Read Northwest Gbaya EZEKIƐL 3 Bible Online

EZEKIƐL 3 - Northwest Gbaya bible

EZEKIƐL 3

¹Wi-tɔ̧-wen ha̧'m'i tɔ̧a̧: «Mɛ́ bíí, mɛ̀ nyɔ́ŋ kara kalata nɛ‘i nyɛi̧a ha̧ mɛ‘i, ɓɛɛ mɛ̀ nɛ́ɛ̀ tɔ̧́ wen ha̧ o be Israɛl.»

²Mi hu̧i̧a̧ nú‘m, ɓɛɛ a̧ pi̧ kara kalata'i kɔ̧ nú‘m, ɓɛɛ mi nyɔŋ.

³A̧ tɔ̧ɔ̧ ha̧‘m woyo: «Mɛ́ bíí, mɛ̀ nyɔ́ŋ kara kalata n'am ha̧a̧ ha̧ mɛ'ɛ, zaŋ-mɛ a̧ sur!» Mi nyɔŋa mɔ‘i, ɓɛɛ ɔ nyɔ̧ɔ̧ kɔ̧ nú‘m hee gɔrɔ ga.

⁴Ɓɛɛ nɛ mɔ'ɔ n'aa tɔ̧ɔ̧ ha̧‘m woyo: «Mɛ́ bíí, mɛ̀ bá war mɛ̀ yák mɛ nɛ̀ɛ́ tɔ̧ wen kɔ‘m ha̧ o be Israɛl.

⁵Mi tom mɛ sitɛ ŋma gɔni-duk nɛ tɔ̧ ŋma ŋga gɔni nú na, ɓɛɛ mi tom mɛ sitɛ o be Israɛl.

⁶Mi tom mɛ sitɛ o gba dukbíí nɛ nú kɔ-wa ɔ ŋgaya na, nɛ nú kɔ-wa tɛ gan mɛ tɛ zia-a na; kóó kà‘m tom so mɛ sitɛ o pɛrti bíí nɔ‘i, wa tɛ̀ɛ́ nyeŋ zer tɛ wen kɔ-mɛ.

⁷Ɓɛɛ o be Israɛl beka kɔ̧ mɛ zii wen nú-mɛ́ na, wen wa kɔ̧ mɛ zii wen nú‘m na mbɛt. O be Israɛl lɛŋ nɛ́ o wi-ŋgazu in o wi-ŋga-see.

⁸Kinii, mi tɛ de ha̧ see-mɛ mɛ ŋgai in ha̧ zu-mɛ mɛ ŋgai hee kɔ-wa ga mbɛt.

⁹Mi tɛ de ha̧ zu-mɛ mɛ ŋgai hee diamaŋ ga, mɛ ŋgai gan ta; ká kíì-wa de mɛ na, ká mɛ yu mɔ ti o yaa-ŋga-zu nɔ‘i na.»

¹⁰A̧ tɔ̧ɔ̧ ha̧‘m siti woyo: «Mɛ́ bíí'ɛ, mɛ̀ hú̧í̧ see-mɛ in zer-mɛ tɛ wen kɔ‘m, mɛ̀ kásí wa nɛ de-a.

¹¹Mɛ̀ sí ɗoŋ sitɛ o bara-biro, o bezaŋ duk kɔ-mɛ nɛ ya gɔni nù mɛ, ɓɛɛ mɛ̀ tɔ̧́ ha̧ wa'e, mɔ nɛ GASA WAN Sɔ̧ tɔ̧ nɛ mɔ'ɔ. Kóó wa a̧ kpɛk, kóó wa a̧ bɛ̧, mɛ̀ tɔ̧́ kɔ-mɛ ha̧ wa.»

¹²Nɛ mɔ'ɔ nɛ ɔmi ko Sɔ̧ baa'm e ŋgɔn, ɓɛɛ mi zii ŋma zɔm giti mɔ nɛ war ɗoŋ-am nɛ tɔ̧‘e: «A̧‘i zɔn gasamɔ ko GASA WAN fara-duk kɔ̧-a̧ mɛ!»

¹³Ɓɛɛ mi zii giti ɓaa o saɗi nɛ gɔm ŋmaa in giti naŋ o keekee nɛ ya katɛ wa mbɛt. Mɔ‘i duka nɛ gasa giti mɔ nyɛmna.

¹⁴Nɛ mɔ'ɔ nɛ ɔmi nɛ baa so'm e ŋgɔn mgbɔɔ am yaknɛ. Mi yaka nɛ dita-see in kíì mbɛt, wen nɛ ŋgai ko GASA WAN dita zu'm ɗɔŋ-ɗɔŋ.

¹⁵Mi hɔɔ tɛ o bara-biro nɛ ya sɛn Tɛl-Aviv ká̧ zaŋ Kebar, ɓɛɛ mi duk hi̧i̧ in wa zɛ mɔɔrɔ-ɗoŋ-yiitoo nɛ gɔna-ɗɛɗɛ.

