Read Northwest Gbaya EZEKIƐL 16 Bible Online

EZEKIƐL 16 - Northwest Gbaya bible

EZEKIƐL 16

²«Mɛ́ bíí, mɛ̀ wé ɗoŋ o gasa ndiŋmɔ nɛ Jerusalɛm dea’ɛ lɛŋ ha̧ a̧.

³Mɛ̀ tɔ̧́‘e mɛ nɛ GASA WAN a̧ tɔ̧ wen’ɛ ha̧ Jerusalɛm: Nɛ̀ tugun-mɛ mɛ tɛnɛ wa koo mɛ sɛn nu Kanaŋ, dáà kɔ-mɛ nɛ be Amɔr, in naa kɔ-mɛ nɛ zɔŋa Hit.

⁴Ŋgimbi nɛ naa kɔ-mɛ koo nɛ mɛ pi̧ nu'i, wa gɔn kɔn-mɛ na, wa zui mɛ ha̧ tɛ-mɛ mɛ sa̧ na, wa sɔ̧ tɔŋ[11] tɛ-mɛ kà bó nɛ̀ baa mɛ pi̧ kɔ̧ kúfà[12] na mbɛt.

⁵Ŋma bíí nɛ dee ko ha̧ mɛ bo na, ŋma bíí mɛ de ko ha̧ mɛ ká bé dè ka ha̧a̧ o mɔɔ nɔ‘i ha̧ mɛ, bo na. Kɔ̧ɔ̧mɔ ko o bíí dɔk zu mɛ na; mɛ nɛ wen mɔ‘i a̧ dee ha̧ wa mɛ pi̧ mɛ zaŋbɛɛ wese nɛ wa koo nɛ mɛ‘i.

⁶«Ɓɛɛ tɛ ɓira-a kɔ‘m yak fara'i, mi zɔka bia-a nɛ mɛ bi ɛ̀nɛ̀-mɛ́ ɗɔɔ tɔk-bea, ɓɛɛ mi tɔ̧ ha̧ mɛ, koo nɛ oi tɔk-bea nɛ mɛ duk sɛnɛ‘i, mɛ beka fe na. Nɛ́ mi'i kpasa mɛ. Mi dee kana ha̧ mɛ mɛ duk kpasa.

⁷Nɛ mɔ'ɔ n'am dee ha̧ mɛ mɛ gasi hee de ɓɔɔ-zɔ̧ ga, ɓɛɛ mɛ gasi kusi kpa ŋgai de zɔŋa. Ber-mɛ hɔa, ɓɛɛ buma kɔ̧ ta-mɛ hɔ mbɛt; mɔ kpɔk, mɛ duka so nɛ sɔŋgɔɗɔ.

⁸«Mi ɓira yak katɛ mɛ woyo; ŋgimbi'i, mi zɔka nɛ̀ kɔ̧-ta-mɛ ku̧u̧ naŋ gbaa mɔ kaɗi, ɓɛɛ mi ba laa tɛ‘m pi̧ tɛ-mɛ kpe nɛ sɔŋgɔɗɔ kɔ-mɛ‘i. Mi ha̧a̧ nú ha̧ mɛ tɛ nɔɔ-tɔk in mɛɛ, ɓɛɛ hegɔ mɛ duk nɛ kɔ‘m. Nɛ mi GASA WAN Sɔ̧ a̧ tɔ̧ hegɔ.

⁹«Nɛ mɔ'ɔ n'am zuia mɛ, nyiŋ nɛ tɔk-bea tɛ-mɛ yinɛ, ɓɛɛ sɔ̧ nɔ̧́ nyama tɛ-mɛ.

¹⁰Mi pi̧i̧ de toka dap laa tɛ-mɛ, mi aa gba de ndárà naŋ-mɛ in de laa nɛ mɔɔ-hɛr-zaŋ, ɓɛɛ mi pi̧ gba-laa kpe nɛ zu a̧.

