Read Northwest Gbaya EZEKIƐL 10 Bible Online

EZEKIƐL 10 - Northwest Gbaya bible

EZEKIƐL 10

¹Ka'm tɛ tɔ̧‘e ha̧‘m zɔk wó, ɓɛɛ ŋma mɔ nɛ mɔ'ɔ nɛ duk gba̧a̧-yí-zan zu keribim nɛ ŋgɔn, ɓɛɛ ŋma mɔ duk sɛnɛ tok nɛnɛ hee ta nɛ‘i sa'e safir ga’ɛ; ɓɛɛ mɔ‘i hɔɔ ŋmaa in damti.

²Ɓɛɛ nɛ mɔ'ɔ nɛ Sɔ̧ tɔ̧ɔ̧ ha̧ wan-pi̧ yɛm-yɛm laa'i: «Mɛ̀ yé si ɗɔɔ keribim mgbara naŋ keekee nɛ̀ ya ɗɔɔ-aa, mɛ̀ káí kɛ̧i̧-wee nɛ mgbara wa dun er-mɛ, ɓɛɛ mɛ̀ gbáí a zu ye.» Ɓɛɛ wi’ɛi yak mɛ de mɔ‘i nɛ̀ yí‘m.

³O keribim yaa ká̧ Tua ko Sɔ̧ nɛ̀ war wii-er ŋgimbi nɛ̀ wi’ɛi yee nɛ tua, ɓɛɛ bu-zan kpe kɔ̧ zala Tua ko Sɔ̧.

⁴Gasamɔ ko Sɔ̧ kura yak zu o keribim nɛ́ sí war dadaa nu Tua ko Sɔ̧; gasa zi-wee'i duna Tua ko Sɔ̧, ɓɛɛ sa̧a̧mɔ gasamɔ ko Sɔ̧ tok hɔ nu zala mɛ mbɛt.

⁵Ɓɛɛ giti ɓaa o keribim nɔ‘i hɔ bee-gara nu tua mɛ zan mɛ hee mɛ nɛ tiger Wan nɛ a̧a̧ nɛ ŋgayamɔ lɛŋ a̧ tɔ̧ wen ga.

⁶Ɓɛɛ GASA WAN tɔ̧ ha̧ wan-pi̧ yɛ́m-yɛ́m-laa'e: «Mɛ̀ bá wee mgbara naŋ keekee nɛ duk mgbara o keribim,» ɓɛɛ wi’ɛi nɛ, ɓɛɛ yor ká̧ naŋ keekee.

⁷Kpɔk mgbara o keribim nyɛi̧a er-wi nɛ́ɛ̀ ba wee nɛ duka mgbara o ŋma keribim, ɓɛɛ ba duk er wan-pi̧ yɛ́m-yɛ́m-laa'i. Wi’ɛi baa wee'i, ɓɛɛ gbo kɔ‘i yak.

⁸Kà‘m tɛ zɔk mɔ wó, ɓɛɛ ŋma mɔ nɛ hɔɔ ŋmaa in er-bíí nɛ́ mɔ'ɔ nɛ̀ duk ti-kɔ̧-ɓaa o keribim’ɛ.

⁹Ha̧‘m zɔk wó ɓɛɛ naŋ keekee a̧a̧ katɛ o keribim kpɔk kpɔk dam wa lɛŋ, ɓɛɛ o naŋ keekee nɔ‘i ya tok nɛnɛ bar-bar hee ŋma de ta ga.

¹⁰Wa naar lɛŋ yaa hee ŋmaa ga, wa lɛŋ yee kɔ̧ ŋmaa duk kpɔk.

¹¹Ka wa kur mɛ nɛ nɔ, wa nyɛma mɛ nɛ si war mgbii-zan naar lɛŋ, wa wɛr tɛ-wa na. Wa nɛ nɔ tan ti wa, wa gir tɛ-wa na.

¹²O er keribim nɔ‘i, in o ɓaa-wa, in ɗoŋ-wa, gu nɛ tɛ-wa lɛŋ, ká bá nɛ̀ o naŋ keekee duna nɛ o mɔ nɛ tok tok kɛɗu-kɛɗu.

¹³Ɓɛɛ mi zii nin nɛ wa aa ha̧ naŋ keekee nɛ́ «gba ŋga hara-búk.»[9]

¹⁴O naŋ keekee lɛŋ duka nɛ̀ o saŋa-yí-wi naar naar dam wa lɛŋ. Kuti-a duka nɛ saŋa-yí keribim; yiitoo-aa duka nɛ saŋa-yí bíí, taar-a duka nɛ saŋa-yí dila, ɓɛɛ sɔŋkur-aa duk nɛ saŋa-yí zua.

¹⁵Ɓɛɛ o keribim bu̧i si yiwese. O keribim nɔ‘i nɛ o kale mɔ n'am zɔka so ká̧ nana-yì Kebar mɛ‘i.

¹⁶Kà o keribim nɛ nɔ siti, ɓɛɛ o naŋ keekee nɛɛ in wa kpɔk; kà o keribim gɔm ɓaa mɛ bu̧i, ɓɛɛ o naŋ keekee kura kpɔk in wa.

¹⁷Kà o eribim gbasi, ɓɛɛ o naŋ keekee yora; ɓɛɛ kà o keribim bu̧i, ɓɛɛ o naŋ keekee yaka in wa, wen ɔmi ko o saɗi nɔ‘i duk tɛ o naŋ keekee.[10]

¹⁸Ɓɛɛ gasamɔ ko GASA WAN gbo nɛ dadaa nu Tua ko Sɔ̧ nɛ́ɛ̀ duk zu o keribim.

¹⁹O keribim ya̧i̧a̧ ɓaa bu̧i̧ yak nɛ̀ yí‘m, ɓɛɛ o naŋ keekee yak in wa mbɛt. Ɓɛɛ wa nɛ́ɛ̀ gu nu Tua ko Sɔ̧ nɛ war daŋa-wese; gasamɔ ko Sɔ̧ ko Israɛl duka mgbák zu wa mɛ.

²⁰Mi iŋa'e, o saɗi nɔ'ɔ bó nɛ́ o ŋma mbe mɔ na, mɛ nɛ o kale mɔ n'am zɔka so fara ya ɗɔɔ Sɔ̧ ko Israɛl sɛn ká̧ Kebar mɛ‘i; mɛ̀ nɛ́ o keribim.

²¹Wa a̧a̧ so nɛ o saŋa-yí in o wɔr-ɓaa naar naar dam wa, ɓɛɛ mɔ hee er-bíí ga duka so ti-kɔ̧-ɓaa-wa.

²²Saŋa yí-wa hɔɔ ŋmaa in o saŋa yí-wi n'am zɔka so ká̧ Kebar mɛ‘i, nɛ̀ kóó o nde nɛ́ só nɛ́ nɔ̀ tan ti-wi'i.