Read Northwest Gbaya EZEKIƐL 26 Bible Online

EZEKIƐL 26 - Northwest Gbaya bible

EZEKIƐL 26

¹Tɛ ɓu-zua-kpɔk pɛ nɛ yaka ɗoŋ kaia o bíí yaknɛ nɛ bara-biro, ɓɛɛ tɛ kuti fio-zɛ‘i, GASA WAN tɔ̧ɔ̧ wen ha̧‘m:

²«Mɛ́ bíí, mɛ zii. Tir zɛkɛɗa Jerusalɛm mam nɛ kɔ‘i tɔ̧ nɛnɛ‘e: ‹Oee, nu garo nɛ gbina ha̧ wa wa! Oee, ye kɔ-wa nɛ ɗaŋa ha̧ wa wa! Ɛ̧ɛ̧ nɛ́ mi'i tɛ kai mɔ kɔ-wa!›

³Wen hegɔ, wen nɛ GASA WAN tɔ̧ɔ̧ zu Tir nɛ mɔ'ɔ: Mi tɛ duk zu nɛ mɛ, Tir, mi tɛ zuɗi o gii tugun bíí a zu mɛ, hee mɔ'ɔ nɛ gba-tɔp pɛŋi nɛnɛ'ɛ ga.

⁴Wa tɛ ɗaŋ o garo Tir lɔkɔti lɔkɔti, gbin nɛ o ŋga fara-pɛm-mɔ kɔ-wa. Mi tɛ gbɛr fuunu yinɛ zu kam-ta, ɓɛɛ zu kam-ta'i tɛ duk zan gee.

⁵Ta'i tɛ duk nɛ fara-tati-yɔk ko o wi-ba-zoro see tɔp mɛ. Nɛ mi GASA WAN a̧ tɔ̧ hegɔ. O tugun bíí tɛ ɓar mɔ kɔ-wa,

⁶ɓɛɛ war ko o boko-bem mɛ nu kɔ-wa, wa tɛ kum wa a nu nɛ gba-paa, ɓɛɛ wa tɛ iŋ‘e, mi nɛ GASA WAN.»

⁷GASA WAN tɔ̧a̧: «Mi tɛ tom Nabukɔdɔnɔsɔr wannu Babilɔŋ, gasa wannu nɛ duk zu o ŋma wannu, nɛ ká̧-zan-mɛ́-ŋgɔn tɛnɛ, nɛ̀ o nyaŋa, o keekee in o wan-daŋ-nyaŋa in o gba gii wi-biro kɔ̧-a̧ nɛ‘i nyɛm mɛ tɔr na, ha̧ wa mɛ bi Tir.

⁸Wa tɛ kum o boko-bem nu kɔ-mɛ nɛ gba-paa, wa tɛ za̧ ŋgárá, ɓɛɛ wa tɛ mbo ŋga fara-pɛm-mɔ gɔn ɗoŋ mɛ, a nɛ ŋgee zik mɛ mbɛt.

⁹Wa tɛ gbin o garo kɔ-mɛ a nu nɛ o ndota boi-gbin-mɔ, wa tɛ za̧ o fara-pɛm-mɔ kɔ-mɛ nɛ dikas a nu lɛŋ.

¹⁰Kutumu̧i̧ naŋ gba gii nyaŋa kɔ-wa tɛ kpe zu mɛ. O giti naŋ nyaŋa, in o keekee-biro ká bá nɛ̀ o zɔm mɔɔ-biro kɔ-wa be tɛ̀ɛ́ mgbimgbi tɛnɛ, o garo kɔ-mɛ tɛ pi̧, ɓɛɛ wa tɛ ye si saaye, hee mɔ'ɔ nɛ‘i kpíɗí nɛ gbina ŋgeŋ, ye nɛ saaye nɛ biro baa’ɛ ga.

¹¹Nyaŋa kɔ-wa tɛ yar dam yuwar bee-gara saaye kɔ-mɛ lɛŋ; ŋgimbi'i, wa tɛ gbɛ o bíí nɛ gba-paa, gbin nɛ o ta-zu-nu kɔ-mɛ, nɛ mɛ e so nɛ tɛ-mɛ‘i a nu.