¹¹Mi aa mbɔi-tɛ tɛ-mɛ, a káná yi er-mɛ in pi̧ kísí ger-mɛ mbɛt.

¹²Mi pi̧i̧ mɔɔ-pi̧-zɔ̧ɔ̧ zɔ̧ɔ̧-mɛ, a o mɔɔ-a-zer zer-mɛ, ɓɛɛ mi hɛr gba de toka-kalaafi[13] ko ko-wan zu mɛ.

¹³O mɔɔ-ɗafi-tɛ-mɛ duk nɛ lɔr in bu-mbɔi, o laa mɛ tɛ-mɛ duka nɛ yɛm-yɛm-laa in gba de yɔɔ-laa nɛ‘i toka tok. Mɛ duka so nyɔŋ nɛ kam-gɔrɔ nɛ‘i gii nɛ fuu zaŋ ŋmaa in gɔrɔ ká bá nɛ nɔ̧́. Nɛ mɔ'ɔ nɛ mɛ ŋmaŋa de gba de zɔŋa gɛɗɛŋ hee boko-bem ko wannu ga.

¹⁴Nyɛrɛ déè kɔ-mɛ hu̧ra pɛsi dam mgbara o tugun bíí. Mɛ duka nɛ̀ gba de be bɔɗa-tɛ, wen nɛ mi'i dee ha̧ mɛ mɛ duk hegɔ. GASA WAN Sɔ̧ a̧ tɔ̧a̧ hegɔ.»

¹⁵«Ɓɛɛ nɛ mɔ'ɔ nɛ mɛ duka tɛ-mɛ nɛ déè kɔ-mɛ in hu̧ra nin-mɛ ɔ nɛnɛ in o bíí nɛ mbɔɗɔnu; kintɛ-mɛ lɛŋ duka sitɛ dàlà, ɓɛɛ mɛ ha̧ tɛ-mɛ ha̧ bíí nɛ ɓir lɛŋ.

¹⁶Mɛ kaia o dap laa kɔ-mɛ, pɛrti-a nɛtɛ nɛtɛ‘i ɗafi nɛ o kusa fara wen dee mɔɔ-búù kɔ-mɛ sɛnɛ; mɔ‘i tɛ de nɛti na, pɛrti mɔ hegɔ beka de woyo ɓɔna mbɛt.

¹⁷Mɛ kaia o lɔr in bu-mbɔi n'am ha̧a̧ mɛ‘i dui nɛ ŋma mɔ nɛ hɔɔ ŋmaa in wiwii; ɓɛɛ nɛ́ a̧‘i a̧ mɛ duk tɛ dee dàlà in a̧.

¹⁸Mɛ kaia o gba de toka laa n'am ha̧a̧ ha̧ mɛ pi̧ tɛ-a, in de nɔ̧́ ká bá nɛ̀ gba de pɛr nyama n'am ha̧a̧ mɛ‘i, a̧ mɛ kai ɗafi wor nɛ a̧.

¹⁹Mi ha̧a̧ gba de fuu, nɔ̧́ in gɔrɔ ha̧ mɛ nɛ nyɔŋmɔ kɔ-mɛ, ɓɛɛ nɛ mɔ'ɔ nɛ mɛ kaia o mɔɔ nɔ‘i dɔ ɗafi nɛ géé-sɔ̧ wen kpaa ga̧a̧mɔ. Nɛ zu mɔ‘i a̧ GASA WAN Sɔ̧ tɔ̧ wen sɛnɛ.

²⁰«Mɛ kaia o bem mɛ be-wiwii in be-okoo nɛ mɛ koa ha̧‘m gbɛ ɗafi nɛ géé-sɔ̧. Deemɔ nɛ̀ mbɔɗɔnu[14] kɔ-mɛ‘i nyɛm mɛ na, sa mɛ tɛ kai o bem kɔ-mɛ gbɛ a zu-a nde?

