Read Northwest Gbaya EZEKIƐL 12 Bible Online

EZEKIƐL 12 - Northwest Gbaya bible

EZEKIƐL 12

¹Nɛ mɔ'ɔ nɛ GASA WAN tɔ̧ɔ̧ ha̧‘m.

²«Mɛ́ bíí, mɛ́ dúk mgbara o yaa-ŋga-zu nɔ'ɔ nɛ a̧a̧ nɛ yí mɛ zɔk mɔ, ɓɛɛ nɛ zɔk mɔ na. Wa a̧a̧ nɛ zer mɛ zii mɔ, ɓɛɛ wa zii mɔ na mbɛt, wen wa nɛ o yaa-ŋgazu.

³«Mɛ́ bíí, mɛ̀ zìì! Mɛ̀ hɛ́r tui kɔ-mɛ hee bara-biro ga, mɛ̀ túí, ɓɛɛ mɛ̀ kúr mɛ̀ yák mɛ wese nɛ yí-wa, mɛ̀ gbín fara nɛ mɛ duka so sɛnɛ nɛti'i si gɔni fara. Ŋmafara mɔ‘i tɛ usi mɔ ha̧ wa mɛ iŋ‘e, wa nɛ o yaa-ŋgazu.

⁴Mɛ̀ hɛ́r o tui kɔ-mɛ nɛ bu-wese nɛ yí-wa hee ŋma bara-biro a̧ wa ba yaknɛ si gɔni nu ga. Ɓɛɛ mɛ̀ kúr mɛ̀ gbó yák nɛ yí-wa nɛ tinini-mɔ hee mɔ'ɔ nɛ o bara-biro gbo nɛnɛ yak’ɛ ga.

⁵Mɛ̀ áŋ naŋ garo gbo si zan, ɓɛɛ mɛ̀ bá tui kɔ-mɛ si zan nɛ woi garo'i nɛ yí-wa.

⁶Mɛ̀ bá hɛra tui kɔ-mɛ e gun ger-mɛ, ɓɛɛ mɛ̀ gbó yák nɛ yí-wa tɛ ŋgimbi tinini-mɔ. Mɛ̀ kpé yí-mɛ yak nɛnɛ hee mɛ zɔk mɔ na ga, wen ha̧ mɔ‘i mɛ duk nɛ mɔɔ-usi-mɔ ha̧ o be nutua ko Israɛl.»

⁷Ɓɛɛ nɛ mɔ'ɔ n'am dee mɔ nyɛm nɛ ɗoŋ mɔ nɛ GASA WAN usa ha̧‘m. Mi hɛra tui kɔ‘m hee tui ko ŋma bara-biro ga mɛ wese, ɓɛɛ mi aŋ naŋ garo gbo mɛ ga̧a̧mɔ. Mi baa tui kɔ‘m e gun ger-am, ɓɛɛ mi gbo yak nɛ yí-wa nɛ tinini-mɔ.

⁸Nɛ mɔ sa̧a̧ mɛ tutuyɛ, ɓɛɛ GASA WAN tɔ̧ ha̧‘m'e:

⁹«Mɛ́ bíí, o be nutua ko Israɛl, o yaa-ŋgazu nɔ'ɔ ak mɔ in mɛɛ zu o mɔɔ nɔ'ɔ nɛ mɛ de’ɛ na nde?

¹⁰Mɛ̀ tɔ̧́ ha̧ wa'e, nɛ mi GASA WAN Sɔ̧ a̧ tɔ̧ wen’ɛ zu o be-wan nɛ duk Jerusalɛm in o be nutua ko Israɛl lɛŋ nɛ ya hi̧i̧.

¹¹Mɛ̀ tɔ̧́ ha̧ wa'e nde, mɛ́ dúk nɛ mɔɔ-usi-mɔ ha̧ wa; mɔ nɛ mɛ dea nɛ́ mɔɔ-usi-mɔ zu mɔ nɛ tɛ kpa wa. O bíí tɛ kai wa yaknɛ nɛ bara-biro si gɔni nu mɛ.

¹²Ɓɛɛ be-wan kɔ-wa tɛ hɛr tui kɔ‘i ba e koŋgo-ɓaa-wi, ɓɛɛ gboo yak nɛ woi garo nɛ‘i aŋa so'i. A̧ tɛ kpe yí-a gbo nɛnɛ yak wen ká a̧ tɛɛ zɔk nu kɔ-wa.

¹³Mi tɛ pi̧ yɔk kɔ‘m zu a̧, ɓɛɛ yɔk'i tɛ yuɓuri a̧. Mi tɛ ba a̧ yaknɛ si Babilɔŋ nu Kaldee mɛ, n'aa beka zɔk na fe nɛnɛ.

¹⁴Mi tɛ pɛsi o gasawi kɔ̧-a̧, o wi-gbak-a gu nɛ o wi-biro kɔ̧-a̧ lɛŋ yaknɛ sót-sót, ɓɛɛ mi tɛ duk ɗoŋ wa nɛ gba-paa mɛ kum wa a nu lɛŋ.

