Read Northwest Gbaya EZEKIƐL 17 Bible Online

EZEKIƐL 17 - Northwest Gbaya bible

EZEKIƐL 17

¹GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ tua-wen’ɛ ha̧ o be Israɛl.

³Mɛ̀ tɔ̧́ ha̧ wa'e nɛ mi GASA WAN Sɔ̧ a̧ tɔ̧ wen’ɛ ha̧ wa: Ŋma zɔm gasa zua duka so. Zɔm ɓaa-a in zɔm buma tɛ-a duk nɛ zi̧a̧-a̧ ulɛ-ulɛ, nɛ dap-aa laɓo-la-laɓo, ɓɛɛ nɛ mɔ'ɔ n'aa bu̧i̧a nɛ́ɛ̀ gu see zu kaya Libaŋ mɛ, ɓɛɛ gbin ndɔŋ nu wii-see gbatui

⁴yák nɛ́ɛ̀ e zaŋ nù ko o wan-ɗɔr-mɔ, sɛn tɛ gasa ye kɔ-wa.

⁵Nɛ mɔ'ɔ n'aa baa ŋma kpar-mɔ nu Israɛl nɛ́ɛ̀ gun tɛ gba de mɔka-nu ká̧ yì mɛ, ha̧ kpar-mɔ‘i mɛ hɔ gasi hee ŋma te[16] ga.

⁶Nɛ mɔ'ɔ nɛ kpar-mɔ‘i mbaŋa ɓɛɛ ɓɔ yaknɛ; kunin-a yee nu, ɓɛɛ nɛ́ɛ̀ hɔ fara-duk ko zua mɛ. Duka nɛ ŋma nyak-dɔ̧ɔ̧ nɛ gbaa-er-a duk ɓɔ nɛnɛ ɓɔnsɛnɛ.

⁷«Ŋma zua nɛ zɔm ɓaa nɛ buma-a yee ŋmaa síp-síp a̧a̧ so sɛnɛ, nɛ mɔ'ɔ nɛ nyak-dɔ̧ɔ̧‘i aa nin, ɓɛɛ o gbaa-er-a bɔ̧i̧ yu hɔ tɛ zu-a'i, ha̧ a̧ mɛ a yi gun-aa, wen n'aa kɔ̧a̧ mɛ kpa dɔka yi gun-aa gan kuti-a.

⁸Wa guna so kpar-mɔ‘i tɛ gba de mɔka-nu ká̧ yi, wen ha̧ yi mɛ a gun-aa, ha̧ a̧ mɛ duk nɛ gba de nyak-dɔ̧ɔ̧, mɛ ɓɔ wai nɛnɛ nɛ dɔka-a.

⁹«Hegɔ, mi GASA WAN Sɔ̧ ak'nɛ́‘e nde, nyak-dɔ̧ɔ̧‘i tɛ gasi hɔ ti nde? Kuti zúá beka tɛ́ɛ̀ zuɗ‘a pi̧ nu, ɗaŋ o waya-a ha̧ o gbaa-er-a mɛ kor na nde? Bo nɛ a̧ tɛ́ tɛ̀ mɛ tɛ̀ɛ́ zuɗ‘a yinɛ mbɛt na nde?

¹⁰Nyak-dɔ̧ɔ̧ nɛ‘i guna so nɛ de-a'i tɛ gasi hɔ ti ɓɔ nde? Ŋga búk mɛ daŋa-wese beka zuɗi nyak-dɔ̧ɔ̧‘i pi̧ nu mɛ kor na nde? A̧ tɛ kor gu nɛ o kunin-a lɛŋ ɓɔn kpɔk fara'i.»

¹¹Ɓɛɛ GASA WAN tɔ̧ ha̧‘m:

¹²«Mɛ̀ ák o yaa-ŋgazu nɔ'ɔ‘e nde, wa iŋ gba̧a̧ tua-wen’ɛ na nde? Mɛ̀ tɔ̧́ ha̧ wa'e nde, wannu Babilɔŋ tɛ̀ɛ́ Jerusalɛm, ɓɛɛ nɛ mɔ'ɔ n'aa baa wannu ká bá nɛ̀ o be-wan yaknɛ si saaye kɔ̧-a̧ mɛ.

¹³A̧ baa ŋma be-wan, nɔ tɔk in a̧, ɓɛɛ ir a̧ mɛ kan mɔ‘e, wi tɛ mbo zu ha̧ a̧, ɓɛɛ nɛ mɔ'ɔ n'aa kaia gasawi yaknɛ lɛŋ,

¹⁴wen ha̧ mɔɔ-wan kɔ-wa mɛ ziɓi, nɛ̀ o wi nɔ‘i beka ba zu nɛ ŋgɔn na, ɓɛɛ ha̧ wa mɛ iŋ‘e, nɔɔ-tɔk kɔ-wa in o ŋmaa'i tɛ yor nɛ de-a.