²¹Mɛ gbɛɛ o bem kɔ‘m, ɓɛɛ mɛ kai dɔ gasi nɛ o géé-sɔ̧.

²²Ŋgimbi deemɔ kɔ-mɛ nɛ mbɔɗɔnu fɛŋ nɛ tɛ-mɛ‘i, tɛ-mɛ bìí ɗoŋ ŋgimbi duka-a kɔ-mɛ nɛ zɔɗi bi nɛnɛ ɗɔɔ tɔk-bea.»

²³Ɓɛɛ sa GASA WAN Sɔ̧ tɔ̧‘e: «Fom a̧ ba mɛ nyɛm nɛ ɗoŋ ɗaŋ kɔ-mɛ.

²⁴Mɛ dee o tua-gasi o géé-sɔ̧ dam ká̧ yuwar, de nɛ o faɓa mɔ kɔ-mɛ nɛnɛ.

²⁵Mɛ dee o taŋgaɗa dam ká̧ sasa-war lɛŋ de nɛ o gba de fara, ɓɛɛ mɛ fɛŋ tɛ-mɛ zu déè kɔ-mɛ‘i de nɛ mɔɔ-búù in o wi-ɓir-war nɛ mbɔɗɔnu nɛnɛ.

²⁶Mɛ ɔɔ in o be Egiptɛ, o ŋga-tɛ-wi; hegɔ mɛ tu̧u̧ see-am tɛ dee dàlà kɔ-mɛ nɛ dɔka-a'i.

²⁷«Kinii, mi dee ŋmaa in mɛɛ, mi kaia o mɔ n'am ha̧a̧ so ha̧ mɛ yinɛ er-mɛ, ɓɛɛ mi e mɛ er o boko be Filistii, o wi-ari kɔ-mɛ nɛ foe de kɔ‘i nɛ wa wen deemɔ kɔ-mɛ‘i.

²⁸«Mɛ ɔɔ in o be Asirii, wen kɔ-mɛ, bó nɛ́ mɔ sur yí-mɛ́ sur na. Mɛ ɔɔ in wa nɛnɛ hegɔɔ ɓɛɛ wɔ tɛ-wa busi tɛ-mɛ na mbɛt.

²⁹Ɓɛɛ nɛ mɔ'ɔ nɛ mɛ dee dàlà in o be Babilɔŋ tɛ nu ko o wan-ɗɔr-mɔ; zu mɔ‘i lɛŋ, wɔ tɛ-wa busi tɛ-mɛ na.»

³⁰Mɛ nɛ hegɔ ɓɛɛ sa GASA WAN tɔ̧‘e: «See-mɛ nik na! Mɔ nɛ mɛ dea lɛŋ duk nɛ deemɔ ko ɗaŋ okoo.

³¹Mɛ dee o taŋgaɗa dam ká̧ sasa-war lɛŋ, de nɛ o gba de fara wen dee dàlà kɔ-mɛ sɛnɛ, ɓɛɛ mɛ de o mɔɔ nɔ‘i wen kpaa mbɔi hee o ŋma dɔka okoo-de-mɔ nɛ mbɔɗɔnu de ga na.

³²Mɛ hɔɔ ŋmaa in ŋma okoo nɛ e wíì kɔ‘i duk, ɓɛɛ sii ɗoŋ ŋma gɔni wiwii.

³³Okoo-de-mɔ nɛ mbɔɗɔnu kii kɔ‘i nɛ mbɔi er o wiwii nɛnɛ, ɓɛɛ kɔ-mɛ, mi zɔka nɛ́ mɛ́ a̧ gɔn gɔna zu o wiwii nɛ ha̧a̧mɔ ha̧ wa gɔn nɛ ɗoŋ wa, wen ɔa-a in mɛɛ.

³⁴Mɛ́ hɔ́ ŋmaa in okoo-de-mɔ nɛ mbɔɗɔnu na, wen bo nɛ o bíí si ɗoŋ mɛ wen ha̧a̧ mɔ ha̧ mɛ na, ɓɛɛ nɛ mɛ'ɛ ha̧ ha̧a̧ mɔ ha̧ o bíí ɛ̧.»

