Read Northwest Gbaya EZEKIƐL 13 Bible Online

EZEKIƐL 13 - Northwest Gbaya bible

EZEKIƐL 13

¹GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ wen a zu o wi-tɔ̧-wen oi nú Sɔ̧ ko be Israɛl nɔ'ɔ nɛ gɔn ta tɔ̧ nɛ wen kɔ-wa nɛ tɛ-wa. Ɛ̀nɛ̀ zíí mɔ nɛ GASA WAN tɔ̧ zu'nɛ́.

³«Gba̧a̧ wen'i nɛ mɔ'ɔ: fom a̧ ba o fɛŋa wi-tɔ̧-wen oi nú Sɔ̧ ndela nɛ gɔn nɛ ta tɔ̧ nɛ wen zu mɔ nɛ wa zɔk na.

⁴O wi-tɔ̧-wen oi nú Sɔ̧ k’ɛ́nɛ́ o be Israɛl kifa nɛ o gba-toyo nɛ yar nɛ bɛɛ-oi nɛnɛ.

⁵Bó nɛ́ wa hɔɔ woi garo-biro na, wa mbo garo zik o be Israɛl, kà bé dè ɓɛɛ ká wa yora nɛ nɔa-a tɛ biro wese ko GASA WAN na.

⁶Hɔɔ-zu kɔ-wa nɛ ndela, ɓɛɛ mɔ nɛ wa tɔ̧ nɛ́ wen-ɔr-mɔ. Wa tɔ̧‘e, ‹Mɔ nɛ GASA WAN tɔ̧ nɛ mɔ'ɔ,› ɓɛɛ bo nɛ mi GASA WAN a̧ toma wa na. Wa ta kɔ-wa'e, mi tɛ yor ɗoŋ wen kɔ-wa.

⁷Ɓɛɛ kɔ‘m, mi tɔ̧ ha̧ wa'e, ‹Bó nɛ́ hɔɔ-zu k’ɛ́nɛ́ nɛ̀ ndela na? Ɛ́nɛ́ gɔn ta ɔr nɛ bíí tɔ̧ nɛnɛ‘e GASA WAN tɔ̧ɔ̧ wen ha'i wo'i,› nɛ́ ndela. Mi tɔ̧ kɔ‘m wen h’ɛ́nɛ́ na.»

⁸Ɓɛɛ sa Sɔ̧ tɔ̧: «Mi tɛ kur zu'nɛ́ wen tɔ̧ɔ̧ gee tum wen in hɔɔ-zu-ndela k’ɛ́nɛ́. Mi GASA WAN tɔ̧a̧ hegɔ!

⁹Mi tɛ usi ŋgai kɔ‘m zu o wi-tɔ̧-wen oi nú Sɔ̧ nɛ̀ tɔ̧́ nɛ́ gee tumui̧ wen-ɔr-bíí in hɔɔ-zu-ndela. Wa beka duk mgbara o wi-ba-keta ko dukbíí kɔ‘m na, nin-wa beka yɔr zaŋ kalata ko o be Israɛl na, naŋ-wa beka i̧si̧ nu ko Israɛl na mbɛt, ɓɛɛ nɛ́ hi̧i̧ ɛ̀nɛ̀ tɛ iŋ‘e, mi nɛ GASA WAN Sɔ̧.

¹⁰«Wa ɔr nɛ́ dukbíí kɔ‘m tɔ̧ nɛnɛ ha̧ wa'e, ‹Ga̧a̧mɔ a̧a̧ sɛnɛ,› ɓɛɛ ga̧a̧mɔ bo kɔ‘i na. Dukbíí kɔ‘m mboo garo, ɓɛɛ o wi-tɔ̧-wen oi nú Sɔ̧ ndela nɔ‘i yɔk ɗoŋ-aa.

¹¹Mɛ̀ tɔ̧́ ha̧ o wi-yɔk-ɗoŋ garo'i nde, ndiɓa-kórò tɛ zir nɛ ŋga ɓɔrɔ in ŋga búk nɛ̀ tɛ́ tui mboo-mɔ‘i yaknɛ.

¹²Garo tɛ gbin a nu, ɓɛɛ o bíí tɛ tɔ̧ h’ɛ́nɛ́‘e, yɔka ɗoŋ garo n’ɛnɛ yɔka’ɛ dee bɔɔ hee ge?

¹³«Nɛ́ mɔ‘i ɓɛɛ sa mi GASA WAN Sɔ̧ tɔ̧‘e, tɛ ŋga nyimsea kɔ‘m, mi tɛ tom gba búk in zɔm ndiɓa-kórò ká bá nɛ̀ zɔm ɓɔrɔ mɛ ɗaŋ mɔ.