¹²Wa tɛ kai o mbɔi kɔ-mɛ yaknɛ, ɓɛɛ wa tɛ ɓar mbɔi nu k’ɛ́nɛ́; wa tɛ gbin o garo kɔ-mɛ, wa tɛ ɗaŋ o gba de tua kɔ-mɛ, ɓɛɛ wa kaia o ta, in o te gu nɛ fuunu ye kɔ-mɛ lɛŋ a ɗɔɔ tɔp.

¹³Mi tɛ de nɛ‘i beka zii ger gima kɔ-mɛ kà bó nɛ̀ zia ger koloŋ kɔ-mɛ ɓɔna mbɛt.

¹⁴Mi tɛ de ha̧ mɛ mɛ kifi kam-ta, mɛ́ tɛ́ duk nɛ fara-tati-yɔk ko o wi-ba-zoro. Wi beka ba ye kɔ-mɛ e ŋgɔn ɓɔna; nɛ mi GASA WAN Sɔ̧ a̧ tɔ̧ hegɔ.

¹⁵«Mɔ nɛ GASA WAN tɔ̧ɔ̧ zu Tir nɛ mɔ'ɔ: Ŋgimbi nɛ‘i be tɛ̀ɛ́ zii giti tika-a kɔ-mɛ, nɛ wa tɛ kum o bíí saaye kɔ-mɛ, nɛ‘i tɛ zii gɔfamɔ ko o wan-da̧i̧ mgbara'nɛ́, bó nɛ́ tɛ o bíí mɛ see-kisi tɛ nak na nde?

¹⁶O be-wan mɛ see-kisi tɛ zir zu o damti kɔ-wa, ɓɛɛ wa tɛ kpɔ̧i̧ o laa-wan tɛ-wa a nu gu nɛ o gba de dap laa; wa tɛ pi̧ o a̧ka̧ laa tɛ-wa, ɓɛɛ wa tɛ ya zu fuunu nɛ kíì nak nɛnɛ, de nɛ kɔsa nɛ tɛ-wa wen zu mɛ.

¹⁷Wa tɛ bìì gima-fio zu mɛ‘e: ‹Oee ye, yaa-hura nin’ɛ, nɛ̀ o bíí kɔ-mɛ tɛ̀ɛ́ nɛ zu o gba-tɔp, nɛ̀ kpaa so ŋgai in o bíí kɔ‘i zu o gba-tɔp yaknɛ; mɛ́ wan-pi̧-kíì tɛ o bíí nù lɛŋ'ɛ, oee ye nɛ ɗaŋa h’ɛ́nɛ́ wa!

¹⁸Tɛ o bíí mɛ see-kisi naka tɛ tika-a kɔ-mɛ, bele baa wa wen sɔŋkur mɔ kɔ-mɛ!›

¹⁹«Ɓɛɛ GASA WAN tɔ̧: Ŋgimbi n'am be tɛ̀ɛ́ de ha̧ ye kɔ-mɛ mɛ kifi nɛ́ bɛɛ-oi, nɛ bíí bo sɛnɛ na, ŋgimbi n'am be tɛ̀ɛ́ kpe zu mɛ nɛ o zɔm yi mɛ ɗuka fara,

²⁰mi tɛ tom mɛ si ye ko o fio nɛ fee ɓee; mɛ tɛ duk kɔ-mɛ ɗɔɔ nu in o bíí nɛ fee so nɛti ha̧ mɛ, tɛ ŋma fara nɛ hɔɔ ŋmaa in bɛɛ-oi nɛ duk kpoo nɛ kpoo. Mɛ beka daŋ nɛ hi̧i̧ ɓɔna, mɛ beka kpa fara mgbara o bíí mɛ zu nu ɓɔna.

²¹Mi tɛ de ha̧ mɛ mɛ duk nɛ mɔɔ-gɔn-ɗɛɗɛ nɛ‘i beka iŋ oi mɛ ɓɔna. Wi tɛ kii mɛ takaɗi, wi beka kpa mɛ na ndo ndo ndo. Nɛ GASA WAN Sɔ̧ a̧ tɔ̧ɔ̧ hegɔ.»