³⁵Hegɔ, kó-dàlà'ɛ, mɛ zii wen nɛ GASA WAN tɔ̧ ha̧ mɛ'ɛ.

³⁶Mɔ nɛ GASA WAN Sɔ̧ tɔ̧ ha̧ mɛ nɛ mɔ'ɔ: «Mɛ ɗaŋa tɛ-mɛ, ɓɛɛ tɛ dee dàlà kɔ-mɛ‘i, mɛ ee ha̧ o gɔni wiwii mɛ zɔk zim tɛ-mɛ. Mɛ dee ɗaŋmɔ tɛ gasa o géé-sɔ̧, ká bá nɛ̀ o bem kɔ-mɛ nɛ mɛ gbɛɛ ɗafi nɛ wa mbɛt'i.

³⁷Wen zu mɔ‘i nɛ mɛ dea'i, mi tɛ mɔi̧ o wiwii nɔ‘i lɛŋ, o wan nɛ mɛ kɔ̧a̧ in o wan nɛ mɛ kɔ̧ na mbɛt; wa tɛ ya zik mɛ e see-a, ɓɛɛ mi tɛ kpɔ̧i̧ laa tɛ-mɛ yinɛ, e mɛ nɛ sɔŋgɔɗɔ sɛn ti wa.

³⁸Mi tɛ gɔn kita-dàlà in gbɛɛ-zu, zu mɛ. Ɓɛɛ ŋga nyimsea-gɔya kɔ‘m tɛ gusi mɛ gbɛ nɛ fio.

³⁹Mi tɛ pi̧ mɛ er o wi nɔ‘i, wa tɛ gbin o taŋgaɗa in o gba de fara kɔ-mɛ‘i, ɓɛɛ wa tɛ kpɔ̧i̧ o laa tɛ-mɛ gu nɛ o mbɔi-tɛ tɛ-mɛ yinɛ e mɛ nɛ sɔŋgɔɗɔ.

⁴⁰«Wa tɛ a wen ha̧ gba giiwi mɛ tik zu mɛ, yo mɛ nɛ ta, ɓɛɛ wa tɛ ɓir kpoo tɛ-mɛ a nu sɛ́kɛ́ɗɛ́-sɛ́kɛ́ɗɛ́ nɛ gba-paa.

⁴¹Wa tɛ dɔ o tua kɔ-mɛ bíí wee a nu gbuɗuk. Mi tɛ de mɔ‘i nɛ yi gba gii okoo, wen ha̧ wa mɛ zɔk bɔnɛ nɛ tika zu mɛ. Ɓɛɛ mi tɛ gɔn ndaa-mɛ tɛ dee fɛŋa-mɔ kɔ-mɛ, ha̧ mɛ ndoti tɛ ha̧a̧mɔ gɔn nɛ ɗoŋ o wiwii.

⁴²Mi tɛ de mɔ ba nú mɛ́ ha̧ see-am mɛ ga̧ zu mɛ, ɓɛɛ mi beka de gɔya mɛ ɓɔna; see-am beka kur zu mɛ ɓɔna mbɛt.

⁴³Wen tɛ-mɛ bìí ɗoŋ mɔ n'am dee ha̧ mɛ ŋgimbi nɛ mɛ ɓɔna so nɛ geɗek bem, ɓɛɛ nɛ mɔ'ɔ nɛ mɛ tɛ̀ɛ̀ ɗáŋ see-am zu o mɔɔ nɔ‘i lɛŋ. O deemɔ kɔ-mɛ tɛ si ɗoŋ zu mɛ, ha̧ mɛ mɛ ndoti tɛ deemɔ kɔ-mɛ nɛ de na. Mi GASA WAN Sɔ̧ tɔ̧ɔ̧ hegɔ. Sɛn zu o dɔka ɗaŋmɔ nɛ mɛ dea'i, bo nɛ mɛ dee ndiŋmɔ gan zu wa woyo na nde?»

