Read Northwest Gbaya EZEKIƐL 11 Bible Online

EZEKIƐL 11 - Northwest Gbaya bible

EZEKIƐL 11

¹Sɔ̧ hɔɔ zu ha̧‘m, fara n'aa baa nɛ‘m nɛ́ɛ̀ e nu Tua kɔ̧-a̧ mɛ wan nɛ zɔk mɔ si daŋa-wese. Kà‘m tɛ zɔk mɔ wó, ɓɛɛ o bíí ɓu-yiitoo-zua-mɔɔrɔ nɛ mɔ'ɔ nɛ ya ka̧ nu tua mɛ‘i’ɛ. O ŋma gasawi kɔ-wa a̧a̧ so mgbara wa mbɛt. Yazania bem ko Azur in Pɛlatia bem ko Bɛnaya.

²Nɛ mɔ'ɔ nɛ GASA WAN tɔ̧ɔ̧ ha̧‘m'e: «Mɛ́ bíí, nɛ́ o wi nɔ‘i a̧ usi yuwar ɗaŋmɔ tɛ tɔ̧ɔ̧ ɗaŋ mbɔrɔ ha̧ o bíí tɛ ye’ɛ.

³Wen wa tɔ̧‘e, ‹Ɛɛ duk dɔ̧ɔ̧ mɛ de tua kinii na. Ye k’ɛɛ nɛ kpánà, ɓɛɛ kiitɛ yɛ nɛ kpoo gi sɛnɛ.›

⁴Wen mɔ‘i, mɛ̀ tɔ̧́ wen a zu wa. Mɛ́ bíí, mɛ̀ tɔ̧́ wen a zu wa.»

⁵Ɓɛɛ nɛ mɔ'ɔ nɛ ɔmi ko GASA WAN tika tɛ‘m, ɓɛɛ tɔ̧ ha̧‘m: «Mɛ̀ tɔ̧́ ha̧ wa'e nde, mɛ nɛ GASA WAN a̧ tɔ̧ wen’ɛ. Mɔ n’ɛnɛ o be Israɛl tɔ̧ nɛ mɔ‘i; wen mi iŋa taamɔ k’ɛ́nɛ́.

⁶Ɛnɛ gbɛɛ o bíí tɛ ye’ɛ zu ŋmaa zu ŋmaa, o wɔr bíí dama yuwar lɛŋ.

⁷«Mɛ nɛ wen mɔ‘i, sa GASA WAN Sɔ̧ tɔ̧ h’ɛ́nɛ́‘e, o wɔr bíí n’ɛnɛ gbɛa see ye'i nɛ́ kpoo, ɓɛɛ Jerusalɛm nɛ́ kpánà gia-a, ɓɛɛ hegɔ mi tɛ ndak'nɛ́ gbonɛ tɛ ye'i.

⁸Ɛ́nɛ́ de nɛ kíí gba-paa? Mi tɛ de ha̧ gba-paa'i mɛ kpa'nɛ́, GASA WAN Sɔ̧ tɔ̧ɔ̧ hegɔ.

⁹Mi tɛ fo'nɛ́ gbonɛ saaye’ɛ, ɓɛɛ mi tɛ e'nɛ́ er gɔni-duk nɛ tɛ kai'nɛ́ yaknɛ; mɔ‘i tɛ duk nɛ gɔna kita kɔ‘m zu'nɛ́.

¹⁰Ɛnɛ tɛ tik nu gba-paa dam zika-nù Israɛl lɛŋ, ɓɛɛ ɛnɛ tɛ iŋ‘e, mi nɛ GASA WAN.

¹¹Ɛnɛ bó nɛ́ kpoo, wen ha̧ Jerusalɛm mɛ duk kpánà-gi'nɛ na. Ɓɛɛ mi tɛ gɔn kita zu mgbák zika-nù Israɛl.

¹²Ɓɛɛ ɛnɛ tɛ iŋ‘e, mi nɛ GASA WAN n’ɛnɛ kasi o heembea kɔ̧-a̧ na'i, in n’ɛnɛ mbo zu tɛ yuwar kɔ̧-a̧ na mbɛt'i. Ɛnɛ ee yuwar kɔ‘m duk, ɓɛɛ ɛnɛ ba nɛ yuwar duka-a ko o gɔni-duk nɛ ya zik'nɛ́.»

