Read Northwest Gbaya EZEKIƐL 28 Bible Online

EZEKIƐL 28 - Northwest Gbaya bible

EZEKIƐL 28

¹Nɛ mɔ'ɔ nɛ GASA WAN tɔ̧ɔ̧ wen ha̧‘m hee mɔ'ɔ ga:

²«Mɛ́ bíí, mɛ̀ tɔ̧́ wen’ɛ ha̧ wannu Tir'e nde, tɛ gasa zu kɔ-mɛ mɛ tɔ̧a̧‘e, wi nɛ sɔ̧. Nɛ wi a̧ duk zu damti ko sɔ̧ see gba-tɔp’ɛ, ɓɛɛ mɛ́ bó nɛ́ sɔ̧ na; mɛ́ nɛ́ bíí, ɓɛɛ nɛ mɔ'ɔ nɛ mɛ baa zu mɛ we nɛ sɔ̧.

³Mɛ iŋa mgbara mɔ gan Daniɛl, ŋma mɔ nɛ gana mɛ bo na.

⁴Mɛ̀ nɛ́ tɛ iŋa-mgbara-mɔ in iŋamɔ a̧ mɛ kpaa nɛ zɔm mbɔi’ɛ, nɛ mɔ'ɔ nɛ mɛ mɔi̧a nɛ lɔr in bu-mbɔi a fara-a-mbɔi kɔ-mɛ.

⁵Ee-see-mɛ tɛ ɗɔra mbɔi nɛ ŋgaya-a dee ha̧ mɛ mɛ de mbɔi dun nu, ɓɛɛ nɛ́ mbɔi kɔ-mɛ‘i a̧ pi̧i̧ gasa-zu tɛ-mɛ.

⁶«Mɛ nɛ wen mɔ‘i a̧ GASA WAN tɔ̧ wen ha̧ mɛ‘e nde, hee mɔ'ɔ nɛ mɛ wee zu mɛ nɛ sɔ̧ ga,

⁷mi tɛ de ha̧ o gɔni-duk, o ŋgazu tugun bíí mɛ ba zu duk nɛ mɛ. Wa tɛ dak gba-paa kpe nɛ mɛ e nu nɛ oi iŋa-mgbara-mɔ kɔ-mɛ, ɓɛɛ wa tɛ ɗaŋ demɔ kɔ-mɛ.

⁸Wa tɛ ir mɛ pi̧ kɔ̧ fio, mɛ tɛ fe nɛ ŋga fio see gba-tɔp’ɛ.

⁹Mɛ tɛ tɔ̧‘e, wi nɛ sɔ̧, ti o wi-gbɛ-mɛ ɓɔ? Wen mɛ́ bó nɛ́ sɔ̧ na, mɛ́ nɛ́ bíí nɛ yee er wi-gbɛ-mɛ nɛ tɛ gbɛ mɛ yinɛ.

¹⁰Mɛ tɛ fe nɛ fio ko wi-mbii er o gɔni-duk. Wen nɛ́ mi GASA WAN Sɔ̧ a̧ tɔ̧ hegɔ.»

¹¹Ɓɛɛ nɛ mɔ'ɔ nɛ GASA WAN tɔ̧ɔ̧ ha̧‘m woyo:

¹²«Mɛ́ bíí, mɛ̀ bíí gima-fio hi̧i̧ nɛ wannu Tir; mɛ̀ tɔ̧́ ha̧ a̧‘e, mɔ nɛ GASA WAN Sɔ̧ tɔ̧ɔ̧ ha̧‘m mɛ tɔ̧ ha̧ mɛ nɛ mɔ'ɔ. Mɛ nyɛma so yi-mɔɔ-dee nɛ iŋa-mgbara-mɔ in gba de tɛ.

¹³Mɛ duka so Edɛn, kpɛɛfɔ ko Sɔ̧. O gba de toka ta nɛtɛ nɛtɛ a̧a̧ so tɛ laa kɔ-mɛ, gba de ta-kui nɛ‘i sa'e sardɔan, de ta nɛ dap-aa tɛ̀ɛ́ hɔ ŋmaa in raka nɛ‘i sa'e topaz, gba de toka ta nɛ‘i sa'e jaspɛ, mbui ta nɛ‘i sa'e krisolit, de toka kɛn-kɛn-ta nɛ‘i sa'e beril, tu̧ ta mít-mít nɛ‘i sa'e oniks, ɓataɓutu ta nɛ‘i sa'e lazulit, gbɛ̧ ta yúŋú-yúŋú nɛ‘i sa'e ɛskarbuklɛ in mbui ta harɗaŋ nɛ‘i sa'e emerod ká bá nɛ̀ lɔr nɛ wa baa de nɛ o bi̧ɔ̧ in o mɔɔ-dɔm ha̧ mɛ; wa dee o mɔɔ nɔ‘i ha̧ mɛ wese nɛ wa koo nɛ mɛ.

¹⁴Mi dee mɛ nɛ keribim-pɛm-mɔ e zu sa̧a̧ Kaya ko Sɔ̧ mɛ; mɛ duka so yar nɛ zu yoŋgoŋgo kɛ̧i̧-wee.