¹⁴Mi tɛ gbin garo n’ɛnɛ yɔka ɗoŋ-aa'i a nu nɛ oi gun. Garo'i tɛ gbin gu zu'nɛ́ gɛ́tɛ́-gɛ́tɛ́, ɛnɛ tɛ kum ɗɔɔ-aa; ɓɛɛ ɛnɛ tɛ iŋ‘e, mi nɛ GASA WAN.

¹⁵«Nyimsea kɔ‘m tɛ tik zu garo in o wi-yɔk-ɗoŋ-aa lɛŋ. Kà o mɔɔ nɔ‘i a̧ gbɔsa gu nu kaɗi, ɓɛɛ sɛka'm tɛɛ tɔ̧ h’ɛ́nɛ́‘e, garo bo ɓɔna, o wi-yɔk-ɗoŋ-aa bo na mbɛt.

¹⁶O wi nɛ tɔ̧ so wen oi nú Sɔ̧ zu Jerusalɛm, ɓɛɛ ka tɔ̧a̧‘e ga̧a̧mɔ a̧a̧ sɛnɛ, ɓɛɛ ka ga̧a̧mɔ bo na'i, o wi nɔ‘i bo ɓɔna mbɛt. Mɔ nɛ mi GASA WAN Sɔ̧ tɔ̧, nɛ mɔ‘i.»

¹⁷«Ɓɛɛ kɔ-mɛ, mɛ́ bíí, mɛ̀ zík tɛ-mɛ sitɛ o zɔŋa-duk kɔ-mɛ nɛ tɔ̧ wen nɛ zu ha̧ o bíí. Mɛ̀ tɔ̧́ wen a zu wa.

¹⁸Mɛ̀ tɔ̧́ ha̧ wa'e, mɛ nɛ mi GASA WAN a̧ tɔ̧ wen’ɛ. Fom a̧ ba o ko-fur-nyina kun yí-er-wi nɔ'ɔ, nɛ fan o kalaafi-hɛr-zu nyɛm nɛ o gasa bíí in o geɗek bíí, h’ɛ́nɛ́ mɛ kpa ŋgai zu duka-a kɔ-wa.

¹⁹Ɛ́nɛ́ fɛŋ nɛ‘m ti dukbíí kɔ‘m wen kpaa fuu in dɔɔ brɛt; ɛnɛ ɔra dukbíí kɔ‘m nɛ ndela gbɛ nɛ dukbíí nɛ nyɛm so mɛ fe na, ɓɛɛ ɛnɛ ee dukbíí nɛ nyɛma so mɛ fe duk.

²⁰«Kinii, nɛ́ mi GASA WAN Sɔ̧ a̧ tɔ̧ h’ɛ́nɛ́‘e, mi tɛ de ŋmaa in'nɛ̀ɛ́ wen zu fura nyina n’ɛnɛ tuia nɛ pɛ́r ha̧ o bíí kɔ‘m. Mi tɛ ŋman o nyina nɔ‘i yí-er'nɛ́‘i yinɛ, ɓɛɛ mi tɛ kpasi o wi n’ɛnɛ tui pɛ́r ha̧ wa'i.

²¹Mi tɛ a̧k o kalaafi nɔ‘i k’ɛ́nɛ́‘i a nu, ɓɛɛ mi tɛ kpasi dukbíí kɔ‘m er'nɛ́; wa beka duk ɗɔɔ o ŋgayamɔ k’ɛ́nɛ́ ɓɔna, ɓɛɛ ɛnɛ tɛ iŋ‘e, mi nɛ GASA WAN.

²²«Tɛ ndela k’ɛ́nɛ́, ɛnɛ dee ha̧ gɛ̧ɛ̧mɔ mɛ ba o wi-de-mɔ nɛ yuwar-a, ɓɛɛ kɔ‘m, mi kɔ̧ mɛ zik zu wa na. Ɛnɛ dee ha̧ tortɛ mɛ ba wi-ɗaŋ wen ha̧ wa mɛ duk tɛ yuwar ɗaŋ duka-a kɔ-wa siti hɔ tɛ fio.

²³Kinii, ɛnɛ beka ɔ zu nɛ tum ɓɔna; ɛnɛ beka tɔ̧ gee tum wen-ɔr-bíí ɓɔna mbɛt. Mi tɛ ɓar dukbíí kɔ‘m yinɛ er'nɛ́, ɓɛɛ ɛnɛ tɛ iŋ‘e, mi nɛ GASA WAN.»