Read Northwest Gbaya EZEKIƐL 2 Bible Online

EZEKIƐL 2 - Northwest Gbaya bible

EZEKIƐL 2

¹A̧ tɔ̧ɔ̧ ha̧‘m: «Mɛ́ bíí,[3] mɛ̀ kúr mɛ̀ yór ŋgɔn ai; mi a̧a̧ nɛ ŋma wen mɛ tɔ̧ ha̧ mɛ.»

²Ɓɛɛ tɛ ŋgimbi n'aa tɔ̧ nɛ wen ha̧‘m'i, a̧ ɔmi ko Sɔ̧ yee nɛ tɛ‘m ɓɛɛ ba'm e ŋgɔn, ɓɛɛ mi zii gba̧a̧ wen nɛ wi’ɛi tɔ̧ ha̧‘m.

³A̧ tɔ̧a̧: «Mɛ́ bíí, mi tom mɛ sitɛ o be Israɛl, o yaa-ŋga-zu nɔ‘i nɛ mbo zu ha̧‘m na'i. Wa kaɗi dee ŋgazu in am na, hee mɔ'ɔ nɛ o zɔmdáa kɔ-wa duka so de ga.

⁴O wi nɔ‘i nɛ o wi-ŋgazu in o wi-ŋga-see. Mi tom mɛ sitɛ wa, mɛ tɔ̧ ha̧ wa'e nde: ‹Mɔ nɛ GASA WAN Sɔ̧ tɔ̧ ha̧ wa nɛ mɔ'ɔ.›

⁵Kóó wa a̧ zii wen nú-mɛ, kóó wa a̧ zii wen nú-mɛ na, wen wa nɛ o wi-ŋgazu, wa tɛ iŋ‘e, ŋma wi-tɔ̧-wen oi nú‘m a̧a̧ mgbara wa.

⁶«Ɓɛɛ kɔ-mɛ Ezekiɛl, ká kíì wa de mɛ na, ká kíì ŋga wen kɔ-wa de mɛ na mbɛt. Wa tɛ yo wen e nú-mɛ. Tɛ duk hee mɛ duk mgbara o tɛn-dara in o tore ga; mɔ kpɔk, ká wen mɛ́ nú o wi-ŋgazu nɔ‘i in gbaayí-wa pi̧ kíì tɛ-mɛ na.

⁷Mɛ̀ wé ɗoŋ mɔ n'am tɔ̧ ha̧ mɛ'ɛ ha̧ wa; kóó wa a̧ zii, kóó wa a̧ zii na, oi ŋgazu kɔ-wa so a̧‘i̧.

⁸«Kɔ-mɛ bíí'ɛ, ká mɛ de ŋgazu hee o wi nɔ‘i ga na; mɛ̀ zíí mɔ n'am tɔ̧ ha̧ mɛ'ɛ; mɛ hú̧í̧ nú-mɛ mɛ nyɔŋ mɔ n'am tɛ ha̧ ha̧ mɛ.»

⁹Ɓɛɛ kà‘m tɔ̧‘e ha̧‘m zɔk mɔ wó, er bíí nɛ mɔ'ɔ nɛ nyɛi̧ kara kalata tɛnɛ pii tɛ‘m’ɛ.

¹⁰Ɓɛɛ er'i bur kara kalata'i e ti'm. Wa yɔra mɔ sɛn zaŋ-aa nɛ kɔ̧ a̧ in ɗoŋ-aa nɛ zan mbɛt. O gba̧a̧ wen nɛ yɔra zaŋ-aa nɛ aia-nú, gɔfamɔ in o hiɗimɔ.