Read Northwest Gbaya EZEKIƐL 27 Bible Online

EZEKIƐL 27 - Northwest Gbaya bible

EZEKIƐL 27

¹Ɓɛɛ GASA WAN tɔ̧ ha̧‘m:

²«Ɓɛɛ mɛ́ bíí, mɛ̀ bíí gima-fio hí̧í̧ nɛ̀ Tir.

³Mɛ̀ tɔ̧́ ha̧ Tir ye nɛ duk see-kisi ká̧ gba-tɔp, nɛ ɗɔr mɔ in o dukbíí mɛ see-kisi’ɛ, mɔ nɛ GASA WAN tɔ̧ɔ̧ ha̧‘m mɛ tɔ̧ ha̧ mɛ nɛ mɔ'ɔ: ‹Tir, mɛ́ nɛ̀ duk tɛ-mɛ zu déè kɔ-mɛ'ɛ!›

⁴Fara-ɔ-wan kɔ-mɛ nɛ́ zu gba-tɔp, ɓɛɛ nɛ́ o wi-de-tua kɔ-mɛ a̧ dee mɛ nɛ̀ de-a hee gba de kombon ga.

⁵Wa gbaa zawaya nu Sɛmir gɔn nɛ o bɛr-kombon, wa gbaa gbatui[19] nu Libaŋ tɔn e ŋgɔn mɛ kun laa-ba-búk sɛnɛ.

⁶Wa gbaa gasa te[20] mɛ nu Basaŋ de nɛ o berewen, wa sɛka o gboŋgoe ha̧ mɛ nɛ zawaya see-kisi nu Kitin, ɓɛɛ wa lati nin-fɔrɔ ɗoŋ-aa.

⁷Wa ɗafa gba de zɔ̧-laa, pɛrti de toka laa mɛ nu Egiptɛ ba e ŋgɔn nɛ laa-ba-búk, ɓɛɛ mɔ‘i usi nɛ zu mɔɔ-wan kɔ-mɛ; ɓɛɛ wa de tua e zu mɛ nɛ gbɛ̧ dap laa-wan in tu̧-a̧ mbɛt nɛ tɛ nɛ tɛ ko o bíí mɛ see-kisi Chipre mɛ.

⁸O be Sidɔŋ in o be Arvad yaa so nɛ o wi-ba-kombon kɔ-mɛ, o wi-iŋ-mgbara-mɔ mɛ Tir yaa so nɛ o wi-de-tom kombon'i.

⁹O gasawi Gebal in o wi-iŋ-mgbara-mɔ mɛ saaye'i yaa so kɔ‘i nɛ o wi-lati-kombon kɔ-mɛ. O gɔni kombon in o wi-ba-a lɛŋ nɛ so mɛ hi̧fi mɔ nu horo kɔ-mɛ.

¹⁰O be Pɛrsɛ, Lud in Put yaa so zaŋ o wi-biro kɔ-mɛ, wa yaa so nɛ o wi-biro kɔ-mɛ. Wa kai so o ŋgee in o be kpáná-boi-gu-zu ga̧i̧ fara-a-wa katɛ mɛ. Nɛ́ wa a̧ baa ŋgai kɔ-mɛ e ŋgɔn.

¹¹«O bem ko Arvad in o wi-biro kɔ-mɛ ya so zu garo kɔ-mɛ, o be Gamad yaa so kɔ‘i zu kusa tua-pɛm-mɔ, ɓɛɛ wa nɛk o ŋgee zik garo kɔ-mɛ kpa nu ŋmaa; nɛ wa'i a̧ baa nin-mɛ e ŋgɔn.»

¹²«Tarsis duka so mɛ hi̧fi o mɔ nɛtɛ nɛtɛ nu kɔ-mɛ, kpa nɛ yi-mɔ nɛ dɔka-a. Wa gɔn so zu mbɔi nu kɔ-mɛ nɛ bu-mbɔi, nɛ o ŋga boi ká bá nɛ̀ tuŋgu.

¹³O bíí nu Jabaŋ, Tubal in Mɛsɛk duka so mɛ gɔn zu o mɔɔ-gɛnɛ nu kɔ-mɛ nɛ o bara in o tasi nɛ‘i dee nɛ ndɛrɛ.

¹⁴O wi Bɛt-Togarma duka so mɛ kai o nyaŋa-de-tom, o nyaŋa-biro ká bá nɛ̀ o sunda tɛnɛ ha̧ mɛ.

¹⁵O bem ko Dedaŋ duka so mɛ ɗɔr mɔ in mɛɛ, mbɔi kɔ-mɛ dama so o see-kisi lɛŋ. Wa duka so mɛ hoɓi o nin-fɔrɔ in o tu̧ te ha̧ mɛ.

¹⁶Edɔm duka so nɛ wan-hi̧fi o gba dɔka mɔ kɔ-mɛ. A̧ duka so ba nɛ o de ta, o gasa laa-wan, o de toka laa, ká bá nɛ̀ o yɛm-yɛm laa, de kísí in gba de gbɛ̧ ta tɛnɛ ha̧ mɛ.

¹⁷«Juda in Israɛl nɛ oi gun duka so ɗɔr o mɔɔ nu kɔ‘i ha̧ mɛ; wa duka so mɛ kai o gba̧a̧ alkamaari mɛ nu Minit, o gba̧a̧ fon, gɔrɔ, nɔ̧́ in gba de pɛr nyama tɛnɛ ha̧ mɛ.

¹⁸Damas duka so mɛ hi̧fi mɔ kɔ-mɛ wen zɔm dɔka mɔ kɔ-mɛ. A̧ duka so mɛ kai nɛ dɔ̧ɔ̧ Helbɔŋ in ulu nu Sahar tɛnɛ ha̧ mɛ.