⁴⁴«O wi-tɔ̧-tua-wen tɛ tɔ̧ wen zu mɛ‘e nde: ‹Be bore hɔ nɛ nana bore!›

⁴⁵Nɛ mbetɛ, mɛ́ nɛ́ mgbák boko-bem ko naa kɔ-mɛ nɛ baa sɛn so wii gu nɛ o bem kɔ‘i mbɛt'i. Mɛ́ yák ŋmaa in o dàà kɔ-mɛ nɛ baa sɛn so o wíì in o bem kɔ-wa’ɛ na. Nàà k’ɛ́nɛ́ duka so nɛ zɔŋa Hit in dáà k’ɛ́nɛ́ so nɛ be-ŋgai Amɔr.

⁴⁶«Dàà kɔ-mɛ nɛ́ Samarii nɛ duk so kɔ‘i katɛ mɛ nɛ war gale in o boko-bem kɔ‘i.[15] Be geɗek boko-nya-mɛ so nɛ Sɔdɔm nɛ duk so kɔ‘i nɛ war wii-er-mɛ in o boko-bem kɔ‘i.

⁴⁷Bo nɛ mɛ zɔka nɛ ɗoŋ deemɔ kɔ-wa de nɛ kɔ-mɛ ɓɛɛ na, bo nɛ tɛ dee kale ndiŋmɔ nɛ wa dea'i a̧ mɛ zɔka ɗoŋ-aa de nɛ kɔ-mɛ na mbɛt, ɓɛɛ nɛ́ deemɔ kɔ-mɛ a̧ ɗaŋa gan kɔ-wa tɛ mɔ nɛ mɛ dee lɛŋ.»

⁴⁸GASA WAN tɔ̧a̧: «Hee mɔ'ɔ n'am duk kpasa’ɛ ga, dàà kɔ-mɛ Sɔdɔm in o boko-bem kɔ‘i de pɛrti ndiŋmɔ nɛ mɛ dea in o boko-bem kɔ-mɛ'ɛ na.

⁴⁹Ɗaŋmɔ nɛ dàà kɔ-mɛ Sɔdɔm dea nɛ mɔ'ɔ. A̧ duka tɛ-a zu nyɔŋmɔ nɛ ɓan so wa na; wa yaa tɛ ga̧a̧ fara nɛ de-a in o boko-bem kɔ̧-a̧, ɓɛɛ er-a nɛ pír sitɛ o wi-kɔsa in o wisan wen gbaka wa na.

⁵⁰Mɛ nɛ tɛ gasa zu in dee ndiŋmɔ yí‘m, a̧ dee ha̧‘m mɛ pɛsi wa sót-sót hee mɛ zɔka ga.

⁵¹«Ɓɛɛ nɛ̀ ko Samarii, a̧ de ɗaŋmɔ hee mɛ dea ga na. Ndiŋmɔ kɔ-mɛ yaka zale; ka'i zɔk war o ndiŋmɔ nɛ mɛ dea’ɛ, ɓɛɛ duk hee deemɔ kɔ-wa duk nɛ yuwar-a ga.

⁵²Mɛ nɛ hegɔ, ziimɔ kɔ-mɛ a̧ si ɗoŋ zu mɛ! O ɗaŋmɔ kɔ-mɛ nɛ gana kɔ-wa'i dee ha̧ o boko-nya-mɛ mɛ duk hee o de bíí ga, duk hee wa nɛ o wi-de-mɔ nɛ yuwar-a ga. Kóó mɛ baa so wen-ɗaŋmɔ zu o boko-nya-mɛ yinɛ mbɛt, ziimɔ tɛ tik kana zu mɛ, búù a̧ ba mɛ!