¹⁵«Ŋgimbi n'am be tɛ̀ɛ́ pɛsi wa dam mgbara o tugun bíí, ɓɛɛ n'am be tɛɛ yai wa sót-sót a gɔni nu nɛnɛ‘i, wa tɛ iŋ‘e nde, mi nɛ GASA WAN.

¹⁶Ɓɛɛ gba-paa, kaɓa, ká bá nɛ̀ ŋga zɛɛ-geŋa tɛ yak zu o ŋma mgbara wa, kà bé dè ɓɛɛ ka o wi nɔ‘i wee ɗoŋ ndiŋmɔ nɛ wa dee so ha̧ o tugun bíí fara lɛŋ nɛ wa tɛ duk sɛnɛ, wen ha̧ tugun bíí mɛ iŋ‘e, mi nɛ GASA WAN.»

¹⁷Ɓɛɛ GASA WAN tɔ̧ ha̧‘m:

¹⁸«Mɛ́ bíí, mɛ̀ nyɔ́ŋ brɛt kɔ-mɛ nɛ naka-tɛ; mɛ̀ nɔ́ yi nɛ gɔna-ɗɛɗɛ in dita-see mbɛt.

¹⁹Mɛ̀ tɔ̧́ ha̧ o bíí tɛ nu’ɛ nde, mɛ nɛ GASA WAN Sɔ̧ a̧ tɔ̧ wen’ɛ ha̧ o bíí saaye Jerusalɛm nɛ ya ɓɔn Israɛl. Wa tɛ nyɔŋ nyɔŋmɔ nɛ gɔna-ɗɛɗɛ, wa tɛ nɔ yì nɛ kíì mbɛt, wen ha̧ o bíí sɛn tɛ nu'i mɛ iŋ‘e, nu kɔ-wa tɛ ɗaŋ wen dee ŋgamɔ ko o bíí tɛ ye'i.

²⁰O gasa ye k’ɛ́nɛ́ tɛ ɗaŋ lɔkɔti-lɔkɔti, ɓɛɛ nù k’ɛ́nɛ́ tɛ kifi nɛ gee ŋga-gbárà, wen h’ɛ́nɛ́ mɛ iŋ‘e, mi nɛ GASA WAN.»

²¹Ɓɛɛ GASA WAN tɔ̧ ha̧‘m:

²²«Mɛ́ bíí, ɛ́nɛ́ tɔ̧́ tua-wen zu nu ko Israɛl tɔ̧ nɛnɛ‘e, ‹Ɗoŋ ŋgimbi a̧ nyɛi̧ kɔ‘i'i, ɓɛɛ hɔɔ-zu hɔ gba̧a̧ na,› wen ge?

²³Kinii, mɛ̀ tɔ̧́ ha̧ wa'e, nɛ mi GASA WAN a̧ tɔ̧ wen’ɛ; mi tɛ gɔn ndaa tua-wen'i; wa beka tɔ̧ pɛrti tua-wen hegɔ‘i mgbara o be Israɛl ɓɔna. Wen hegɔ, mɛ̀ tɔ̧́ ha̧ wa'e, ŋgimbi hɔɔ gba̧a̧ ko hɔɔ-zu hɛɗa kaɗi.

²⁴«Gee hɔɔ-zu-ndela kà bó nɛ̀ gee wen-ɔr-mɔ zu mɔ nɛ tɛ hɔ beka bo mgbara o be nutua ko Israɛl ɓɔna.

²⁵Mɔ nɛ mi GASA WAN tɔ̧ɔ̧ tɛ ɓɔn kana tɛ wen mɛ nú‘m'i, ɗoŋ-aa beka nyɛi̧ na, ɓɛɛ wen'i hɔɔ gba̧a̧. Ɛnɛ o yaa-ŋgazu nɔ'ɔ, wen n'am tɔ̧ a zu'nɛ́'ɛ tɛ hɔ gba̧a̧ kpa'nɛ́ nɛ̀ yí. Mi GASA WAN a̧ tɔ̧ wen’ɛ.»

²⁶Ɓɛɛ GASA WAN tɔ̧ ha̧‘m woyo:

²⁷«Mɛ́ bíí, wen nɛ o be nutua ko Israɛl tɔ̧ in o ŋmaa nɛ mɔ'ɔ: ‹Hɔɔ-zu ko Ezekiɛl dáa-wan’ɛ beka hɔ kɔ‘i gba̧a̧ mɛ pɛ'ɛ na. Tɔ̧ɔ̧-wen kɔ̧-a̧ duk nɛ zu o ŋma mɔ nɛ tɛ hɔ tɛ ŋma ŋgimbi mɛ.›

²⁸Kinii, mɛ̀ tɔ̧́ ha̧ wa'e, mɛ nɛ mi GASA WAN a̧ tɔ̧ wen’ɛ ha̧ wa. Tɔ̧ɔ̧-wen kɔ‘m ha̧ wa ɗoŋ'ɛ beka ba ŋgimbi na, ɓɛɛ wa zɔka mɔɔ-oi-aa kaɗi. Mɔ n'am tɛ tɔ̧ ha̧ wa tɛ de kana ɓɔn oi nú‘m'i. Mi GASA WAN Sɔ̧ tɔ̧ɔ̧ hegɔ!»