¹³Ɓɛɛ ŋgimbi n'am biti tɔ̧ nɛ wen'i, Pɛlatia, bem ko Bɛnaya tika nu, ɓɛɛ fe. Ɓɛɛ mi tik nu nɛ sɔnti'm, mi ŋmaa nú‘m tɛ hiɗimɔ nɛ ŋgaya-a tɔ̧ nɛnɛ‘e: «Ho! GASA WAN Sɔ̧, ɛnɛ tɛ kum oi ndaa o be Israɛl lɛŋ yinɛ nde?»

¹⁴Ɓɛɛ nɛ mɔ'ɔ nɛ GASA WAN tɔ̧ɔ̧ ha̧‘m: «Mɛ́ bíí,

¹⁵o nya-mɛ in o bíí nutua ko dáà kɔ-mɛ ká bá nɛ̀ o be Israɛl lɛŋ a̧ zii wen nɛ o bíí Jerusalɛm tɔ̧ zu'nɛ́'ɛ; mɔ nɛ wa tɔ̧ nɛ mɔ'ɔ: ‹Wa a̧ ɓɔn fara nɛ wa ya sɛnɛ‘i nyɛi̧ nɛ GASA WAN, wen nù kɔ-wa kifa duk nɛ nù k’ɛɛ kinii.›

¹⁶«Wen hegɔ mɛ̀ tɔ̧́ ha̧ wa: ‹Mi GASA WAN Sɔ̧ tɔ̧ɔ̧ hegɔ. Nɛ mbetɛ, mi foo wa yaknɛ si gɔni-nù nyɛi̧ nɛ‘m, mi pɛsa wa dam mgbara o gɔni-duk dam zaŋnu; koo hegɔ‘i mbɛt, mi a̧a̧ mgbara wa fara nɛ wa kaia wa si sɛnɛ‘i hee sa̧a̧-fara nɛ gu zu wa ga.

¹⁷« ‹Mi tɛ mɔi̧ wa mgbara o dukbíí piinɛ ɗoŋ, mi tɛ fo wa zaŋnu n'am pɛsa wa si sɛnɛ‘i lɛŋ si ɗoŋ nu kɔ-wa, ɓɛɛ mi tɛ ha̧ nu Israɛl ha̧ wa woyo.

¹⁸Wa tɛ si ɗoŋ nu kɔ-wa, ɓɛɛ wa tɛ kai o géé-sɔ̧ in o ndiŋmɔ lɛŋ yinɛ sɛnɛ.

¹⁹Mi tɛ mɔi̧ see-wa e kpɔk, ɓɛɛ mi tɛ e mbe taamɔ tɛ-wa; mi tɛ ba ŋga-see tɛ-wa yinɛ, ɓɛɛ mi tɛ ha̧ mbe mɔka-see ha̧ wa,

²⁰ha̧ wa mɛ nɛ nɔ nyɛm nɛ ɗoŋ heembea kɔ‘m, in ha̧ wa mɛ kasi yuwar deemɔ kɔ‘m mbɛt. Wa tɛ duk nɛ́ dukbíí kɔ‘m, ɓɛɛ mi tɛ duk nɛ́ Sɔ̧ kɔ-wa.

²¹Ɓɛɛ war ko o wi nɛ see ɓɔna tɛ o géé-sɔ̧ in yuwar ndiŋmɔ kɔ-wa'i, mi tɛ de ha̧ ɗaŋ deemɔ kɔ-wa mɛ tik zu wa.› Mi GASA WAN Sɔ̧ tɔ̧ɔ̧ hegɔ.»

²²O keribim kaia ɓaa nɛ ŋgɔn, ɓɛɛ o naŋ keekee fo tɛ nyɛm ŋmaa in wa. Ŋgimbi'i, ɓɛɛ ká gasamɔ ko Sɔ̧ ko Israɛl duka zu wa nɛ ŋgɔn.

²³Ɓɛɛ gasamɔ ko Sɔ̧ gbo saaye'i, ɓɛɛ yak nɛ́ɛ̀ duk zu kaya wan mɛ war daŋa-wese.

²⁴Nɛ mɔ'ɔ nɛ ɔmi ko GASA WAN baa'm nɛ ŋgɔn, ɓɛɛ ba'm si mgbara o bara-biro sɛn Kaldee mɛ. Nɛ́ Sɔ̧ a̧ hɔɔ zu'i ha̧‘m, ɓɛɛ mɔ‘i n'am zɔka'i yak yí‘m ɓɛlɛm.

²⁵Ɓɛɛ mi we ɗoŋ mɔ lɛŋ nɛ GASA WAN usa ha̧‘m ha̧ o wi nɔ‘i.