¹⁶Ɗoŋ zɛ mɔɔrɔ-ɗoŋ-yiitoo, GASA WAN tɔ̧ɔ̧ wen ha̧‘m:

¹⁷«Mɛ nɛ gee bíí, ɓɛɛ mi ee mɛ nɛ wi-pɛm-mɔ zu o be Israɛl. Mɛ tɛ zii wen mɛ kɔ̧ nú‘m, ɓɛɛ mɛ dala ha̧ wa.

¹⁸Kà‘m tɔ̧ ha̧ wi-ɗaŋ‘e, ‹Mɛ tɛ fe,› ɓɛɛ kà mɛ̀ mbaŋ tɛ-a na, kà mɛ̀ gai a̧ mɛ e yuwar ɗaŋ deemɔ duk na, kà wi’ɛi duk tɛ kale ɗaŋ yuwar kɔ̧-a̧‘i siti, wi’ɛi tɛ fe zaŋ ɗaŋmɔ kɔ‘i; ɓɛɛ wen-fio ko wi’ɛi tɛ duk zu mɛ.

¹⁹Kà mɛ a̧ nɛ̀ɛ́ tɔ̧ mbɔrɔ ha̧ wi-ɗaŋ‘i, ɓɛɛ nɛ mɔ'ɔ n'aa e ɗaŋ‘i duk na, a̧ tɛ fe zaŋ ɗaŋmɔ kɔ̧-a̧, ɓɛɛ kɔ-mɛ, mɛ tɛ kpasi.

²⁰Ɓɛɛ kà a̧ boo nɛ wi-de-mɔ nɛ yuwar-a, nɛ mɔ'ɔ n'aa ee deemɔ nɛ yuwar-a duk mɛ de nɛ ɗaŋmɔ, mi tɛ tui pɛr ha̧ a̧, ɓɛɛ mɛ nɛ a̧ a̧ tɛ fe; wen nɛ̀ mɛ tɔ̧ mbɔrɔ ha̧ a̧ na'i, a̧ tɛ fe zaŋ ɗaŋmɔ kɔ̧-a̧, nɛ‘i beka ta mɔ wen deemɔ nɛ yuwar-a n'aa duka so de nɛti'i ɓɔna; ɓɛɛ mɛ̀ íŋ kana'e, mi tɛ ak tɔk tɛ wi’ɛi er mɛ.

²¹Ɓɛɛ ka mɛ mbaŋ tɛ wi-de-mɔ nɛ yuwar-a'i'e, ká a̧ de ɗaŋmɔ na, ɓɛɛ kà a̧ bɛ̧ dea-a, a̧ tɛ kpasi, wen zu mbɔrɔ kɔ-mɛ, ɓɛɛ mɛ nɛ tɛ-mɛ kpasa mbɛt.»

²²Ɓɛɛ nɛ mɔ'ɔ nɛ ŋgai ko GASA WAN baa'm woyo, ɓɛɛ a̧ tɔ̧ ha̧‘m: «Mɛ̀ kúr mɛ̀ zír si kɔ̧ ɗɔŋgɔ mɛ, mi kɔ̧ɔ̧ mɛ tɔ̧ wen ha̧ mɛ hi̧i̧.»

²³Mi baa yuwar yak zir si kɔ̧ ɗɔŋgɔ mɛ, ɓɛɛ gasamɔ ko GASA WAN hee wan n'am zɔka so ká̧ Kebar mɛ‘i nɛti ga'i hɔ woyo; ɓɛɛ mi hɔ̧fi̧ ba sɔnti'm gu nu.

²⁴Ɔmi ko Sɔ̧ yee tɛ‘m ba'm e ŋgɔn woyo, ɓɛɛ GASA WAN tɔ̧ ha̧‘m: «Mɛ̀ nɛ́ɛ̀ yé kɔ̧ tua kɔ-mɛ, mɛ̀ kpé nu tua e zu mɛ.

²⁵Mɛ́ bíí, mɛ̀ zìì, wa tɛ hɛr mɛ nɛ nyak nɛ mɛ beka gbo si mgbara bíí ɓɔna.

²⁶Mi tɛ fo leɓe-mɛ lati war ger-mɛ; nú-mɛ́ tɛ kpe, nɛ mɛ beka gai o wi-ŋgazu nɔ‘i ɓɔna.

²⁷Ɓɛɛ ŋgimbi n'am be tɛɛ tɔ̧ ŋma mbe wen ha̧ mɛ woyo, mi tɛ ha̧ ŋgai tɔ̧ɔ̧-wen ha̧ mɛ, ɓɛɛ mɛ tɛ tɔ̧ ha̧ wa hee mɔ'ɔ ga: ‹Mɔ nɛ GASA WAN Sɔ̧ tɔ̧ nɛ mɔ'ɔ!› O wi nɛ tɛ kɔ̧ mɛ zii, wa a̧ zii, ɓɛɛ o wan nɛ tɛ kɔ̧ mɛ bɛ̧ zia-a, wa a̧ bɛ̧, wen wa nɛ o yaa-ŋgazu!»