Read Northwest Gbaya EZEKIƐL 24 Bible Online

EZEKIƐL 24 - Northwest Gbaya bible

EZEKIƐL 24

¹Tɛ mɔɔrɔ-ɗoŋ-naar pɛ, tɛ ɓu fio-zɛ, tɛ ɓu ɔɔ zɛ, GASA WAN tɔ̧ɔ̧ wen ha̧‘m hee mɔ'ɔ ga:

²«Mɛ́ bíí, mɛ̀ yɔ́r wese sɔsɔɔ'ɛ, wen mɛ nɛ sɔsɔɔ'ɛ a̧ wannu Babilɔŋ ku̧u̧ nɛ naŋ tika Jerusalɛm nɛ biro.

³Mɛ̀ tɔ̧́ tua-wen’ɛ ha̧ o yaa-ŋgazu nɔ'ɔ, mɛ tɔ̧ ha̧ wa'e nde, mɛ nɛ mi GASA WAN a̧ tɔ̧ɔ̧ wen’ɛ: Mɛ̀ é kpánà tɛ wee, ɓɛɛ mɛ̀ á yì kɔ̧ kpánà‘i.

⁴Mɛ̀ ɓír mur kpoo a kɔ̧ a̧, ku saɗi gu nɛ ɓaa-a lɛŋ, ɓɛɛ mɛ gɔm gba de gba̧a̧ a zu a̧.

⁵Saɗi'i a̧ duk nɛ de ŋmaŋa sami, ɓɛɛ ɛ̀nɛ̀ á gua ɗɔɔ-aa nɛ dɔka-a, ha̧ a̧ mɛ nɔ̧́í̧ nɛ kpasa-a wen ha̧ kpoo'i mɛ mɔk yɛɗɛ-yɛɗɛ, gu nɛ o gba̧a̧-a̧ lɛŋ.

⁶Ɓɛɛ mɔ nɛ mi GASA WAN tɔ̧ nɛ mɔ'ɔ: Bɔnɛ tɛ tik zu ye-gbɛ-zu’ɛ, nɛ hɔɔ ŋmaa in kpánà nɛ gbɛɛ dua, ba ŋgake nɛ‘i nyɛm mɛ fɔr ɓɛɛ ká sa̧a̧ ɓɔna ga’ɛ! Ɛ̀nɛ̀ dɔ́r ɓira kpoo kɔ̧-a̧ kpɔk kpɔk yinɛ lɛŋ; zɔka tani beka kpasi ye'i na.

⁷Tɔk-tɛ o bíí n'aa gbɛɛ so ɓɔna mgbara wa; wa aa tɔk'i zu yɔɔ-go, wa gbaia tɔk'i a bɛɛ-nu, wa a fuunu zu-a na mbɛt.

⁸Mi ee tɔk'i ɓɔn zu go'i, kà‘m be zɔk, ɓɛɛ kà see-am nyima ha̧‘m mɛ kifi er ha̧ wa.

⁹Mɛ nɛ wen mɔ‘i a̧ GASA WAN tɔ̧ɔ̧ nɛnɛ‘e nde: Bɔnɛ tɛ tik zu ye-gbɛ-zu’ɛ. Mi mbɛt tɛ ye gasa wee ɗɔɔ-aa.

¹⁰Ɛ̀nɛ̀ mɔ́í̧ gua, ɛ̀nɛ̀ yé wee, ɛ̀nɛ̀ é kpoo tɛ wee, ɓɛɛ ɛ̀nɛ̀ á o mɔɔ-gi-kpoo sɛnɛ ha̧ a̧ mɔk nɛ de-a, ha̧ gba̧a̧-a̧ sɔti mbɛt.

¹¹Mɛ̀ é gee kpánà zu kɛ̧i̧-wee ha̧ kpánà‘i ba wee gbɛ̧, ha̧ ŋgake kɔ̧ a̧ mɛ bìì wee or a nu, in ha̧ kpánà‘i mɛ sa̧ woyo.

¹²«Kóó mɛ dee so o mɔɔ nɔ‘i lɛŋ, ŋgake beka or a nu ɓɛɛ ka kpánà‘i sa̧a̧ na.

¹³Mi kɔ̧ɔ̧ mɛ ga̧ tɛ-mɛ oi simbo ndiŋmɔ kɔ-mɛ, ɓɛɛ mɛ kɔ̧ ha'i mɛ ga̧ tɛ-mɛ na. Wi beka ga̧ tɛ-mɛ ɓɔna hɔ ŋgimbi nɛ nyimsea kɔ‘m tɛ tik zu mɛ.

¹⁴Mi, GASA WAN a̧ tɔ̧ wen’ɛ, ɓɛɛ mɔ n'am tɔ̧a̧ beka tik nu gee na. Kinii, mi tɛ de ŋmaa in mɛɛ nɛ ko beka bo yí‘m ɓɔna. Mi beka e mɛ gee na, mi tɛ de mɔ in mɛɛ nyɛm nɛ ɗoŋ deemɔ kɔ-mɛ; GASA WAN tɔ̧ɔ̧ hegɔ.»

