mgbara wa hee ŋga kɛ̧i̧-wee ga, nɛ hɔɔ ŋmaa in wee-kan, nɛ wee-aa duk pi̧ nɛnɛ hee pi̧i̧-kórò ga.

¹⁴O saɗi nɔ‘i nɛ nɔ siti, ɓɛɛ wa tɛɛ nɛ nɔ si ɗoŋ mbɛt nɛ haya-a hee mbaŋa-kórò ga.

¹⁵Mi zɔka o saɗi nɔ‘i, ɓɛɛ mi zɔk naŋ keekee fara yor katɛ wa kpɔk kpɔk tan sɔnti-wa naar lɛŋ.

¹⁶O naŋ keekee nɔ‘i ya tok nɛ kɔ‘i bar-bar hee ŋma de ta ga. Wa naar lɛŋ duk hee ŋmaa ga, ɓɛɛ duk hee wi dee wa ha̧ wa mɛ ye kɔ̧ ŋmaa ga.

¹⁷O naŋ keekee nɔ‘i kpɔk kpɔk nɛ nɔ tan ti-wi dam mgbii-zan naar lɛŋ, wa wɛr tɛ-wa na.

¹⁸Kusa-wa nɛ mɔɔ-kíì, ɓɛɛ ɗoŋ-wa lɛŋ tok tok.

¹⁹Kà o saɗi nɔ‘i nɛ nɔ, ɓɛɛ o naŋ keekee nɛɛ nɔ; kà o saɗi kur daŋ si ŋgɔn, ɓɛɛ o naŋ keekee kura daŋ si ŋgɔn mbɛt.

²⁰Wa nɛ si fara lɛŋ nɛ see-wa[1] kɔ̧a̧, ɓɛɛ o naŋ keekee nɛɛ in wa, wen mɔ nɛ o saɗi nɔ‘i kɔ̧a̧, a̧ o naŋ keekee de.

²¹Kà o saɗi nɛ nɔ siti, ɓɛɛ o naŋ keekee nɛɛ kana in wa; kà o saɗi gbasi yor, ɓɛɛ o naŋ keekee yora; kà o saɗi kur daŋ si ŋgɔn, ɓɛɛ o naŋ keekee kura daŋ si ŋgɔn mbɛt, wen nɛ́ kpɔk taamɔ[2] nɛ̀ duk tɛ o saɗi nɔ‘i, a̧ duk tɛ o naŋ keekee mbɛt.

²²Ŋma mɔ nɛ hɔɔ ŋmaa in yiwese guu zu o saɗi nɔ‘i tok nɛnɛ hee bu ta ga.

²³O saɗi nɔ‘i nyɛi̧a ɓaa yiitoo si ɗɔɔ mɔ‘i nɛ hɔɔ ŋmaa in yiwese'i, ɓɛɛ oi ɓaa-wa yiitoo yiitoo ya mɛ kpe tɛ wa.

²⁴Ŋgimbi nɛ wa kur mɛ nɛ nɔ, mi zii nɛ giti ɓaa-wa fara gɔm ŋmaa hee giti ŋga som-yì ga, kóó hee tiger Wan nɛ a̧a̧ nɛ ŋgayamɔ lɛŋ ga, hee giti naŋ o gba gii wi-biro ga; kà wa yor, ɓɛɛ wa lɛŋ mɔ̧i̧a ɓaa-wa si ɗɔɔ.

²⁵Ŋma tiger bíí tɛa nɛ fara nɛ mɔ hɔɔ ŋmaa in yiwese nɛ guu zu o saɗi nɔ‘i.

²⁶Ɓɛɛ wi zɔk ŋma mɔ hee tu̧ ta nɛ‘i sa'e safir ga nɛ ɗoŋ-aa hɔɔ ŋmaa in damti. Ŋma mɔ duka zu mɔ‘i woyo ŋgɔn mɛ hee bíí ga.

²⁷Mi zɔka mɔ‘i nɛ duk tok nɛnɛ lak-lak hee bu boi ga'i; ŋma mɔ hee wee ga zika ɗoŋ-aa kpa nu ŋmaa, ɓɛɛ de ha̧ sa̧a̧mɔ mɛ gɔn zik a̧ nɛ ŋgɔn hɔ ɗɔɔ.

²⁸Sa̧a̧mɔ‘i hɔɔ ŋmaa in dap ɓutu nɛ yɔr mɛ ɓar’ɛ ga; mɔ‘i nɛ gasamɔ ko GASA WAN. Mi zɔka mɔ‘i, ɓɛɛ mi yo nu, ba yí‘m gu nu, ɓɛɛ mi zii tiger ŋma bíí nɛ duka tɔ̧ nɛ wen ha̧‘m.