⁵³«Mi tɛ ba wa e ŋgɔn, mi tɛ ba Sɔdɔm in o boko-bem kɔ‘i e ŋgɔn; mi tɛ ba Samarii in o boko-bem kɔ‘i e ŋgɔn, ɓɛɛ mi baa mɛ in o boko-bem kɔ-mɛ e ŋgɔn woyo mbɛt,

⁵⁴wen ha̧ ziimɔ mɛ ba mɛ, ɓɛɛ ha̧ foe de mɛ sɛn yí-wa zu o mɔ nɛ mɛ dea'i, wen ha̧ see-wa mɛ ga̧ zu mɛ.

⁵⁵O boko-nya-mɛ Sɔdɔm in Samarii ká bá nɛ̀ o boko-bem kɔ-wa tɛ duk nɛ̀ de-a hee kuti duka-a kɔ-wa nɛti ga, ɓɛɛ ɛnɛ in o boko-bem k’ɛ́nɛ́ tɛ duk nɛ de-a hee mɔ'ɔ n’ɛnɛ yaa so nɛti ga mbɛt.

⁵⁶Ŋgimbi duka-tɛ kɔ-mɛ nɛ mɔ ɓan so nɛ̀ mɛ na, mɛ baa zɛkɛɗi so boko-nya-mɛ Sɔdɔm,

⁵⁷nɛti nɛ‘i tɛ iŋ so ndaa ɗaŋ kɔ-mɛ hɔ̧ɔ̧ na; ɓɛɛ kinii mɛ kifa nɛ mɔɔ-zɛkɛɗi ko o boko be Edɔm in Filistii nɛnɛ. Nɛ́ o boko-bem nɛ ya zik mɛ a̧ tɛ sɛn mɛ.

⁵⁸Hegɔ GASA WAN tɔ̧a̧, ɗaŋ deemɔ kɔ-mɛ nɛ mbɔɗɔnu in mɔɔ-foe kɔ-mɛ tɛ duk zu mɛ.

⁵⁹«Ɓɛɛ nɛ mɔ'ɔ nɛ GASA WAN tɔ̧a̧: Mi tɛ de mɔ in mɛɛ nyɛm nɛ ɗoŋ deemɔ kɔ-mɛ, wen mɛ ee ha̧a̧nú kɔ-mɛ tɛ geemɔ, ɓɛɛ mɛ ɗaŋ yuwar nɔɔ-tɔk k’ɛɛ in mɛɛ.

⁶⁰Tɛ‘m tɛ mbaŋ ɗoŋ nɔɔ-tɔk k’ɛɛ in mɛɛ tɛ ŋgimbi zɔŋa, ɓɛɛ hegɔ, mi tɛ nɔ mbe tɔk in mɛɛ nɛ tɛ duk hegɔ kpoo nɛ kpoo.

⁶¹Ɓɛɛ war kɔ-mɛ mbɛt, tɛ-mɛ tɛ mbaŋ ɗoŋ ɗaŋ yuwar deemɔ kɔ-mɛ mɛ ti, ɓɛɛ foe tɛ de mɛ ŋgimbi n'am be tɛ̀ɛ́ fo dàà in boko-nya-mɛ geɗek-a si ɗoŋ tɛ-mɛ. Wa tɛ ya hee o boko-bem kɔ-mɛ ga; mɔ kpɔk, wa bo zaŋ nɔɔ-tɔk k’ɛɛ in mɛɛ na.

⁶²Mi tɛ nɔ mbe tɔk in mɛɛ woyo, ɓɛɛ mɛ tɛ iŋ‘e, mi nɛ GASA WAN.

⁶³Ka'm e o ɗaŋ deemɔ kɔ-mɛ ha̧ mɛ, tɛ-mɛ tɛ mbaŋ ɗoŋ o mɔɔ nɔ‘i, ɓɛɛ foe tɛ de ha̧ nú-mɛ mɛ kpe. Mi GASA WAN Sɔ̧ tɔ̧ɔ̧ hegɔ.»