¹⁵Mɛ duka so zóóŋ tɛ deemɔ kɔ-mɛ, wese nɛ‘i koo nɛ mɛ hɔ wese nɛ ɗaŋmɔ hɔɔ nɛnɛ tɛ-mɛ.

¹⁶Tɛ kia mbɔi nɛ ŋgaya-a, mɛ dee ha̧ mbɔi kɔ-mɛ mɛ dun nu; mɔ‘i dee ha̧ mɛ mɛ de ŋgamɔ in ɗaŋmɔ yak zale. Nɛ́ mɔ‘i a̧ dee ha̧‘m mɛ fo mɛ yinɛ zu sa̧a̧ kaya kɔ‘m, ɓɛɛ keribim-pɛm-mɔ tɛ ndak mɛ yinɛ yi yoŋgoŋgo kɛ̧i̧-wee.

¹⁷Déè kɔ-mɛ pi̧i̧ gasa zu tɛ-mɛ, ɓɛɛ mɛ ɗaŋ zu mɛ. Nɛ mɔ'ɔ n'am pi̧i̧ mɛ nu ti o wannu ha̧ wa mɛ mam mɛ.

¹⁸Mɛ dee ɗaŋmɔ yak zale tɛ ɗaŋ yuwar kia mbɔi kɔ-mɛ nɛ dea ha̧ mɛ mɛ ɗaŋ sa̧a̧ fara kɔ‘m, ɓɛɛ nɛ mɔ'ɔ n'am dee ha̧ wee mɛ gbo mgbara'nɛ́ mɛ bìì mɛ yinɛ kór-kór. Mi dee ha̧ mɛ mɛ kifi gee buk mbulɛɛ ti o bíí nɛ ya zɔk nɛ mɛ.

¹⁹Zu o bíí lɛŋ nɛ iŋa mɛ mgbara o dukbíí zika tɛ tɛ mɔ nɛ hɔɔ zu mɛ. Mɛ kifa nɛ mɔɔ-gɔn ɗɛɗɛ-wi, wen ɓaa sɔŋkur mɔ kɔ-mɛ nɛ mɔ'ɔ nɛ kaɗa'i.»

²⁰Nɛ mɔ'ɔ nɛ GASA WAN tɔ̧ɔ̧ ha̧‘m:

²¹«Mɛ́ bíí, mɛ̀ zík tɛ-mɛ zɔk mɔ si Sidɔŋ, mɛ̀ tɔ̧́ wen a zu a̧.

²²Mɛ̀ tɔ̧́ ha̧ a̧‘e: Wen nɛ GASA WAN Sɔ̧ tɔ̧ nɛ mɔ'ɔ. Mi tɛ ba zu'm duk nɛ mɛ Sidɔŋ. Wese n'am be tɛ̀ɛ́ usi bɔnɛ ha̧ mɛ oi ɗaŋmɔ kɔ-mɛ, o bíí tɛ zɔk gasamɔ kɔ‘m, ɓɛɛ nɛ́ hi̧i̧ a̧ wa tɛ iŋ‘e mi nɛ GASA WAN, nɛ̀ war tɛ‘m ɔ sa̧a̧.

²³Mi tɛ pi̧ ŋga zɛɛ-geŋa zu mɛ, tɔk tɛ fok nɛ yuwar nɛnɛ dekpe-dekpe, o bíí tɛ a nu sɛn nú gba-paa nɛnɛ mbɔlɔlɔ dam fara lɛŋ, ɓɛɛ wi tɛ iŋ‘e, mi nɛ GASA WAN.»

²⁴«Kinii hegɔɔ yak nɛnɛ sɔ̧i̧i̧, ŋma mɔ beka fo o be Israɛl na, kóó so nɛ tɛn nɛ gak wi, kóó nɛ tok wi mbɛt beka bo ɓɔna; ŋma wi-fɛŋ-wa beka bo na, ɓɛɛ o bíí tɛ iŋ‘e, mi nɛ GASA WAN.»

²⁵Ɓɛɛ GASA WAN Sɔ̧ tɔ̧ woyo'e: «Ŋgimbi n'am be tɛ̀ɛ́ mɔi̧ o be Israɛl nɛ pɛsa sot sot dam mgbara o dukbíí nɛnɛ a tɛ kpɔk fara, wa tɛ de ye tɛ zika-nù n'am ha̧a̧ so ha̧ zɔmdáa kɔ-wa Jakob. Ɓɛɛ tɛ mɔ‘i, mi tɛ usi ha̧ o tugun bíí‘e war-tɛ‘m ɔ sa̧a̧.

²⁶Wa tɛ ya tɛ bɛla nɛ ŋma mɔɔ-fo-wa beka bo na; wa tɛ mbo o tua, gun nɛ o nyak-dɔ̧ɔ̧ kɔ-wa, ya nɛnɛ nɛ fee-see. Ŋgimbi n'am be tɛ̀ɛ́ usi bɔnɛ ha̧ o dukbíí nɛ ya katɛ wa zɛkɛɗi nɛ wa'i, o bíí tɛ iŋ‘e, mi nɛ GASA WAN Sɔ̧ kɔ-wa.»