¹⁵Nɛ mɔ'ɔ nɛ GASA WAN tɔ̧ɔ̧ ha̧‘m'e:

¹⁶«Mɛ́ bíí, mi tɛ ba yaa-dua-see-mɛ yinɛ katɛ mɛ hee gɔma yi ga, ɓɛɛ ká mɛ́ ai nú de nɛ tɛ-mɛ nɛ kɔsa na, ká mɛ hi̧i̧ kɔ̧a̧ na mbɛt.

¹⁷Mɛ̀ gɔ́fí mɔ nɛ oi nú, ká mɛ́ zim mɔ na; mɛ̀ hɛ́r mɛtɛwol zu mɛ, mɛ̀ á ndárà naŋ-mɛ; ká mɛ e ha̧ zera mɛ da̧ nu mɛ na, ɓɛɛ ká mɛ nyɔŋ kam-fio na.»

¹⁸Mi tɔ̧ɔ̧ wen ha̧ dukbíí nɛ tuyɛ; kà mɔ tɛ ga̧, ɓɛɛ kóò kɔ‘m tik nu fe. Mɔ sa̧a̧, ɓɛɛ mi de mɔ nɛ GASA WAN tɔ̧ɔ̧ so ha̧‘m'i.

¹⁹Ɓɛɛ nɛ mɔ'ɔ nɛ o bíí tɔ̧ɔ̧ ha̧‘m: «Mɛ beka we ɗoŋ gba̧a̧-mɔ nɛ mɛ de’ɛ h’ɛ́ɛ́ na?»

²⁰Ɓɛɛ mi kifi nú ha̧ wa: «Mɔ nɛ GASA WAN tɔ̧ɔ̧ ha̧‘m mɛ tɔ̧ h’ɛ́nɛ́ nɛ mɔ'ɔ:

²¹Ɛnɛ o be Israɛl, mi tɔ̧ h’ɛ́nɛ́‘e nde, mi tɛ fɛŋ Tua kɔ‘m, mɔɔ-ŋmaŋ-tɛ k’ɛ́nɛ́, nɛ duk nɛ fara-tortɛ in fara-de-ɓɔlɔ k’ɛ́nɛ́, ɓɛɛ o bem k’ɛ́nɛ́ nɛ ɓɔna Jerusalɛm mɛ tɛ kum nu gba-paa.

²²Wen zu mɔ‘i, ɓɛɛ ɛnɛ tɛ de kalemɔ n'am dea; ɛnɛ beka e zera da̧ nú‘nɛ́ na, ɛnɛ beka nyɔŋ kam-fio na mbɛt.

²³Ɛnɛ tɛ e mɛtɛwol ɓɔn zu'nɛ́ in ndárà naŋ‘nɛ́, ɛnɛ beka de ko nɛ tɛ‘nɛ́ na, ɛnɛ beka hi̧i̧ kɔ̧a̧ fio na mbɛt. Ɛnɛ tɛ ziɓi nɛ oi gun, wen ɗaŋmɔ k’ɛ́nɛ́, ɓɛɛ ɛnɛ tɛ de kɔsa nɛ tɛ‘nɛ́ in o ŋmaa.

²⁴Mɔ nɛ Ezekiɛl dea nɛ́ mɔɔ-usi-mɔ h’ɛ́nɛ́; kana nɛ mɔ n'aa dea'i, ɛ̀nɛ̀ tɛ de kana mbɛt. Ŋgimbi nɛ mɔ‘i be tɛ̀ɛ́ hɔ, ɓɛɛ ɛ́nɛ́ tɛ iŋ‘e, mi nɛ GASA WAN Sɔ̧.

²⁵«Ɓɛɛ kɔ-mɛ, mɛ́ bíí, mi tɛ ba mɔɔ-hai-tɛ tɛ-wa yinɛ, mi tɛ ɗaŋ fara-tortɛ in fara nɛ wa duk nɛ tɛ-wa nɛ duk nɛ fara-de-ɓɔlɔ kɔ-wa'i yinɛ. Mi tɛ kum o bem kɔ-wa mɛ be-wiwii in be-okoo-a yinɛ mbɛt,

²⁶ɓɛɛ wese'i, ŋma bíí mgbara wa nɛ tɛ yu mɔ yak tɛ ba nyɛrɛ mɔ‘i tɛnɛ mɛ tɔ̧ ha̧ mɛ.

²⁷Ɓɛɛ kpɔk wese'i, ŋgimbi nɛ wi-yu-mɔ‘i be tɛ̀ɛ́ hɔ, nú-mɛ́ tɛ hú̧í̧ ha̧ mɛ mɛ tɔ̧ wen, mɛ́ beka duk nɛ́ mukɛ̧ ɓɔna; hegɔ mɛ tɛ duk nɛ mɔɔ-usi-mɔ ha̧ wa, ɓɛɛ wa tɛ iŋ‘e, mi nɛ GASA WAN.»