¹⁵Nɛ ɗoŋ, wannu Juda tɛ̀ɛ̀ bá zu nɛ ŋgɔn, ɓɛɛ tom o betom sitɛ wannu Egiptɛ‘e, a̧ a̧ tom o ŋga nyaŋa in o wi-biro nɛ dɔka-a tɛnɛ ha'i. Ɓɛɛ mɔ‘i n'aa dee hegɔ‘i tɛ hɔ ti nde? Mɔ tɛ hɔ yɔɔ zu-a nde? Kà a̧ nɛ ɗaŋa yuwar nɔɔ-tɔk kɔ-wa in o ŋmaa kaɗi, ɓɛɛ a̧ kpasa ɓɔ nde?

¹⁶«Mi GASA WAN Sɔ̧ kana mɔ nɛ tɛ‘m'e, hee mɔ'ɔ n'am duk kpasa ga, mi'e wannu tɛ fe sɛn bee-gara Babilɔŋ, wen a̧ yaka zu kanamɔ in nɔɔ-tɔk n'aa nɔɔ so in wannu Babilɔŋ, wi nɛ dee wan ha̧ a̧‘i.

¹⁷Wannu Egiptɛ nɛ oi gasa mɔɔ-biro in o gba gii wi-biro kɔ‘i beka kpasi wannu Juda na, wen o wi Babilɔŋ tɛ tɛ̀ɛ́ za̧ kɔ̧ in mbo fara-daŋ-nɛnɛ zik wa mɛ kum wa.

¹⁸A̧ yaka zu kanamɔ n'aa kana so in tɔk n'aa nɔɔ so, ha̧ nɛ er ha̧ ŋmaa'i; tɛ deemɔ n'aa dee hegɔ‘i, a̧ beka kpasi na.»

¹⁹Mɛ nɛ wen mɔ‘i, sa GASA WAN Sɔ̧ tɔ̧‘e nde: «Mi kan mɔ nɛ tɛ‘m'e, hee mɔ'ɔ n'am duk kpasa ga, kanamɔ in nɔɔ-tɔk kɔ‘m n'aa ee tɛ geemɔ‘i, mi tɛ de ha̧ o mɔɔ nɔ‘i lɛŋ mɛ tik zu a̧.

²⁰Mi tɛ yai yɔk kɔ‘m pi̧ zu a̧ mɛ ba a̧, mi tɛ gbur a̧ nɛ nu si Babilɔŋ, ɓɛɛ mi tɛ usi bɔnɛ ha̧ a̧ wen kanamɔ-ndela n'aa kana ti'm'i.

²¹O yaa-ŋgo-biro kɔ̧-a̧ tɛ kum nu gba-paa, ɓɛɛ mi tɛ pɛsi oi ndaa o bíí nɛ tɛ pɛsi dam ti-zan fara lɛŋ. Hegɔ ɛnɛ tɛ iŋ‘e, wen kɔ‘m GASA WAN tik nu gee na.»

²²GASA WAN Sɔ̧ tɔ̧a̧: «Mi tɛ gbin ndɔŋ-nu wii-see gbatui, ɓɛɛ mi nɛ tɛ‘m tɛ nɛ̀ɛ́ gun a̧ sɛn zu kaya mɛ.

²³Mɛ nɛ zu kusa kaya ko o be Israɛl; a̧ tɛ gasi mɛ gba er wai nɛnɛ, ɓɛɛ a̧ tɛ duk nɛ́ gba de gbatui. Ɓɛɛ o nɔ̧́í̧ nɛtɛ nɛtɛ tɛ mɔi̧ ɔ tɛ o gbaa er-a.

²⁴O te zaŋbɛɛ lɛŋ tɛ iŋ‘e, mi nɛ GASA WAN; nɛ́ mi a̧ de ha̧ te wan nɛ yor nɛ̀ ŋgɔn mɛ yu nɛ mbɔɗɔnu, ɓɛɛ wan nɛ yu nɛ mbɔɗɔnu kura yor zeeŋ; nɛ́ mi a̧ de ha̧ tɔr te mɛ kor, ɓɛɛ mi dee ha̧ o kora te mɛ ɓɔ mbɛt. Mi GASA WAN a̧ tɔ̧ wen’ɛ; mɔ n'am tɔ̧, nɛ́ mɔ‘i a̧‘m tɛ de.»