¹⁹Daŋ in Yavaŋ duka so mɛ kai o zu boi nɛ Uzal mɛ tɛnɛ ha̧ mɛ, ká bá nɛ̀ o masoro in o wa̧a̧ nyama mɛ tɛ́ɛ̀ kpai nɛ mbɔi kɔ-mɛ.

²⁰Dedaŋ duka so mɛ ɗɔr o laa-nyaŋa ha̧ mɛ.

²¹Arabii in o be-wan Kedar duka so nɛ o wi-hi̧fi̧-mɔ kɔ-mɛ mbɛt. Wa duka so ha̧ nɛ o be-sami, o vala sami in o vala gbadua ha̧ mɛ kpai nɛ o mɔ kɔ-mɛ.

²²O wi-ɗɔr-mɔ Seba in Rama duka so ɗɔr mɔ ha̧ mɛ, wa duka so mɛ hi̧fi o masoro, ndoŋge in wa̧a̧ nyama, ká bá nɛ̀ o de ta in lɔr kpai nɛ mbɔi kɔ-mɛ mbɛt.

²³Haraŋ, Kan in Edɛn, o wi-ɗɔr-mɔ nu Seba, Asur in Kilmad duka so mɛ hi̧fi nɛ o mɔ kɔ-mɛ.

²⁴Wa duka so mɛ kai o gasa gbɛ̧ laa in o de toka laa, o dap zɔ̧-laa, in o gba̧a̧ pɛr nɛ́ɛ̀ nyɔŋ nɛ lumɔ sɛn tɛ mɛ.

²⁵«Nɛ́ o kombon mɛ Tarsis a̧ duka tui o mbɔi kɔ-mɛ yar nɛ zu yi nɛnɛ ɗɔr nɛ mɔ kɔ-mɛ yaknɛ. Mbɔi kɔ-mɛ dita hee kombon nɛ̀ dɔka tui a̧a̧ kɔ̧ a̧ zu gba-tɔp ga.

²⁶O wi-ba-kombon baa mɛ nɛ zu yi nɛ berewen hɔ see yi, ɓɛɛ nɛ mɔ'ɔ nɛ gba búk mɛ daŋa-wese mbaŋa kombon nɛ oi-mɛ ɓɔn see gba-tɔp mɛ.

²⁷O mbɔi kɔ-mɛ, o mɔɔ-gɛnɛ, o wi-de-tom kombon in o wi-ba-kombon, o wi-lati-kombon in o wi-zɔk-tui, gu nɛ o wi-biro kɔ-mɛ in o gba giiwi nɛ mɛ tui tɛ kum ɗɔɔ gba-tɔp ŋgimbi nɛ kombon be tɛɛ ye yi nɛ oi'nɛ́.

²⁸Ŋgimbi nɛ o wi mɛ nu-ŋgere be tɛ̀ɛ́ zii hiɗimɔ ko o wi-ba-kombon fara ye yi, ɓɛɛ tɛ-wa tɛ nak.

²⁹Ɓɛɛ o wan-gai-kombon, o wi-de-tom kɔ̧ kombon, ká bá nɛ̀ o wi-ba-kombon lɛŋ tɛ zir a mbɔɗɔnu.

³⁰Wa tɛ hi̧i̧ mɛ, wa tɛ hi̧i̧ kɔ̧a̧-fio mɛ, tik nɛnɛ nɛ ger-wa; wa tɛ a bùk zu-wa, kin nɛ tɛ-wa nɛ zu búk-paa nɛnɛ.

³¹Wa tɛ kpui zu wen zu mɛ, wa tɛ a o laa-bufu tɛ-wa. Wa tɛ hi̧i̧ mɛ nɛ gasa ɗaŋsee, de nɛ ko nɛ tɛ-wa.

³²Tɛ ɗaŋsee, wa tɛ bìì gima-fio hi̧i̧ nɛ mɛ, ɓɛɛ gba̧a̧ gima-fio nɛ wa tɛ bíí‘i nɛ mɔ'ɔ: ‹Tir so nɛ zɔm ye see gba-tɔp nɛ gana o ŋma ye lɛŋ.›

³³Ŋgimbi nɛ mɛ duka so kai nɛ o mɔɔ-gɛnɛ kɔ-mɛ ku nɛ gba-tɔp si kur mɛ‘i, mɛ dee ha̧ o bíí mɛ kpa mɔ, ɓɛɛ zaŋ dɔka mɔ in mbɔi kɔ-mɛ‘i, mɛ dee ha̧ o wannu zaŋnu mɛ kpa dɔka mɔ.

³⁴Mɛ zɔk, kinii yi mbaŋa kombon a nu see gba-tɔp mɛ nɛ oi tui kɔ-mɛ, ká bá nɛ̀ mɛ in o bíí kɔ-mɛ lɛŋ si ndaa yi mɛ.

³⁵Zu o bíí leŋ nɛ ɔ tɛ o see-kisi zika tɛ mɔ nɛ hɔɔ zu mɛ; gba bele baa o wannu kɔ-wa, ɓɛɛ sɔnti-wa kai yɔk ɗaŋ lɛŋ.

³⁶O wi-ɗɔr-mɔ mgbara o gɔni-duk zɔka mɔ nɛ hɔɔ zu mɛ, ɓɛɛ wa ya zɛkɛɗi nɛ mɛ mam nɛ kɔ-wa. Mɛ́ dúk nɛ mɔɔ-gɔn-ɗɛɗɛ-wi, nɛ‘i beka iŋ oi-mɛ ɓɔna kpoo nɛ kpoo.»